Sema Maypangkep Na Pengimbaliy Tan Nat Pengimbaliy
7
Niman ma, maypangkep na inbaga yod solat jo, sejay i songbat ko. Mapteng no nat mengimbaliy iriy tothoo. 2 Nem kagol a chakel i naenarog ira na nat imbaliy cha, mapmapteng pay i mengimbaliy kayo say gwariy imbaliy na sa-ki tan sa-ki. 3 Sema dahin engimbaliy, mesepol a chechogen toy imbaliy to. Inges tod biin engimbaliy. Mesepol a chechogen to ngoy imbaliy to. 4 Tep sema bii, nat kegwen toy angel to, no diket kegwen na imbaliy to. Inges to ngod dahi. Nat kegwen toy angel to, no diket kegwen na imbaliy to. 5 Isonga, enog i bidaw a chechogen joy imbaliy jo. Nem kosto no gwariy tolagan jo i nat mancharog kayo nin na piyen akow say ipo-tok jon mankararag. Nem no mepalabas maliy akow, pancharog kayo mowan, nahol ni solisogen to kayon Satanas et manbesol kayo emo tep nat mahatifel joy dekna yo. 6 Kigwan ko jay say amtaen jo i naintolok kon mengimbaliy kayo, nem ekak ipilit. 7 Piyan ko komen emiin a too, ingesen chaak a balesang. Nem amtak i nat man-inges i kabaalan a in-i-kan Afo Chiyos cha sa-ki tan sa-kid si-kathayo.8 Si-kayon balesang tan si-kayon ebalo, kigwan ko i mapteng i onbale-balesang kayon inges toak. 9 Nem no nat mahatifel joy dekna yo, pengimbaliy kayo koma. Tep mapmapteng i mengimbaliy kayo iy mandigat kayo na dekna yo.
10 Si-kayon engimbaliy, gwariy piyan kon konen cha si-kayo. Nat bilin ko bengat, nem bilin ngon Jesus a Afo thayo. Say bii, nat isi-jan to komay imbaliy to. 11 Nem no isi-jan to, ampet a onbale-balesang ono mekisingpet cha imbaliy to. Sema dahi ngo, nat isi-jan to ngo komay imbaliy to.
12 Et si-kayon echom, gwara ngoy piyan kon konen cha si-kayo. Nem seja bilin, nat edafod Jesus a Afo thayo, no diket edafod si-kak a mismo. No gwariy dahin naemati et gwariy imbaliy ton nat naemati, nat isi-jan koma na dahi no piyan na imbaliy ton mekiiyan. 13 Inges to ngoy biin naemati. No nat naematiy imbaliy to, nat isi-jan koma na bii no piyan na imbaliy ton mekiiyan. 14 Tep say dahin nat naemati, iyay-awat ded Afo Chiyos kagol na inpakisa-ki thod imbaliy ton naemati. Et sema ngon biin nat naemati, iyay-awat ngod Afo Chiyos kagol na inpakisa-ki thod imbaliy ton naemati. Isonga, nainbilang Afo Chiyos a esantoan i inpangimbaliy cha. No nat podno man, say aanak jo, inges toy anak iren ma nat naemati. Nem iyay-awat met laeng ira ma anak jod Afo Chiyos. 15 Nem sema nat naemati, no piyan ton isi-jan i imbaliy to, angken itolok jo. No mepesamak iwan, iyaydibchi ma naemati, angken bii ono dahi. Tep piyan Afo Chiyos i etalnay biyag tayo. 16 Si-kam a bii, nat amtam no mebedin a egwisen moy imbaliy mon memati say maysalakan. Et si-kam ngon dahi, nat amtam ngo no mebedin a egwisen moy imbaliy mon memati say maysalakan.
17 Say konen kod si-kayo, angken nengoy kasasaad jon in-i-kan Afo Chiyos, angken nengoy kasasaad jo nonta tiya-gway to kayon Afo Chiyos a memati, itoloy jo ma kasasaad jo. Sejay i nainbilin kod emiin a naematid emiin a dogad. 18 Kaspangarigan, no ekogit i dahi nonta inpamati tho, nat a-kalen to komay malka na kogit to. Et no nat ekogit i dahi nonta inpamati tho, nat mankogit koma. 19 Tep nat ainportanti no ekogit i dahi ono enchi. Sema ainportanti kitdi, sema pemati thayo na bili-bilin Afo Chiyos. 20 Angken nengoy kasasaad jo nonta tiya-gway to kayon Afo Chiyos a memati, itoloy jo ma kasasaad jo. 21 No bagaen kayo nonta inpamati yo, angkena. Nem no gwara et i gwaya jon maydibchi, angken maydibchi kayo et ma. 22 Tep sema toon bagaen nonta inpamati thod Jesus a Afo thayo, angken bagaen pay, indibchin Jesus a Afo thayo man et kegwen to wa. Inges to ngod toon nat bagaen nonta inpamati tho. Bagaen men Cristo. 23 Tep tiyongkal to kayon Afo Chiyos, et banay i inbayad to. Isonga, enog i inpanbalin i angel jon bagaen na tothoo tan sema iren nemnem chen naedafod ja dobong. 24 Isonga, aahi, angken nengoy kasasaad jo nonta tiya-gway to kayon Afo Chiyos a memati, itoloy jo ma kasasaad jo et ono-onori yos Afo Chiyos.
