4 Jawʉt, Moisés puexa israelitas toꞌa wʉt, jʉm-aechon ampox: “Dioslap toꞌa ampox xamal isliajwam: 5 Xamal kaeyaxtat owaxaelam ofrenda wajpaklon Diosliajwa. Puexa xamal chaxduisiam wʉt Diosofrenda, ¡najut chaxduiyaxaelam, chaxduisiampoxan! Xalaeyaxaelam oro, plata, malis bronce, Dios chaxduiliajwam. 6 Xalaeyaxaelambej chimiabʉꞌan moradabʉꞌan, malis púrpurabʉꞌan, pasoeibʉꞌan, linobʉꞌanbej, kaes pachaembʉꞌan, cabralabej baeliajwa. 7 Xalaeyaxaelam carnerobʉꞌan, joelasbʉꞌan pasoeimintat, choefbʉꞌanbej, chimiabʉꞌanpi, acaciatawlafachanbej, kaes chimiafachanpi. 8 Xalaeyaxaelambej olivosiminan lámparanliajwa, malis perjumaminan, olivosiminan sʉapich tanialaliajwa japot Diosliajwa, malis incienso xabejnikaliajwa Dios pejcarpabaliajwa. 9 Xalaeyaxaelambej iaꞌ, pawʉli cornalina, kaes asewbej iaꞌ, xabich pachaempi, japi iaꞌ xatdeladuiliajwa efodxot, pectoralxotbej, puexa sacerdotestatoꞌlan pejmatiafxot duiliajwa” —aech Moisés, toꞌa wʉton puexa israelitas toꞌa wʉt.

10 Moisés kaes jʉm-aech ampox puexa israelitasliajwa:

“Puexa xamal nejmach xabich kijulpi isliajwam, ¡xamal fʉlaeman, isliajwam puexa wajpaklon Dios toꞌapoxan! 11 Dios pejcarpaba isam wʉt, duiyaxaelam linobʉꞌan japacarpaba matakasliajwam. Isaxaelambej carpaba pejganchan, tawlafachanbej, malis acacianaeyan. Isaxaelambej nosnaechan, basan japitawlafachan pejbʉxfalliajwa. 12 Isaxaelam Dios pejbaúl, baúlfakaꞌbej, baúl pejxatdelanaeyanbej, fol wʉt xalaeliajwapi baúl. Isaxaelambej linobʉꞌ, japabʉꞌxotlap dutam wʉt diajnaxaelam pieza japoxbaúl esliajwam. 13 Isaxaelambej mesa, japoxmesaxot owaliajwa pan Diosliajwa. Isaxaelambej japoxmesa pejxatdelanaeyan, folam wʉt xalaeliajwam. Isaxaelambej mesaxot xa-isaxaelampoxan. 14 Isaxaelambej candelabroxot itliakaliajwa, isaxaelambej jaxot xa-ispiliajwa. Isam wʉt candelabro isaxaelambej candelabro pejlámparan, malis olivosiminan japilámparanliajwa. 15 Isaxaelambej altar jaxot bowaliajwa incienso, altar pejxatdelanaeyanbej isaxaelam, fol wʉt xalaeliajwa. Isaxaelambej olivosiminan nabichaxaelpi Diosliajwa japa-olivosiminan joelaliajwapi sacerdotes. Isaxaelambej incienso, xabich xabejchaempi. Baeyaxaelambej linobʉꞌ dusliajwam Dios pejcarpaba laleyaxxot. 16 Isaxaelambej altar choef bowaliajwa. Isaxaelambej broncetat jitthumba xamojlax altarxot. Isaxaelambej acacianaeyan, xatdelanaeyan, fol wʉt japox altar xalaeliajwa. Isaxaelambej puexa altarxot xa-isaxaelpoxan. Isaxaelambej broncetat, pinjiaf. ¡Japoxtas pejbasebej isaxaelam broncetat! 17 Baeyaxaelambej linobʉꞌan Dios pejcarpabafʉlmaktxot xajajialaliajwa japalinobʉꞌantat. Isaxaelambej nosnaechan, nosnaechan pejbasanbej. Linobʉꞌ baeyaxaelam duiliajwam Dios pejcarpabafʉlmakt laleyaxxot. 18 Isaxaelambej estacaxan satxot matamatlaliajwa japacarpaba chiekal xabichkaliajwa. Fʉlmaktliajwabej japi estacaxan. Isaxaelambej mʉa keꞌaliajwa estacaxanxot. 19 Athoeyaxaelambej naxoe Aarón bʉꞌlanabichliajwa, nabist wʉt Diosliajwa. Naxoe athoeyaxaelambej Aarón paxi bʉꞌlanabichliajwa, nabist wʉti Diosliajwa, japi sacerdotexoti” —aech Moisés kitoꞌa wʉton israelitas.

