Dios toꞌapox, pinjikolax iam
7
Do jawʉt, Dios jʉm-aech ampox Noéxot: “Puexa jiwxot, xam kaenam kaenejchaxoelaxam, xan sʉapich. Samata, ¡xam lem barkam, nijow sʉapich! ¡Naxi sʉapich, japi pejwathoꞌ sʉapichbej! 2 Choef, pachaempi xan taj-ofrendaliajwa, japi choef leyaxael, siete poi, siete pawis sʉapich. Leyaxaelbej kaenanʉla choef, chaemili xan taj-ofrendaliajwa. Japi choef leyaxael kaen poi, kaeow pawisbej. 3 Papunpi, pachaempi xan taj-ofrendaliajwa, japilap leyaxael siete poi, siete pawis sʉapich, ampathatat tʉp wʉt puexa chiekal natoenasamatapi that buꞌal wʉt. 4 Siete matkoiyanwʉx, xabich iam thilnax toꞌaxaelen. Cuarenta matkoiyan, cuarenta madoiyanbej, iam thilnax matdukaxil, puexa ampathatpijiw toesaxaelen xot. Xan isxpi, puexa fakjolpi, toesaxaelen” —aech Dios Noéxot. 5 Do jawʉx, Noé puexa chiekal islison, me-ama Dios kitoꞌas isliajwa.6 Iam xabich thilnaxtat that buꞌal wʉt, jawʉt Noé cumplepon seiscientos waechan. 7 Do jawʉt, Noé pinjiyax barkam lowpon, pijow sʉapich, paxi sʉapichbej, japi pejwathoꞌ sʉapichbej, japi weliajwa, iam pinjiyax thilnax wʉajna. 8 Nejmachchoefbej low barkamxo, pachaempi Dios pej-ofrendaliajwa, pachaema-elpibej Dios pej-ofrendaliajwa, papunpibej, baxotat laelpibej. 9 Puexa japi low, Noé sʉapich. Kaenanʉla choef low, pawisje, me-ama Dios toꞌas.
10 Dolis, siete matkoi pat wʉt, Dios markpox, matkoi, jawʉt Dios toꞌa pinjikolax iam thilnaliajwa that chiekal buꞌlaliajwa. 11 Japamatkoi, diecisiete matkoi wʉt, kolejuimt wʉt, jawʉt Noé seiscientos waechan. Japamatkoi wʉt, xabich iam thilnafʉl. Xabich min nakolafʉl satlelsin. 12 Iam thilnafʉl wʉt, pot fan pothata cuarenta matkoiyan, cuarenta madoiyanbej. 13 Japamatkoi, diecisiete matkoi wʉt, kolejuimtje wʉtlisox, Noé low barkam, pijow sʉapich, paxi sʉapichbej, japi pejwathoꞌ sʉapichbej. Noé tres paxʉlan. Matxoelapijin pawʉl Sem. Wachakalpijin pawʉl Cam. Taxdukapijin pawʉl Jafet. 14 Japi sʉapich, puexa nejmachchoef low, thinspi, tathoetpijiwbej. Lowbej baxot laelpi, papunpibej. 15-16 Puexa nejmachchoef kaenanʉla low pawisje barkamxot, Noé sʉapich, me-ama Dios chajia jʉm-aech. Do jawʉx, Dios barkam fakaꞌt.
17 Iam thilnafʉl cuarenta matkoiyan, cuarenta madoiyanbej. Min pothata soꞌnikafʉl wʉt, jawʉt barkam poꞌlafʉl. 18 Min xabich pinaminsfʉl. Barkam dukafʉl mintat. 19 Puexa ulan, mʉaxan pinjiyaxanpoxan, matkiowafʉl. Mʉaxan pinjiyaxanpoxan, xabich athʉpi, japibej matkiowfʉl. 20 Mʉaxan pinjiyaxan xabich athʉpi matkiow wʉt, jawʉt kaes siete metro pinaminfʉk. 21 Jasoxtat pothata puexa buꞌal, ampathatpijiw. Puexa choef tʉp, papunpi. Tʉpbej choef, thinspi. Tʉpbej puexa choef, baxotat laelpi. 22 Puexa ampathatat laelpi, fakjolpi, chiekal tʉp min buꞌlaxtat.