25 Niman ma, maypangkep iren ma aneng mengimbaliy, nagwariy bilin kon edafod Jesus a Afo thayo, nem konen kod si-kayo i gwared nemnem ko. Tan kagol a kiyaasian toak Jesus a Afo thayo, naepiyalak a bagaen to. 26 Isonga, konen ko i kagol na diga-digat a emangkeda-kami niman, mapteng no eg jo sa-dathan iwa kasasaad jo. 27 Si-kam a dahi, no gwariy imbaliy mo, enog i insi-jan. Nem no nagwara, enog i anap na imbaliy mo. 28 Nem no mengimbaliy ka, nat iyanbasol ka. Et sema biin nat engimbaliy nin, no mengimbaliy, nat iyanbasol ngo. Nem konen ko i mapmapteng pay i nat mengimbaliy kayo tep piyan kon nat da-kaman joy digat a nadiya-kaman na sambaliy chiya biyag.
29 Aahi, say piyan kon a-seden, sejay. Kedpeng bengat i timpo thayo. Manipod niman, sema gwariy imbaliy to, a-magen to komay piyan Criston singen nagwariy imbaliy to. 30 Sema naiyanmengo, nat nemnemnemen to komay panmengo tho. Sema ngon maradsak, nat nemnemnemen to ngo komay chadsak to. Sema naenongkal, nat ibilang to komay tiyongkal ton kegwen to. 31 Et emiin a naiyosal tayod ja dobong, nat sema ipo-tok tayo koma. Tep igwan aliy timpon mepokaw iya dobong tan sema panbiyag chiyay.
32 Piyan kon nagwariy panchanagan jo. Sema dahin nagwariy imbaliy to, mebedin a ipo-tok ton mansilbid Jesus a Afo thayo tan sema pan-imdengan Afo. 33 Nem say dahin gwariy imbaliy to, nainpo-tok toy biyag chiya dobong tan sema pan-imdengan na imbaliy to. 34 Isonga, singen ebinga-bingay i nemnem to. Inges to ngod biin nagwara waliy imbaliy to tan marikit a nat engimbaliy nin. Mebedin a ipo-tok ton mansilbid Jesus a Afo thayo tep pangkep to bengat i pengiawat na angel to tan nemnem tod Afo. Nem say biin engimbaliy, nainpo-tok toy biyag chiya dobong tan sema pan-imdengan na imbaliy to. 35 Kigwan ko ira jay para cha panmaptengan jo. Nat kowan iparit i mengimbaliy kayo. Piyan ko bengat i mapteng tan aolnos i panbiyag jo tan nat metiped koma i pansilbi yod Jesus a Afo thayo.
36 Nem no bilang i gwariy dahin iyaykarin mekiimbaliy. No mahedsang i dekna tho tan towan nemnema i imbaliyen to komay bii tep ngaaw no nat tongpalen to, itolok jon man-imbaliy ira. Nat iyanbasol ira no man-imbaliy ira. 37 Nem no bilang i sinigorado niwa dahi i nat imbaliyen to ma bii tep mapmapteng pay i onbale-balesang. Mapteng iwan basta sinigorado thon pasiya i onbale-balesang tan itife-tifel toy dekna tho tan nagwariy memidit cha si-kathon menechal na kari thon mekiimbaliy. No seman, mapteng no nat mengimbaliy. 38 Isonga, mapteng no mengimbaliy i dahi, nem mapmapteng pay i onbale-balesang.
39 Say biin engimbaliy, mesepol a mekikadgwed imbaliy to basta sibibiyag. Nem no metiy i imbaliy to, angken mengimbaliy mowan na kompormin dahin piyan to, nem setan a dahi, mesepol a naematid Jesus a Afo thayon inges niwa bii. 40 Nem cha nemnem ko, mas mapmapteng no onbale-balesang iwan, tan naematiak i naintorong ngo na Ispirito Santoy nemnem ko.