Sema Iren Naiyansilbid Cristo, Songbathan Ched Cristo
4
Isonga, ibilang jo kawi komen bagaen Criston engipiyalan Afo Chiyos na obda na pantoro na podnon nat iyaypaamta nonta bayag da. 2 Say toon iyaypiyalan na obda, mesepol a maybiybiy i naepiyal. 3 Nem si-kak, nat nachimanagak no kowisen joak ono kowisen chaak na echom a too maypangkep no naepiyalak cha obdak ono enchi. Angken ekak kowisen i angel ko maypangkep nithan. 4 Edinis i konsinsiyak, nem nat piyan ton a-seden i agpayson nagwariy basol ko. Si Jesus a Afo thayoy mengowis cha si-kak. 5 Isonga, enog i kiyowis i echom tep aneng i koston timpo na pengowis. Panseked kayo ingkathod onkowan mowan alis Jesus a Afo thayo, et ipasi-neng to ira ma iyay-emot med enbolinget tan ipaamta tho ira ma pangkep na tothoo. Et apolbaran Afo Chiyos i sa-ki tan sa-kin toon iyaybagay chiwa imag to.6 Aahi, emiin den kigwan ko, nain-arig koy angel ko tan si Apollos a pan-achalan jo say sema pesing jon memateg na too, kosto-kosto ngon onoran to ma iyaysolat cha esel Afo Chiyos. Tep ngaaw no iki-tek joy sa-kin too iy disjonen joy echom. 7 Agpayson ekayang kayo iy say sema echom? Nengo ayay gwared si-kayon nat in-i-kan Afo Chiyos? No sema gwared si-kayo, edafod Afo Chiyos, apay nga nainki-tek joy angel jon singen si-kayoy edafoan to?
8 Nakigwan jo i gwara wed si-kayoy emiin a piyan jo. Nakigwan jo i bimaknang kayo wa na daing a nain-i-kan na Ispirito Santo. Nakigwan jo i iyanbalin kayo na ari, nem si-kawin apostolis, aneng nin. Mapteng koma no podnon ari kayo say mekitoray kawi ngod si-kayo. 9 Tep cha nemnem ko, si-kawin apostolis, inpanbalin to kawin Afo Chiyos a kababaan a toon inges toy balod a ekowis a metiy cha sangoanan na chakel a too. Tan singen towan bantayi kawi na intiron dobong, pati anghilis. 10 Si-kawin apostolis, nakigwan cha i egwenggweng kawi kagol na pamati wid Cristo. Nem si-kayo, nakigwan jo i edaing kayo kagol na pamati yod Cristo. Nagwariy toray mi, nem gwaren emiin i toray jo. Nachijaw cha kayo, nem nadinisjon cha kawi. 11 Ingkathod niman, naaofa kawi, naiya-kow kawi, tan naiyanbaro kawi na bakjot. Nasiyepdat cha kawi, tan nagwariy naiyan-iya-iyanan mi. 12 Masdo kawi na olay a man-obda say gwariy panbiyagan mi. No sesnithen cha kawi na too, nakinchew mid Afo Chiyos i bindisjonan to ira. No napidi-pidigathan cha kawi, naiyano-anosan mi. 13 No ngaaw i nakigwan ched si-kawi, nadiyodop min songbathan. Angken ingkathod niman, nainbilang cha kawi na toon basoren maykepil tan bangen mekaskas.
14 Nat kowan isolat ira man say mebaingan kayo, no diket say bidinen tahejo tep singen anak tahejon ensemek ko. 15 Tep angken chakel i toon naengajod si-kayod pamati yod Cristo, si-kak bengat i awejo. Tep iyanbalinak na awejo nonta emati kayod Cristo Jesus kagol na inpankasabak na mapteng a chamag cha si-kayo. 16 Isonga, pangaasi yo, amag joy naimag ko. 17 Tep kagol niyay, kowan ito-nos Timothy cha si-kayo. Nainbilang ko na anak kon ensemek ko, tan naepiyal a mansilbid Jesus a Afo thayo. Ipalagip tod si-kayo i pesing na panbiyag a naiyonoran ko kagol na pamatik cha Cristo. Sema pesing na panbiyag, si-katho ngoy naintorok cha emiin a naematid emiin a nakimowa-kowanan ko.
18 Gwara konoy echom jon pahi-tek tep chiyan namnamaa i ekak onkowan ded tan a manbisited si-kayo. 19 Nem onkowanak ded ta kad-an jo nem engkay, no seman i piyan Afo Chiyos. Et icho-pet ko no sema iren toon pahi-tek, agpayson gwared si-kariy panakabalin Afo Chiyos ono notnot cha bengat. 20 Tep sema pengamtaan i naintorayan to kiyen Afo Chiyos, nat notnot tayo, no diket sema panakabalin Afo Chiyos a naesi-neng cha biyag tayo. 21 Isonga, olay to kayo na piyan jo. No nat sa-dathan joy naimag jo, mesepol a somdeken tahejo no onkowanak ded tan. Nem no sa-dathan joy naimag jo, ibiybiy koy semek ko tan anos kod si-kayo no onkowanak ded tan.