2 Do jawʉx, Moisés la Bezaleel, Aholiab sʉapich, japi fʉlaeliajwadin. Moisés jawʉt asew israelitas sʉapich, xajʉpi chamia isliajwa Dios pejkajachawaesaxtat. Japi chajia pajut chiekal jʉmduw japabichax kajachawaesliajwa. 3 Do jawʉt, Dios pejcarpaba isaxaeli notlisi ofrendan Moisésxot israelitas xalalaenapoxan, japoxantat tʉadusliajwa Dios pejcarpaba isax.

Do jawʉtbej, israelitas kofa-eli kaematkoisfʉl xalalaenapoxan ofrenda Dios pejcarpabaliajwa. 4-5 Do ja-aech wʉt, Dios pejcarpaba ispi, fʉlaechlisi Moisés poxade jʉmchiliajwapi ampox Moisésxot. Do jawʉt, paꞌa wʉt, jʉm-aechi ampox Moisésxot: “Israelitas pajut pijaxtat xabich kaes jʉmch xalalaena ofrenda, kaes weꞌpa-elpoxan xanbichliajwa Dios toꞌapox nabichliajwan” —aech nabisti, chapaei wʉti Moisésxot.

6 Do jawʉt, Moisés bichakal fʉlaech israelitas pejcarpabachan poxade. Jawʉt, pinjametat kifiaton israelitaspoejiw, wathoꞌbej, kaes xalae-elaliajwa ofrendan Dios pejcarpabaliajwa. 7 Xanbichliajwapoxan weꞌpa-el xot, japoxan namaeyaxaelxot.

8 Kaes chiekal matabijtpi isliajwa chamia, japi jiw islisi Dios pejcarpaba. Dios pejcarpaba islisi diezbʉꞌantat, baesbʉꞌan, linomʉa jʉchmʉatat. Japabʉꞌanxot asabʉꞌan, moradabʉꞌan. Asabʉꞌan púrpurabʉꞌan. Asabʉꞌan pasoeibʉꞌan. Japabʉꞌanxot ael-isas kolenje Dios pej-ángeles, pejbaꞌanpi. 9 Kaenanʉla japalinobʉꞌan, pakchobʉꞌanpox doce metro y medio. Pinabʉꞌanpox dos metro. 10 Cinco linobʉꞌan nalia-athowpi pinabʉꞌ isliajwa. Jaki-aechbejpi asabʉꞌan cinco linobʉꞌanliajwa. 11 Do jawʉx, matxoelapejbʉꞌ pamakaxot, japi duw moradamʉa xatathoekaliajwa. Do jawʉt, asabʉꞌ, wʉchakalpejbʉꞌ, jaki-aechbejpi. 12 Matxoelapejbʉꞌ pamakaxot, duwpi cincuenta cordónmʉa. Ma-is wʉchakalpejbʉꞌ pamakaxotbej, duwpi cincuenta cordónmʉa, matxoelapejbʉꞌ sʉapich, xawaekaliajwa chiekal najʉpaliajwa, wʉchakalpejbʉꞌ sʉapich. 13 Orotat isbejpi cincuenta gancho xawaekaliajwa, asabʉꞌ sʉapich. Do ja-aech wʉt, kaebʉꞌ islisi Dios pejcarpabaliajwa. 14 Bezaleel, pejjiw sʉapich, baelpi oncebʉꞌan cabralatat thʉch osliajwasik, linobʉꞌanmatwʉajtat. 15 Kaenanʉla cabralabʉꞌan pakchowbʉꞌanpox trece metro y medio. Pinabʉꞌpox dos metro. 16 Cinco cabralabʉꞌan nalia-athowpi kaebʉꞌ isliajwa. Nalia-athowbejpi seis cabralabʉꞌan, asabʉꞌ isliajwa. 17 Do jawʉx, matxoelacabralabʉꞌanxot, taxdukapejbʉꞌmakamatdukaxxot, duwlisi cincuenta cordónmʉa xawaekaliajwa, wʉchakalpejbʉꞌ sʉapich. Jaki-aechbejpi wʉchakalcabrabʉꞌan, taxdukapejbʉꞌmakamatdukaxxot. 18 Isbejpi cincuenta gancho broncetat, xatathoek wʉt kaebʉꞌ isliajwa, japacabralabʉꞌan osliajwasik Dios pejcarpaba matwʉajasik.

19 Dios pejcarpabaliajwa, Bezaleel, pejjiw sʉapich, is carnerobʉꞌan japabʉꞌanbej thʉch owaliajwasik. Japabʉꞌan joelas pasoeiminan. Kaes asabʉꞌanbej isbejpi xabich chamiabʉꞌan. Japabʉꞌan kaes thʉch owaliajwasik Dios pejcarpabamatwʉajtat.

