Ma amxotlap Adán paxi pejwʉajan, japon pamojiw pewʉajanbej
(Heb 11.5)
5
Ampawʉajan, Adán pejwʉajan, japon pamojiw pejwʉajanbej. Dios is wʉt Adán, isbejpon pawis. Japi kolenje, me-ama Dios pajut wʉt, ja-aechi. Japi nejchaxoel wʉt, matabijt pachaempoxan isliajwa, babijaxan is-elaliajwabej. 2 Dios is wʉt Adán, isbejpon pawis, jawʉt Dios jʉmdut japi kajachawaesliajwa. Dioslap jʉm-aech ampox japixot: “Ampi pawʉlaxael ‘jiw’” —aech Dios.3 Do jawʉx, Adán ciento treinta waechan wʉt, paxʉlan nalaelt. Japon pawʉl Set. Japon chiekal pax Adán, taꞌla-aech. 4 Do japoxwʉx, Adán kaes ochocientos waechan laeja wʉt, xabich paxipon, poejiw, wathoꞌbej. 5 Jasoxtat Adán laeja novecientos treinta waechan. Jaswaechan sʉapich wʉt, Adán tʉp.
6 Set ciento cinco waechan wʉt, Set paxʉlan nalaelt. Japon pawʉl Enós. 7 Do japoxwʉx, Set kaes ochocientos siete waechan laeje wʉt, xabichpon paxi, poejiw, wathoꞌbej. 8 Jasoxtat Set laeje novecientos doce waechan. Jaswaechan sʉapich wʉt, baxael, Set tʉp.
9 Enós noventa waechan wʉt, paxʉlan nalaelt. Japon pawʉl Cainán. 10 Do japoxwʉx, Enós kaes ochocientos quince waechan laeje wʉt, xabichpon paxi, poejiw, wathoꞌbej. 11 Jasoxtat Enós laejepon novecientos cinco waechan. Jaswaechan sʉapich wʉt, baxael, Enós tʉp.
12 Cainán setenta waechan wʉt, paxʉlan nalaelt. Japon pawʉl Mahalaleel. 13 Do japoxwʉx, Cainán kaes ochocientos cuarenta waechan laeje wʉt, xabichpon paxi, poejiw, wathoꞌbej. 14 Jasoxtat Cainán laeje novecientos diez waechan. Jaswaechan sʉapich wʉt, baxael, Cainán tʉp.
15 Mahalaleel sesenta y cinco waechan wʉt, paxʉlan nalaelt. Japon pawʉl Jared. 16 Do japoxwʉx, Mahalaleel kaes ochocientos treinta waechan laeje wʉt, xabichpon paxi, poejiw, wathoꞌbej. 17 Jasoxtat Mahalaleel laeje ochocientos noventa y cinco waechan. Jaswaechan sʉapich wʉt, Mahalaleel tʉp.
18 Jared ciento sesenta y dos waechan wʉt, paxʉlan nalaelt. Japon pawʉl Enoc. 19 Do japoxwʉx, Jared kaes ochocientos waechan laeje wʉt, xabichpon paxi, poejiw, wathoꞌbej. 20 Jasoxtat Jared laeje novecientos sesenta y dos waechan. Jaswaechan sʉapich wʉt, Jared tʉp.
21 Enoc sesenta y cinco waechan wʉt, paxʉlan nalaelt. Japon pawʉl Matusalén. 22 Enoc laeje wʉt, xabich pachaempon, me-ama Dios tatoꞌal. Enoc kaes trescientos waechan laeje wʉt, xabichpon paxi, poejiw, wathoꞌbej. 23 Jasoxtat Enoc laeje trescientos sesenta y cinco waechan. 24 Jaswaechan sʉapich wʉt, asamatkoi Enoc chiekal masoxtat ijilon ampathatat, Dios bʉꞌfos xoton athʉ poxase, Enoc chiekal kaenejchaxoelax xot Dios sʉapich. Dios bʉꞌfoson tathʉalin athʉ poxase.
25 Matusalén ciento ochenta y siete waechan wʉt, paxʉlan nalaelt. Japon pawʉl Lamec. 26 Do japoxwʉx, Matusalén kaes setecientos ochenta y dos waechan laeje wʉt, xabichpon paxi, poejiw, wathoꞌbej. 27 Jasoxtat Matusalén laejepon novecientos sesenta y nueve waechan. Jaswaechan sʉapich wʉt, Matusalén tʉp.
28 Lamec ciento ochenta y dos waechan wʉt, paxʉlan nalaelt. 29 Lamec paxʉlan wʉlduwpon Noéwʉltat, Lamec jʉm-aech xot ampox: “Chajiakolaxtat, wajpaklon Dios kastika wʉajnapijin, japon tabejt xot sat. Samata, ma amwʉtjel, xabich nabistas damlathʉla-esalpoxtat naxaeyaxanliajwa. Pe ampoch yamxʉch pijaxtat, asamatkoi, damlathʉlaxaes” —aech Lamec paxʉlan Noéliajwa. 30 Do jawʉx, Noé nalaelt wʉt, Lamec laeje wʉt kaes quinientos noventa y cinco waechan, xabichpon paxi, poejiw, wathoꞌbej. 31 Jasoxtat Lamec laeje sietecientos setenta y siete waechan. Jaswaechan sʉapich wʉt, Lamec tʉp.
32 Noé quinientos waechan wʉt, do jawʉx, baxael, japon tres paxipon poejiw. Matxoelapijin pawʉl Sem. Wʉchakalpijin pawʉl Cam. Trespijin pawʉl Jafet.