6 Do jawʉx, cuarenta matkoiyan wʉt, Noé fafat barkam pejventana. 7 Jawʉt, tapaeipon punjalaliajwa, me-ama bial kabʉanchian, japon jalwekaliajwa sat. Pe bial punjala wʉt, faena-elon sat. Jʉmch asalelde, asalelde, ja-aechalison. Ja-aechon wʉajnawesliajwa sat mamoꞌlax. Jawʉtbej, bial kabʉanchian kaxa nawias-eldin barkam poxadin. Kaelel chiekal nafoꞌa bial kabʉanchian. 8 Do jawʉx, asamatkoi bial kabʉanchian pas-el wʉtlison barkam poxadin, Noé nejpunjala-aechan a-ut sat jalwekaliajwa. 9 Pe a-ut kaxa paꞌan, sat ijil xot damlathʉlaliajwa. Sat matlʉs-elfʉk. Minkal. Do jawʉt, Noé mʉaxxachoꞌe a-ut na-esliajwa. Na-et wʉt, Noé eton a-ut barkamtutat. 10 Do jawʉx, asasemana toep wʉt, Noé pejme nejpunja-aechon a-ut. 11 Dolisox, tuila wʉt, a-ut nawiaꞌan wʉt, olivonaefʉt xanwiaꞌan pej-afboktat. Ja-aech wʉt, Noé chiekal matabijt satanpoxlisox.

12 Do jawʉx, Noé kaes wʉajnawetfʉk siete matkoiyan. Noé nejpunjala-aech a-ut jalwekaliajwa sat. Jawʉt, a-ut kaxa nawias-eldin barkam poxadin, sat faen xotlison. Kaelel a-ut chijia chiekal.

13 Do jawʉx, Noé barkammatwʉaj pejtawlafachan kaelel kuwpon, sat chiekal taeliajwa. Jawʉt, taenpon min kaes siowafʉlpox. Jawʉt, Noé seiscientos y un waechanlison. Japamatkoi, matxoelamatkoi, matxoelajuimt wʉt. Noé nakiowa kawetafʉk barkamxot. Wʉajnawetfʉkon sat chiekal tinkaliajwa. 14 Veintisiete matkoi wʉtlisox, kolejuimtje wʉt, sat chiekal tink. 15 Do jawʉt, Dios jʉm-aech ampox Noéliajwa: 16 “¡Xam ma amwʉt nakolde barkamxot, nijow sʉapich, naxi sʉapichbej, japi pejwathoꞌ sʉapich! 17 Puexa nejmachchoef, xam sʉapichpi, ¡japi nej nakola! ¡Nej nakola choef, thinspi, tathoetpijiwbej, baxotat laelpi, japi puexa xabich naxʉwlaliajwa, that pejme xajʉpaliajwa!” —aech Dios Noéxot.

18 Do jawʉt, Noé nakolt barkamxot, pijow sʉapich, malis paxi, pejwathoꞌ sʉapich. 19 Puexa choef jawʉt nakola barkamxot. Nakola choef thinspi, tathoetpijiw, baxotat laelpi, papunpi. 20 Do jawʉt, barkamxot nakola wʉti, Noé sumta-efʉl iaꞌ isliajwa altar itpaeliajwa sitaeyax Diosliajwa. Do jawʉt, Noé altar isax kitoet wʉt, kaenanʉla nejmachchoefxot, pachaempi Dios pej-ofrendaliajwa, xʉaꞌaton. Nejmachmiabej, pachaempi Dios pej-ofrendaliajwa, bapon Dios pej-ofrendaliajwa. Jawʉt, japi choef, miabej, owapon altarmatwʉajtat. Pawi toejwas jitat. Jasox is Noé, Dios chaxduw wʉt ofrenda. 21 Dios xathiajow taen wʉt choef bowaspi, jawʉt Dios nejchachaemil. Samata, nejchaxoel wʉt, pajutliajwa jʉm-aechon ampox: “Jiw babijaxan is wʉt, japox babijaxtat kaes toꞌaxinil tabejsliajwa ampathat. Xan chiekal matabijtax. Jiw babijaxan is, pansiachiw wʉt nejchaxoelpox. Japoxan ji-islap japi. Xan-is kaes toesaxinil puexa choef buꞌlaxtat, me-ama ampamatkoiyan isx, jachiyaxinil” —aech Dios pajutliajwa.