Bezaleel ispox altar broncetat
38
Bezaleel, pejjiw sʉapich, ispi altar acaciatawlafachantat choef bowaliajwa jaxot. Is wʉti japox altar, isipox cuadradotat. Palelan cuatrolelan dos metros y veintecinco centímetro pakchowaxpox. Japa-altar un metro veinticinco centímetro athʉpox. 2 Japi is cuatro mat-e noeliajwa altar pejcuatro izquinanxot. Mat-e is wʉti, ispi koew tawlafachantat. Japox altar matxafafapi broncefachantat. 3 Isbejpi broncetat xa-isliajwapi altarxot. Japi ispoxan ampoxanlape. Jitthumba tholaliajwapoxan, palaxanbej, tasfachan pinanʉlpibej. Isbejpi tenedores jitbʉaꞌan thiklapaliajwa. Isbejpi jitbʉaꞌan, itdelanpi, xalaeliajwa. 4 Isbejpi broncetat rejilla altarliajwa. Do jawʉt, etipot altartutat athʉxach dusliajwa. 5 Isbejpi cuatro bronce-argollan duiliajwa rejilla pej-izquinanxot, argollawʉajan poxade xajoeliajwade acacianaeyan, japoxan takʉkaliajwa fol wʉt. 6 Do jawʉx, isbejpi acacianaeyan altarxot xatdelaliajwa. Japanaeyan matxafafas broncefachantat. 7 Do jawʉx, japanaeyan xajoeldepi altar-argollanwʉajan poxade, kolelelje, altarlelan, chijia wʉt xalaeliajwa. Japi altar is wʉt, isipox, pawʉajantat, me-ama paboktat, acaciatawlafachantat.Bezaleel ispox broncetas, xabich pinjiafpox, Dios pejcarpabapijaxliajwa
(Éx 30.18)
8 Israelitaswathoꞌ, nabichaxaelpi Dios pejcarpaba laleyaxxot, japi pejchapotan, isas broncetat. Japi wathoꞌ chaxduwpi pejchapotan Bezaleelxot, japon pejjiw sʉapich, isliajwa broncetas, xabich pinjiafpox, japox tas pejbaseliajwa, Dios pejcarpabaxotaliajwa.
Bezaleel ispox Dios pejcarpabafʉlmakt
9 Bezaleel, pejjiw sʉapich, is Dios pejcarpabafʉlmak. Surlel, japox bafʉlmakliajwa cuarenta y cinco metro xajajialaliajwa linobʉꞌantat, jʉchbʉꞌan. 10 Do jawʉx, Bezaleel, nabistpi sʉapich, islisi veinte acacianosnaechan. Isbejpi veinte basan broncetat noeliajwa japanosnaechan japabasanxot. Isbejpi ganchan, argollanbej, linobʉꞌan duw wʉt xajoeliajwa. 11 Dios pejcarpabafʉlmakt nortelel linobʉꞌ, xabich pakchowbʉꞌpox. Japox pakchowaxpox cuarenta y cinco metro. Veinte acacianosnaechan ispi japalinobʉꞌ xajajialaliajwa. Isbejpi veinte basan broncetat, japanosnaechan noeliajwa japabasanxot. Isbejpi plataganchan, plata-argollanbej, japalinobʉꞌ xatathoekaliajwa, dusliajwa wʉt. 12 Isbejpi linobʉꞌ veintidós metro y medio occidentefʉlmaklelliajwa xajajialaliajwa. Isbejpi diez acacianosnaechan bafʉlmakxot xajajialaliajwa. Isbejpi diez basan japanosnaechan noeliajwa. Isbejpi plataganchan, plata-argollanbej, japalinobʉꞌ xatathoekaliajwa, dusliajwa wʉt. 13 Isbejpi linobʉꞌ veintidós metro y medio orientefʉlmaklel xajajialaliajwa. 14 Isbejpi siete metro linobʉꞌ Dios pejcarpabafʉlmaklaleyaxlel xajajialaliajwa. Isbejpi tres acacianosnaechan. Isbejpi tres basan japanosnaechan noeliajwa japabasanxot. 15 Isbejpi siete metros linobʉꞌ Dios pejcarpabafʉlmakt ta-ulel xajajialaliajwa. Isbejpi tres acacianosnaechan, malis tres basan. 16 Puexa linobʉꞌan Dios pejcarpabafʉlmakt xajajialaliajwa chiekal baelsbʉꞌan linomʉatat, jʉchmʉatat. 17 Japi basan nosnaechan noeliajwa isaspi broncetat. Isbejpi ganchan, malis argollan, platatat, japanosnaechanliajwa. Puexa japanosnaechan, athʉlelse, xafafas platafachan. Puexa japi nosnaechanfʉlmakliajwa duws plata-argollan.