20 Do jawʉx, islisi acaciatawlafachan Dios pejcarpabaliajwa. Do jawʉt, tawlafachan matnoch noefʉli. 21 Kaenanʉla tawlafachan pokchofachanpox cuatro metro y medio. Pinjiafpox, sesenta y cinco centímetro. 22 Puexa japatawlafachan Dios pejcarpabaliajwa, tawlamatduilaxanxot thaklaxaelam koletʉakjeliajwa, noeliajwa pejbasanwʉajanxot, japatawlafachan chiekal nalianoeliajwa. Puexa tawlafachan Dios pejcarpabaliajwa, japoxanlap ispi. 23 Japatablafachanxot, veinte tawlafachan, xajajialaliajwa surlel. 24 Platatat cuarenta basan isbejpi, cuarenta tawlafachanbʉxfallel owaliajwa. Kaenanʉla tawlabʉxfalanxot, jaxot kolebasanaxael. 25 Japatablafachanxotbej, veinte tawlafachan xajajialaliajwa Dios pejcarpaba nortelelliajwa. 26 Tawlafachan pejbasan, cuarenta basan, ispi platatat tawlafachan kaenanʉla kolebasanxot noeliajwa. 27 Dios pejcarpabata-ulel, oestelelliajwa, ispi seis tawlafachan. 28 Isbejpi koliafje koletʉaksoꞌt-pejtawlafachanliajwa. 29 Japatawlafachan, chiekal mox nows wʉt, naxbija nows. Mal-isox ja-aech athʉlel, satlel sʉapich. Kaenanʉla japatawlaxot athʉlelse duws oro-anillo, xatdelsat xatatoesliajwade. Jasoxtat ispi koletʉajsoꞌtliajwa chiekal mamnikaliajwa. 30 Samata, ocho tawlafachanpox Dios pejcarpabata-ulel pejtawlafachanliajwa. Isbejpi dieciseis basan platatat, kaenanʉla japatawlafachanbʉxfallel kolebasan eliajwa.

31 Bezaleel, pejjiw sʉapich, isbejpi cinco acacianaeyan xatdelaliajwapotan japitawlafachan nortelelliajwa Dios pejcarpaba chiekal mamnikaliajwa. 32 Isbejpi cinco acacianaeyan xatdelaliajwapotan asatawlafachan surlelliajwa Dios pejcarpabaliajwa chiekal mamnikaliajwa. Isbejpi cinco acacianaeyan xatdelaliajwapotan asatawlafachan oestelelpiliajwa Dios pejcarpabata-uxotaliajwa. 33 Xatdelsat, patupijt naman chiekal tawlafachanpatade. Xajoelde wʉt, we-enlel paꞌapot. 34 Do jawʉx, tawlafachan matxafafalisi orofachan. Isbejpi oro-argollan japa-oro-argollanwʉajan poxade xajoeliajwa acacianaeyan, matxafafasi orofachan.

35 Baelbejpi linobʉꞌ, linomʉa, tres colorestat jʉchmʉa. Kaecolor moradomʉat. Asacolor púrpuramʉat. Asacolor pasoeimʉat. ¡Japalinobʉꞌ bael wʉti, kolenje Dios pej-ángel, ael-ispi, pabaꞌanpi, chiekal kilachaemili! 36 Do jawʉx, cuatro ganchan isaspi orotat, kaenanʉla duiliajwa cuatro acacianosnaechan-oefanxot linobʉꞌ dusliajwa japaganchanxot. Linobʉꞌ dut wʉt, carpabatutat diajanlisi jaxot kolepieza nakolsliajwa. Kaepieza pawʉlaxael Lugar Santo. Asapieza pawʉlaxael Lugar Santísimo. Lugar Santísimo piezaxlel esaxaeli Dios pejbaúl. Japanosnaechan matxafafas orofachan. Japanosnaechan kaenanʉla kaebasan, noeliajwa jaxot. Japabasan isas platatat.

37 Dios pejcarpaba laleyaxlel dusliajwa, baelisi linobʉꞌ. Japabʉꞌ bael wʉti, baeli, tres colorestat linomʉat, jʉchmʉatat. Kaecolor moradamʉat. Asacolor púrpuramʉat. Asacolor pasoeimʉat. ¡Japalinobʉꞌ bael wʉt, ael-is wʉti, chiekal kilachaemil. 38 Isbejpi cinco acacianosnaechan japalinobʉꞌ dusliajwa. Japa-acacianosnaechan kaes athʉxotse orofachan matxafafas. Anillosbej, jaxot duws, japibej matxafafas orofachan. Japanosnaechan kaenanʉla pejgancho nosnaechan-oefxot, orotat isaspi, duw. Jofbejpi bronce cinco basan isliajwa, kaenanʉla cinco nosnaechan noeliajwa jaxot.