Sacerdotes pejnaxoe isaspoxan
39
Sacerdotes pejnaxoe chiekal baels, sacerdotes nabist wʉt Dios pejcarpabaxot bʉꞌlanabichliajwa. Japi naxoe isas color moradabʉꞌantat, púrpurabʉꞌantatbej, pasoeibʉꞌantatbej. Ma-isi ja-aech, is wʉt ponan, Aarón pejew, japon naxoeliajwa, me-ama Dios toꞌas Moisés. Do jawʉxbej, Moisés toꞌa israelitas.2 Efod isliajwa wʉt, isipox moradabʉꞌtat, púrpurabʉꞌ sʉapich, malis pasoeibʉꞌ, linomʉatat chiekal jʉchmʉatat, oromʉatbej. 3 Japoxlap oromʉat is wʉti, matxoela martillotat chiekal paꞌapi orofachan jukaliajwa. Do jawʉx, tasiaplap, orofachan, paꞌaspi, me-ama hilomʉa wʉt, jakichiliajwa. Do jawʉxbej, japa-oromʉa sʉapich chiekal bael moradabʉꞌ sʉapich, púrpurabʉꞌ sʉapich, malis pasoeibʉꞌ. 4 Efod kolebʉꞌjexaelpox wʉajnalel, matwʉajlelbej. Japox efod kolebʉꞌjepox, matthowspox takaxot. 5 Cinturónmʉat, fatkakʉsliajwapox isas moradabʉꞌtat, púrpurabʉꞌ sʉapich, malis pasoeibʉꞌ, oromʉa sʉapich, linomʉa chiekal jʉchpi sʉapichbej. Japoxbej ispi me-ama Dios jʉm-aech Moisésxot.
6 Cornalina-iaꞌxot paxi pejwʉlan leli. Me-ama sello isliajwa wʉt, jaki-aechipox. Do jawʉtbej, kole-oromonturaxot kaenanʉla iaꞌ duwpon monturaxot dusliajwa. 7 Do jawʉt, Bezaleel, japon sʉapich nabisti, cornalina-iaꞌ duwpi, kaenanʉla efodtakaxot. Israel paxi pejwʉlan japacornalina-iaꞌxot Israel paxi pejwʉlan leli. Japox ja-aechi Dios nejkiowa-elaliajwa pejjiw israelitas. Me-ama Dios jʉm-aech Moisésxot chapaeliajwapon israelitas japoxan isliajwa.
8 Pectoralbʉꞌ dusliajwapox mattiaftxot, xabich chiekal kilachaemili, pectoralbʉꞌxot bael wʉt. Me-ama efod bael wʉt, jaki-aechipox. Japox ispi moradabʉꞌtat, púrpurabʉꞌ sʉapich, malis pasoeibʉꞌ, linomʉatat, chiekal jʉchmʉatat, oromʉatatbej. 9 Pectoralbʉꞌ athow wʉti, truktibʉꞌ daꞌnikaliajwa. Pectoralbʉꞌ ispi cuadradotat. Cuatrolelan veinte cuatro centímetro. 10 Pectoralxot doce iaꞌ duwpi, xabich pachaempi. Japi iaꞌ xabich ommaenkpi. Cuatro hijilerasxot duwpi. Matxoelahileraxot duti iaꞌt, pawʉlpot rubí. Jaxot dutbejpi asat iaꞌt, pawʉlpot crisólito. Jaxot dutbejpi asat iaꞌt, pawʉlpot esmeralda. 11 Segundohileraxot duti iaꞌt, pawʉlpot granate. Jaxot dutbejpi asat iaꞌt, pawʉlpot zafiro. Jaxot dutbejpi asat iaꞌt, pawʉlpot jade. 12 Tercerohileraxot duti iaꞌt, pawʉlpot jacinto. Jaxot dutbejpi asat iaꞌt, pawʉlpot ágata. Jaxot dutbejpi asat iaꞌt, pawʉlpot amatista. 13 Cuartohileraxot duti iaꞌt, pawʉlpot topacio. Jaxot dutbejpi asat iaꞌt, pawʉlpot cornalina. Jaxot dutbejpi asat iaꞌt, pawʉlpot jaspe. Japi iaꞌ duwpi oromonturasxot, pectoralxotbej. 14 Puexa japi iaꞌ, doce iaꞌ. Kaenanʉla japi iaꞌxot leli Israel paxʉlan pejwʉl. Me-ama argollanxot lel wʉt sello isliajwa, jaki-aechi lel wʉt pawʉlan, docemʉtanpijiw israelitas pejwʉlan.
15 Pectoralxot duiliajwa ispi orocadenamʉa chiekal orokolatat, me-ama cordónmʉa, jʉchpi wʉt, jaki-aechi. 16 Isbejpi kole-oromontura, kole-oro-argollabej. Kae-oro-argolla duti pectoral pej-izquinaxot, athʉlelse. Asa-oro-argollabej duti asa-izquinaxot athʉlelse pectoralxot. 17 Do jawʉt, kole-orocadenamʉat xajoeldepi argollawʉaj poxade, matdukaxxot kaelel chiekal duilaliajwa. 18 Do jawʉtbej, oromontura-efodxot takalel kaelel duti kaenanʉla oro-cadenamʉatmatdukaxxot. 19 Do jawʉtbej, ispi kole-oro-argolla. Kae-oro-argolla duti dach pej-izquinaxot. Asa-oro-argollabej duti asa-izquinaxot dachxot. Efodbabʉꞌlel japoxan nama sacerotes pijax, naxoelax sʉapich. 20 Do kaes isbejpi kole-oro-argolla duiliajwa mathiafxot, mox efodtakaxot, athʉlelse efod pejcinturónmʉatxot. 21 Do jawʉx, pathoeimʉatat keꞌtlisi pectoral pej-argolla efod pejdachlel pej-argollaxot. Jasoxtat, pectoral dutlisipox efodxot.
