2
Jasoxtat Dios chiekal toeton, tulaelt wʉt that, puexa thatatpibej. Dios chiekal toetlison, tulaelpoxan thatbaxo, puexa thatbaxotatpibej. 2 Sexto-matkoi toep wʉt, Dios kaes is-ellison. Japamatkoi wʉt, Dios kaes tulaels-eliso. Kaes tulaels-el, puexa tulaeltpoxan chiekal toet xotlison. 3 Do jawʉt, Dios jʉm-aech ampox: “Xan puexa tulaeltax wʉt, seis matkoiyan wʉt puexa chiekal toetx. Séptimo-matkoi wʉt, do kaes tulaelsaxinil. Ampamatkoi, napachaxaelen. Samata, séptimo-matkoi wʉt, pachaem puexa jiwbej napataliajwa, sitaeliajwa japamatkoi” —aech Dios. Do jasoxtat, Dios tulaelt ampathat, thatbaxobej.Ma-aechpox Dios is wʉt matxoelapijin, aton, japon pijowbej
4-5 Akasestat, Dios lulaelt wʉt ampathat, thatbaxobej, iam chiekal ijilfʉk ampathatxot. Samata, jawʉt, ijilfʉk nejmachnaechan naboelapi, polabej. Ijilbej jiw nabichliajwa sat. 6 Pe nakiowa, min nakakolsan satlelsin japaminan fʉlaeliajwa posata paesnikaliajwa.
7 Do jawʉx, Dios asthumba koecha wʉt aton kiladofapon wʉton. Aton isax toet wʉt, Dios fumtafʉl japon aton fakjolaliajwa. Jasoxtat japon aton tʉadut fakjolaliajwa, laejaliajwabej. Japon atonlap pawʉl Adán.
8 Do jawʉx, Dios mʉtha chimialul japon atonliajwa. Japalul ok oriente-lel, Edén pawʉlxot. Dios toet wʉt japalul, Dios toꞌa Adán dukaliajwa japalulxot. 9 Jaxot xabich chimianaebaechnaechan chanuil. Japanaebaechnaechan xabich pachaem baechxaeliajwa. Japalultutat kolenaebaechnae chanuk. Japakolenaebaechnaexot chanuk, kaenaebaechnae jiw baech xael wʉt, pomatkoicha laelpaxaelpox jiw. Japi jiw japabaech xael wʉt, tʉpaxili. Asanae jiw baechxael wʉt, japi jiw matabijsaxael pachaempoxan isliajwa, babejnejchaxoelaxanbej is-elaliajwa babijaxan.
10 Edén pawʉlxot kaelajt, minlajt, nalaelt. Japalajtxotlap naebaechnaechan, chanuil lultat, chiekal pachaemsfʉl. Japaminlajt, cuatrolajtje natatakan. 11 Kaelajt, pawʉl Píson. Japalajt mox xabich jajial Havila pawʉlxot. Jaxotlap xabich maenk oro. 12 Japi-oro xabich pachaem. Jaxotbej, me-ama thunaelnaex kabʉan-aechpi. Japathunaelnaex xabich xabejchaem. Samata, thunael faeli. Jaxotbej iaꞌ, xabich ommaenkpi. Japi iaꞌ pawʉl ónice. 13 Segundo pejlajt, pawʉl Gihón. Japalajt mox xabich jajial Cus tʉajnʉxot. 14 Tercero minlajt pawʉl Tigris. Japalajt min fʉloek Asiria tʉajnʉ, orientelel. Cuarto minlajt pawʉl Éufrates.
15 Dios toꞌa Adán tataeflaliajwa japalul. 16 Dios jʉm-aechbej ampox Adánxot: “Xam xaesiam wʉt, ¡nejmachnaebaechnaechan baechxaeyaxaelam! 17 ¡Pelax, asanaebaechnae baechxaeyaximil! Japabaest xaelam wʉt, diachwʉajnakolax matabijsaxaelam, chimianejchaxoelaxan isliajwam, babejnejchaxoelaxanbej is-elaliajwam. Xaelam wʉt, diachwʉajnakolax tʉpaxaelam”a —aech Dios Adánxot.
18 Do jawʉx, wajpaklon Dios nejchaxoel wʉt, jʉm-aechon ampox: “Pachaema-el aton chiekal tamachaliajwa. Samata, isaxaelen pejkachawaesan, japon aton kajachawaesliajwas” —aech Dios, nejchaxoel wʉt Adánliajwa. 19-20 Dios chajia puexa choef islison, puexa nejmachmia, papunpibej. Do jawʉt, Dios puexa nejmachchoef bʉꞌpaton Adánxot, Adán kaenanʉla japi choef wʉlduiliajwa. Do jawʉt, Adán taen wʉton choef, kaenanʉla wʉlduwpon. Ma-ison ja-aech mialiajwa, choef, tathoetpijiwliajwabej. Kaenanʉla japi choef wʉlduwpon. Pe, puexa choefxot, chiekal ijil Adán pejkajakachawaesanliajwa. 21 Do jawʉt, Dios kitispon Adán xabich moejsliajwa. Me-ama tʉp wʉt, ja-aechon Dios pijaxtat. Ja-aech wʉt, Dios kut kaechena, Adán pejchenanxot. Jawʉt, Dios pejme wajelmatawaet. 22 Jawʉtlap, Dios is atow Adán pejchenatat, japon pijowliajwa. Adán nathikt wʉt, Dios itpaeispon japow. 23 Adán jʉm-aech ampox, japow taen wʉt: “Ampowlap diachwʉajnakolax isas tajchenakolaxtat. Me-ama xan, jakitispow. Samata, wʉlaxaelow ‘pawis’, Dios is xot japow xanxot” —aech Adán.
24 Samata, ma amwʉt, aton pijow fit wʉt, nakolsaxaelon paxxot, penxotbej, dukaliajwa pejlel, pijow sʉapich. Japi kolenje, me-ama kaen wʉt, ja-aechiyaxaeli.
25 Japamatkoiyan, Adán bʉꞌjʉmchalaejapon, pijow sʉapich. Pe japi kolenje matabijs-el padaeyax.