“Aton natkowa wʉt asan pijan, woei, o, oveja wʉtbej, xʉaꞌla wʉton choefan, o, mowa wʉtbejpon, japon, natkowapon, mosaxael woeipijin cinco paktat woei-natkowa-ompox mosliajwa. Japon natkowa wʉt oveja, mosaxael ovejapijin cuatro ovejatat oveja-natkowapox mosliajwa. 2 “Pe natkowapon, ba madoi low wʉt natkowaliajwa, jawʉt, chalechkal, bapijin bejcha wʉton natkowapon, japon natkowan tʉp wʉtbej, bapijin bʉꞌwʉajanjilaxael natkowapon tʉpoxliajwa. 3 Pe matkoi wʉt, bapijin boesa wʉt natkowan, bapijin pejbʉꞌwʉajnaxael, matkoi boesa xoton natkowapon.

“Natkowapon mosaxael natkowapox pa-ompoxtat. Pe, natkowapon plata kijil wʉt mosliajwa natkowapox, ja-aech wʉt, japon mowaxaes esclavoliajwa wenatkowapon mosliajwapon.

4 “Aton, natkowapon, japon faens wʉt, choefan, natkowapon sʉapich, buey wʉt, o, bur wʉt, o, oveja wʉt, japon aton natkowapox choefanliajwa, kaes pejme mosaxaelon. Koleveces mosaxaelon wenatkowapon mosliajwapon.

5 “Aton pejew, choef, tapaei wʉt matxaeliajwa asan pejlulxot, ja-aech wʉt, choefpijin pejlul, kaes chiekal wepachaemslul diajnaxaelon mosliajwapon lulpijin wetabejtasponliajwa. Malap-is jachiyaxael, uvalulpijinliajwa, pejchoef matxael wʉt asan pej-uvalulxot. Choefpijin pej-uvalul kaes chiekal wepachaemslul diajnaxaelon mosliajwa lulpijin wetabejtasponliajwa.

6 “Aton jit tamdut wʉt, japox jit atʉaj fol wʉt, asan pejtrigolul chatoejwas wʉt, tamejaspi, o jolaliajwaspi wʉt, puexa mʉthaspibej, chatoejwas wʉt, jit tamdutponlap mosaxael wechatoejwaspon.

7 “Aton chiekal xanaboejt wʉt asanliajwa, japon atonxot pejewplata waelapon, o, ommaenkpibej. Pe japon aton pejbaxot natkowan japi not wʉt, natkowapon kaes koleveces mosaxael pa-ompox natkowapoxliajwa, natkowapon faen wʉti. 8 Pe faena-el wʉti natkowapon, ja-aech wʉt, xanaboejtaspon bʉflaeyaxaes jueces poxade, japi jueces chiekal matabijsliajwa, japon diachwʉajnakolax pajut natkowa-elpox, xabich xanaboejtaspon pejew. 9 “Aton pijan dofa wʉt, asan pijan buey, o, bur wʉt, o, oveja wʉtbej, o, naxoelax wʉtbej, o, asax, nafoꞌapoxliajwa wʉt, do jawʉx, asan jʉm-aech wʉt ampox: ‘Japoxan diachwʉajnakolax xan chiekal tejew’ —aech wʉton, japi kolenje bʉflaeyaxaes jueces poxade, japi jueces chiekal matabijaliajwa achan japixot diachwʉajnakolax pejbʉꞌwʉajan. Japi jueces chiekal matabijt wʉt, pejbʉꞌwʉajanpon, japon aton kaes koleveces mosaxaelon diachwʉajnakolax pejewkolapon.

10-11 “Aton, fit wʉt asan pijan choefan asan atonxot, japon chiekal xanaboejtaspon pijan, japon aton chiekal tataeflaliajwa choefan, woei wʉt, o, bur wʉt, o, oveja wʉt, nejmachchoefan wʉtbej, pe asamatkoi, choefan chiekal masoxtat tʉp wʉt, o, najala wʉtbej, o, asan aton natkowa wʉt choefan, pe chinax aton tae-el wʉt, choefan natkowas wʉt, choefan tataefʉlpon, japon aton jʉmchiyaxael ampox choefanpijinxot: “Xan jʉm-an ampox xamxot, Dios pajut chiekal najʉmtaeliajwa. Xan japon choefan natkowa-enil” —chiyaxaelon choefanpijinxot. Ja-aech wʉt, choefanpijin naexasisaxaeson japon jʉm-aechpox, diachwʉajnakolaxpox. Ja-aech wʉtbej, japon mosaxil choefan natkowaspoxliajwa. 12 Pe japon aton sitnatkowas wʉt asew jiw, chinax japon aton is-el wʉt, choefan tataefʉlpon mosaxael choefanpijin, asew jiw choefan sitnatkowaspoxliajwa. 13 Choefan matkaech wʉt choefan tathoetpijin, choefan tataefʉlpon xanwiasaxael choefan matkaechpon itpaeliajwa japon pijan choefan wematkaechpox chofan tathoetpijin. Ja-aech wʉt, choefan tataefʉlpon mosaxil choefan tʉpoxliajwa.

