Jesús pejwʉajan naexasiti bʉxfiachpox babejjamechan jʉmchisamata asew jiwliajwa
3
Takoew,
xamal chiekal matabijam,
xanal,
Jesús pejwʉajan naewʉajnaxpin,
babijaxan isaxaelen wʉt,
Dios xabich kaes xanal nakastikaxael.
Samata,
¡xamalxot nej xabicha-eleꞌ jiw,
naewʉajanpi Jesús pejwʉajan!
2 Puexa xatis isas pachaema-elpoxan asew jiwliajwa,
majt chiekal nejchaxoela-esal wʉt isliajwaspoxan.
Kaen aton jʉmchi-el wʉt kaejame,
pachaema-eljame,
asew jiwliajwa,
japon atonlap Diosliajwa chiekal pachaemaxael.
Japon aton pajut chiekal natataeflaxaelbej isasamata babijax.
3 Xatis kawaei kaechaxajoels freno.
Jatis wʉt,
pachaem kawaei xajiasliajwas,
chaflaesias poxade chaflaeliajwas.
4 Ja-aechbej pinjiyax barkamliajwa.
Timón cha-aelaxachpoxtat aton xajʉp xajiasliajwa barkam,
xabich pinajoewa wʉt,
chaflaesia poxade chaflaeliajwa.
5 Ja-aechbej jit.
Cha-aeljit wʉt,
xajʉp pinjiyax lul toejwaliajwa.
Ja-aechbej wajkaech-iaꞌan.
Xajʉp nejmach jʉmchiliajwas:
“Xan xajʉpx isliajwan pinjiyaxan” —chiliajwas asbʉan jʉmch wajkaech-iaꞌantat.
6 Wajkaech-iaꞌanbej,
me-ama jit,
tabejsaxaes xot asew jiw.
Wajkaech-iaꞌantat xabich jʉmtis babijaxan asew jiwliajwa.
Japox tʉaduws,
jams wʉt.
Amwʉtjelbej nakiowa jatisfʉlas.
Jachiyaxaes pomatkoicha ampathatat,
Satanás nakbʉxtoꞌapoxan naksiyas xot.
7 Jiw matabija nejmachchoef,
tathoetpijiw,
itfelaliajwa.
Samata,
tatoꞌal wʉti,
tathoetpijiw,
mia,
jom,
minpijiwbej,
japi choef jʉmtaenspi.
Naexasichbejpi.
8 Pe aton fiasaxil pejkaech-iaꞌt naksiya-elaliajwa pachaema-elpoxan.
Bʉxkofaxil babijaxan jʉmtispoxan.
Japoxan asew jiwliajwa,
me-ama jombʉaꞌnael wʉt,
ja-aechox.
Samata,
asew jiw xabich tabejtas.
9 Xatis jʉmtis wajkaech-iaꞌantat waj-ax Diosliajwa:
“Xam xabich pachaemam” —tis.
Do jawʉx,
jʉmtisbej wajkaech-iaꞌantat babejjamechan asew jiwliajwa,
japi jiw isaspi Dios,
me-ama Dios wʉt,
ja-aechpi.
10 Wajkaech-iaꞌantat jʉmtis chimiajamechan Diosliajwa.
Do jawʉtbej,
jʉmtisbej babejjamechan asew jiwliajwa.
Takoew,
xatis japoxan jʉmchiyaxisal asew jiwliajwa.
11-12 Satlel min nakakolsanxot,
jaxot chimiamin nakakolsan.
Jaxot nakola-el xasaxamin.
Ja-aechbej mʉthasi.
Higonae naboet wʉt,
japanaexot naboes-el asabaech.
Uvanaechanxotbej naboes-el asabaech.
Me-ama japox ja-aechbejlap-is wajkaech-iaꞌan.
Chimiajamechan jʉmtis wʉt,
kamta kaewʉtje,
jʉmchiyaxisal babejjamechan.
Dios pijax, matabijsax, kaes pejme pachaempox xatis matabijaliajwas
13 Xamalxot kaen aton xabich matabijsan wʉt,
¡japon nej is pachaempoxan!
¡Japon nej nejchaxoelebej:
“Xan kaes pachaema-enil.
Me-ama asew jiw,
jachi-enil” —nej aechepon,
nejchaxoel wʉt!
14 Xamal asew jiw nusasiowlam wʉt,
kaes paklonasiam wʉtbej,
ja-am wʉt,
asew jiw matabijaxael diachwʉajnakolax xamal matabija-emilpim.
15 Xamal asew jiw xabich nusasiowlam wʉt,
kaes paklonasiam wʉtbej,
japoxan Dios toꞌa-el.
Ja-am wʉt,
nejchaxoelaxaelam ampathatpijiw nejchaxoelpox.
Ja-amwʉtbej,
nejchaxoelaxaelam,
me-ama Satanás toꞌa xamal nejchaxoelaliajwam.
16 Xamal asew jiw nusasiowlam wʉt,
kaes paklonasiam wʉtbej,
jachiyaxaelam wʉt,
xamal kaenejchaxoelaximil.
Isaxaelambej puexa nejmach,
chaemilpoxan.
17 Jiw matabijapi Dios pijax matabijsax,
japi jiw chiekal duil,
me-ama Dios nejxasink japi duilaliajwa.
Duil wʉt,
nabe-eli,
asew jiw sʉapich.
Japibej talias-el asew jiw.
Nejchaxoelbejpi naexasisliajwa asew jiw tatoꞌalpoxan.
Japibej beltaen,
asew jiw nabijat wʉt.
Jiw kajachawaet wʉtbejpi,
puexa jiw chiekal kajachawaeti.
Naekichachajba-elbejpi asew jiw.
Isbejpi pachaempoxan asew jiwliajwa.
18 Aton chiekal duk wʉt,
asew jiw sʉapich,
japon naewʉajan wʉtbej asew jiw chiekal duilaliajwa,
ja-aech wʉt,
japi jiw chiekal duilaxael.