Jesús pejwʉajan naexasiti, japi puexa jiw chiekal sitaeyaxaelpox
2
Takoew,
xamal xanaboejam wajpaklon Jesucristo,
xabich pachaempon.
Samata,
¡xamal puexa jiw sitaem!
¡Nabej mastaeleꞌ asew jiw!
2 Xamal culto isam wʉt,
jaxot kimaeyan pasaxael.
Japon xabich oro-anillos kothiyaxajoeyaxael.
Japon xabich naxoelaxael chamoeyax.
Do jawʉt,
kijilan jaxot pasaxael.
Japon naxoelaxael pachaema-elpox.
¿Xamal machiyaxaelamkat,
japi kolenje bʉꞌkʉlam wʉt?
3 Jawʉt chiekal bʉꞌkʉlaxaelam kimaeyan.
Japon toꞌaxaelam ekaliajwa tʉa-ekax,
kaes chamoeyaxtat.
Kijilanlax nukax toꞌaxaelam.
Ja-el wʉt,
toꞌaxaelampon satat ekax.
Xamal ja-am wʉt,
isaximil pachaempox Diosliajwa.
4 Japi kolenjeliajwa kaeyax nejchaxoelaximil.
Xamal sitaeyaxaelam xabich naxoelpon chamoeyax.
Asan sitaeyaximil.
Japox ja-am wʉt,
jadoꞌ japox pachaemaxil.
5 Takoew,
xamal nejxasinkaxpim,
¡xan lelxpox xamal chiekal naexasisfʉlde!
Dios makanot jiw kijila japon naexasisliajwapi.
Ja-aech wʉt,
japi jiw Diosliajwa kimaenk wʉt,
ja-aechi.
Japi tapaeyaxaes pomatkoicha duilaliajwa japonxotse,
me-ama Dios jʉmdut jiwliajwa,
Dios nejxasinkpiliajwa.
6 Xamal chiekal bʉꞌkʉla-emil wʉt kijila,
ja-am wʉt,
diachwʉajnakolax xamal sitae-emil kijila.
¡Xamal najut nejchaxoelde kimaeya pijaxtat xamal nabijatampoxan,
bʉflaech wʉti jueces poxade,
jaxotde xamal tasalaliajwapi!
7 Japi jiw jʉm-aechbej babejjamechan Jesúsliajwa,
japon xabich pachaempon.
Xatis japon pejjiws.
8 Dios pejjamechan,
chajia lelspox,
jʉm-aech wʉt,
jʉm-aechox:
“¡Nejxasinkde asew jiw!
Me-ama xam najut nanejxasinkam wʉt,
¡ja-amde asew jiwliajwa!”
—aechox.
Xamal diachwʉajnakolax jasox ja-am wʉt,
kaes pejme pachaempox isaxaelam.
9 Asew jiw chiekal sitaenam.
Pe asew jiw chiekal sitae-emil wʉt,
ja-am wʉt,
xamal is-emil Dios nejxasinkpox.
Isaxaelam babijax.
Ja-am wʉt,
nejbʉꞌwʉajnaxaelam Diosliajwa,
puexa jiw chiekal sitae-emil xot,
Dios japox toꞌa wʉt.
10 Aton naexasisfʉl wʉt Moisés chajia lelpox,
pe japon aton kaeyax weweꞌpas wʉt naexasisliajwa,
japox weweꞌpas xot naexasisliajwa,
japon aton pejbʉꞌwʉajnaxael Diosliajwa.
Ja-aech wʉt,
japon aton,
me-ama puexa chiekal naexasis-elon Moisés chajia lelpox,
jachiyaxaelon.
11 Dios pajut chajia jʉm-aech:
“¡Nijow nabej naebʉꞌmoejs asew wathoꞌ!”
—aech Dios.
Dios jʉm-aechbej wathoꞌliajwa:
“¡Nabej naebʉꞌmoejs nejmol asew poejiw!”
—aech Dios.
Dios jʉm-aechbej:
“¡Nabej beꞌ asew jiw!”
—aech Dios.
Aton pijowpon,
japon asew wathoꞌ naebʉꞌmoejs-el wʉton pijow,
pe japon aton,
asan aton boesa wʉt,
ja-aech wʉt,
japon aton nakiowa pejbʉꞌwʉajan Diosliajwa.
Ja-aech wʉt,
japon aton Diosliajwa,
me-ama puexa Moisés chajia lelpox chiekal naexasis-el wʉt,
ja-aechon.
12 Xamal chiekal isam wʉt Dios toꞌapox,
ja-am wʉt,
xamal bʉꞌwʉajanjilaxaelam Diosliajwa.
Chiekal naexasis-emil wʉt Dios toꞌapox,
ja-am wʉt,
Dios xamal kastikaxael.
Xamal jʉm-am wʉt,
¡jʉm-amde pachaempoxan!
¡Isdebej pachaempoxan asewliajwa,
Dios japox toꞌa xot!
13 Jiw beltae-el wʉt asew jiw,
Diosbej japi jiw beltaeyaxil,
asamatkoi,
Dios jiw babejchow kastika wʉt.
Jiw beltaenpi asew jiw,
japi jiw Dios kastikaxil,
pat wʉt kastikamatkoi.
Jesús pejwʉajan naexasiti isaxaelpox pachaempoxan
14 Takoew,
asew jiw asbʉan jʉmch jʉm-aech wʉti:
“Xan Jesús pejwʉajan naexasitx” —aech wʉti,
pe is-el wʉt pachaempoxan asew jiwliajwa,
japi jiw jʉm-aechpox pachaema-el Diosliajwa.
Japox jʉm-aech wʉt,
Dios bʉꞌweyaxisal japi jiw.
