—¿Diachkatdoꞌ Dios jʉm-aech ampox xamal chiekal chanaekabʉana wʉt: ‘Puexa naebaechnaechan nabej baechxaeꞌ ampalulxoti’ —aechkat Dios? —aechlap jom Adán pijowxot.

2 Japow jʉmnot wʉt, jʉm-aechow ampox jomxot:

—¡Dios nakaechafias-el naebaech baechxaeliajwanpox! 3 Pe Dios jʉm-aech ampox: ‘Lultutat chanuknae, baechxaeyaximil. Baechjachaximilbej’ —aech Dios. Samata, japabaech jachax wʉt, xaelx wʉtbej, diachwʉajnakolax xanal tʉpaxaelen —aech Adán pijow jomxot.

4 Pe jom jʉm-aech ampox japowxot:

—Diachwʉajnakolax japox jachiyaxil xamalliajwa. Japabaech xaelam wʉt, xamal tʉpaximil. 5 Dios pajut chiekal matabijt, xamal japabaech xaelam wʉt, xabich kaes matabijsaxaelam. Me-ama Dios xabichmatabijt, xamallap-is jachiyaxaelam. Puexa matabijsaxaelam, chimianejchaxoelaxan isliajwam pachaempoxan, babejnejchaxoelaxanbej isliajwam babijaxan —aechlap jom Adán pijowxot.

6 Jom naksiyax bʉxtoet wʉt, japow natachaemtlison naebaech. Taen wʉtlisow japanaebaech, nejchaxoel wʉt, jʉm-aechow ampox: “Ampabaech chiekal chimiabaech. Pachaemkasdoꞌ xan xaeliajwan. Xasikasdoꞌ. Xan xaelx wʉt, puexa xabich matabijsaxaelen. Me-ama Dios puexa xabich matabijt, xankas-is jachiyaxaelen” —aechow, nejchaxoel wʉt nabaestliajwa.

Do jawʉt, kutlisow naebaest xaeliajwa. Xael wʉt, pamal xasalisow japabaest. Do jawʉtbej, Adán-is xael japabaest. 7 Jawʉtlap, japi kolenje pajut chiekal matabijt bʉꞌjʉmchalaelpox. Samata, higuera-ʉafan athowpi tʉachachiewaliajwa. Do jawʉt, tʉachachiewapi, xabich padala xotlisi.

8 Tuila wʉt, kaesʉapich wik wʉt, Adán, pijow sʉapich, thiataenpon Dios fʉlaenpox. Samata, japi dʉkp namoechaliajwa naechanxot, pejlewla xoti, naexasis-el xotbejpi Dios.

9 Do jawʉt, Dios wʉlalat wʉt Adán, me-ama matabijs-el wʉt, ja-aech Dios. Dios jʉm-aech ampox:

—Adán, ¿amxotamkat xam? —aech Dios.

10 Adán jʉmnot wʉt, jʉm-aechon ampox:

—Xan thiataenx wʉt xam fʉlaemanpox, jawʉt xan namoestax, tajlewla xot xamliajwa. Xanbej bʉꞌdala xam nabʉꞌtaeliajwam, xanal chiekal bʉꞌjʉmchalaelpax xot —aech Adán Diosliajwa.

11 Do jawʉt, Dios kawʉajnachaemt wʉt, jʉm-aechon ampox Adánliajwa:

—¿Achankat xamal chanaekabʉana bʉꞌjʉmchalaelpampox? ¿Achankat xamal chanaekabʉanabej nadalaliajwam? ¿Diachwʉajnakolaxkat xamal xaelam naebaech kaechafiatxbaest xae-elaliajwam? Chil xamal xae-emil wʉt, chil ja-am wʉt, ¡xamal najut matabijsaximil bʉꞌjʉmchalaelpampox! —aech Dios Adánliajwa.

12 Adán jʉmnot wʉt, jʉm-aechon ampox Diosliajwa:

—Xam nachaxdutampow, xan nakajachawaesliajwa, japow naxsal japanaebaest xan xaeliajwan —aech Adán Diosliajwa.

13 Do jawʉt, Dios wʉajnachaemt wʉt, jʉm-aechon ampox japowliajwa:

—¿Ma-aech xotkat xam japox isam? —aech Dios japowliajwa.

Japow jʉmnot wʉt, jʉm-aechow ampox Diosliajwa:

—Jom naekichachajba xan. Samata, xan xaelx japabaest —aechow Diosliajwa.

