3 Sema iren naiyansalodsod maypangkep na naimag ko, sejay i songbat kod si-kara. 4 Podnon apostolisak, isonga gwariy karebengan kon mengan tan man-inom na nain-i-kan na natiyoroan ko. 5 No gwara komiy imbaliy kon naemati, gwara ngoy karebengan kon mengitahi-tahin cha kona-konan kon inges tos Peter tan sema iren echom a apostolis tan sema aahin Jesus a Afo thayo. 6 Isonga, niyana nainpilit jon man-obda kawin Barnabas na panbiyagan mi iy nain-i-kanan jo ira ma echom a apostolis na kasepolan cha? 7 Gwara ayay solcharon nat naesowilchoan? Gwara ayay gardeniron nat nanimathan toy intanem to? Tan gwara ayay naiyanbantay na kalniron nat nanimathan toy kathas to?

8 Sema karebengan kon mengegwat na tolong jo, nat naedafo bengat ired ma aramid na too. Angken sema dinteg Moses, man-inges i kigwan to maypangkep iren jay. 9 Tep iyaysolat chiwan a dinteg i “No ipakathin moy bahed irik say ma-kal i ohis to, enog i biyedberan i ngoseb to say mahapangan na irik.” ^a Baha aya bengat i intebal Afo Chiyos nonta kigwan to man? 10 Sigoradon kigwan to ngo man para cha si-kawi. Ahow gayam, iyaysolat ngo para cha si-kawi. Tep sema naiyan-aracho tan sema naiyan-ani, iyaybagay a namnamaen cha i gwariy bingayen chen para bediy cha. 11 Nonta intoro wiy esel Afo Chiyos cha si-kayo, singen iyantanem kawi na bothil a aispiritoan cha nemnem jo. Isonga, ngaaw aya no egwathen mid si-kayoy kasepolan mi? 12 Sema iren echom a naiyantorod si-kayo, no gwariy karebengan chen manbaged si-kayo na kasepolan cha, mas ba-ba-nayan pay i karebengan mi.

Nem angken bilang i setan i karebengan mi, nagwariy inbaga wid si-kayo, no diket iyanosan min emiin i digat mi say nat setan i kagol a nat pematian jo na mapteng a chamag maypangkep Cristo. 13 Sigoradon amta yo i sema iren naiyansilbid ma timplo, naigwat chiy kakanen ched ma timplo. Tan sema iren naengitangdal na animal cha tangdalan chiwa timplo, naengala ira na bingay chiwa iyaytangdal. 14 Inges to ngo ired ma naiyankasaba na mapteng a chamag. Inbilin Jesus a Afo thayo i egwathen cha komay kasepolan cha ired ma nakiyasaba ra.

15 Nem si-kak, angken gwariy karebengan kon mengegwat na tolong ired ma nakiyasabak, ekak inbaga. Tan nat kowan isolat ngo ira jay say mengi-kan kayod si-kak. Tep mas mapmapteng pay i metiyak koma iy say pengemag kon man. Tep no gwariy igwat ko ired ma nakiyasabak, nagwara koma wiy karebengan kon mengiki-tek i dibchiy pankasabak. 16 Tep setan bengat i mebedin a iki-tek ko. Nat mebedin a iki-tek koy pankasabak na mapteng a chamag. Tep inbilin Afo Chiyos i a-magen ko man, et ngaaw i mepesamak cha si-kak no ekak ikasaba. 17 No si-kak komiy emispis niyay a obda, mebedin a edagboanak. Nem ekak pinispis, no diket inpiyal Afo Chiyos cha si-kak, et mesepol a tongpalen ko. 18 Nengo wiy kongkonak? Nagwara malaksid sema chadsak kon pankasaba na mapteng a chamag tan ekak naedagboan angken gwariy karebengan kon manbaga na tolong ired ma nakiyasabak.

19 Isonga, angken dibchiak tan nagwariy afok, inpanbalin koy angel kon bagaen na emiin a too say egwisen ko emoy chakel pay a toon mematid Cristo. 20 No mekikadgwaak ired ma Hodjos tan sema iren echom a naengonod na dinteg Moses, onoran ko ngoy aramid cha tan sema dinteg say egwisen ko iren mematid Cristo. Angken nat mesepol a onoran kon mismo ma dinteg, onoran ko ngorechan say nat metiped ira ma tood pemati red Cristo. 21 No mekikadgwaak ired ma Gentile a nat naengonod na dinteg Moses, nat onoran ko ngo ma dinteg say egwisen ko iren mematid Cristo. Nat kowan kona i nat naiyonoran koy dinteg Afo Chiyos tep say podno, naiyonoran koy dinteg Cristo. 22 Tan no mekikadgwaak ired ma ekapsot i pamati ra, ibagay koy naimag kod si-kara say egwisen ko iren mengikedsang na pamati ra. Isonga, emiin a ekila-kilasin too, ibagay koy angel kod si-kara say egwisen koy echom a memati et say maysalakan ngo ira. 23 Naimag kon emiin ira jay say sema iren naemati na mapteng a chamag, ma-ma-choman ira, et say mekibingayak na bindisjon a naedafod mapteng a chamag.

24 Amta yo i no gwariy dongba, emiin a mekidongba, ipahat chen manbebtik na mapkes, nem sa-ki bengat i mengegwak a may-i-kanan na kongkona. Isonga, ipahat jo ngon onoran si Afo Chiyos say i-kanan to kayo ngo na kongkona. 25 Sema iren mekidongba, toroan chiy angel cha say koston metorayan i angel cha. Naimag cha man say may-i-kanan ira na kongkonen nat onbayag. Nem natiyorayan tayoy angel tayo say may-i-kanan kiya na kongkonen nagwariy pengingkaan to. 26 Isonga, no si-kak ngo, iyay-arigak cha mekidongben naiyandiritso led ma pengingkaan na dongbaan. Iyay-arigak pay cha marengpel a napimonta na olay i chengpel to. 27 Isonga, natiyorayan koy angel ko say nat panbesol toak na angel ko; nahol ni si-kak a naiyankasaba ired ma echom, si-kak emon mismoy nat apolbaran Afo Chiyos.