2 “¡Puexa israelitas toꞌim kaeyaxtat tamejaliajwa taj-ofrenda! ¡Puexa israelitas jʉm-amdebej: ‘Xamal chaxduisiam wʉt Dios pej-ofrendaliajwa, japoxan xalaeman xanlel nejchachaemlaxtat!’ —amdepi puexa israelitasliajwa. 3-5 Do jawʉx, xam kinosaxaelam taj-ofrenda, taj-ofrendalap ampoxanaxael. ¡Kinosaxaelam oro, plata, cobre, yiafbʉꞌan, color púrpurabʉꞌan, pasoeibʉꞌanbej, xabich chimiabʉꞌanpi, linobʉꞌan, kaes chimiabʉꞌanpi, cabralabej! ¡Kinosaxaelambej carnerobʉꞌan, joelaspi pasoeimintat, choefbʉꞌan, chimiabʉꞌanpibej, acaciatawlafachan, kaes chiekal chimiafachanpibej! 6 ¡Kinosaxaelam olivosiminan lámparanliajwa, perjumaminanbej tanialaliajwa, olivosiminan sʉapich! Do jawʉx, japamintat joelaliajwa tajcarpaba, sacerdotes xanbistibej, malis incienso, bowa wʉt xabich xabejchaemaliajwa. 7 Kinosaxaelambej iaꞌ, pawʉli cornalina, kaes asew iaꞌbej, xabich pachaempi duiliajwa puexa sacerdotes-paklokolan pej-efodxot, pejpectoralxotbej. 8 Tajcarpaba nawe-isaxaelam xan japabaxotaliajwan, israelitasxotan wʉt. 9 ¡Pe tajcarpabapijaxanliajwa isaxaelam, me-ama xan itpaeyaxaelen! —aech Dios Moisésxot.

10 Dios pejme jʉm-aech ampox Moisésxot:

“Isde tajbaúl acaciatawlafachantat. Japabaúl isliajwam wʉt, xajʉsaxaelam un metro y diez centímetros pakchowaxpox. Sesenta y cinco centímetro pinatupox, athʉpoxbej. 11 Japoxbaúllap matxafafaxaelam orofachantat, patulel, tathoetlelbej. Japoxbaúlfʉletlelanxot duiyaxaelam orofaex. Japa-orofaex pawʉli ribetes.

12 ¡Isdebej cuatro argolla orotat Dios pejbaúlxot pejtʉakanxot duiliajwam cuatro izquinanxot! ¡Kaenanʉla pakchowaxlel duim kole-argolla! 13 ¡Isaxaelambej kolenaeya acacianae xatdelsatliajwa! Japaxatdelanaeyan matxafafaxaelam oro. 14 Do jawʉt, ¡japaxatdelanaeyan xajoelaxaemch argollawʉajade! Ja-aech wʉt, pachaemaxael japoxbaúl xalaeliajwam, folam wʉt. 15 ¡Japakolenaeya kaes kusaximil! ¡Nej duka chiyaxaelam jaxot! 16 Xan chaxdusaxaelenpox, tajtatoꞌlax, ¡japoxlap osaxaelam tajbaúltuxot!

17 “¡Orotat isaxaelam baúlfafa un metro y diez centímetro pakchowaxpox! Sesenta y cinco centímetro pinfakaꞌpox. 18-20 Baúlfafa isam wʉt kaet oro, pinjitat, ¡jawʉt japa-orotat ael-isaxaelambej kolenje ángel, pabaꞌanpi! Baúlfafa matdukaxxot, ¡nosaxaelam nukaliajwa kaen ángel, ael-isampon! ¡Asabaúlfaxot nosaxaelam matdukaxxot! Ja-aech wʉt, japox koloeyax baúlfafamatwʉajtat, me-ama xutapelaxaek baúltuchadik. Japoxan isliajwam wʉt, ¡martillotat bijiat beflaxaelam! 21 Do jawʉx, xan chaxdusaxaelenpox, tajtatoꞌlax, ¡japoxlap osaxaelam tajbaúltuxot. Do jawʉtbej, baúlfafa fakaꞌsaxaelam. 22 Jaxotlap xam faenaxaelen. Do jawʉt, kolenje ángeles ael-isaspixot xam jʉmchiyaxaelen puexa tajtatoꞌlaxan israelitasliajwapox! —aech Dios Moisésxot.

