Génesis
Dioslap tulaelt ampathat, thatbaxobej
1
Akaseskolaxtat, tʉadut wʉt, ampathat, thatbaxobej chiekal ijil. Jawʉt, Dioskal. Do jawʉt, Dioslap tulaelt that, thatbaxobej.2 Akaseskolaxtat Dios tulaelt wʉt that, japox that kabʉanchi-elfʉkox, me-ama amwʉtjel. Thatxot chiekal ijil. Thatmatwʉajtat chiekal minkalfʉk. Japoxthatlap xabich min fʉniachkolaxtat okpox. Minmatwʉajtat xabich itkʉaꞌnik. Itliakax chiekal ijil. Jawʉt, Dios pej-espíritu dach daduili min matwʉajtat.
3 Do jawʉx, Dios jʉm-aech ampox: “¡Nej nalaels itliakax!” —aech Dios.
Do jawʉt, chalechal itliakax nalaelt itliakaliajwa that. 4 Dios taen wʉt itliakax, xabich pachaempox, Dios pejlel dijan itliakax. Itkʉataxbej pejlel dijanpon. 5 Dios japox is wʉt, jʉm-aechon ampox: “Itliakax pawʉlaxael ‘matkoi’. Itkʉatax pawʉlaxael ‘madoi’” —aech Dios. Jasoxtat Dios tulaelt that matxoelamatkoitat.
6-7 Dolisidoꞌ, segundo-matkoi wʉt, Dios jʉm-aech ampox: “¡Nej nadiajneꞌ marmin! ¡Japamin, namanaliajwa thatbaxoxotse!” —aech Dios.
Dios japox jʉm-aech wʉt, marmin nadijan koloeyaxliajwa, asamin namanaliajwa thatbaxoxotse, asamin namanaliajwa marxot ampathatxotbej.
8 Dios wʉlduw xanjʉpax namanpox athʉxotse “thatbaxo”. Jasoxtat Dios tulaelt japoxan segundo-matkoi.
9-10 Do kandiawa wʉt, tercer-matkoi wʉt, Dios jʉm-aech ampox: “¡Sat nej nakolsman marxot!” —aech Dios satliajwa, marxotdikpox.
Jawʉt, sat pinjiyax nakosin marxotsin. Japoxlap Dios wʉlduw “that”. Pinjiyax min kaweta namanpox. Japoxbej Dios wʉlduw “mar”.
Dios taen puexa chiekal wepachaemspox tulaeltpoxan. 11 Do jawʉt, Dios toꞌa nejmach naboelaliajwa, pa-ʉthanpi, naechan pabaechanpiliajwa. Jawʉt, jʉm-aechon ampox: “¡Puexa chiekal naboelim, nejmachpa-ʉthanpiliajwa, naechan nejmachpabaechanpiliajwabej!” —aech Dios, japoxan toꞌa wʉt.
Jasoxtat Dios jʉm-aech wʉt, puexa chiekal naboela. 12 Thatxot xabich nejmach naboela pa-ʉthanpiliajwa. Xabich nejmachbej naboela pabaechanpiliajwa. Dios japoxan taen wʉt, xabich nejchachaemilon, puexa chiekal pachaem xot. 13 Jasoxtat Dios tulaelt tercermatkoitat. 14-15 Do kandiawa wʉt, cuartomatkoitat wʉt, Dios pejme jʉm-aech ampox: “¡Naduꞌe juimt, matkoipijnamliajwa, thatbaxoxot pomatkoicha itliakaliajwam! ¡Naduꞌebej juimt, madoipijnamliajwa, itliakaliajwam madoi! Jasoxtat japox koloeyax Dios diajan. Juimt matkoipijinliajwa itliakaliajwa matkoi. Juimt madoipijinliajwabej itliakaliajwa madoi. Jasoxtat jiw chiekal matabijsaxael xajuiliajwa matkoiyan, waechanbej, fiesta-matkoiyan wʉtbej” —aech Dios.
Jasox Dios jʉm-aech wʉt, puexa chiekal ja-aechlisox. 16 Do jawʉx, Dios tulaelt koloeyax itliakax. Pinjiyaxpox itliakaliajwa matkoi. Cha-aexpi itliakaliajwa madoi. Isbejpon itthaej. 17-18 Puexa japoxan Dios duwpon thatbaxoxot japi duilaliajwa jaxot. Samata, juimt matkoipijin thatbaxoxot itliaklison matkoi. Juimt madoipijin, itthaejbej, thatbaxoxot itliaklisi madoi. Dios japoxan taen wʉt, xabich nejchachaemil, puexa chiekal pachaem xot. 19 Jasoxtat Dios is cuarto-matkoi wʉt.
20 Kandiawa, quinto-matkoi wʉt, Dios jʉm-aech ampox: “¡Nejmachbaxibej nej xabicha, laepaxaelpi mintat! ¡Nejmach mia nej xabichabej, papunaxaelpi!” —aech Dios japoxanliajwa.
Do jawʉt, puexa japoxan chiekal ja-aechlisox. 21-22 Ja-aech Dios nejmachbaxi xabichaliajwa, pinbaxi. Jawʉt, Dios toꞌa japi choef naxʉwlaliajwa xabich xajʉpaliajwapi mar. Dios tulaeltbej nejmachmia xabichaliajwa, puexa papunpi. Jawʉt, Dios toꞌa puexa japi naxʉwlaliajwa xajʉpaliajwapi that. Dios pajut taen wʉt japon ispoxan, xabich nejchachaemilon, puexa chiekal pachaem xot. 23 Jasoxtat Dios is quinto-matkoi wʉt.
24 Kandiawa wʉt, sexto-matkoi wʉt, Dios jʉm-aech: “¡Nej xabicha nejmachchoef thatxot, jiw thinaxaelpi choef, tathoetpijiwbej, baxotat laepibej!” —aech Dios nejmachchoef xabichaliajwa.
Puexa japoxan chiekal ja-aechlisox. 25 Jasoxtat Dios pijaxtat nejmachchoef xabichlisi. Dios puexa japoxan taen wʉt, xabich nejchachaemilon, puexa chiekal pachaem xot.
26 Do jawʉt, Dios jʉm-aech ampox: “Isaxaes aton. Me-ama xatis nejchaxoes wʉt, jachiliajwa japon aton. Japon aton mamnikaxael puexa choefliajwa, baxiliajwa, papunpiliajwa, namamiachaxaespiliajwabej, tathoetpijiwbej, baxotat laelpibej” —aech Dios.
27 Japamatkoi wʉt, Dios is aton, pawisbej. Japi, me-ama Dios pajut wʉt, ja-aechi.
28 Do jawʉt, Dios jʉmdut kajachawaesliajwa japi. Jʉmdut wʉt, jʉm-aechon ampox japixot: “¡Xamal xabich naxʉwalde xabichliajwa naxi, that xajʉpaliajwapi, japi nabichliajwasat! ¡Mamnikaxaelam puexa baxiliajwa, papunpiliajwabej, puexa nejmachchoefliajwabej!” —aech Dios japixot.
29 Do jawʉt, Dios pejme jʉm-aech ampox japixot: “¡Chiekal najʉmtaem! Xamal nejmach chaxduwx pa-ʉthpi, pafupibej, xaeliajwam. Chaxduwxbej puexa nejmachnaebaechnaechan baechxaeliajwam. 30 Pelax, choef, tathoetpijiw, baxotat laelpi, papunpibej, japi chaxduwx xaeliajwa pola, nʉaf-ʉafbej” —aech Dios japixot.