Sema Inpasi-pasing Iren Ma Apostolis
Sema Kapoanan Na Dibcho
1
Afo Theophilus, cha pilmiron dibchok, in-istoriyak a emiin i inpasi-pasing Jesus tan intoro-toro thon iyanchogid timpon inchogi thon mantoro 2 ingkathod akow a kimayang cha dangit. Idi aneng pay si Jesus a onkayang, inbilin to ired tothoon pinispis ton manbalin na apostolis to, et sema kigwa-kigwan to, edafod Ispirito Santo. 3 Idi iyandigat mes Jesus et etiy, iyanpara-parang ired ma apostolis to na epat a polon akow. Nontan a timpo, chakel i ima-imag ton pamaneknek i agpasyon iyanpawil. Et intoroan to ngo ira ma apostolis to maypangkep na pantorayan Afo Chiyos. 4 Idi sa-kin akow a ekipangan si Jesus ired ma apostolis, kigwan to i “Enog i bintihan i Jerusalem, no diket seked jo nin i Ispirito Santon inkarin Awak a i-kan tod si-kayo. Tep si-katho ma engibanagan ko nontan a kigwan kod si-kayo i 5 ‘Si John a Naemonjag, nainbonjag tod tooy chanom, nem si-kayo ngo, no mepalabas i sankaatihan a akow, ibonjag Afo Chiyos cha si-kayoy Ispirito Santo.’ ”Kimayang Si Jesus Cha Dangit
6 Idi sa-kin akow a esa-sa-nop ires Jesus tan apostolis to, inbagaan iren ma apostolis i “Afo, niman i timpon pengiolim na gobirnod si-kathayon poli-polin Israel?” 7 Insongbat Jesus i “Si Awak bengat i gwariy karebengan ton mannemnem na timpo thon mepesamak ira man, isonga nat mesepol a amtaen jo. 8 Nem no onmothok aliy Ispirito Santod si-kayo, may-i-kanan kayo na panakabalin, tan si-kayoy menistigo maypangkep cha si-kak chiya Jerusalem, tan cha intiron sahop na Judea tan Samaria, tan cha emiin a soli na dobong.” 9 Idi iyakcheng men kigwan Jesus iwan, kimayang maled dangit a chiyan bantayin siya-dinan mala na kolpot et nat nahasi-neng cha wala.
10 Idi mantangtangkak pay ired dangit a mankakayang si Jesus, biglen gwariy chegwen dalekin man-ak-akgwat cha askang chen iyanbaro na polaw. 11 Et kigwan cha i “Si-kayon i-Galilee, niyana man-ak-akgwat kayod jay a mantangtangkak cha dangit? Si Jesus a iyaysi-jan cha si-kayon kimayang cha dangit, on-oli di mowan cha dobong. Et sema inpasing ton kimayang cha dangit a sini-neng jo, inges to ngoy pesing ton on-oli did jay.”
Pinispis Iren Ma Apostolis I Maysa-dat Cha Judas
12 Et bintihan iren ma apostolis i Chontog na Olivas et imoli ired Jerusalem. Say kaaragwi tho, chanchanin sa-kin kilomitro. 13 Idi mimothok ired siyodad, kimowan ired kwadton naiyan-iyanan chen gwared kayang. Sema iren toon gwared man, si Peter, si John ni James, si Andrew ni Philip, si Thomas, si Bartholomew, si Matthew, si James a anak Alphaeus, si Simon a iyanngaran na Zealot tep naintakchel toy ili tho, tan si Judas a anak James. 14 Si-karen emiin, naesa-sa-nop iren mankararag, pati sema iren bibiin echom cha tan si Maria a inen Jesus, tan sema iren aahi thon daleki.
15 Idi epalabas maliy piyen akow, esa-sa-nop iriy ematid Jesus. Say karakel cha, chanchanin sandasos tan chegwen polo. Et imakgwat si Peter a kigwan to i 16 “Aahik, sema inpapadto na Ispirito Santod David nonta bayag da, mesepol a etongpal. Sema inpadton David, maypangkep Judas a inbalnay toy tothoon iyanmet Jesus. 17 Nem sigod si Judas i sa-kid si-kawin apostolis, et pinispis Jesus a ontolong cha obda wi.”
18 Sejay i epasamak cha Judas. Sema pilak a iyay-i-kan cha si-katho kagol na ngaaw a imag to, intongkal to na payow. Et chiwan i iya-kasan ton bimesjag i ekes to et bimo-day a emiin i sosot to. 19 Sema iren emiin a toon naiyan-iyan cha Jerusalem, iyamtaan chiy epasamak cha Judas, isonga engaranan iwa payow na Akeldama a sema banag tod esel cha, Payow na Chala.
20 Et intolo-toloy Peter a engowan i “Gwara ngoy iyaysolat cha dibchon Psalmon may-arig cha Judas. Kigwan tod man i:
‘Sapay koma mekbeng i baliy to
tan sapay koma nagwara wiy man-iyan chiwan.’ a
Kigwan to ngod man i:
‘Sapay koma gwariy maysa-dat cha obda tho.’ b
21-22 Isonga, mesepol a gwariy maysa-dat cha Judas say sema too, mayka-chom cha si-kawin apostolis a menistigo na inpanpawil Jesus. Sema too, mesepol a naekikadgwed si-kawi nonta intiron timpo na ingkay-olo-olop mid Jesus a Afo thayon iyanchogid timpon emonjag si John a Naemonjag ingkathod timpon iyaysi-jan si Jesus cha si-kathayo et kimayang maled dangit.”
23 Et sema iren esa-sa-nop, emispis ira na chegwen tood si-karen mebedin emon maysa-dat cha Judas. Sema sa-ki, si Joseph a iyanngaran pay na Barsabbas tan Justus. Sema sa-ki ngo, si Matthias. 24 Et iyankararag iren kigwan cha i “Afo Chiyos, si-kam i mahaamta na nemnem na emiin a too. Pangaasim ipaamtam cha si-kawi no siyen ja chegwen tooy pinispis mo 25 say maysa-dat cha Judas a apostolis. Tep binekan Judas i kinaapostolis to tan obda tho, et kimowan chiwa dogad a iyay-anaman to.” 26 Et iyanbobonot iren bimo-day si Matthias, et iyayka-chom med ma sawal na sa-kin apostolis.