—¡Xam sʉapich julaxoen, Aarón, malis kolenje Aarón paxʉlan: Japi kolenjexot kaen pawʉl Adab, asan pawʉl. Abiú! Xam sʉapich julaxoenbej setenta israelitas-ancianos, xan jaxotaliajwan. ¡Pe xabich moxaximil xanxot! ¡Atʉaxach nuilaxaelam brixtat xanxotse! 2 Xam kaenam mox xanxot pasaxoeman. Asew xabich moxaxil xanxot. Kaes asew israelitas chinax julaxil, xamal sʉapich —aech Dios Moisésxot.

3 Do jawʉx, Moisés fʉlaech chapaeliajwa puexa israelitas Dios jʉm-aechpox. Do jawʉt, israelitas japox jʉmtaen wʉt, puexa japixot jʉm-aechon ampox:

—¡Isaxaes puexa Dios naktoꞌapoxan! —aechi puexa.

4 Do jawʉt, Moisés puexa chiekal lel Dios jʉm-aechpoxan. Kandiawa wʉt, chajiakolasap, Moisés nansap. Do jawʉt, doce iaꞌ noefʉl wʉt, ispon iaꞌaltar Diosliajwa mʉaxleltat. Doce iaꞌ taen wʉt, israelitas pajut chiekal matabijslisi docemʉtanpi, israel pamojiw. 5 Do jawʉx, Moisés kitoꞌa pansiachiw xʉaꞌasliajwa tor bowaliajwabej altarmatwʉajtat Dios pej-ofrendaliajwa. Jawʉtbej, japi xʉaꞌat asew tor Dios pej-ofrendaliajwa, puexa israelitas pejme pachaemaliajwa Diosliajwa. 6 Jawʉt, Moisés torjal najʉpadijan wʉt, asat pejlel dijanpot cha-eton tazónestat. Asat, choefjal, matsasalton altar. 7 Do jawʉt, Moisés chanaexaljow Dios pejtatoꞌlaxan puexa israelitas pajut chiekal jʉmtaeliajwa. Jawʉt, puexa israelitas jʉm-aech ampox:

—Puexa xatis chiekal naexasisaxaes wajpaklon Dios jʉm-aechpoxan xatisliajwa —aech puexa israelitas.

8 Do jawʉt, Moisés torjal chafit, matsasalsliajwa puexa israelitas. Jawʉtbej, Moisés jʉm-aech ampox israelitasliajwa:

—Xamal matsasaltax torjal, chiekal kaenejchaxoelaxan xot naexasisliajwam Dios pejtatoꞌlaxan.

9 Do jawʉx, Moisés julach mʉax poxase, Aarón sʉapich, kolelje Aarón paxʉlan sʉapich. Setenta israelitas-ancianosbej julachi. 10 Mʉaxxotse wʉt, israelitas taenlisi pejDios. Dios nukxot xabich sasilpox. Me-ama zafiropiso wʉt, ja-aechpox. Me-ama thatbaxo pathoeyaxpox wʉt, ja-aech jaxot. 11 Dios kastika-el japi julachpi, japi taenpi Dios, xael wʉti, af wʉtbejpi, jaxotse.

12 Dios jʉm-aech ampox Moisésxot:

—¡Xam xabʉaꞌsin! ¡Kaes julamin xanlelsin! ¡Jaxot nawʉajnaweꞌe xam chaxduiliajwan iaꞌfachan, lelxpoxan tajtatoꞌlaxan, israelitas pajut chiekal matabijsliajwa! —aech Dios Moisésxot.

13 Moisés nant wʉt, kaes julachpon Dios pejmʉaxase. Julichpon, pejkajachawaesan Josué sʉapich. 14 Moisés jʉm-aech ampox israelitas-ancianosxot:

—¡Amxot xamal nawʉajnawesaxaelam, hasta xanal kaxa pejme baloekx wʉt! xamalxot namaeyaxael Aarón, Hur sʉapich. Xamalxot asax wʉtlejen, ¡chapaeyaxaelam Aarónxot, Hurxotbej, japi chiekal chaemsliajwa japox! —aech Moisés israelitas-ancianosxot.

15 Moisés japox jʉm-aech wʉt, kaes julachpon mʉax poxase. Japamʉax tampoel xabich itloejentat. 16-17 Do jawʉt, israelitas taenlisi, itliakax fʉloek wʉt Diosxotsik. Japox itliakax, jit tamdadut wʉt, ja-aechox toejwaliajwas Sinaímʉaxmatwʉajxotsik. Seis matkoiyan japamʉax xabich tampoel, xabich itloejen xot. Séptimomatkoiliajwa wʉt, Dios jʉm-aech itloejenxot Moisés jʉmtaeliajwa. 18 Moisés itloejentutat wʉt, julach mʉaxase. Jaxoton cuarenta matkoiyan, cuarenta madoiyanbej, japamʉaxxotse.