“Chapaeyaxaelam isliajwapi altar acaciatawlafachantat bowaliajwa incenso. 2 Japox altar cuadradowaxaelpox. Cuarenta y cinco centímetrowaxaelpox pakchowaxpox. Cuarenta y cinco centímetrowaxaelpox pinatupox. Noventa centímetrowaxaelpox athʉpox. Chapaeyaxaelambej isliajwa, me-ama cuatro mat-e, jasi, altarmatwʉajtat, pejcuatro tʉaksoꞌanxot noeliajwa. Japatawlafachantat isax chaxpaeyaxaelam mat-e, ¡japatawlafachantat isax chaxpaeyaxaelam! 3-4 Chapaeyaxaelam thʉch matxafafaliajwapi orofachan japox altar. Altar pejcuatrolelan matduil xot, mat-ebej, orofachantat matxafafaxaeli. ¡Orofaex duiyax xamasajiasaxaelam altarlanxot! Japa-orofaex pawʉl ribetes. Japa-orofaex pejbʉxfalxot, ¡duiyaxaeli oro-argollan kaenanʉla pejtʉaksoꞌanxot japa-orgollanwʉaj poxade naeyan xajoeliajwa! Ja-aech wʉt, pachaemaxael altar chaxlaeliajwa, fol wʉti. 5 Japanaeyan isax chapaeyaxaelam acacianaetat. Do jawʉx japanaeyan matxafafaxaeli orofachan. 6 Do jawʉx, japox altar nosaxaelam tajcarpabaxot, linobʉꞌ dutampox wʉajnalel, pawʉlxot Lugar Santo piezaxxot. Tajbaúl, pejfafa, orotat isaspox sʉapich, linobʉꞌ wesklelsik ekaxaelpox. Jaxotlap, tajbaúl, nospaeyaxaeli, xam sʉapich. 7 Pomatkoicha, kandiawasap, Aarón lámparan pejmechan xatʉt wʉt, toejwasi, falaliajwa olivosiminan lámparanxot. Do jawʉtbej, Aarón bowaxael incienso xabejna-osliajwa altarxot. 8 Do jawʉx pejme, Aarón incienso bowaxael, kaliax lámparan tamduiliajwa wʉt. Japoxlap Aarón isaxael japoxan pomatkoicha tajcarpabaxot. Do jawʉx, Aarón tʉp wʉt, japon paxi, japon pamojiwbej, Aarón pejkawʉtat japox islapaxaeli pomatkoicha. 9 Altarxot bowaxilon inciensowa-eli. Japox altarxot Aarón bowaximilpi ampilape: Choef, trigo, cebada. Falaximilbej vino japox altarxot. 10 Japox altarxot bowaliajwa wʉt, xan kaenanliajwa. Kaewaechan wʉt, choefan xʉaꞌlapon jiw pejbabijaxanliajwa, choefanjal Aarón xalaeyaxaen altarmat-e joelaliajwa, cuatro mat-e. Ja-aech wʉt, xan taj-altar nawepachaemaxael xanliajwa —aech Dios Moisésxot.

11 Dios jʉm-aech ampox toꞌa wʉton Moisés:

12 “Xam xajuiyaxaelam puexa israelitaspoejiw, ¡japi poejiw toꞌaliajwam mosliajwapi impuesto tajcarpabaliajwa, ja-aech wʉt ijilaxael waxae, xabich chachoelpox, japi tʉpasamata japoxwaxaetat! Ja-aech wʉt, waxae, xabich chachoelpox, japi waeyaxisal, xam toꞌampi mosliajwa impuesto. 13 Puexa israelitaspoejiw censoxot wʉllelspi, japilapmosaxael cinco gramos plata tajcarpabaliajwa. Japapalatafachan xaxajuiyaxaes tajcarpabapijaxanliajwa, xajajʉspoxtat. 14 Puexa israelitaspoejiw, veinte waechanpi, kaes veinte waechan xenapibej, wʉllelaxaespi censofʉtxot, japilap mosaxael platafachan tajcarpabaliajwa. 15 Mot wʉti tajcarpabaliajwa, kimaeya mosaxael cinco gramos platafachan. Japi kaes mosaxil. Kijilabej mosaxael cinco gramos platafachan. Japi kijila dach mosaxil. 16 Plata kinotam wʉt, israelitas motpoxan, japi plataxot isaxaelam tajcarpabapijaxanliajwa. Japitat, plataafachantat, Mosaxaelambej nabisti tajcarpabaxot. Japox isam wʉt, xan nejchaxoelaxaelen israelitas motpoxanliajwa xan japi tataeflaliajwan, waxae xabich chachoelpoxtat tʉpasamatapi —aech Dios toꞌa wʉton Moisés.

