Moisés nalaeltpox
2
Japamatkoiyan wʉt, Leví pamon fiton pijow. Japowlap-is Leví pamow, israelita-atow. 2 Do baxael, moejow wʉt, naxʉwalow. Faenow paxʉchpoich. Paxʉch xabich chamiach, taen wʉtow paxʉch. Do jawʉt, paxʉch moestow tres juimtje. 3 Tres juimtje moest wʉtow paxʉch, do kaes tampoelisox japow moechliajwa paxʉch. Do jawʉt, fitlisow kanasto, baespox juncotonantat. Xapapeꞌenlisow pindaernaeltat japoxkanasto min lesamata. Xapapeꞌnax kitoet wʉt, oklisow paxʉch japakanastotuchadik, nawelxot chadusliajwa. Jasox ki-aechow Nilonawelxot, juncotonan nuilxot chadusliajwa mintat. Japajunco, me-ama muifʉrtʉa wʉt, jakabʉan-aech. Pe asatʉatan, rixjil juncotonan chiekal papowan, me-ama muifʉrtʉa ja-aechi-el. Japijuncoton, pokchowtotan. 4 Do jawʉt, jʉm-aechow ampox paxʉlowxot: “¡Nakoewch atʉaxach chatataefʉlde, achax jachiyaxael nakoewchliajwa!” —aechow toꞌa wʉt paxʉlow.5 Do jawʉx, baxael wʉtlejen, faraón-paxʉlow fʉlaekow naweladik nawaeliajwa. Jawʉt, pamakwathoꞌ mathʉn nawelbabʉꞌ. Jawʉt, faraón paxʉlow, chalechkal taenow kanasto, chaduk wʉt juncotonan nuilxot. Do jawʉt, faraón-paxʉlow toꞌa pamakow xalaeliajwadin japoxkanasto japow poxadin. 6 Pamakow japakanasto fat wʉt, taenow xaljamch, kanastotutat ok wʉt. Jawʉt, japoch xaljamch xabich nowpoch. Do jawʉt, faraón paxʉlow xabich beltaen japoch xaljamch. Samata, jawʉt, jʉm-aechow ampox:
—Ampoch xaljamch hebreo-atoch —aech faraón paxʉlow.
7 Jawʉt, xaljamch pakoewow jʉm-aech faraón paxʉlowxot:
—¿Xamliajwakat pachaem xan wʉljaesaliajwan hebrea-atow, ampoch xaljamch miasliajwas? —aech xaljamch pakoewow.
8 Faraón paxʉlow jʉm-aech xaljamch pakoewowliajwa:
—¡Xabʉaꞌde, hebrea-atow wʉljaesliajwam! —aech faraón paxʉlow.
Do jawʉt, yamxʉch pakoewow fʉlaechlisow pen wʉljaesliajwa. 9 Pen bʉꞌpat wʉtow faraón paxʉlowxot, faraón paxʉlow jʉm-aech yamxʉch penliajwa:
—¡Ampoch yamxʉch xan nawemiasaxaelam! ¡Nawechaxtiꞌaxaelambej! Xam chiekal mosaxaelen nawechaxtiꞌa-om —aech faraón paxʉlow yamxʉch penxot.
Do jawʉt, japow bʉflaech paxʉch chaxtiꞌaliajwa, faraón paxʉlow paxʉlanliajwa. 10 Do baxael, xaljamch chiekal tiꞌt wʉt, japow wiat faraón paxʉlowxot, me-ama paxʉlankolan wʉt, jachiliajwa faraón paxʉlow yamxʉlanliajwa. Do jawʉt, faraón paxʉlow nejchaxoel wʉt, jʉm-aechow ampox: “Xan chafitx mintat. Samata, wʉlduwx yamxʉch aMoiséswʉltat” —aechow, nejchaxoel wʉt.
Moisés najaetpox Egipto tʉajnʉxot
11-12 Do baxael, Moisés patiꞌin wʉt, fʉlaechon taeliajwa pejjiw, israelitas, japilap hebreos. Jawʉt, taenlison israelitas xabich nabistpox. Taenbejpon Egipto tʉajnʉpijin, ba wʉt hebreo-aton. Do jawʉt, Moisés nejchaxoel chamamosliajwa. Samata, jawʉt, Moisés chiekal nataelanatadiajtpon chiekal taeliajwa. Do jawʉt, jaxot chiekal asew jiw ijil. Samata, jawʉt, Moisés boesapon Egipto tʉajnʉpijin. Jawʉt, mʉthton thaejtat. 13 Do, kandiawa wʉt, Moisés pejme fʉlaech mathʉnaliajwa. Jawʉt, taenpon, nakae-israelita-aton naba wʉt. Samata, Moisés jʉm-aech ampox japi kolejeliajwa:
—¿Ma-aech xotkat xamal nakae-israelitas nabam? —aech Moisés.