18 Cortina, Dios pejcarpabafʉlmakt laleyaxxotliajwa, japabʉꞌ color moradabʉꞌ, malis pasoeibʉꞌ, xabich chimiabʉꞌ, chiekal jʉchbʉꞌ. Japabʉꞌ baels wʉt, chiekal kilachaemlas. Japabʉꞌ pakchowaxpox, nueve metropox. Dos metro veinticinco centímetro athʉpox. Japacortina athʉpox chiekal najʉp asacortinabʉꞌan sʉapich, Dios pejcarpabafʉlmakt pejcortinabʉꞌan. 19 Japox cortinabʉꞌ, Dios pejcarpabafʉlmakt laleyaxxotliajwa cuatro nosnaechanpox. Kaenanʉla japanosnaechan nows pejbasanxot, isaspi broncetat. Japanosnaechan pejganchan, anillosbej, isaspi platatat. Japanosnaechan athʉlelse matxafafas platafachan. 20 Puexa estacaxan Dios pejcarpabaxotliajwa, bafʉlmaktxotliajwabej, isaspi broncetat.
Levitas pamojiw cuenta lelpox nejmach-anael puexa xadaeptpoxanliajwa, is wʉti Dios pejcarpaba
21 Moisés toꞌa sacerdote Aarón paxʉlan, pawʉlpon Itamar, japon kajachawaesliajwa levitas pamojiw, cuenta lel wʉti, chiekal matabijsliajwa massʉapich xadaepti nejmach-anael xanbist wʉti, is wʉti Dios pejcarpaba.
22 Bezaleel, pax pawʉl Uri. Uri pam pawʉl Hur. Japon Hur, Judá pamon. Bezaleel puexa chiekal is, me-ama Dios jʉm-aech Moisésxot japoxan isaxan kitoꞌaliajwapon. 23 Aholiab kajachawaet Bezaleel, japoxan is wʉt. Aholiab pax pawʉl Ahisamac. Japon Ahisamac Dan pamojiwmʉtpijin.
24 Puexa oro xa-is wʉti xadaeptpoxan, is wʉti Dios pejcarpaba, japi oro xalaenspi Dios pej-ofrendaliajwa. Japi oro xadaeptpoxan chiekal xajʉch wʉti, dewnikpox nakolt novecientos sesenta y cinco kilos y treinta gramos.
25 Censo is wʉt, plata kinot wʉti nakae-israelitas, japi plata chiekal xajʉt wʉti, nakolt tres mil trescientos diecinueve kilos y quinientos veinticinco gramos. 26 Puexa, kaes veinte waechanpi, censoxot wʉllels, seiscientos tres mil quinientos cincuenta poejiw nakolt israelitas. Kaenanʉla japi poejiw chaxduw cinco gramos y medio plata. 27 Do jawʉt, tres mil trescientos kilos plata jofapi isliajwa basan Dios pejcarpabafʉlmakt xajajialaliajwa, linobʉꞌtat diajnaliajwabej batu. Puexa japiplatafachantat ispi cien basan. Kaenanʉla basan dewnik treinta y tres kilos. 28 Puexa japaplatafachan, israelitas owapoxan. Japi platafachantat Bezaleel, japon sʉapich nabisti, ispi ganchan acacianosnaechanliajwa. Platafachantat nosnaechantaꞌtat matxafafabejpi. Japaplatafachantat isbejpi anillos nosnaechanxot duiliajwa.
29 Israelitas bronce owa wʉt Dios pej-ofrendaliajwa, puexa japi bronce xajʉt wʉt, dewnik dos mil trescientos treinta y seis kilos y cuatrocientos gramos. 30 Broncetatbej ispi nosnaechan pejbasan Dios pejcarpaba laleyaxxotliajwa. Japitatbronce isbejpi altar bowaliajwa choef. Broncetatbej ispi rejilla. Puexa xa-isaxaelpoxan altarxot ispi broncetat. 31 Japitatbronce isbejpi basan, estacaxanbej Dios pejcarpabafʉlmaktliajwa. Isbejpi broncetat basan nosnaechan noeliajwa Dios pejcarpabafʉlmakt-laleyaxxotliajwa.