Inkararagan Jesus I Angel To
17
Idi kigwan Jesus iwan, timangkak cha dangit a kigwan to i “Awa, mimothok miy timpo. Si-kak a Anak mo, ibiybiy moy kinachiyos ko say ibiybiy ko ngoy kinachiyos mo. 2 Tep in-i-kan moy karebengan kon mantoray na emiin a too say i-kan koy biyag a nagwariy pengingkaan tod emiin a toon inpiyal mod si-kak. 3 Et sema biyag a nagwariy pengingkaan to ket, sejay a amtaen chaken sa-kin podnon Chiyos tan amtaen chaak ngon si Jesu Criston into-nom. 4 Inbiybiy koy kinachiyos mod ja dobong tep tiyongpal ko wiy kigwan mon a-magen ko. 5 Niman, Awa, chayaw moak cha sangoanan mon inges to ma inpanayaw mod si-kak nonta gwaraak cha si-kam nonta aneng pay meparsowiy dobong.Inkararagan Jesus Ira Ma Disipolos To
6 “Inpaamtak i ogadim ired ma toon pinispis mod ja dobong a inpiyal mod si-kak. Toom ira et inpiyal mod si-kak. Intolo-toloy chen a-magen i kigwan mo. 7 Niman amta ra wa i emiin a imag ko tan kigwan ko, edafod si-kam. 8 Inpaamtak cha si-kara ma kigwan mod si-kak et piyati ra. Agpayson amta ra i si-kam i edafoan ko, tan piyati ra i si-kam i engito-no did si-kak.
9 “Kowan ikararagi ira niman. Nat kowan ikararagiy tood ja dobong a nat naematid si-kak, no diket sema toon inpiyal mod si-kak tep toom ira. 10 Emiin a took, toom ngo ira, tan emiin a toom, took ngo ira. Et iyaychayawak kagol cha si-kara. 11 Chanchanin bebtihan ko ja dobong et on-oliak cha si-kam. Nem sema toon inpiyal mod si-kak, mepejas ired ja dobong. Awa, si-kam a esantoan, bantayim ira babaen na panakabalin mon in-i-kan mo ngod si-kak say mansa-sa-kiy nemnem chen inges toy nemnem tayo. 12 Idi ekiiyanak cha si-kara, biyantayan ko ira babaen na panakabalin mon in-i-kan mod si-kak. Biyantayan ko ira et nagwariy iya-tiw, angken sa-kid si-kara, malaksid niwa sa-kin toon iyaypadto i sigoradon mechosa na ingked ingka. Sema too, iya-tiw say metongpal i iyaysolat chiwa esel Afo Chiyos. a
13 “Chanchaniy timpo na iolik cha si-kam. Isonga, kowan kona ira jay niman iy ajaak pay chiya dobong say sema iren inpiyal mod si-kak, kolpin kenasen chiy chadsak ko. 14 Inpaamtak ired ma too i emiin a kigwan mod si-kak. Isonga, sema iren toon nat naemati, en-owes cha ira. Tep sema iren naemati, inges chaak a afil i pannemnem ched ma pannemnem iren ma nat naemati. 15 Nat kowan ichawat i a-kalen mo ired ja dobong, no diket kowan ichawat i bantayan mo ira say sema Ngaaw a si Satanas, nat a-gwahen to ira. 16 Inges chaak a sema pannemnem cha, afil cha pannemnem iren ma toon nat naemati. 17 Seja iren toon inpiyal mod si-kak, idasin mo say mansilbi ired si-kam. Amag mo jay babaen niwa podno. Tep sema ese-esel mo, si-katho ma podno. 18 Sema inpangito-nom cha si-kak ired ma tood ja dobong, inges niwan ngoy pengito-nok iren ja toon inpiyal mod si-kak. 19 Itangdal koy biyag ko para cha si-kara say podnon itangdal cha ngoy biyag cha para cha pansilbi red si-kam.
Inkararagan Jesus I Emiin A Ematid Si-katho
20 “Nat seja iren disipolos ko bengat i kowan ikararagi, nem emiin ngon naematid si-kak kagol na toro na disipolos ko. 21 Awa, ikararag ko i mansa-sa-ki iren emiin. Ikararag ko ngo i mekisa-sa-ki ired si-kathayon inges toy pekisa-kim cha si-kak tan pekisa-kik ngod si-kam say sema iren tood ja dobong, patien cha i si-kam iwa engito-no did si-kak. 22 Sema chayaw a in-i-kan kod si-kara, inges to ngoy chayaw a in-i-kan mod si-kak say mansa-sa-ki iren inges toy inpansa-ki thayo. 23 Ekisa-kiak cha si-kara tan ekisa-ki ka ngod si-kak say sema pansa-sa-ki ra ket, nagwariy kolang to. Et no inges niwan i pansa-sa-ki ra, amtaen na tood ja dobong i si-kam i engito-nod si-kak, tan amtaen cha ngo i sema semek mo ired ma naemati, inges to ngoy semek mod si-kak.
24 “Awa, piyan kon sema toon inpiyal mod si-kak, mayka-chom ired si-kak cha kad-an ko say si-nengen chiy chayaw a in-i-kan mod si-kak tep ensemek moak na olay angken nonta aneng pay meparsowiy dobong. 25 Awa, si-kam a maronong, sema toon nat naemati, nat amta raka. Nem amta taha, tan seja disipolos ko, amta ra i si-kam i engito-nod si-kak. 26 Inpaamtak i ogadim cha si-kara, et itolo-toloy kon mengipaamted si-kara say sema semek mod si-kara, inges toy semek mod si-kak, tan gwaraak ngod si-kara.”