14 Matxoelatʉadutpon nabeyax, japon jʉm-aech ampox Moisésliajwa:
—¿Xamkatlap paklonam, jueznambej xanalliajwa? ¿Xamkat nejchaxoelam xan-is naboesaliajwam, me-ama kaeliw Egipto tʉajnʉpijin boesam? ¿Xamkat-is jachiyaxaelam xanliajwa? —aech israelita-aton Moisésliajwa.
Moisés japox jʉmtaen wʉt, xabich pejlewlapon. Matabijtbejpon kitaenspox, boesa wʉt Egipto tʉajnʉpijin. 15 Faraón jʉmtaen wʉtbej Moisés boesapox Egipto tʉajnʉpijin, jawʉt faraón toꞌa pejsoldaw Moisés boesaliajwas, jaeltas wʉt.
Pe Moisés najaet Madián tʉajnʉ poxade, japatʉajnʉxotde dukaliajwa. Pat wʉton japatʉajnʉxot, minmʉthxot mox eklison.
16 Madián tʉajnʉxot dukon sacerdote-aton pejbaxot. Japon pawʉl Reuel. Japon siete paxʉlow, wathoꞌkal. Japamatkoitat, japi wathoꞌ bʉflaen japaminmʉth poxadin, pax pejew, oveja, min feyaxxot xalwʉajfalaliajwa min. 17 Do jawʉt, japaminmʉthxot japi wathoꞌ kitapae-esal min powaliajwa pejew oveja dʉajsliajwapi min. Poejiw, babejchiw, asew jiw pej-oveja tataefʉlpibej, pasiowlapi japaminmʉth. Minmʉthxotbej japi wathoꞌ chijiyax toꞌas. Jawʉt, japox taen wʉt, ekxot nanchapon kajachawaesliajwa japi wathoꞌ. Do jawʉt, japi wathoꞌ kajachawaetlison. Do jawʉtbej, Moisés pajut min powa dʉajsliajwa japi wathoꞌ pejew, oveja. 18 Do jawʉx, japi wathoꞌ kamta patlejen paxxot. Samata, pax wʉajnachaemt wʉt, jʉm-aechon ampox paxi wathoꞌliajwa:
—¿Ma-aech xotkat amwʉtjel kamta papatam xamal? —aech pax paxiwathoꞌliajwa.
19 Paxiwathoꞌ jʉmnot wʉt, jʉm-aechi ampox paxxot:
—Egipto tʉajnʉpijin, aton, nakajachawaet. Asew poejiw, oveja tataefʉlpi, min powax nakitapae-el wʉt, japon aton xanal nakajachawaet. Do jawʉt, japon aton pajut min powa oveja dʉajsliajwa xanal tataeflaxpi. Japon aton pajut min dʉajton oveja —aech japi wathoꞌ, paxxot chapaei wʉti.
20 Do jawʉt, pax jʉmnot wʉt, jʉm-aechon ampox paxiwathoꞌliajwa:
—¿Amxotkat japon aton? ¿Ma-aech xotkaton tamach pawaeltam japon aton? ¡Xabʉaꞌde kaxade wʉljaesliajwam japon aton! ¡Nej xabʉatapon naxaeyax xaeliajwa! —aech pax, paxiwathoꞌ toꞌa wʉt.
Do jawʉt, paxiwathoꞌ ow-aechi. Jawʉt, kaxadepi wʉljaesliajwa Moisés.
21 Moisés jaxot wʉt, ow-aechon dukaliajwa Reuel pejbaxot. Do baxael, Reuel kidut paxʉlow Moisésxot pijowliajwa. Japow pawʉl Séfora. 22 Do baxael, Séfora naxʉwal. Faenow poich. Moisés wʉlduw paxʉch Gersónwʉltat, Moisés jʉm-aech xot ampox: “Xan asatʉajnʉpijnan, asatʉajnʉpijiw pejtʉajnʉxotan” —aech xoton.
23-24 Do baxael, pin-iawaechan wʉt, rey Egipto tʉajnʉpijin tʉplison. Pe nakiowa, israelitas nabijasfʉl, esclavos xoti. Israelitas Dios kawʉajan kajachawaesliajwas. Dios jʉmtaen, japi kawʉajanpoxan. Ja-aech wʉt, Dios nejchafaet chajia jʉmdutpox Abrahamxot, Isaacxotbej, Jacobxotbej, kajachawaesliajwa japi pamojiw. 25 Dios taek wʉt japi, taenpon israelitas xabich nabijasfʉlpox.