17 Dios pejme jʉm-aech ampox Moisésxot: 18 ¡Xamlap chaxpaeyaxaelam isliajwa tas pinjiaf broncetat! ¡Chaxpaeyaxaelambejpi isliajwa base brocetat japox tasliajwa. Do jawʉx, ¡toꞌaxaelam japox tas esliajwapi broce basexot altartʉaksoꞌtlel, tajcarpaba laleyaxwʉajnalel, patutat! ¡Japox tas min wʉlʉsaxaeli cha-ekaliajwa jaxot! 19 Japox broncetasxot Aarón, paxi sʉapich, min powaxael kikakiasliajwa, tʉak kiasliajwabejpi. 20 Japi jaxot kikakiasaxael, pejtʉakanbej, leliajwa wʉt tajcarpaba. Jachiyaxaelbejpi isliajwa wʉti pejbichaxan, choef xʉaꞌasliajwa wʉt, bowaliajwa wʉt taj-ofrendaliajwa. Japoxlap, japi is wʉt tʉpaxili tajkastikaxtat. 21 Tʉpasamatapi tajkastikaxtat, japilap kikakiasaxael, pejtʉakanbej. Japox tajtatoꞌlax pomatkoichaliajwa Aarónxot, japon paxiliajwabej, pamojiwliajwabej —aech Dios toꞌa wʉton Moisés.

22 Dios kaes jʉm-aech ampox toꞌa wʉton Moisés:

23 ¡Xamlap najut wʉljaesaxaelam xabich pachaempi, xabejchaempi! Wʉljaesaxaelampi ampilape. Seis kilo kaes pachaempi, mirranaelan. Tres kilo canelabokan. 24 Seis kilo casiabokan. Japoxan xaxajuiyaxaelam tajcarpabapijax xajuiyaxtat. Wʉljaesaxaelambej tres litros y medio olivosiminan. 25 Me-ama perjumaminan is wʉt taniala perjumamin nakolaliajwa, ¡jachiyaxaelam! Japoxan puexa kaeyaxtat tanialam wʉt, jachiyaxaelam wʉt, nakolsaxael perjumaminan sacerdotes joelaliajwa, jiw nabisti Dios pejbichaxan, xanbichaxaelpoxan Diosliajwa. 26-27 Japot perjumamintat matchafafanaxaelam tajcarpaba, tajbaúlbej, tajmesa pan owaxaelxot, puexa mesaxot xa-isaxaelpoxan, candelabrobej, candelabroxot xa-isaxaelpoxan, altarxot, bowaxaelxot incienso. 28 Japot perjumamintat matchafafanaxaelam altar, choef bowaxaelxot, puexa altarxot xa-isaxaelpoxanbej, broncetas, japox pejbasebej matchafaxaelam. 29 Jasox isaxaelam wʉt, puexa japoxan chiekal pachaemaxael xan tejewliajwa. Nejmach asaxanpoxan naxbijcha wʉt xan tajaxanpoxanxot, ja-aech wʉt, japoxanbej xan tejewaxaelape.

30 ¡Japot perjumamintat matnaechafanaxaelam Aarón, japon paxibej, japi tajsacerdoteliajwa pomatkoicha! 31 ¡Israelitas jʉmchiyaxaelambej ampox: ‘Ampot perjumamintat matnaechafanaxaelam, aton makafitampon tajsacerdoteliajwa. Japot perjumamintat matchafanaxaelampi, japi jiwlap xanliajwa. Malap-is jachiyaxael japot perjumamint pomatkoichaliajwa xanliajwa. 32 Tajperjumamintat nejmach-atonxot matnaechafanaximil. Isaximilbej asat perjumamint, me-ama ampot jasot. Japot perjumamint xan tajt xot. 33 Nejmach-aton xamalxot is wʉt, me-ama ampaperjumamint, o, chafan wʉton japaperjumamintat nejmach-atonxot, ja-aech wʉt, japon-aton taj-atonaxil!’ —chiyaxaelam israelitas —aech Dios bʉxtoꞌa wʉton Moisés.

34 Dios pejme jʉm-aech ampox toꞌa wʉton Moisés:

“Wʉljaesaxaelampi ampilape, cuatro especias, xabich xajaenchaempikal. Pin-iatpox chiekal najʉpaxael japoxan. Samata, wʉljaesaxaelampi ampilape. Resina, un aromática, inciensokolabej, gálbano aromáticobej. Japilap xam wʉljaesaxaelam. 35 Japi cuatro especias puexa chiekal tanialaxaelam isliajwam incienso tajsacerdotes tajcarpabaxot bowaliajwa. Me-ama perjumaminan isan, taniala perjumamin isliajwa, ¡xamlap-is jachiyaxaelam, isam wʉt japox incienso! 36 Tanialax kitoetam wʉt, chiekal xatkianaxaelam kaesʉapich. Do jawʉx, japox cha-esaxaelam tajcarpabaxot tajbaúlwʉajnalel, xan sʉapich, nospaeyaxaelamxot. 37 Xamal isaximil asa-incienso najutliajwa, me-ama ampi incienso jasi. Japox incienso xan kaenan Diosnanliajwa. Samata, xamal sitaeyaxaelam taj-incienso. 38 Xamalxot nejmach-aton isaxael wʉt incienso, me-ama taj-incienso, xabej nejxasink xoton taj-incienso, ja-aech wʉt, japon aton taj-atonaxil” —aech Dios toꞌa wʉton Moisés.