15-16 Xamal,
Jesús pejwʉajan naexasitampimxot,
asew jiw weweꞌpaxaes wʉt naxoeliajwa,
xaeliajwabej,
pe xamal asbʉan jʉmch jʉmchiyaxaelam wʉt japiliajwa:
“¡Chijiamde!
¡Dios xamal nej kajachawaes naxoeliajwam!
¡Dios nej chaxdui naxaeyaxan xamal xaeliajwam!”
—chiyaxaelam wʉt,
xamal jʉm-ampox pachaemaxil japi jiwliajwa.
17 Asew jiw jʉmchiyaxael wʉtbej asew jiwliajwa:
“Xanal chiekal naexasitx Jesús pejwʉajan” —chiyaxael wʉti,
pe japi jiw isaxil wʉtbej pachaempoxan asew jiwliajwa,
ja-aech wʉt,
japi jiw jʉm-aechpox Diosliajwa pachaemaxil,
isaxil xoti Dios jʉm-aechpox.
18 Kaen aton jʉmchiyaxael ampox:
“Jesús pejwʉajan naexasitixot asew is-el pachaempoxan asew jiwliajwa.
Asew,
Jesús pejwʉajan naexasitilax,
is pachaempoxan asew jiwliajwa” —chiyaxaelpon.
Japon aton japox jʉm-aech wʉt,
xan jʉmchiyaxaelen japon atonliajwa:
“Xatis chiekal matabijaxisal,
asew jiw diachwʉajnakolax naexasit wʉt Jesús pejwʉajan,
is-el wʉti pachaempoxan asew jiwliajwa.
Xanlax isfʉlax pachaempoxan asew jiwliajwa,
me-ama Dios natoꞌa japoxan isliajwan.
Ja-ansfʉlax wʉt,
jiw matabijaxael diachwʉajnakolax xan chiekal naexasitx Jesús pejwʉajan” —chiyaxaelen japon atonliajwa.
19 Xan pejme japon aton jʉmchiyaxaelenbej:
“Xam nejchaxoelam wʉt,
jʉm-am:
‘Dios kaen.
Kaes asan Dios ajil,
me-ama Dios,
jason’ —am wʉt,
japox diachwʉajnakolax.
Japox nejchaxoelam wʉt,
diachwʉajnakolax.
Depbej matabija,
Dios kaenpon.
Japi dep pejlewla xot,
tathʉlalbejpi Diosliajwa.
Pe nakiowa,
dep kofa-el babijaxan ispoxan asew jiwliajwa.
Samata,
xan matabijsaxinil,
diachwʉajnakolax xam chiekal naexasitam wʉt Jesús pejwʉajan.
Pe is-emil wʉt pachaempoxan asew jiwliajwa,
ja-am wʉt,
diachwʉajnakolax xam naexasis-emil Jesús pejwʉajan.
20 ¡Xam nabej nejliakleꞌ!
Xatis jʉmchiyaxaes wʉt:
‘Xan naexasitx Jesús pejwʉajan’ —chiyaxaes wʉt,
pe is-esal wʉtbej pachaempoxan asew jiwliajwa,
jatis wʉt,
xatis jʉmchiyaxaespox,
Diosliajwa japox pachaemaxil.
21 Wajwʉajnapijin Abraham is Dios kitoꞌaspox.
Samata,
paxʉlan xʉaꞌlaxael wʉton ofrenda isliajwa Diosliajwa,
ja-aech wʉt,
Abraham Diosliajwa bʉꞌwʉajanjilon.
22 Abraham naexasit Dios jʉmtispox.
Samata,
Abraham paxʉlan xʉaꞌlaxael wʉt,
ja-aech wʉt,
puexa jiw chiekal matabija Abraham diachwʉajnakolax chiekal xanaboejtpox Dios.
23 Samata,
Abraham is,
me-ama Dios pejjamechan,
chajia lelspox,
jʉm-aech wʉt,
jʉm-aechox japonliajwa:
‘Abraham naexasit Dios jʉmtispox.
Samata,
Abraham Diosliajwa bʉꞌwʉajanjilon’ —aechox.
Asew jiw chajiakolaxtat Abrahamliajwa jʉm-aech:
‘Abraham,
Dios pejnachalan’ —aechi” —chiyaxaelen japon atonliajwa,
xan jʉmnosaxaelen wʉt.
24 Samata,
puexa xatis matabijas,
aton xanaboejt wʉt Dios,
japon aton bʉꞌwʉajanjil Diosliajwa,
chiekal is xot Dios tatoꞌalpoxan.
25 Rahab pejbichax,
poejiw bʉꞌmoejsax plata kanaliajwa.
Japow asamatkoi is pachaempox,
chiekal bʉꞌkʉlt wʉtow kolenje,
israelitas,
pat wʉt Jericó paklowaxxot.
Japi chawʉajnataen asamatkoi nabeliajwa,
japapaklowaxpijiw sʉapich.
Rahab kajachawaet japi weliajwa padaelmajiwxot.
Asanʉamtade toꞌach besamatas padaelmajiw.
Japox is xot,
Rahabbej bʉꞌwʉajanjil Diosliajwa.
26 Jiw fakjola-el wʉt,
tʉpaxael.
Ja-aech wʉt,
kaes asaxan isaxilbejpi.
Xatisbej jatis,
puexa naexasichpis Jesús pejwʉajan.
Nejchaxoels wʉt:
“Xatis Jesús pejwʉajan naexasich” —chiyaxaes wʉt,
pe is-esal wʉt Dios naktoꞌapoxan,
jatis wʉt,
japox pachaemaxil Jesús pejwʉajan naexasichpoxliajwa.
Jachiyaxaes wʉt,
Diosliajwa xatis,
me-ama patʉpa wʉt,
jachiyaxaes.