Juan taenpox pawis, Satanásbej
12
Thatbaxotat kaeow atow natulaelt.
Japox xan taenx matabijsliajwan asamatkoi jachiyaxaelpoxliajwa.
Japow puexa chapona-itliak.
Me-ama juimt matkoipijin,
chapona-aechow.
Japow nuk juimt madoipijinmatwʉajtat.
Japow corona matlʉaꞌt,
doce ithaejpijax.
2 Japow moejow.
Xabich chanowpow,
boejpuns xot naxʉwlaliajwa.
3 Do jawʉt,
jaxot pinjikolan dragón natulaelt.
Japon maklej kabʉan-aech.
Japon pasoeyan,
siete matnaetjepon,
diez mat-etjebejpon.
Kaenanʉla pejmatnaetanxot matlʉaꞌa corona.
4 Pejtoꞌthit xawilcha wʉt,
xabich piꞌchapon ithaej.
Jawʉt una tercera parte ithaej natacholan that poxadik.
Jawʉt dragón nukjaba japow pejwʉajnalel,
yamxʉch nalaelt wʉt kamta xaeliajwapon yamxʉch.
5 Naxʉwal wʉtow,
faenow poich.
Japoch yamxʉch asamatkoi tatoꞌlaxael pothatapijiw.
Jiw tatoꞌal wʉt,
chiekal tatoꞌlaxaelon.
Yamxʉch nalaelt wʉt,
kamta bʉꞌfos Dios poxade,
Dios sʉapich chalakaliajwa.
6 Jawʉt najaetow pajilaxlelde,
Dios chaemt poxade.
Jaxotde pomatkoicha japow naxaeyaxan chaxduiflas mil doscientos sesenta matkoiyanliajwa japow xaeliajwa.
7 Baxael,
athʉxotse Miguel,
Dios pej-ángelespaklon,
Dios pej-ángelesbej,
naba,
dragón sʉapich,
dragón pej-ángeles sʉapichbej.
8 Miguel,
pej-ángeles sʉapich,
malechapi.
Samata,
dragón,
pej-ángeles sʉapich,
kaes athʉxotaxili.
9 Jasoxtat pinjin dragón foꞌakas that poxadik,
pej-ángeles sʉapich.
Dragón asawʉl Satanás.
Japon puexa dep pejpaklon.
Chajiakolaxtat natulaelton jomtat.
Japonlap xabich jiw pothata naekichachajba.
10 Do jawʉx,
jʉmtaenx athʉxotse pinjametat jʉm-aechpox:
“Satanás pomatkoicha,
pomadoichabej,
Dios pejwʉajnalel xabich tasalafʉl jiw,
Dios naexasiti.
Japonlap foꞌakas that poxadik.
Samata,
matkoi pat Dios xatis nakbʉꞌweliajwa babijaxan isaspoxanliajwa.
Dios nak-itpaeyaxaelbej pejpamamax.
Matkoi patbej Dios pajut jiw chalaliajwa,
tatoꞌlaliajwabejpon.
Cristobej jiw tatoꞌlaxael.
11 Wajkoew,
naexasitpi Cristo tʉppox japi babijaxan ispoxanliajwa,
japi chapaeibej asew jiw Cristo pejwʉajan naexasitpox.
Ja-aech wʉt,
pejlewla-eli tʉpaliajwa.
Samata,
malechapi Satanás.
12 Xamal athʉxot duilampim,
¡nejchachaemilde,
Satanás foꞌakas xot that poxadik!
Xamallax,
japathatxot duilampim,
marxotbej,
xabich nabijasaxaelam.
Jachiyaxaelam Satanás pijaxtat.
Japon pajut chiekal matabijt,
kaematkoiyan sʉapich,
weweꞌpaspox Dios kastikaliajwas” —aech athʉxotse pinjametat jʉmtaenxpox.
13 Dragón that poxadik foꞌakas wʉt,
wʉlchakal najaeton pawis jaelsliajwa,
naxʉwalpow.
14 Jawʉt japow baꞌduchas,
kakoefbaꞌ.
Samata,
japow punjala pajilax poxade,
dukaxael poxade.
Jawʉt dragón xabich atʉaj waeltas.
Japow pajilaxxot tres waechan y medio naxaeyaxan pomatkoicha chaxduiyaxaes japow xaeliajwa.
15 Do jawʉt,
dragón min pinjiyax xul wʉt,
japox nawel nadofa japow buꞌlaliajwa japoxtat.
16 Pe jawʉt,
Dios pijaxtat sat tawakfʉla.
Jawʉt japamin natoek,
sat tawakfʉla poxadik.
17 Samata,
dragón xabich palala,
japow wia xot.
Jawʉt dragón fʉlaech nabeliajwa,
japow pamojiw sʉapich,
japi naexasiti Dios tatoꞌalpoxan,
Jesús pejwʉajan naexasitibej.
18 Do jawʉx,
dragón nuk marbabʉꞌtat wʉllalasliajwapon asan marpijin,
japon kajachawaesliajwas.