20-21 Do jawʉt, Moisés naksiyax bʉxtoet wʉt, puexa israelitas fʉlaechlisi pejcarpabachan poxade. Do jawʉx, puexa israelitas xabich nejchachaemil xoti xalaenlisi pejew Dios pej-ofrendaliajwa, japoxantat isliajwapi Dios pejcarpaba, japabaxot kawʉajnaliajwapi Dios. Xalaenbejpi kaes xabich weꞌppoxan japabaliajwa, athoeliajwabej naxoe, kaes xabich pachaempi, japoxan sacerdotes naxoeliajwa. 22 Do jawʉt, xabich poejiw, xabich wathoꞌbej, puexa japixot nejmach xalaenlisi, pajut pijaxtat xabich nejchachaemil xoti Diosliajwa. Xalaeni duwpoxan naxoetat, anillo, malis argollan, naechoꞌxajoebej. Oromʉabej, wʉchajilpi, japi xalaeni. Nejmach xabich ommaenkpibej xalaeni, orotat isaspi. Kaenanʉla ofrenda xalaenlisi Diosliajwa, isaspi orotat, chajia diajkpoxan, Diosliajwa, Dios chaxduiliajwapoxan. 23 Xalaenbejpi yiafbʉꞌan, moradabʉꞌan, púrpurabʉꞌan pasoeibʉꞌan. Kaes asabʉꞌanbej, xabich pachaempi, linobʉꞌan, xalaeni. Xalaenbejpi cabrala. Xalaenbejpi carnerobʉꞌan, joelasi pasoeimintat. Kaes pejme pachaembʉꞌan. 24 Xalaeni plata, bronce, Dios pej-ofrendanliajwa. Japoxan israelitas xalaeni Moisés poxadin Dios pejcarpaba isliajwa. Asew israelitas, tawlafachanpi, acaciafachan, japatawlafachan xalaeni. Xabich puexa nejmach xalaeni puexa weweꞌpaxaespoxanliajwa, Dios pejcarpaba isaxael wʉti. 25 Wathoꞌ kijuspi baeliajwa ke-etat, japi wathoꞌbej xalaeni pejew, baeli, yiafbʉꞌan, moradobʉꞌan, púrpurabʉꞌan, pasoeibʉꞌanbej. Kaes asabʉꞌanbej, linobʉꞌan, xabich pachaembʉꞌan, japi wathoꞌlap xalaen japoxan. 26 Asew israelitaswathoꞌbej, xabich kijuspi hilomʉa isliajwa cabralatat, japi wathoꞌ japoxan is xabich nejchachaemlaxtat. 27 Israelitas, paklochiwpi, xalaen iaꞌ, xabich chamiatan, iaꞌ, pawʉli cornalina. Kaes asa-iaꞌ, xabich chamiatanpi, xalaeni. Japi-iaꞌ efodje xapeꞌsliajwa, pectoral sʉapich, puexa sacerdotestatoꞌlan pejmatiafxot dusliajwa. 28 Xalaenbejpi perjumaminan, olivosiminanbej. Japa-olivosiminan lámparanliajwa Dios pejcarpabatu itliakaliajwa, Japa-olivosiminan taꞌchafanaliajwa, wʉlduw wʉti sacerdotes. Japaperjumaminan isliajwabej incienso, atʉaj xabej-okaliajwa.

29 Do jawʉt, puexa israelitas, poejiw, wathoꞌbej, xabich nejchachaemili kajachawaesliajwa isliajwa Dios toꞌaspox Moisésliajwa. Samata, xabich israelitas xalaeni pejew, Dios pej-ofrendaliajwa.

30-32 Do jawʉx, Moisés jʉm-aech ampox israelitasliajwa: “¡Xan chiekal naeweꞌe! Dios makafit kaen Judá pamon, pawʉlpon Bezaleel. Japon Uri paxʉlan, Hur pamon. Bezaleel xabich matabijt, Dios pejEspíritu Santo xabich kajachawaech xoton. Samata, xabich kijuspon nejmach isliajwa orotat, platatat, broncetatbej. 33 Bezaleel xabich kilachaemil, iaꞌ triawk wʉt, xabich pachaempotan. Chiekal kilachaemilbejpon, japa-iaꞌ duw wʉt jiw pejnaxoexot. Japon kijusbej nejmach isliajwa tawlafachantat. Xabich kijusbejpon isliajwa xabich chamia, jiw japoxan taen wʉt nejxasinkaliajwa. 34 Bezaleel kajachawaechbej Dios xajʉpaliajwa chiekal itpaeliajwapon asew israelitas japon matabijtpoxan. Ja-aechlap-is pawʉlpon Aholiab. Japon Ahisamac paxʉlan, Dan pamon. 35 Samata, japi kolenje Dios pejEspíritu Santo pejkajachawaechxot xabich nejmach kijuspon puexa isliajwa. Samata, xabich kijuspi tawlafachantat nejmach isliajwa. Xajʉpbejpi pejnejchaxoelaxanxot faekaliajwa isliajwapoxan. Xabich kijusbejpi bael wʉt ael-isliajwa moradabʉꞌanxot, púrpurabʉꞌanxotbej, pasoeibʉꞌanxotbej, linobʉꞌan, xabich chamiabʉꞌanxotbej. Japibej xabich kijus baeyaxtat xabich chamia baeliajwa, jiw taen wʉt xabich nejxasinkaliajwa japoxan.