Éxodo
Israelitas xabich nabijatpox Egipto tʉajnʉxot
1
1-2 Jacob, chijia wʉt paxi sʉapich, Canaán tʉajnʉxot pati Egipto tʉajnʉxot. Do jawʉx, Egipto tʉajnʉxot Jacob paxilap kaenanʉla pejmʉtanlisi. Jacob paxi ampilape. Kaen pawʉl Rubén. Asan pawʉl Simeón. Asan pawʉl Leví. Asan pawʉl Judá. 3 Asan pawʉl Isacar. Asan pawʉl Zabulón. Asan pawʉl Benjamín. 4 Asan pawʉl Dan. Asan pawʉl Neftalí. Asan pawʉl Gad. Asan pawʉl Aser. 5 Jacob paxi, pamojiw sʉapich, puexa nakolti, setenta jiw. José chajia wʉajna duk Egipto tʉajnʉxot.6 Do baxael, José, pakoew sʉapich, japi pejwathoꞌbej, puexa chiekal tʉpi Egipto tʉajnʉxot. 7 Jacob pamojiw, japi israelitas, xabich paxipi. Do baxael, xabich pin-iskola wʉt, pinamʉtlisi, japi xabichlisi Egipto tʉajnʉxot. Ja-aech wʉt, Egipto tʉajnʉpijiwliajwa israelitas chachoellisi.
8 Do baxael, xabich pin-iswaechan wʉt, asan faraón wʉt Egipto tʉajnʉxot, japon is-el chajiakolaxtat José ispox Egipto tʉajnʉpijiw kajachawaet wʉtron tʉpa-elaliajwa pejlit. Dolis japon faraón jʉm-aech ampox Egipto tʉajnʉpijiwliajwa: 9 “¡Chiekal nanaeweꞌe! Israelitas kaes xabich pin-iskola. Me-ama xatis jachi-eli. Samata, japi chachoellisi xatisliajwa. 10 Xatis asax nejchaxoelaxaes isliajwas japiliajwa, xabich kaesasamata israelitas paxi wajtʉajnʉxot nalaelafʉl. Asatʉajnʉpijiw nakchakifʉlaen wʉt, do jawʉtbej, israelitas kaenejchaxoelxael, xatis nakchakifʉlaeliajwa asatʉajnʉpijiw sʉapich.” Do ja-aech wʉt, israelitas chijiyaxael wajtʉajnʉxot.
11 Samata, Egipto tʉajnʉpijiw, paklochiw, japilap xabich nabichax toꞌapi israelitas. Ja-aech wʉt, israelitas kitoꞌas isliajwa paklowaxan Egipto tʉajnʉxot. Kaepaklowax pawʉl Pitón. Asapaklowax pawʉl Ramsés. Japapaklowaxanxotlap faraón toꞌa paklochiw naxaeyaxan cha-owaliajwa. 12 Pe israelitas xabich toꞌas wʉti nabichliajwa Egipto tʉajnʉpijiwliajwa, ja-aech wʉt, xabich kaesfʉlpi paxi Egipto tʉajnʉxot. Ja-aech wʉt, Egipto tʉajnʉpijiw xabich kaes pejlewlapi israelitasliajwa.
13 Egipto tʉajnʉpijiw pejlewla wʉti, esclavos kiladofaslisi israelitas xabich tanbichliajwapi Egipto tʉajnʉpijiw. 14 Israelitas xabich nabijat, xabich tatoꞌlas xoti bʉx-as juꞌaliajwa adobes isliajwa. Japi adobes, me-ama ladrillos bachan isliajwa. Israelitas toꞌasbej nabichliajwa lulanxot, satanxotbej, choef tataeflaliajwa. Israelitas japoxan nabist wʉt, tatoꞌlas chinax beltae-esalpoxta, xabich babijaxtatbej tatoꞌlas. 15 Do, ja-aech wʉtbej, faraón wʉlala koliowje israelitaswathoꞌ. Kaeow pawʉl Sifra. Asaow pawʉl Fúa. Japi koliowje israelita wathoꞌ. Japilap kajachawaesaxael israelitaswathoꞌ, naxʉw wʉt. Japi wathoꞌ pat wʉti faraónxot, faraón jʉm-aech ampox japi koliojeliajwa:
16 —Xamal koliowam, kajachawaesaxaelam israelitaswathoꞌ, japi naxʉlwal wʉt, ¡chiekal taefʉlde, yamxi nalaela wʉt! Pawisch wʉt, ¡nabej boesa-am! Pelax, poeich nalaelt wʉt, ¡Kamta boesam! —aech faraón kitoꞌa wʉton japi wathoꞌ.
17 Pe japi wathoꞌ pejlewla xoti Diosliajwa, be-eli yamxi poejiw nalaela wʉt faraón kitoꞌas wʉti. 18 Do jawʉx, japox faraón wʉltaen wʉt, toꞌapon japi, wathoꞌ koliowje, wʉlalaeliajwas. Pat wʉti faraónxot, japon jʉm-aech ampox japi wathoꞌliajwa:
—¿Ma-aech xotkat xamal be-emil, yamxipoejiw nalaela wʉt? —aech faraón japi wathoꞌliajwa.
19 Japi wathoꞌ jʉmnot wʉt, jʉm-aechi ampox faraónliajwa:
—Israelitaswathoꞌ, me-ama Egipto tʉajnʉpijiwwathoꞌ, jachi-el. Japi wathoꞌ kaes pejme mamnik. Xanal tajpasax wʉajna kaewʉtje kamta israelitaswathoꞌ naxʉwal. Samata, xanal xajʉpa-enil puexa kamta kaewʉtje taeflaliajwan, yamxi nalaela wʉt —aech japi wathoꞌ faraónxot.
20-21 Do ja-aech wʉt, israelitas xabich kaes pin-iskolafʉlisi. Samata, japi wathoꞌ pejlewla xoti Diosliajwa, Dios kajachawaechpi japi wathoꞌ xabichaliajwa paxi. 22 Pe faraón puexa Egipto tʉajnʉpijiw toꞌa wʉt, jʉm-aechon ampox: “Puexa yamxipoejiw, israelitas paxi, nalaela wʉt, ¡pelmik Nilonawel poxadik! Pe, yamxiwathoꞌ nalaela wʉt, ¡nabej pels Nilonawel poxadik!” —aech faraón, toꞌa wʉton puexa Egipto tʉajnʉpijiw.