Ampox carta xatoꞌas judíosliajwa, Jesús pejwʉajan naexasitiliajwa
Dios toꞌapox paxʉlan, japon naewʉajnaliajwa jiw
1
Chajiakolaxtat Dios pin-iaveces xabich bʉxtoꞌa pejprofetas,
japi profetas jʉmchiliajwapi wajwʉajnapijiw Dios bʉxtoꞌaspoxan.
Do jawʉx,
profetas naewʉajan wajwʉajnapijiw Dios bʉxtoꞌaspoxan.
2 Do baxael,
Dios toꞌa paxʉlan xatis naknaewʉajnaliajwa Dios matabijaliajwas.
Chajiakolaxtat Dios toꞌa paxʉlan isliajwa ampathat,
puexa thatbaxotatpibej.
Do jawʉx,
Dios paxʉlan toꞌa japon puexa japoxan tataeflaliajwa.
3 Dios paxʉlan xabich pachaempon.
Me-ama pax Dios xabich pachaem,
ja-aechbej paxʉlan.
Dios paxʉlan xajʉp puexa isliajwa jʉm-aechpoxtat,
mamnik xoton.
Puexa japon ispoxan ampathatat,
athʉxotsebej,
nakiowa amwʉtjel pachaemsfʉl japon pijaxtat.
Dios paxʉlan tʉp cruztat xatis babijaxan isaspoxan ajilaliajwa Diosliajwa.
Jawʉx chijialison athʉ poxase ekaliajwa pax poklalel,
japon sʉapich,
puexa tatoꞌlaliajwa.
Dios paxʉlan kaes pejme pachaempox, me-ama ángeles, jachi-elon
4 Dios paxʉlan kaes pejme pachaem.
Me-ama ángeles,
jachi-elon.
Dios tapaei paxʉlan puexa tatoꞌlaliajwa,
japon sʉapich.
Dios tapaeibej ángeles kaesʉapich tatoꞌlaliajwa.
5 Dios jʉm-aech paxʉlanliajwa:
“Xam taxʉlnam.
Amwʉtjel puexa jiw matabijaxael xam diachwʉajnakolax taxʉlnam” —aech Dios.
Dios jʉm-aechbej asew jiw chiekal matabijaliajwa japon paxʉlanliajwa:
“Xanlap japon paxnan.
Japon xan taxʉlan” —aech Dios.
Dios japox jʉmchi-el kaen ángelliajwa.
Dios japox jʉm-aech paxʉlankalliajwa.
Samata,
matabijas Dios paxʉlan kaes pejme pachaempon.
Me-ama ángeles,
jachi-elox.
6 Dios paxʉlan toꞌaliajwa wʉt ampathatlelsik,
jʉm-aechon ángelesliajwa:
“Xamal puexa brixtat nuilaxaelam taxʉlan pejwʉajnalel,
sitaeyaxaelam xot” —aech Dios ángelesliajwa.
7 Dios jʉm-aechbej:
“Taj-ángeles tajjamechan xananʉamspijwaxael asew jiwliajwa.
Ángeles pabisla.
Me-ama joewa wʉt,
ja-aech.
Japibej,
me-ama jitkaech-iaꞌan wʉt,
ja-aech jiw toejafaliajwa,
pejbʉꞌwʉajanpi xanliajwa” —aech Dios.
8 Dios jʉm-aech paxʉlan jʉmtaeliajwa:
“Xam Diosnam.
Tatoꞌlaxaelam pomatkoicha.
Xam puexa tatoꞌlam wʉt,
chiekal tatoꞌlaxaelam.
9 Xam nejxasinkam isliajwam pachaempoxan.
Xambej nejwesla isliajwam pachaema-elpoxan.
Samata,
xam makafitx tajaxtat kaes nejchachaemlaliajwam.
Me-ama nejnachala nejchachaemil wʉt,
xam jachiyaximil” —aech Dios paxʉlanliajwa.
10 Dios pejme jʉm-aech paxʉlanliajwa:
“Xam paklonam.
Isam ampathat,
puexa ajil wʉt.
Isambej thatbaxo.
11 Puexa xam isampoxan,
baxael,
paduj nadofaxael.
Me-ama padujnaxoe,
jachiyaxael japoxan,
asamatkoi,
puexa toep wʉt.
Pelax xam toepaximil,
pomatkoicha dukaxaelam xot.
12 Me-ama jiw truka padujnaxoe,
xambej asamatkoi jakichiyaxaelam thatbaxoliajwa,
ampathatliajwabej.
Do jawʉx,
pajelthatbaxo,
pajelthatbej,
xam isaxaelam.
Pelax xam,
me-ama amwʉtjel,
jachisfʉlaxaelam pomatkoicha,
xam toepaximil xot” —aech Dios paxʉlanliajwa.
13 Dios jʉmchi-el kaen ángelliajwa:
“¡Ekde tajpoklalel puexa jiw tatoꞌlaliajwam!
Nadaelmajiw malechaxaelen japi xam naexasisliajwa toꞌaxaelampox” —chi-el Dios pej-ángelesliajwa.
Pelax Dios japox jʉm-aech paxʉlankalliajwa.
14 Puexa ángeles,
japi espíritus.
Samata,
japi taeyaxisal.
Japi duil isfʉlaliajwa Dios tatoꞌalpoxan.
Japi toꞌas potʉajnʉcha kajachawaesliajwa jiw.
Japi jiw Dios bʉꞌweyaxaes.