Iyanparang Si Jesus Cha Pithon Disipolos To
21
Idi iyakcheng iwan, iyanparang mowan si Jesus ired ma disipolos tod kilig na baybay na Tiberias. a Et sema inpanparang tod si-kara, epasamak a inges to jay. 2 Si Simon Peter, si Thomas a iyanngaran na Epin, si Nathanael a i-Cana cha Galilee, sema iren anak Zebedee, tan sema chegwa pay a disipolos Jesus, esa-sa-nop ira. 3 Et kigwan Simon Peter ired ma echom to i “Onkowanak a memalchow.” Et kigwan cha i “Mekiolop kawid si-kam.” Et kimowan iren iyanbangka, nem nagwariy ninigay cha nontan a edagwi.4 Idi emangketa-nang, imakgwat si Jesus cha kilig na baybay, nem nat piyeschian iren ma disipolos to. 5 Inbagen Jesus cha si-kara i “Gwariy ninigay jon paideng?” “Nagwara,” kigwan cha. 6 Et kigwan pay Jesus i “Igwa-jas jo ta balchow jod gwanan na bangka et gwariy a-daen jo.” Et ingwa-jas chiy balchow cha, et nat mahakoyod ched sekep na bangka kagol na karakel na paideng a ninigay cha. 7 Et sema disipolon ensemek Jesus, kigwan tod Peter i “Si Afo man!” Idi inki-ngelan Simon Peter iwan, inbaro thoy ta-kep to tep ingkal to say man-obda, et jimaptok a chakos cha chanom say onkowan cha kad-an Jesus. 8 Nem sema iren echom a disipolos, inkilig chiy bangka, et inkoyod chiy balchow a iyapno na paideng. Tep nat iyay-aragwi ired kilig na baybay tep sandasos a mitro bengat i kaaragwi tho.
9 Idi imepas ira ma disipolos cha bangka, mita riy iyaykedot a paideng cha ngalab, et gwara ngoy tinapay. 10 Et kigwan Jesus cha si-kara i “Ala kayo di na ninigay jon paideng.” 11 Et simekep si Simon Peter cha bangken engikoyod cha kilig na baybay na balchow a iyapno na babenay a paideng. Sema bilang to, sandasos tan dimen polo tan tedo. Nem angken chakel i paideng, nat eketdang iwa balchow. 12 Et kigwan Jesus i “Gomali jon mengan.” Nagwariy angken sa-kin disipolon etoled a mengibaga no siya man tep amta ra i si-kathoy Afo ra. 13 Et kimowan si Jesus a ida thoy tinapay a in-ap-ap tod si-kara, et in-ap-ap to ngoy paideng. 14 Seman i maykatdon inpanparang Jesus cha disipolos to manipod na inpanpawil to.
Sema Kigwan Jesus Cha Peter
15 Idi iyakcheng ira ma disipolos a engan, inbagen Jesus cha Simon Peter i “Si-kam, Simon a anak John, ba-ba-nayan i semek mod si-kak iy say sema semek iren ja echom mo?” Et insongbat Peter i “Ahow, Afo, amtam i ensemek taha.” Et kigwan Jesus i “Kajoim i took a singen ngangalobon kalniro.” 16 Et inbagen Jesus na maykafinchegwa i “Si-kam, Simon a anak John, ensemek moak?” Et insongbat Peter i “Ahow, Afo, amtam i ensemek taha.” Et kigwan mowan Jesus i “Bantayim i took a singen kalniro.” 17 Et inbagen Jesus na maykafintedo i “Si-kam, Simon a anak John, ensemek moak?” Et ensahit i nemnem Peter tep emintedon inbagen Jesus no ensemek to. Et insongbat Peter i “Afo, amtam a emiin. Amtam i ensemek taha.” Et kigwan mowan Jesus i “Kajoim i took a singen kalniro. 18 Sejay a konen kod si-kam, podnon idi balodahi ka, si-kam i engiki-det na balkes mo, tan angken dogad a piyan mon konan, kimowan ked man. Nem no aama ka wa, okjaren moy diwam a bedoren chaka et ikowan chaked dogad a nat piyan mon konan.” 19 Kigwan Jesus iwan say ipaamta tho i pesing Peter a metiy, et sema pesing Peter a metiy, si-kathoy kagol a kaychejawan Afo Chiyos. Et kigwan Jesus cha Peter i “Onori moak.”
Sema Kigwan Jesus Maypangkep Na Disipolon Ensemek To
20 Et iyanboli-neg si Peter a mita tho ma disipolon ensemek Jesus a mantetened cha si-kara. Si-kathoy disipolon imesop cha Jesus nonta engan iren engibaga i “Afo, siyay menraidor cha si-kam?” 21 Idi miten Peter iwa disipolo, kigwan tod Jesus i “Afo, ngoy mepesamak cha si-katho?” 22 Et insongbat Jesus i “No piyan kon manbiyag iwan ingkathod on-oliak mowan ali, nagwariy biyang mo. Si-kam, onori moak bengat.” 23 Kagol na engowanan Jesus niwan, gwariy toon ematin engowan i nat metiy iwa disipolo. Nem nat kigwan Jesus i nat metiy iwa disipolo. Sema kigwan to, “No piyan kon manbiyag ingkathod on-oliak mowan ali, nagwariy biyang mo.”
Sema Kaonoran Na Dibcho
24 Si-kak iwa disipolon niyantabtabalen Jesus. Kowan tistigoi i agpayson epasamak ira jay. Si-kak i engisolat iren jay, et amta wi i podnoy insolat ko. 25 Chakel pay i ima-imag Jesus a nat iyaysolat chiyay. No iyaysolat komen emiin iwa ima-imag to, angken intiron dobong, kolang i kay-ejanan na dibchon iyaysolathan to.