Dios dutpox arwaera thatbaxot
9
Dios naksiya wʉt chimiajamechan Noéliajwa, japon paxiliajwabej, jʉm-aechon ampox: “¡Xam xabichde naxi! Ma-is naxi, ¡nej xabicha paxi! Ja-am wʉt, naxi, namojiwbej, xajʉpaxael pothata. 2 Puexa nejmachchoef, ampathatpijiw, ma amwʉt pejlewlaxaeli xamalliajwa. Xamal mamnikaxaelam puexa choefliajwa. Papunpiliajwa, sattat laelpiliajwabej, mintat laelpiliajwabej, puexa japiliajwa mamnikaxaelam. 3 Mʉthampi, pachaempi xaeliajwam, japilap xaeyaxaelam. Puexa nejmachchoef pachaempi xaeliajwam xaeyaxaelam. Xan tapaeyax xamal puexa xaeliajwam choef. 4 Pe, xamal xaeyaximilpox, ampoxlape. Xan tapae-enil xamal xaeliajwam, pawi, xabich jalpi. Ja-aech wʉt, xanliajwa choefan, me-ama boesa-esal wʉt, jachiyaxaelxot. 5 Aton boesa wʉt asan aton, japon atonlap-is boesaxaeson asew jiw kastikaliajwas. Nejmachchoefan matkaet wʉt asan aton, japon choefanbej boesaxaes asew jiw.”6 “Xan isx wʉt aton, japon aton, me-ama xan, tajut wʉt ja-aechxpon.
Samata, nejmach-aton, asan aton boesa wʉt,
japon aton-is boesaxaes asew jiw.
7 Pelax, ¡xamal xabichde naxi!
Ja-am wʉt, naxi, namojiwbej,
xajʉpaxael pothata” —aech Dios Noéxot, japon paxiliajwabej.
8 Dios kaes jʉm-aech ampox Noéxot, japon paxiliajwabej: 9 “Xan convenio isaxaelen xamxot, naxixotbej. Japoxconvenio asamatkoi namojiwliajwabej. 10 Japoxconvenio puexa choefliajwa, nakolapi barkamxot, xamal sʉapich. Papunpi, thinspibej, tathoetpijiwbej, puexa ampathatxot duilpibej, japi puexaliajwa isaxaelen jʉmdutxpox. 11 Tajconvenio xamalxot xaliasaxinil. Samata, kaes min pinjiyax toꞌaxinil puexa ampathatpijiw toesliajwan, choefbej. Kaes toꞌaxinil min pinjiyax that bʉꞌlaliajwa. 12-13 Xan athʉ dutx wʉt arwaera, xamal taenam wʉt nejchaxoelaliajwam tajconvenio pomatkoichaxaelpox xamalxot, puexa choefliajwabej. Me-ama majt tapaeix that buꞌlaliajwa, japoxan kaes isaxinil. Jiw taen wʉt arwaera, japox xamal taenam wʉt, japibej pajut chiekal nejchaxoelaliajwa xan chajia jʉmdutxpox nakiowapoxfʉk.
14-15 Itloejen fol wʉt, arwaera nalaelt wʉtbej itloejenxot, jawʉt xan nejchaxoelaxaelen, chajia jʉmdutxpox, convenio, xamalxot, puexa choefliajwabej. Samata, kaes toꞌaxinil min pinjiyax that buꞌlaliajwa. 16 Arwaera itloejentat duk wʉt, xan nejchaxoelaxaelen convenio, chajia jʉmdutxpox xamalxot, puexa choefliajwabej. Japoxlap pomatkoichaliajwa. 17 Jasoxtat xan itpaeyaxaelen tajconvenio, chajia jʉmdutxpox ampathatpijiwliajwa, puexa choefliajwabej” —aech Dios Noéxot, japon paxiliajwabej, nakola wʉti barkamxot.
Noé, paxi sʉapichpox
18-19 Noé paxi, nakolapi barkamxot, ampilape. Kaen pawʉl Sem. Asan pawʉl Cam. Asan pawʉl Jafet. Japi Noé paxi, trespi, japi pamojiwlap pejme that xabich xajʉpi. Cam paxʉlan pawʉl Canaán.
20 Do jawʉx, Noé pejlul is. Do jawʉtbej, mʉthabejpon uva. 21 Do asamatkoi, Noé af wʉt vino, saxtas wʉt, bʉꞌjʉmcha-okpon pejcarpabaxot. 22 Cam taen wʉt pax Noé bʉꞌjʉmcha-okpox, jawʉt fʉlaechon chapaeliajwa kolenje pakoewan. 23 Japi japox jʉmtaen wʉt, xafoli sumta-osax matxakasliajwapi pax. Low wʉti pax okxot, sumta-osax nataelamakxafol wʉt, xatʉakreꞌxafoli, pax matakasliajwa tae-elaliajwapi pax bʉꞌjʉmch okpox. Tʉakreꞌxafol wʉt, asalel natachaemafʉli pax taesamatapi chiekal jʉmchaxot okxoton.
24 Do jawʉx, Noé boejthʉs wʉt saxtaspox, jawʉt pajut chiekal matabijton, paxʉlan Cam taenspox, bʉꞌjʉmcha ok wʉt. 25 Samata, Noé jʉm-aech ampox Diosliajwa:
“Asamatkoi, ¡pachaema-elpox nej tapasas Cam paxʉlan, Canaánliajwa! Japonlap esclavowaxael tanbichliajwapon kolenje paxonliajwa” —aechlap Noé japox Diosxot.
26 Do jawʉx, Noé kaes jʉm-aech ampox Diosxot:
“Tajpaklon Dios, ¡xam kajachawaeꞌe Sem! ¡Canaánlax esclavowaxael Semliajwa! 27 ¡Jafet nej xabicha paxi! ¡Nej xabichabejpon pamojiw! ¡Japi chiekal nej duile Sem paxi pejtʉajnʉchanxot, pamojiw pejtʉajnʉchanxotbej! ¡Pe japon, Canaán, esclavowaxael Jafetliajwa!” —aech Noé Diosliajwa.