22 Puexa efod pejcapa, sacerdote thʉch naxoeliajwapox, japoxlap chiekal ispi moradabʉꞌtat, baesbʉꞌtat. 23 Japox, capa, patutat wʉajduchpox. Japawʉajxot jʉmbʉꞌtruk wʉt, jʉmbʉꞌathoeyax xamasajiatipox. Me-ama cuerochaleco pejwʉajan is wʉt, jaki-aechipox thialfalasamata. 24 Capa pejmakaxot xabich nejmach ael-is wʉt duwpi, japacapa chiekal chajulaliajwa. Japox, capa, pejmakaxot ael-ispi granadabaech moradabʉꞌxot, púrpurabʉꞌxotbej, pasoeibʉꞌxotbej, linohilomʉa chiekal jʉchmʉatat. 25 Isbejpi cha-aelcampanitas orokolatat duiliajwa, granadabaech sʉapich, japox capa-makamatdukaxxot xabich chamoeyaxliajwapox, duiyax xamasajiatipox. 26 Sacerdote bʉꞌlanabichliajwa capamakaxot duch kaecampanita. Duchbej granadanaebaest ael-isaspox. Ja-aechi japoxan duiyax, xamasajiat wʉti. Japox xabich chamoeyax, me-ama Dios jʉm-aech Moisésxot japox isax chaxpaeliajwapon israeltas japoxan isliajwa.
27 Túnicas, baelspi linomʉatat, jʉchmʉatat, Aarónliajwa, Aarón paxiliajwabej. Puexa japi túnica, kaen aton baelpoxan. 28 Japon atonlap bael linomʉa, jʉchmʉatat, turbantebej, malis tʉaxajoelaxan. 29 Japonlap bael linomʉa, jʉchmʉatat, cinturónmʉatliajwa. Baelpon chiekal, moradamʉatat, púrpuramʉa sʉapich, malis pasoeimʉa. Japon bael wʉt, chiekal kilachaemil, me-ama Dios jʉm-aech, Moisésxot.
30 Isbejpi placa orokolatat. Japox placaxot lelsox, me-ama sello lels wʉt, jaki-aechipox. Japi lelpox jʉm-aech ampox: ‘Ampon aton, nabistpon Diosliajwa’ —aechox. 31 Do jawʉx, cordónmʉatat, moradamʉa sʉapich, ketlisipox dusliajwa placa turbantexot, me-ama Dios jʉm-aech, Moisésxot.
Israelitas toetpox Dios pejcarpaba isax
32 Israelitas toetlisi Dios pejcarpaba isax. Puexa chiekal islisi Dios pejcarpaba, me-ama Dios jʉm-aech Moisésxot. 33 Do jawʉx, puexa israelitas xalaenlisi Moisés poxadin Dios pejcarpabaxot xa-isaxaelpoxan. Japi ispoxan Dios pejcarpabaliajwa ampoxanlape: Pejganchan, pejtawlafachan, pejxatdelanaeyan, pejnosnaechan, malis pejbasan. 34 Xalaenbejpi carnerobʉꞌan owaliajwa Dios pejcarpabamatwʉajtat, joelasbʉꞌan pasoeiminan, asabʉꞌanbej chiekal chimiabʉꞌanpi owaliajwa Dios pejcarpabamatwʉajtat, pabʉꞌan chawʉajnaxat-elaliajwa Dios pejbaúlxot. 35 Xalaenbejpi Dios pijax baúl, pejxatdelanaeyan sʉapich, fol wʉt xalaeliajwa Dios pijax baúl, baúlfafa sʉapich. 36 Xalaenbejpi mesa, mesaxot xa-isliajwapi, panbej owaliajwa mesamatwʉajtat Dios pej-ofrendaliajwa. 37 Xalaenbejpi candelabro, isaspox orokolatat, candelabropijaxan, lámparanbej. Xalaenbejpi candelabroxot xa-isliajwapoxan, olivosiminanbej lámparanxot fallaliajwa, tamduw wʉt itliakaliajwa. 38 Xalaenbejpi altar, orofachantat matxafafaspox, olivosiminanbej Dios pejcarpabaxot nabichaxaelpi japi joelaliajwas, malis incienso, xabich xabejchaempi bowaliajwa, Dios pejcarpabatuxot xabejnikaliajwa, linobʉꞌbej duiliajwa Dios pejcarpaba laleyaxxot. 39 Xalaenbejpi altar, broncefachantat matxafafaspox, pejregilla sʉapich, isaspox broncetat. Xalaenbejpi japox altar pejxatdelanaeyan sʉapich, puexa xa-isliajwapoxan altarxot. Xalaenbejpi broncetas, pinjiaf, japox tas pejbase sʉapich. 40 Xalaenbejpi linobʉꞌan Dios pejcarpabafʉlmaktxot xajajialaliajwa, japabʉꞌan pejnosnaechan sʉapich, japinosnaechan kaenanʉla pejbasan. Xalaenbejpi linobʉꞌ dusliajwa Dios pejcarpabafʉlmakt laleyaxxot, mʉabej, Dios pejcarpabafʉlmakt pej-estacan sʉapich, Dios pejcarpabaxot xa-ispiliajwapi. 41 Xalaenbejpi sacerdotes pejnaxoe, japoxan chiekal baelspoxan, bʉꞌlanabichliajwa tajcarpabaxot. Japoxan naxoeyaxan sacerdote Aarónliajwa chiekal kilachaemlaspox, Aarón paxiliajwabej, japi sacerdotexot.