“¡Isaxaelam tajcarpaba diez linobʉꞌantat! Japabʉꞌan baelam wʉt, ¡baeyaxaelam, tres colorestat linomʉatat, jʉchmʉatat! Kaecolor, ¡nej moradomʉata! Asacolor, ¡nej púrpuramʉata! Asacolor, ¡nej pasoeimʉata! Japalinobʉꞌtatxot, ¡kolenje ángeles ael-is wʉti, ¡aelbaeyaxaelpon chiekal kilachaemilpon, bael wʉt! 2 ¡Puexa japabʉꞌan, chiekal najupaxael! Doce metro y medio pakchobʉꞌanpox. Kolemetrowaxaelbej pinabʉꞌanpox. 3 Cincobʉꞌan nalia-athoeyaxaelam! ¡Malap-is jachiyaxaelam asacincobʉꞌanxot! 4 Matxoelapejbʉꞌ pamakaxot duyaxaelam cordónmʉa xatathoekaliajwa. Japacordónmʉa moradomʉayaxael. Do jawʉt, asabʉꞌ, wʉchakalpejbʉꞌ, jakichiyaxaelam, me-ama matxoelapejbʉꞌt. 5 Japabʉꞌan, matxoelapejbʉꞌ, wʉchakalpejbʉꞌ sʉapichliajwa, ¡cincuenta cordónmʉa duiyaxaelam kaenanʉla pamakanxot, asabʉꞌ sʉapich, xawaekaxaelam chiekal najʉpaliajwa, asabʉꞌ sʉapich!

6 ¡Isaxaelambej cincuenta gancho orotat xawaekaliajwam japaganchoxot, asabʉꞌ sʉapich, me-ama kaebʉꞌ, pinabʉꞌ, nakolsliajwa!

7 “¡Baeyaxaelambej once bʉꞌan cabralatat tajcarpabamatwʉajliajwa thʉch osliajwasik, linobʉꞌmatwʉajxot! 8 ¡Puexa japacabralabʉꞌan chiekal najʉpaxael! Japacarpabʉꞌan trece metros y mediowaxael, pakchowaxpox. Pinabʉꞌpox dos metrowaxael. 9 ¡Cinco cabralabʉꞌan nalia-athoeyaxaelam, nakolsliajwa kaebʉꞌ, pinabʉꞌ! Do jawʉxbej, seisbʉꞌan nalia-athoeyaxaelam asabʉꞌliajwa. ¡Taxdukabʉꞌ, pakchowaxpox, namanpox, chiekal najʉpatruknaxaelam, japabʉꞌ namanaliajwa tajcarpabafumulel! 10 ¡Cinco cabralabʉꞌanmakaxot cincuenta cordónmʉa duiyaxaelam xawaekaliajwam! Malap-is jakichiyaxaelambej wʉchakalpejbʉꞌ. 11 Do jawʉx, ¡isaxaelam cincuenta gancho broncetat xawaekaliajwam japaganchoxot, asabʉꞌ sʉapich, kaebʉꞌ, pinabʉꞌ, chiekal nakolsliajwa! 12 Japacarpabʉꞌan, pakchobʉꞌan, namaeyaxael xot, duiyaxaelam tajcarpabatʉaksoꞌtlel. 13 Ja-aech wʉt, tajcarpaba matakasaxaes carpabʉꞌantat. Pakchowaxan, namabʉꞌan, japabʉꞌan kolelelje duiyaxaelam. Cuarenta y cinco centímetrowaxael pakchowaxpox kaelel. Cuarenta y cinco centímetrowaxael pakchowaxpox asalel.

14 “¡Isaxaelambej kaes kolebʉꞌan thʉch oswaliajwam tajcarpabamatwʉajxot! ¡Kaebʉꞌ isaxaelam carnerobʉꞌan, joelim pasoetat! ¡Asabʉꞌbej isaxaelam chiekal chimiabʉꞌan! Japabʉꞌ thʉch osliajwamsik.

15 “¡Tawaꞌkaxaelambej acacianaechan tawlafachanliajwa! Japi tawlafachan tajcarpabaliajwa. ¡Matnoch chiekal noeyaxaelam, tawlafachan! 16 Japi tawlafachan pakchofachanpox cuatro metros y mediowaxael. Pinjiafpox sesenta y cinco centímetrowaxael. 17 ¡Puexa japi tawlafachan Dios pejcarpabaliajwa, tawlafachan matduilaxanxot thaklaxaelam, me-ama koletʉakje wʉt, jachiliajwa, chiekal nalianoeflaliajwa pejbasanwʉajanxot! Puexa japi tawlafachan Dios pejcarpabaliajwa, ¡japoxlap jakichiyaxaelam! 18 Tawlafachan tawaꞌklam wʉt, ¡tawaꞌklaxaelam veinte tawlafachan noeflaliajwa surlel! 19 ¡Cuarenta basan isdaxaelam platatat japatawlafachanbʉxfalxot noeliajwa. Kaenanʉla tawla kolebasanaxael bʉxfalxot, koletʉakjeliajwapox!

