Jiw xabich babijaxan ispox
6
Do asamatkoi, xabich jiw wʉt ampathatat, xabichbej wathoꞌpansiachow. 2 Japamatkoiyan, paklochiw taeni wathoꞌ, xabich chamiachiw. Samata, paklochiw, japi wathoꞌxot makanoti, kaes chamiachiwpi, pejwathoꞌliajwa. 3 Do jawʉt, Dios nejchaxoel wʉt, jʉm-aechon ampox: “Xan tapaeyaxinil ampi jiw pomatkoicha laelpaliajwa ampathatat, japi jiwkal xot. Japi piach laelpaxil. Laelpaxaeli ciento veinte waechan jʉmch” —aech Dios, nejchaxoel wʉt. 4 Paklochiw xabich paxipi japi wathoꞌtat, wathoꞌ xabich chamiachiwpitat. Japi paklochiw paxibej xabich pinanʉli. Mamnikbejpi. Japilap pejlewla-el nabeliajwa, padaelmajiw sʉapich. Samata, japi puexa jiw matabijtas, japi wʉajnapijiwpi. 5 Dios taen jiw xabich babijaxan ispox pothata pomatkoicha. Japi jʉmch nejchaxoel babijaxan isliajwa. Puexa jiw xabich is babijaxan. 6-7 Samata, Dios xabich nejxaejwas japi jiwliajwa. Dios nejchaxoel wʉt jʉm-aechon ampox: “Jiw xabich babijaxan is. Chil jiw is-enil wʉt, kaes xabich pachaemaxaellach. Samata, xan puexa jiw toesaxaelen. Puexa nejmachchoef, jiw thinpi, baxotat laelpibej, puexa nejmachmiabej, toesaxaelen” —aech Dios, nejchaxoel wʉt.8 Pe, Dios nejchachaemil Noéliajwa.
Noé pinjiyax barkam ispox
9 Ampawʉajan, Noé pejwʉajan.
Noé chiekal naexasit Dios. Samata, japon chiekal pachaem. Japamatkoiyan xabich, jiwxot, kaen Noé duk, kaenejchaxoelaxpon, Dios sʉapich. 10 Noé tres paxʉlan. Kaen pawʉl Sem. Asan pawʉl Cam. Asan pawʉl Jafet.
11 Puexa jiw, ampathatpijiw, xabich babijaxan is, Dios nejweslapoxan. Xabich jiw naba, asew jiw sʉapich. 12-13 Puexa jiw jʉmch nejchaxoel babijaxan isliajwa. Chinax nejchaxoela-eli Dios. Dios taen wʉt ampathatpijiw, potʉajnʉcha xabich babijaxan ispoxan, Dios jʉm-aech ampox Noéliajwa: “Diachwʉajnakolax xan jiw taenx, xabich babijaxan is wʉt nakaewaliajwa, xabich nakaewa naba wʉtbejpi. Samata, puexa jiw, pothatapijiw, toesaxaelen, xabich babijaxan is xoti. Toesaxaelenbej puexa nejmachchoef. 14 Xan kitoꞌaxaelen pinjiyax barkam isliajwam. ¡Japox barkam isaxaelam tawlafachantat, pachaempitat! ¡Piezaxan isaxaelam! ¡Me-ama pindaernael jasitat barkam xapapeꞌnaxaelam tawlafachan matduilaxanxot, patulelan, puexa fʉletlelanbej, min lesamata! 15 ¡Barkam isde ampaxajʉsaxtat! ¡Isde ciento treinta y cinco metros pakchowaxpox, patu veintidós metros y medio, athʉpox trece metros y medio! 16 ¡Tres tawlanʉaꞌa isde patulel! Asatawlanʉaꞌa athʉ wʉlxael. Asatawlanʉaꞌa pafataxael. Asatawlanʉaꞌa dach wʉlxael. ¡Kaefafayaxaelpox kaelel! ¡Barkammatwʉajtat isde, me-ama bamatwʉaj! ¡Athʉlel dusaxaelam, me-ama ventana, kolelelje! ¡Japox ventana medio metrowaxael athʉpox! 17 Xan iam, pinjiyax, toꞌaxaelen pothata chiekal bʉꞌlaliajwa. Puexa jiw, puexa nejmachchoefbej, chiekal buꞌlaxael.
18 Pe isaxaelen convenio xamxot. Ja-an wʉt, xamal weyaxaelam, barkamtutat lowam wʉt, nijow sʉapich, naxi sʉapichbej, japi pejwathoꞌbej. 19 Kaenanʉla nejmachchoef, ampathatpijiw, jeyaxaelam barkamtat. Jeyaxaelam poi, pawis sʉapich. Jasoxtat japi choef tʉpaxil, me-ama xamal. Me-ama xamal tʉpaximil, barkamtutat, jachiyaxaellap-is japi choef. 20 Xabich nejmachchoef, miabej, fʉlaeyaxaen xamlel. Kaenanʉla leyaxael poi, pawis sʉapich, tʉpasamatapi. Xam sʉapichlap, nejmachchoef leyaxael barkamxot. Leyaxael kaen poi, pawis sʉapich. Leyaxaelbej papunpi, choef thinspibej, batat laelpibej. Ja-aech wʉt, japi choef-is tʉpaxil. 21 ¡Xamal nejmachnaxaeyaxan tamejaxaelam choefliajwa, xamal najutliajwabej! ¡Japi naxaeyaxan cha-owaxaelambej barkamtat!” —aech Dios toꞌa wʉton Noé.
22 Do jawʉx, Noé pinjiyax barkam is wʉt, is puexa, me-ama Dios kitoꞌas isliajwa.