Sema Risponsibilidad A Pangkal Na Naematin Iyanbasol
5
Gwariy iyaygwanggwang cha si-kak maypangkep na naekibii-biid si-kayo. Gwara konoy dahin naenarog na inpan-ina tho. Angken sema iren eg naematid Afo Chiyos, nat naimag cha man. 2 Nem pahi-tek kayo pay angken inges to man. Ensahit komay nemnem jo kagol na imag na echom jo, et a-kalen jo koma man a dahi. 3 Tep angken nagwaraak chithan, naniyemnemnem tahejo. Kagol na karebengan a in-i-kan Jesus a Afo thayod si-kak, kiyowis ko wala man a dahin iyanbasol a singen gwaraak chitha kad-an jo. 4 Sejay miy pesing jo koma. Kasa-nop kayon singen gwaraak chithan, et babaen na panakabalin Jesus a Afo thayo, 5 iawat jo man a dahid Satanas say maomas i angel to, et maysalakan i ispirito tho no akow na pengowis alin Jesus a Afo thayo.6 Ngaaw i pahi-tek jo. Sigoradon amta yo i sema otik a para debag na tinapay, mebedin a idebag toy ekasahiy a tinapay. Inges tod basol. Angken otik bengat, alinan toy emiin. a 7 Isonga, mesepol a a-kalen joy chaan a para debag say nagwaren polos i ngaaw cha si-kayo. No a-magen jo man, singen bado kayon tinapay a nagwariy para debag to. Et amtak i inges niwan kayo wala tep naemati kayod Jesu Cristo. Tep si Cristoy kalniron iyaytangdal na timpo na Piyasta na Inda-bas na Anghil cha Hodjos say maydibchi kiyed basol tayo. b 8 Isonga, mesili-silibrar komay imag Cristo para cha si-kathayo. Nem nat mengan kiya koma na tinapay a gwariy para debag to, no diket sema tinapay a nagwariy para debag to. Sema piyan kon a-seden, nat onoran tayo komay basol tan ngaaw, no diket sema mapteng tan podnon nagwariy ngaaw a iyaydao-daok.
9 Cha sigod a solat kod si-kayo, kigwan ko i nat mekikadgwa kayo komed toon naekibii-bii tan naekidahi-dahi. 10 Nem nat piyan kon a-seden ira ma eg naematin naenarog na nat imbaliy cha tan sema iren naengamkam na nat kegwen cha tan sema iren naengibot tan sema iren naiyanchayaw na sinan chiyos. Tep no seman ma, mesepol jon bebtihan iyay a dobong. 11 Say piyan kon a-seden ket, enog i kadkadgwa ired ma naengowan i aahi yo ired pamati no naenarog ira na nat imbaliy cha tan naengamkam ira na nat kegwen cha tan naiyanchayaw ira na sinan chiyos tan naengowan ira na ngaaw cha echom tan naiyanbotheng ira tan naengibot ira. Sema iren toon inges to man, angken pekipangan jod si-kara, enog i imag iwan. 12 Tep sema iren toon nat naemati, nagwariy biyang kon mengowis cha si-kara. Nem sema iren echom jon naemati, gwariy biyang jon mengowis cha si-kara. 13 Tep si Afo Chiyos i mengowis iren ma eg naemati. Nem si-kayo, mesepol a a-magen joy iyaysolat cha esel Afo Chiyos a “Ekal joy toon iyayka-chom cha si-kayon naengamag na ngaaw.” c