Adán paxipox pijow Evaxot
4
Adán Eva fit wʉt, baxael, japow moejow. Do jawʉx, naxʉwal wʉt, faenpow poich. Wʉlduwpi paxʉlan Caínwʉltat. Eva paxʉlan faen wʉt, jʉm-aechow ampox: “Diachwʉajnakolax Dios nachaxdut taxʉlan poich” —aechow. 2 Do jawʉx, Eva pejme moejow. Pejme naxʉwal wʉt, nalaelt wʉchakalpijin. Wʉlduwpi paxʉlan Abelwʉltat. Japi chiekal pakdiachiw wʉt, wʉchakalpijin oveja thin. Matxoelapijin naxaeyaxan mʉtha. 3 Asamatkoi, naxaeyaxan tiꞌt wʉt, chiekal naboet wʉtbej, Caín kaesʉapich naxaeyaxan xafol bowaliajwa, Dios pej-ofrendaliajwa. 4 Abelbej bʉꞌfol corderos, jeltiꞌtpi, chiekal dalpi, chiekal matxoelanalaelapikal. Abel xʉaꞌat corderos Dios pej-ofrendaliajwa. Jawʉt, Dios nejchachaemil Abel pej-ofrendaliajwa, chaxduw xoton corderos. 5 Pelax, Dios nejchachaemla-el Caín pej-ofrendaliajwa. Samata, Caín xabich palala. Xutampapon xabich palalapox.
6 Do jawʉt, Dios wʉajnachaemt wʉt, jʉm-aechon ampox Caínliajwa: “¿Ma-aech xotkat xam jʉmch nalala? Xutampam xabich nalalapox. 7 Xam isaxaelam wʉt pachaempox taj-ofrendaliajwa, chil ja-am wʉt, xam nejchachaemlaxaelam. Pe jasox is-emil xot, xam ma amwʉt nejchaxoelam isliajwam babijax. Samata, japox babijax xam isaxaelam. Pe, xamfʉk isaximil japox babijax is-elaliajwam” —aech Dios Caínliajwa.
8 Do baxael, asamatkoi, Caín jʉm-aech ampox pakoewanliajwa: “Chijias mathʉnaliajwas” —aechon. Do atʉaj mathʉn wʉt, Caín boesa pakoewan Abel.
9 Do jawʉx, Dios me-ama matbijs-el wʉt, ja-aechon, wʉajnachaemt wʉt Caín. Dioslap jʉm-aech ampox Caínliajwa:
—Caín, ¿amxotkat nakoewan Abel? —aech Dios Caínliajwa.
Caín jʉmnot wʉt, jʉm-aechon ampox:
—¡Jalape! Xan takoewan tae-enil. Xanbej tataefla-enil takoewan —aech Caín Diosliajwa.
10 Dios jʉm-aech ampox Caínliajwa:
—¿Ma-aech xotkat xam babijax isam nakoewanliajwa? Xan chiekal tajut taenx, nakoewan boesam wʉt. Samata, xam weweꞌp kastikaxkal. 11 Samata, ma amwʉt xam xabich nabijasaxaelam. Nakoewan boesam xot, amxot kaes dukaximil. Atʉaj fʉlaeyaxaelam. 12 Xam naxaeyaxan mʉtham wʉt, xabich wenaboesaxil. Laliaxlaxaelam potʉajnʉcha. Xam kaekawʉtat dukaximil —aech Dios Caínliajwa.
13 Do jawʉt, Caín jʉmnot wʉt, jʉm-aechon ampox Diosliajwa:
—¡Xan kaes boejtaliasaxinil najʉm-ampox tajkastikaxliajwa!
14 Ma amwʉt, xam natoꞌam amxot nakolsliajwan. Xan xabich laliaxlaxaelen potʉajnʉcha atʉaj xamxot. Kaekawʉtat dukaxinil. Atʉaj nanʉamtax wʉt, asew jiw nataen wʉt, japi jiw xan naboesaxael —aech Caín Diosliajwa.
15 Pe Dios jʉmnot wʉt, jʉm-aechon ampox Caínliajwa:
—Asan aton xam boesa wʉt, japon pejjiw weboesaxaeson siete pejjiw —aech Dios.
Samata, Caín bʉꞌmarkas Dios pijaxtat, asew jiw taens wʉt, boesa-elaliajwas.
16 Dios sʉapich, nospaeyax bʉxtoet wʉt, Caín jaxot chijialison, xabichatʉajaliajwa, beꞌkliajwadik, dukaliajwa Nod tʉajnʉxotdik, Edén orientelel.
Caín paxipox, pamojiwxot
17 Jaxotdik Caín fiꞌk pawis. Japow moejow wʉt, naxʉwal. Paxʉlan faenpow. Caín paxʉlan, japon pawʉl Enoc. Jawʉx Caín paklowax is. Japapaklowax wʉlduwpon paxʉlan Enoc pejwʉltat. 18 Enoc tiꞌt wʉt, fiton pijow. Japow moejow wʉt, naxʉwal. Enoc paxʉlan pawʉl Irad. Jawʉx Irad paxʉlan nalaelt. Japon pawʉl Mehujael. Mehujael paxʉlan pawʉl Metusael. Metusael paxʉlan pawʉl Lamec. 19 Lamec koliowje pijow. Kaeow pawʉl Ada. Asaw pawʉl Zila. 20 Ada paxʉlan pawʉl Jabal. Japon pamojiw duil choefbʉꞌbachantat. Japi jiw xabich choef thin. 21 Jabal pakoewan pawʉl Jubal. Jubal pamojiw arpa dakaxan xabich kijuspi. Flauta nababeyaxanbej xabich kaecha julspi. 22 Asaw, Lamec pijow, pawʉl Zila, japowbej naxʉwal. Paxʉlan faen wʉt, wʉlduwpow paxʉlan Tubal-caínwʉltat. Japon chiekal tiꞌt wʉt, anael nabichan nadofapon. Japon is pachaempoxan broncetat, anaeltatbej. Tubal-caín pakoewow pawʉl Naama.
23 Asamatkoi, Lamec jʉm-aech ampox pejwathoꞌliajwa:
“¡Xan chiekal nanaeweꞌe xamal jʉmchiyaxaelenpox chiekal jʉmtaeliajwam! Xan kaen aton boesax, matxoela nabejcha xoton. Japon aton pansian. 24 Caín boesas wʉt, japon aton weboesaxaes siete pejjiw. Ja-aech wʉt, xan naboesaxaelpon, japon aton pejjiwpi weboesaxaeson setenta y siete pejjiw” —aech Lamec pejwathoꞌliajwa.
Set nalaeltpox
25 Do jawʉx, Adán pijow, Eva, moejow wʉt, baxael, naxʉwalpow. Paxʉlan nalaelt wʉt, Eva jʉm-aech ampox: “Dios nachaxdut asan taxʉlan, Abel boesas xot Caín” —aech Eva. Eva paxʉlan pawʉl Set.
26 Set chiekal tiꞌt wʉt, pijow fiton. Do baxael, japow moejow. Moejow wʉt, naxʉwalow. Set paxʉlan pawʉl Enós. Do japamatkoiyan wʉt, japi jiw tʉaduwpi Dios kawʉajnaliajwa Dios pejwʉltat.