“¡Jʉmchiyaximil kichachajbaxan asew jiwliajwa! ¡Aton, babijaxan ispon, kajachawaesaximil! Naksiyaximilbej japon atonliajwa, me-ama babijaxan is-el wʉt, ¡jachiyaximil naksiyam wʉt japon atonliajwa asew jiw naekichachajbaliajwam!

2 “Me-ama xabich asew jiw, babijaxan ispi, ¡xamalbej jachiyaximil!

“¡Diachwʉajnakolaxpox naksiyaxaelam juezxot! Lach asew jiw bʉxtoꞌa naksiyaliajwam kichachajabax babijaxan ispon kastika-elaliajwas, ¡pe nakiowa naksiyaximil kichachajbax! 3 Aton, kijilan, tasalas wʉt pejbʉꞌwʉajanpoxliajwa, ¡xamal chiekal tataeflaxaelam juez! Juez beltaesamata, japon aton xabich kijil xoton. Japon aton kijilan kastikaliajwa. Me-ama nejmachjiw kastikas wʉt, jachiyaxaeson.

4 “Nadaelman pijan woei, nafoꞌaspon, xamal faenam wʉt, bur wʉtbej, ¡xamal wiasaxaelam nadaelnam pijan woei o, bur wʉt! 5 ¡Elchiyaximil xam kajachawaesliajwam nejweslapon! Nadaelman pijan, woei, xaꞌokjaba wʉt padewax, ¡xam kajachawaesaxaelam nadaelman woei tamjolax!

6 “Kijilan tasalas wʉt juez wʉajnalel, xamal chiekal taeyaxaelam, japon juez chiekal nejchaxoelaxaelpox kijilanliajwa. Me-ama nejmachjiw pejbʉꞌwʉajan wʉt, jachiyaxaes japon aton tasalas wʉt juez wʉajnalel.

7 “¡Xamal tasalaximil kichachajbaxtat, aton bʉꞌwʉajanjilpon! ¡Tapaeyaximilbej kastikas wʉt boesaliajwaspon japon aton bʉꞌwʉajanjilpon! Xan chinax jʉmchiyaxinil: ‘Japon aton bʉꞌwʉajanjil’ —chiyaxinil japon aton pejbʉꞌwʉajanpoxliajwa.

8 “Xamal juezj, jiw pejbʉꞌwʉajanpi xamal mosaxael wʉti platatat, ja-aech wʉt, ¡kinosaximil japi pejewplata! Xamal kinotam wʉt, japi jiw pejewplata, ja-am wʉt, xamal, me-ama itliakliwam wʉt, jachiyaxaelam. Samata, xamal nijaxtat jiw pejbʉꞌwʉajanpi kastika-esil, babijaxan is wʉti.

9 “Aton asatʉajnʉpijin wʉt, ¡japon atonliajwa xamal isaximil babijaxan! Xamalbej majt Egipto tʉajnʉxotam wʉt, asatʉajnʉpijwam. Xamalbej najut chiekal matabijtam, ma-aech, asatʉajnʉxot duilam wʉt —aech Dios Moisésliajwa, japon jʉmchiliajwa puexa israelitas.

10-11 Dios kaes jʉm-aech ampox Moisésxot, japon jʉmchiliajwa puexa israelitas:

“Naxaeyaxan mʉthaxaelam seis waechan, nejsatanxot nabistam wʉt. Pe séptimowaechliajwa wʉt, ¡nabichaximil nejsatan kaewaechliajwa! ¡Japawaech wʉt nejtʉajnʉpijiw, kijila, xaeliajwa, pajut naboelapi nejsatanxot, choefbej xaeliajwa! Malap-is jachiyaxaelam nej-uvalulanliajwa, nej-olivonaechanliajwabej.

