Sema Maypangkep Na Mekan A Iyaytangdal Ired Ma Sinan Chiyos
8
Niman ma, seta salodsod jo maypangkep na mekan a iyaytangdal ired ma sinan chiyos, sejay i songbat ko. Podnoy kigwan jon gwariy pengamta thayon emiin. Nem sema pengamta, nainpahi-tek toy too. Nem no gwariy semek tayo, a-magen tayoy panmaptengan na echom. 2 Sema toon nakigwan to i chakel i amta tho, nat amta tho nin i piyan Afo Chiyos a egwathan to. 3 Nem sema toon mahasmek Afo Chiyos, ibilang Afo Chiyos a too tho.4 Isonga, maypangkep na pengan na iyaytangdal ired ma sinan chiyos, sejay i konen ko. Amta thayo i nat podnon chiyos ira ma sinan chiyos. Amta thayo ngo i sa-sa-ki bengat i podnon Afo Chiyos. 5 Tep angken nakigwan na too i gwara ira ma chiyos cha dangit tan chiya dobong, tan angken chakel ira ma nakigwan cha i chiyos tan afo, 6 cha si-kathayo, sa-sa-ki bengat i Afo Chiyos a Awa thayo. Si-kathoy emarsowa na emiin, et manbiyag kiyen manchejaw cha si-katho bengat. Sa-sa-ki ngo bengat i Afon si Jesu Cristo. Si-kathoy engipaparsowaan Afo Chiyos na emiin, tan babaen cha si-katho, iyay-i-kanan kiya na biyag.
7 Nem sema iren mahaamta niya podno, nat emiin a naemati. Tep igwan iriy echom a aingsen naiyanchayaw ired ma sinan chiyos. Isonga, no mengan ira na iyaytangdal cha sinan chiyos, sema gwared nemnem cha, nachijaw cha pay ira ma sinan chiyos. Angken nat basol i imag cha, ekonsinsiya ira ngorechan. 8 Nem sema nakiyakan tayo tan nat nakiyakan tayo, nat si-kathoy pan-imdengan Afo Chiyos maypangkep cha si-kathayo. Tep nat on-otik i kinamapteng tayod nemnem Afo Chiyos no eg kiya mengan na iyaytangdal ired ma sinan chiyos, tan nat onbanay ngoy kinamapteng tayod nemnem to no mengan kiya niwan.
9 Nem tanchaani yo i seta gwaya yo, nat si-kathoy panbasolan na echom jon ekapsot i pamati tho. 10 Tep nem bilang i gwariy echom jon kolang i amta tho maypangkep iren man. Si-kayon chakel i amta tho maypangkep iren man, apay no si-nengen to kayon mankakakan chiwan a timplon naiyanchayawan cha iren ma sinan chiyos? Aawis emoy echom jon mekipangan na iyaytangdal ired ma sinan chiyos angken naemati i basol iwan. 11 Isonga, kagol na chakel i amta yo, sema echom jon ekapsot i pamati tho, echaral i pamati tho. Nem etiy ngos Cristo para cha si-katho. 12 Isonga, no mekonsinsiyay echom tayon ekapsot i pamati tho kagol na naimag tayo, nat si-katho bengat i iyanbasolan tayo, nem si Cristo ngon mismo. 13 Isonga, sema nakiyakan ko, no si-kathoy panbasolan na ahik cha pamati, ekak ma menga-mengan na bohin iyaytangdal ired ma sinan chiyos say eg manbesol iwan a too kagol cha si-kak.