20 “Malap-is jachiyaxaelam asalel tajcarpabaliajwa. Samata, tajcarpaba nortelel noeflaliajwa, tawaꞌklaxaelam veinte tawlafachan. 21 ¡Isaxaelambej cuarenta basan platatat! Kaenanʉla tawlabʉxfalanxot, jaxot kolebasanaxael. 22 Tajcarpaba tʉaksoꞌjil lelliajwa, pej-oestelelliajwabej, ¡tawaꞌklaxaelam seis tawlafachan! 23 ¡Kaes koliafje tawaꞌklaxaelam tʉaksoꞌpijfliajwa! 24 Japakoletawla nosliajwa kae-izquinaxot. Asatawla nosaxaelam asa-izquinaxot athʉpijaxliajwa, matxoela pej-argollapijaxliajwa. Jachiyaxaelam koletawla, matxoelapijax, tʉaksoꞌtpijaxliajwa.

25 Ja-aech wʉt, tajcarpaba pejtʉaksoꞌlel dieciseis basaliajwa ocho tawlafachanliajwa. Kaenanʉla tawla pejbʉxfalel kolebasanliajwa.

26 ¡Isaxaelambej cinco acacianaeyan xatdelaliajwa nortelel tajcarpabaxot! 27 ¡Isaxaelambej cinco acacianaeyan xatdelaliajwam surlel tajcarpabaliajwa! ¡Isaxaelambej cinco acacianaeyan xatdelaliajwam oestelel, tajcarpaba pejtʉaksoꞌxotaliajwa!

28 Xatdelsat, patupijt, xajoelaxaelam wʉt, we-enlel xenjaliajwade. 29 Do jawʉx, ¡japatawlafachan orofachan matxafafaxaelam! ¡Isaxaelambej oro-argolla japawʉajan poxade xajoelaliajwa xadelanpotxot! ¡Xatdelanpotxotbej matxafafaxaelam orofachan! 30 Do jawʉx, ¡duiliajwa tajcarpaba, me-ama xam itpaeix ampamʉaxxot!

31 “¡Linomʉa, tres colores jʉchpitat, baeyaxaelam! Kaecolor moradomʉataxael. Asacolor púrpuramʉataxael. Asacolor pasoeimʉataxael. Japalinohilomʉatxot kolenje, ángel, ael-isam wʉt, ¡baeyaxaelam! 32-33 Do jawʉx, ¡cuatro acacianaeyan-oeftat japalinobʉꞌ dusaxaelam oro-ganchanxot! ¡Japanaeyan matxafafaxaelam orofachan! ¡Kaenanʉla japanaeyan pejbasan isaxaelam platatat! Japalinobʉꞌfʉletleldik esaxaelam tajbaúl. Ja-am wʉt, nakolsaxael kolepieza japabʉꞌtat. Kaepiezaxot pawʉlaxael Lugar Santo. Asapiezax pawʉlaxael Lugar Santísimo. 34 Do jawʉx, ¡tajbaúl fakasaxaelam Lugar Santísimoxot! 35 ¡Mesa nosaxaelam Lugar Santopiezaxxot nortelel! ¡Candelabrobej chanosaxaelam japapiezax pejsurlel, mesa wʉajnalel!

36 “¡Linobʉꞌ baeyaxaelam japacarpabaxotaliajwa, jiw laleyaxlel dusliajwa! Japabʉꞌ bael wʉt, ¡baeyaxaelam, tres colores linomʉa, jʉchmʉatat! Kaecolor, ¡nej moradomʉata! Asacolor, ¡nej púrpuramʉata! Asacolor, ¡nej pasoeimʉata! Japalinobʉꞌxot, ¡baeyaxael, xabich kilachaemilpon, bael wʉt! 37 ¡Isaliajwa japalinobʉꞌ dusliajwam, cinco acacianaeyanxot, orofachan matxafafaspixot! Japanaeyan kaenanʉla pejganchowaxael, orotat isaspi, duiliajwa naeyan-oefxot. Jofaxaelambej bronce isliajwam cinco basan japacinco naeyan noeliajwa.