12 “Kaesemana wʉt, ¡seis matkoiyan wʉt puexa xamal chiekal isampox kitoesaxaelam! Pe séptimomatkoi wʉt, ¡puexa xamal chiekal napataxaelam damlathʉlaliajwam! ¡Nejew choefbej puexa chiekal napataxael! ¡Nejew woei, burbej, xanbichaximil, japi kaes chiekal mamnikaliajwa xatoetxoti pamamaxan, xanbistam wʉt! Nej-esclavos, nej-esclavasbej, asatʉajnʉchanpijiwbej, ¡chiekal napataxael japamatkoi wʉt!

13 “¡Xan tatoꞌlaxpoxan, japoxan xamal puexa chiekal isaxaelam! ¡Xamalbej kawʉajnaximil asew jiw pejdiosan, japi kawʉajanpoxan!” —aech Dios Moisésliajwa, japon jʉmchiliajwabej puexa israelitas.

14 Dios kaes jʉm-aech ampox Moisésliajwa, japon jʉmchiliajwabej puexa israelitas:

“Kaewaechan wʉt, ¡xamal isaxaelam tres fiesta itpaeliajwam xan nasitaenampox! 15 Matxoela pejfiesta wʉt, xamal xaeyaxaelam pan, levadurajila, siete matkoiyan wʉt, me-ama xan jʉm-an majt. Jachiyaxaelam Abib pawʉljuim wʉt, japajuim wʉtlap xamal chijiam xot Egipto tʉajnʉxotdin. Xamal fʉlaeman wʉt japafiesta taeliajwam, xan nakawʉajnaliajwam, ¡ke-etat fʉlaeyaximil! ¡Xalaeyaxaelam malechpi xan taj-ofrendaliajwa, me-ama xamal chajia toꞌax xalaeliajwam!

16 “Kaewaechan wʉt, ¡isaxaelambej segundafiesta! Japafiesta isaxaelam mat-om-isliajwam trigo jolampoxan. Japafiesta wʉt, kaesʉapich trigo nawexalaeyaxaelam, chiekal matxoelajolampi, xan taj-ofrendaliajwa. Kaewaechan wʉt, waech toepax wʉajna, ¡isaxaelambej tercerafiesta, xamal chiekal kitoetam wʉt jolaxan, tʉtampoxanbej, puexa mʉthampi!

17 “Kaewaechan wʉtbej, puexa poejiw chinax chakowaxil japafiestan naktaeliajwa, itpaeliajwabej sitaeyax xanliajwa.

18 “Choefan xʉaꞌlampon pejjal xan nachaxdutam wʉt taj-ofrendaliajwa, jawʉt, kaewʉtje, nachaxdusaximil pan, tanialaspi levadura. Nachaxduiyaxaelamlax pan levadura taniala-esalpi. Choef xʉaꞌatam wʉt xanliajwa, choef pejsi maeyaximil kandiawa bowaliajwam. Jawʉt, japamatkoitat, choefsi bowam wʉt, chiekal toejafaxaelam.

19 “Trigo matxoelajolampi, kaes chiekal pachaempi, nejlulanpijiw, japitrigofu nawexalaeyaxaeman xan tajcarpaba poxadin, xan nejpaklon Diosnanliajwa.

“¡Cabraxʉlan chat-esaximil pen pejmit-ʉftat! —aech Dios Moisésxot, japon jʉmchiliajwabej puexa israelitas.