23 Dios kaes jʉm-aech ampox Moisésxot:

“¡Mesa nawe-isaxaelam nosliajwam tajcarpabaxot! Japox mesa isam wʉt, ¡xajʉsaxaelam noventa centímetro pakchowaxpox! ¡Xajʉsaxaelambej cuarenta y cinco centímetro pinatupox! ¡Xajʉsaxaelambej sesenta y cinco centímetro athʉpox! 24 Japox mesa matxafafaxaelam orofachan. Japamesafʉletlelanxot duiyaxaelam orofaex. 25 Isaxaelambej tawlafaex. Japatawlafaex siete centímetropi pinjiafpox mesabʉxʉxot duilaliajwam, japoxan mesa chiekal chamamnikaliajwa. ¡Oromʉa duiyax xajʉsaxaelam mesa pejbʉxʉchanxot! 26-27 ¡Isaxaelambej cuatro argolla orotat, japi-argollan cuatro mesa-thitanxot duiliajwam, tawlafaexbʉxfalxot, japa-orgollawʉaj poxade xajoeliajwam naeyan! Ja-am wʉt, pachaemaxael xamal japamesa xalaeliajwam, folam wʉt. 28 ¡Isaxaelambej koloeyax acacianaetat xatdelsatliajwa, folam wʉt xalaeliajwam. Japaxatdelanaeyan matxafafaxaelam orofachan! 29 ¡Orokolatat isaxaelambej platfachan, cucharónesbej, japamesaliajwa. Isaxaelambej orotat jarras, copanbej, min xalaeliajwam xafolam wʉt japi min taj-ofrendaliajwa, jaxot falaliajwam. 30 Tajmesaxot weꞌpaxil pan owampox tajwʉajnalel, xanliajwapi! —aech Dios Moisésxot.

31 Dios pejme jʉm-aech ampox Moisésxot:

“¡Orokolatat isaxaelam kaet oro, pinjitat, candelabro! ¡Martillotat bijiat beflaxaelam! Candelabro isam wʉt kaet oro, pinjitat, ¡isaxaelam pejbase! Do jawʉx, ¡orotat isaxaelambej candelabro pejtamat! Do jawʉxbej, ¡orotat isaxaelam padalan, jaxot cha-eliajwam lámparan, itliakaliajwa tajcarpabatu! ¡Kaenanʉla japadalanxot orotat isaxaelam, me-ama almendratalant! 32 Candelabrotamatxot kolelelje, ¡tres pares orotat isaxaelam candelabrodalanliajwa. Samata, tres daltaxaelpox kaelel! ¡Ma-isox asalel tres daltaxael! 33 Kaenanʉla japaseis-dalan, ¡ael-isaxaelam orotat, tres almendratalan! 34 ¡Japacandelabrotamatxot, orotat ael-isaxaelam cuatro almendratalan! 35 Japatres pares candelabrodalan nakolaxot, candelabrotamatxot, jaxot kaenanʉla bʉxfallel, ¡almendrataltat ael-isaxaelam! 36 Candelabrodalanxot almendratalan ael-isaxaelam wʉt, ¡martillotat bijiat beflaxaelam japot orotat, pinjitat! 37 Do jawʉx, ¡isaxaelambej siete lámparan! ¡Japoxan candelabrodalan matwʉajantat eyaxaelam itliakaliajwapox wʉajnalel! 38 ¡Isaxaelambej orotat lámparan pejmechan xatʉsliajwa, toejwaspi! ¡Isaxaelambej orotat cha-ael-platillos mecha sekwaspi jeliajwa jaxot! 39 Candelabro isam wʉt, isaxaelambej candelabropijaxan, ¡japoxan isaxaelam treinta y tres kilos orokolatat! 40 ¡Puexa japoxan isaxaelam, me-ama xan chajia xam itpaeix, mʉaxxotse wʉt!” —aech Dios Moisésxot.