14 Do jawʉt, Dios jʉm-aech ampox jomliajwa:

—Xam naekichachajbam xot japow, kaes xabich nabijasaxaelam. Me-ama asew nejmachchoef, jachiyaximil xam. Ma amwʉt, pomatkoicha xam laejaxaelam baxotat. Xam japox pomatkoicha nejkabʉanaxael. Xaelam wʉt, asdaꞌax xaeyaxaelam —aech Dios jomliajwa.

15 Dios kaes jʉm-aech ampox asamatkoi jachiyaxaelpox jomliajwa:

—Xam nadaelman dofaxaelam japow. Ma-is japow padaelman dofaxael xam. Namojiwbej nejweslaxael japow pamon. Asamatkoi, xam tʉakjiꞌlaliklaxaelam japow pamon. Jasoxtat japow pamon nabijasaxael ampathatat. Pe nakiowa, japow pamon, xam matnaepaꞌchaxaelon. Jasoxtat xam kastikaxaelon pomatkoichaliajwa —aech Dios jomliajwa.

16 Do jawʉt, Dios kaes jʉm-aech asamatkoi jachiyaxaelpox japowliajwa:

—Xamlis isam babijax, naexasitam xot jom, xaelam xotbej naebaest. Samata, naxʉwlam wʉt, xabich nabijasaxaelam. Ja-aech wʉt, xam nakiowa nejxasinkaxaelam nejmol. Nejmol xam tatoꞌal wʉt, owchiyaxaelam —aech Dios japowliajwa.

17 Dios kaes jʉm-aech asamatkoi jachiyaxaelpox Adánliajwa:

—Xamlis isam babijax, nijow naexasitam xot. Japabaestliajwa xan chajia chiekal jʉm-an ampox xam chiekal jʉmtaeliajwam: “¡Xaeyaximil japabaest!” —an xan chajia. Xam nakiowa xaelam xot japabaest, ma amwʉt sat chiekal tabejtam. Xabich nabichaxtat naxaeyaxanaxael xam najut xaeliajwam. Nabich-emil wʉt, xam kijilaxaelam. Naxaeyaxanbej ijilaxael. Jasox pomatkoicha jachiyaxael xamliajwa, puexa ampathatpijiwliajwabej. 18 Samata, nejmachtoeix xabich naboelaxael nejlulanxot. Naboelaxaelbej nae-eꞌlʉ. Xam xaeyaxaelam pajut naboelapi, jiw mʉtha-esalpi. 19 Xabich xadamlaxaelam, nabistam wʉt naxaeyaxanliajwa. Japoxlap pomatkoicha jachiyaxael xamliajwa, hasta tʉpaxaelam wʉt. Xan asthumba koechax xam atona nadofaliajwam. Tʉpam wʉt, pejme asthumba nadofaxaelam —aech Dios Adánliajwa.

20 Do jawʉx, Adán wʉlduw pijow Evawʉltat. Japowlap puexa jiw pejchapaeꞌaxael. 21 Do jawʉtbej, Dios is naxoe Adánliajwa, japon pijowliajwabej. Japi pejnaxoe isas choefbʉꞌantat. Jawʉt, Adán, pijow sʉapich, naxoeilisi choefbʉꞌan. 22 Do jawʉt, Dios nejchaxoel wʉt, jʉm-aechon ampox pajutliajwa: “Ma amwʉt, aton, me-ama xatis wʉt, ja-aechlison. Japon aton ma amwʉt matabijt pachaempoxan isliajwa, chaemilpoxanbej is-elaliajwa. Japon aton xatis tapaeyaxisal baechxaeliajwa asanaebaechnae. Japabaech xael wʉt, japon aton tʉpaxil ampathatat. Pomatkoicha laejaxaelon” —aech Dios pajutliajwa.

23 Samata, Adán, pijow sʉapich, Edén lulxot Dios nakolax toꞌaspi. Do jawʉx, Dios toꞌa Adán xabich nabichliajwa sat naxaeyaxan mʉthaliajwa. Adánlap, koechaspon Dios, japox majt chiekal sataxkal. 24 Adán, Eva sʉapich, japalulxot nakolax toꞌas wʉt, Dios toꞌak pej-ángeles, pabaꞌanpi, japi wesliajwa lulnʉamt, orientelel. Dios not espada, tamdadutpowa. Japowa pajut jajialanik. Jasoxtat Dios pej-ángeles chiekal wesfʉl japalulnʉamt, Adán, pijow sʉapich, asew jiwbej, pejme kaxadin kaes pas-elaliajwa japalulxot, asanaebaechnae baechxaesamata, pomatkoicha laelpasamatapi ampathatat.