20 Dios kaes jʉm-aech ampox Moisésxot, do jawʉx Moisés jʉmchiliajwabej puexa israelitas:

“Xan taj-ángel toꞌaxoekan japon matxoelaliajwa, xamal nʉamtat folam wʉt xamal chiekal tataeflaliajwa, xan chajia chawʉajnachaemtax poxade. 21 ¡Taj-ángelxot atʉajaximil! ¡Japon chiekal naexasisaxaelam! Xamal nejchaxoelam wʉt, ¡jʉmchiyaximil ampox: “Xan nejwesla naexasisliajwan ángel natoꞌapox” —chiyaximil, xamal nejchaxoelam wʉt, japon isfʉl xot, xan jʉm-anpoxan! Taj-ángel chinax beltaeyaxil xamal babijaxan isampoxanliajwa. 22 Pe xamal diachwʉajnakolax chiekal naexasitam wʉt taj-ángel, isam wʉtbej xan jʉm-anpoxan xamalliajwa, ja-am wʉt, nadaelmajiw, xan tadaelmajiwaxaelbej. Xanlap nabeyaxaelen, nadaelmajiw sʉapich. 23 Taj-ángel matxoela fʉlaeyaxael xamalxot, bʉflaeliajwa xamal amorreos pejtʉajnʉ poxade, hititas, ferezeos, cananeos, heveos, jebuseos, pejtʉajnʉchan poxade. Pe xan japi jiw puexa toesaxaelen. 24 Japi babijaxan ispoxan, xamal nakxataeyaximil. Japi pejdiosan wʉajnalel xamal brixtat nuilaximil kawʉajnaliajwam japoxan. ¡Xamallax toesaxaelam japi kawʉajanpoxan! Iaꞌ, pinanʉl nuilpi, japi kawʉajnaliajwa, ¡japoxanbej chiekal toesaxaelam! 25-26 Xanlap nejDiosnan, ¡na-itpaeyam xanliajwa xabich nejchachaemlampox! Ja-am wʉt, xan chaxduiyaxaelen naxaeyaxan, minbej, xamal chiekal nejchaemaliajwam.

“Xan chiekal tataeflaxaelen xamal bʉꞌxaenkasamatam waxaetat, tʉpasamatambej nejmatkoi wʉajna. Wathoꞌ, paxi chabijapi, ijilaxael nejtʉajnʉchanxot. Ijilaxaelbej wathoꞌ, nafoenapi.

27 “Xan tajkajachawaesaxtat potʉajnʉchanpijiw xabich pejlewlaxael xamalliajwa. Nejmachtʉajnʉchan poxade, xamal fʉlaeyaxaemchtʉajnʉchan poxade, xan tajkajachawaesaxtat, nadaelmajiw naedʉkpaxaeli xamal, xabich pejlewla xoti. 28 Xan tajkajachawaesaxtat asatʉajnʉchanpijiw xabich pejlewlaxael xamal xenaxaelam poxade. Samata, heveos, hititas, cananeosbej, japi puexa xamal naedʉkpaxael, fʉlaeman wʉt japilel. 29 Xan jukx wʉt nadaelmajiw pejtʉajnʉchanxot, kamta kaewaechtat jukax toesaxinil. Tapaeyaxaelen japi duilaliajwa pejtʉajnʉchanxot, satan napesasamata, xabich pejme choef, tathoetpijiw, kaes xabichasamata, baxael, xamal tabejsasamata japi choef. 30 Xan tajkajachawaesaxtat, japi kamta puexa chijiyaxil. Asamatkoi, asew chijiyaxael. Jasoxtat japi chijiyax natoesfʉlaxael. Pe naxi xabich pin-iat wʉt, ja-aech wʉt, xamal, naxi sʉapich, nosaxaelam japi pejtʉajnʉchan nejtʉajnʉchanliajwa. 31 Nejtʉajnʉchanaxaelpox xan markax Mar Rojoxotdin hasta mar Mediterráneoxotde, filisteos duilxotde. Markaxbej pajilaxxotdin hasta Éufrates nawelxotde. Xan tapaeyaxaelen xamal japatʉajnʉpijiw, xamal nijaxtat japi jiw chijiyaliajwa.

32 “¡Japi sʉapich, xamal kaenejchaxoelaximil! ¡Japi pejdiosan nakkawʉajnaximilbej! 33 Xamal tapaeyaximil japi jiw duilaliajwa, xamalxot. Japi ispoxan nakxataenam wʉt, xamal babijaxan isaxaelam xanliajwa. Japi pejdiosan xamal nakkawʉajnam wʉt, xamal napelsaxaelam xanxot” —aech Dios Moisésxot, do jawʉx Moisés jʉmchiyaxaechon puexa israelitas.