14 “Nejmach-aton wʉljow wʉt asan atonxot prestaliajwaspon choefan, pe asamatkoi, choefan, masoxtat tʉp wʉt japon atonxot choefanpijin tae-elaxtat, o, choefan najala wʉtbej tae-elaxtat choefanpijin, japon prestapon mosaxaelon choefanpijin, choefan tʉpoxliajwa, o, najalapoxliajwabej. 15 Pe choefanpijin taen wʉt pijan choefan tʉpox, o, taen wʉtbejpon pijan choefan najalapox, ja-aech wʉt, japon aton prestaspon mosaxil choefan tʉpoxliajwa, o, choefan najalapoxliajwabej. Pe aton asan pijan choefan alquilapon xanbichliajwa, pe asax ja-aech wʉt choefanliajwa, japon aton mosaxil ja-aechpoxliajwa choefanliajwa. Japon aton mosaxael alquilapoxkal” —aech Dios Moisésxot, japon jʉmchiliajwa puexa israelitas.

16 Dios pejme jʉm-aech ampox Moisésxot, japon jʉmchiliajwa puexa israelitas:

“Nejmach-aton kichachajbaxtat pawis bʉꞌmoejt wʉt, chinax poi bʉꞌmoejs-esalpow, japowbej jʉmdus-el wʉt fisliajwa japon poi, ja-aech wʉt, bʉꞌmoejtpon japow atow, japon aton mosaxael japow pejjiw. Me-ama pejkabʉan nakjiyaliajwa wʉt matxoela moti, jachiyaxael, japon aton bʉꞌmoejt xoton japow. Do jawʉt, japon aton fisaxael japow pijowliajwa. 17 Japow pax tapae-el wʉt, japon aton fisliajwa japow, japon aton nakiowa, mosaxael japow pejjiw. Me-ama japi pejkabʉan atow chinax poi bʉꞌmoejs-esalpow fit wʉton, japon aton mosaxael japow pejjiw.

18 “Wathoꞌ, nabistpi pejpinjoeꞌaxtat, ¡japi wathoꞌ tapaeyaximil kaes laelpaliajwa ampathatxot! ¡Kamta chiekal bempi!

19 “Aton, ja-aechpon choefanpawistat, japon aton boesaxaes, japox pejkastikaxliajwa japon aton.

20 “Choef xʉaꞌatpon asew diosanliajwa, japi choef xankalliajwa-el, japon atonlap-is boesaxaes japox pejkastikaxliajwa.

21 “Aton asatʉajnʉpijin wʉt, ¡japonliajwa xamal isaximil babijaxan! Xamalbej majt Egipto tʉajnʉxotam wʉt, asatʉajnʉpijwam. Samata, ¡chiekal pachaemde asatʉajnʉpijinliajwa!

22 “¡Xamal isaximil babijaxan wathoꞌliajwa, pamaljiw naetʉpspiliajwa, yamxi pasoelpiliajwabej! 23 Pe xamal nakiowa babijaxan isam wʉt, japi wathoꞌliajwa, o, yamxi pasoelpiliajwabej, japi, nawʉljow wʉti xanxot tajkajachawaesax, xan fʉlaeyaxaenkan xamal poxadik. 24 Xabich talalaxtat xamal beyaxaelen espadatat. Ja-an wʉt, nejwathoꞌ namaeyaxael, me-ama wathoꞌ, pamaljiw chajia naetʉpspi wʉt, jachiyaxael nejwathoꞌjiw. Ja-aech wʉtbej, naxibej pasoelaxael.

25 “Xamal prestam wʉt plata, xan naexasitpon, xamalxot dukpon, japon kijil wʉtbej, ¡xamal, me-ama plata prestapi, jachiyaximil japonliajwa! Plata prestapi kaewʉchfʉl mat-omwʉljoefʉl. Xamallax jachiyaximil japon atonliajwa. Mat-omwʉljoeyaximilbej interes prestampoxliajwa. 26 Xamal prestampon plata, waelt wʉton pejsumta-osax xamalxot prestampoxliajwa, japon wewiasaxaelam mot wʉt prestampoxliajwa. Pe xamal kaematkoisfʉl, juimt tujop wʉt, japon aton pejsumta-osax prestaxaelampon naxtʉajsliajwa, moejt wʉt. 27 ¡Ja-amde japon aton, kaes asax kijil xoton naxoelax, xabich nabijasaxaelxoton pathuiyaxtat! El wʉt, ¿achaxkat japon naxtʉajsaxael? Pe japon aton nawʉljow wʉt tajkachawaesax, xan japon aton kajachawaesaxaelen. Xan tajut chiekal matabijtax beltaeliajwan jiw kijila.

28 “¡Xamal jʉmchiyaximil babejjamechan xan nejDiosnanliajwa! ¡Xamal jʉmchiyaximilbej babejjamechan tatoꞌalpi nejtʉajnʉxot!

29 “¡Trigo chiekal matxoelajolampi, xabich piach kijsaximil nawexalaeliajwam xan taj-ofrendaliajwa! ¡Vinobej, chiekal matxoelajukamminan, nawexalaeyaxaelam taj-ofrendaliajwa!

“Kaenanʉla xamal naxipoejiw, matxoelanalaelapi, japilap xan tejwaxael. 30 Jachiyaxaelbej kaenanʉla nejew choefliajwa. Matxoelanalaelapikal xan tejewaxael, japi choef, pak wʉt, o, oveja wʉt. Choefan, xan tajanpon, xamal nawetataeflaxaelam siete matkoiyan. Ocho matkoiyan wʉt choefan nalaeltpox, xʉaꞌlaxaelam taj-ofrendaliajwa.

31 “Xamal poejwam, xankal tanbichliajwam.

“Samata, ¡xaeyaximil choefwi, matkaechpon nejmachoefan, tathoetpijinpon! ¡Japawi wʉr dʉajde!” —aech Dios Moisésxot, japon jʉmchiliajwa puexa israelitas.