6 Isbejpi orokolatat Dios pejbaúlfafaliajwa. Pakchowaxpox un metro y diez centímetro. Pinfafapox sesenta y cinco centímetro. 7 Baúlfafamatdukaxxot, kolelelje, Dios pej-ángel, pabaꞌanpi, ael-ispi orotat, martillotat bijiat befli kaet pinjitat orotat. 8 Baúlfafa is wʉti kaet pinjitat, orotat, japot kaetat ael-isbejpi kolenje Dios pej-ángel, pabaꞌanpi. Baúlfafamatdukaxxot, kaefafalel, kaen Dios pej-ángel ael-ispi noch. Asafafalel, baúlfafamatdukaxxot, asan Dios pej-ángel, ael-isbejpi, nochpox. 9 Do ja-aech wʉt, kolenje Dios pej-ángel, ael-ispoxan, me-ama xutafoꞌa wʉt asa-aellel, ja-aechox. Ma-is asa-ael. Me-ama xutafoꞌin asa-aelleldin, ja-aechox. Pe japox kole-ángel ael-isaspox xutapela baúlmatwʉajlel. Japox koloeyax baꞌxachoeyax chanowspi baúlfafamatwʉajtat. Ja-aech wʉt, me-ama matakati pejbaꞌantat baúlfafa.

10 Do jawʉt, Bezaleel isbejpon mesa tawlafachantat pawʉlpitat acacia. Japamesa xajajʉpon noventa centímetro pakchowaxpox. Cuarenta y cinco centímetro pinjiyaxpox. Sesenta y cinco centímetro athʉpox. 11 Pokla-orokolafachantat matxafafapon japamesa. Japamesafʉletlelanbej duwpon orofaex, pawʉli ribete. 12 Isbejpon tawlafaex. Japatawlafaex siete centímetro pinjiafpox. Mesabʉxʉxot matamatalpon, japoxantat mesa chiekal chamamnikaliajwa. Japatablafaex nababʉaꞌanxot duwpon ribete, orotat isaspi. 13-14 Isbejpon cuatro oro-argollan, japa-argollan cuatro mesathitanxot duwpon tawlafaexbʉxʉxot, japa-orgollawʉaj poxade xajoeliajwa xatdelanaeyan! Ja-aech wʉt, pachaemaxael japamesa xalaeliajwa, fol wʉti.

15 Xatdelanaeyanliajwa ispon acacianaetat. Do jawʉx, xatdelanaeyan matxafafapon orofachantat. 16 Isbejpon orokolatat mesaxot xa-isliajwapi. Japox jʉmchiyaxael platfachan, cucharones, tasfachan, pawʉli jarras, copafachan, ofrendamint xafol wʉt japacopafachanxot falaliajwa xafeliajwa wʉt. Japoxan owaxaeli. Eyaxaelbejpi mesamatwʉajtat.

17 Do jawʉt, Bezaleel isbejpon pokla-orokolatat candelabro. Is wʉt, martillotat bijiat befʉlon kaet, oro pinjitat. Candelabro pejbase ispon jʉwlasamata candelabro. Isbejpon candelabrotamat. Do jawʉxbej, ael-ispon almendratalan. Japoxan ispon kaet, oro pinjitat. 18 Japox candelabro seis daltjepox. Kaelel tres daltjepox. Ma-is asalel tres daltje. 19 Kaenanʉla candelabrodalanxot, jaxot tres almendratalan duws, ael-isaspi. 20 Japacandelabrotamaxot almendratalan duwpon, ael-isaspi. 21 Tres natathaknaxbʉxfalxot, nakoltxot candelabrotamatxot, jaxot ael-ispon nuthala-eltalt. 22 Candelabrodalanxot, almendratalan ael-is wʉton, bijiat befʉlon martillotat kaet oro, pinjittat. 23 Do jawʉx, ¡isbejpon siete lámparan! ¡Isbejpon orotat lámparan pejmechan xatʉsliajwapi, toejwaspi. Isbejpon orotat cha-aelplatillo mecha sekwaspi japaplatilloxot pelsliajwa! 24 Candelabro is wʉt, isbejpon candelabroxot xa-isaxaelpoxan. Japoxan puexa ispon treinta y tres kilo orokolatat.

25 Do jawʉx, Bezaleel ispon altar incienso bowaliajwa acaciatawlafachantat. Japox altar is wʉton, ispon cuadradotat. Cuarenta y cinco centímetro pakchowaxpox. Cuarenta y cinco centímetro pinjiyaxpox. Noventa centímetro athʉpox. Altarmat-e is wʉton, cuatro tʉaksoꞌanxot, japamat-e ispon japi, tawlafachantat. 26 Do jawʉx, japox altarmatwʉaj matxafafapon orokolafachantat. Cuatrolelan altarxot, mat-ebej, matxafafapon orokolafachantat. Do jawʉtbej, duwpon orofaex altarlelanxot. Japa-orofaex pawʉl ribetes. 27 Do jawʉx, japa-orofaex pejbʉxfalxot, duwpon oro-argollan kaenanʉla pejtʉaksoꞌanxot japa-orgollanwʉaj poxade xajoeldepon xatdelsnaeyan. Ja-aech wʉt, pachaemaxael japox altar xalaeliajwa, fol wʉti. 28 Japaxatdelanaeyan ispon acacianaetat. Do jawʉx, japanaeyan matxafafapon orofachantat.

29 Do jawʉx, Bezaleel isbejpon olivosimin sacerdotes matchafalaliajwa. Isbejpon perjumaminkola. Me-ama perjumaminan ispi is wʉt, jaki-aechon, perjumaminan is wʉt.