Israelitas kitoetpox Dios pejcarpaba isax
40
Do jawʉt, Dios jʉm-aech ampox Moisésxot: 2 “Matxoelamatkoi wʉt, chiekal matxoelajuim wʉt, jawʉt, ¡xamal thilsaxaelam isliajwam tajcarpaba! 3 Do jawʉt, tajcarpaba isax kitoeti wʉti, tajbaúl matxoela esaxaeli tajcarpabatuxot. Tajbaúl esaxaelxot, asabