Sema Panchinarom Ira Na Naemati
6
No gwariy naiyansosongbathan jo, apay nga naincharom joy echom jon naematid sangoanan na kowis a nat naemati? Tothoon Afo Chiyos koma ira ma mengaso. 2 Nat amta yo aya i tothoon Afo Chiyos ira ma mengowis na emiin a tothood ja dobong no sa-ki din akow? No kaya jon a-magen iwan, sigoradon kaya jon kasoen i oti-otik a naiyansosongbathan jo. 3 Nat amta yo aya i si-kathayo ngoy mengowis na anghilis? No kaya tayon a-magen iwan, sinto pay i kaya thayo komen mengowis na problimed ja biyag. 4 Isonga, no gwariy kaso jon inges niwan, apay nga nainpakowis jod toon eg jo narinispiktar tep eg ira naemati? 5 Kowan kona jay tep kababaing iyay cha si-kayo. Sigoradon gwared si-kayoy edaing a mengowis na kaso jon naemati. 6 Nem naincharom jo kitdiy echom jon naemati. Et naimag jo man cha sangoanan iren ma nat naemati!7 Sema panchinaroman jo, nainbiybiy to i aagwak kayo wala tep nat jowan onoriy toro-toron Cristo. Magangkana no itolok jon a-magen chiy ngaaw cha si-kayo. Magangkana no itolok jon dokoen cha kayo. 8 Nem si-kayon mismoy naengamag na ngaaw tan naiyandoho. Et naimag jo pay iwan angken chiwa aahi yo ngod pamati. 9 Nat amta yo aya i sema iren naengamag na ngaaw, eg ira mayka-chom cha pantorayan Afo Chiyos? Enog i siyaol i angel jo. Sema iren naekibii-bii tan naekidahi-dahi, sema iren naiyanchayaw na sinan chiyos, sema iren naenarog na nat imbaliy cha, tan sema iren daleki tan bibiin naenarog na echom cha, nat mayka-chom ired pantorayan Afo Chiyos. 10 Sema iren naengibot, sema iren naengamkam na nat kegwen cha, sema iren naiyanbothe-botheng, sema iren naengowan na ngaaw maypangkep na echom, tan sema iren tolisan, nat mayka-chom ngo ired pantorayan Afo Chiyos. 11 Et seta echom cha si-kayo, inges niwan kayo nontan. Nem niman, edinisan kayo, iyanbalin kayo na esantoan a toon Afo Chiyos, tan naiyaybilang kayo a maronong. Epasamak ira man a emiin kagol na imag Jesu Criston Afo thayo tan sema panakabalin na Ispiriton Afo Chiyos.
Osal Joy Angel Jon Manchejaw Cha Afo Chiyos
12 Gwariy echom cha si-kayon naengowan i “Angken a-magen kon emiin i piyan ko.” Podno tan, nem sema para cha panmaptengan tayo, nat emiin a ma-mag. No konen ko i “Angken a-magen kon emiin i piyan ko,” podno tan, nem nat a-magen ko pay iwan no amtaan ko i maingsaak et ekak mahasalcheng. 13 Gwara pay i echom a naengowan i “Say mekan, aamag a may-i-jan cha ekes, tan sema ekes, aamag a ejanan na mekan.” Podno ngo tan, nem igwan aliy akow a omasen Afo Chiyos ira man a chegwa tep nagwara wiy osal cha. Nem nat podno i aamag i angel tayon menarog na nat imbaliy tayo. Tep aamag i angel tayon mansilbid Jesus a Afo thayo, et si Jesus a Afo thayoy mahakegwen na angel tayo. 14 Et sema angel tayo, panpawil Afo Chiyos babaen na panakabalin ton inges toy inpasing ton engipawil Jesus a Afo thayo.
15 Nat amta yo aya i sema angel tayon naemati, parti na angel Cristo? Isonga, sema angel kon parti na angel Cristo, kosto aya no ika-chom kod angel na biin naekidahi-dahi? Enchi ngarod! 16 Nat amta yo aya i no menarog i dahi na biin naekidahi-dahi, manbalin ira na sa-kin angel? Tep iyaysolat cha esel Afo Chiyos i “Manbalin iwa chegwa na sa-ki.” a 17 Nem no mekisa-kiy tood Jesus a Afo thayo, manbalin i nemnem cha na sa-ki.
18 Isonga, aragwii yoy penarog na nat imbaliy jo. Tep sema pesing na basol a mengomas na angel, afil cha emiin a echom a basol tep no menarog kayo na nat imbaliy jo, sema angel jon mismoy panbasolan jo. 19 Sigoradon amta yo i sema angel joy timplon naiyan-iyanan na Ispirito Santon in-i-kan Afo Chiyos cha si-kayo. Nat si-kayoy mahakegwen na angel jo, no diket si Afo Chiyos. 20 Tep tiyongkal to kiyen Afo Chiyos, et banay i inbayad to say kegwen to kiya. Isonga, osal joy angel jon manchejaw cha Afo Chiyos.