2 “¡Chiekal najʉmtaem! Judá pamojiwxot xan makafitx Bezaleel. Japonlap Uri paxʉlan. japon Bezaleelbej, Hur pamon. 3 Bezaleel xabich kajachawaetx. Samata, taj-espíritu pijaxtat xabich matabijton kilachaemlaliajwa, puexa ispoxanliajwa. 4 Japonbej, xabich kijus, xabich matabijtbejpon orotat isasiapoxan isliajwa, platatat wʉt, broncetat wʉtbej. 5 Japonbej chiekal kilachaemil iaꞌ, ommaenkpi, triawkaliajwa, duiliajwabej monturaxot. Kilachaemilbejpon tawlafachantat, nejmach-ael-is wʉt. 6 Xanbej makafitx Aholiab Bezaleel pejkajachawaesanliajwa. Japon Aholiab, Ahisamac paxʉlan, Dan pamon. Xan xabich kajachawaesaxaelen puexa matabijtpi kaes xabich matabijsliajwa isliajwa puexa xan jʉm-anpoxan, xamlap japi chaxpaeyaxaelam. 7-11 Xan kitoꞌaxpoxan ampoxanlape japi isliajwa. Isaxaelpi tajcarpaba, tajbaúl, baúlfafabej, malismesa, tajmesaxot xa-isaxaelpoxan. Chaxpaeyaxaelam isliajwabejpi orocandelabro, orocandelabroxot xa-isaxaelpoxan, isaxaeli altar, jaxot incienso bowaliajwa. Isaxaelbejpi asa-altar choef bowaliajwa, malapi isaxael xa-ispoxan japox altarxotliajwa. Isaxaelbejpi pinjiyax tas, tas pejbasebej. Isaxaelbejpi naxoe, chiekal baelspi sacerdote Aarónliajwa, japon paxiliajwabej, naxoeliajwa nabist wʉti sacerdotesbichaxan. Isaxaelbejpi perjumaminan, sacerdotes matnaechafanaliajwas, japi sacerdotes nabistxoti xanliajwa. Isaxaelbejpi incienso xajaenchaempoxan tajsacerdotes tajcarpabaxot bowaliajwa. Puexa japoxan isaxaelpi, me-ama xamxot jʉm-an, xam toꞌaliajwam japi isliajwa japoxan —aech Dios Moisésxot.

12-13 Dios kaes jʉm-aech ampox Moisésxot:

“Xam najut chiekal jʉmchiyaxaelam israelitas. Jʉm-am wʉt israelitas, ¡jʉmchiyaxaelam ampox: ‘Dios nabʉxtoꞌa wʉt, jʉm-aechon puexa xamalliajwa: “Xamal israelitas sitaeyaxaelam napatamatkoiyan. Japamatkoi pomatkoichaliajwa xamalliajwa. Ja-am wʉt, xamal chiekal matabijsaxaelam xanlap diachwʉajnakolax Diosnan, puexa xamal makanotx. 14 Napatamatkoi wʉt, xamal damlathʉlaxaelam na-itpaeliajwam nejsitaeyaxan xanliajwa. Nejmach-aton xamalxot sitae-el wʉt napatamatkoi, japon aton kastikam matkaesaxaeson. Xamalxot aton nakiowa nabist wʉt, japon aton pejjiwxot kaelel chijiyaxael. 15 Kaesemana nabistam wʉt, nabichaxaelam seis matkoi. Pe séptimomatkoiliajwa wʉt, xamal napataxaelam na-itpaeliajwam nejsitaeyax xanliajwa. Xamalxot aton nakiowa nabist wʉt napatamatkoi, japon aton kastikas wʉt matkaesaxaeson” —aech Dios, nabʉxtoꞌa wʉt’ —chiyaxaelam xam japox israelitas! 16 Samata, puexa israelitas sitaeyaxael napatamatkoi. Japoxlap, me-ama convenio pomatkoichaliajwa, toepaxilox. 17 Napatamatkoitat, israelitas damlathʉl wʉt, japi chiekal nejchaxoelaliajwa japi tajjiwpi —aech Dios Moisésxot.

Dios tulaelt wʉt thatbaxo, tulaeltbejpon that. Seis matkoi wʉt tulaeltpon japoxan. Séptimomatkoi wʉt, Dios chiekal napaton. Do kaes is-elbejpon.

18 Dios naksiyax bʉxtoet wʉt Moisésxot Sinaimʉaxxotse, Dios chaxdut kole-iaꞌfachan Moisésxot. Japa-iaꞌfachan, Dios pajut pejkothiyatat lelpoxan, pejtatoꞌlaxan israelitas pomatkoicha naexasisliajwa.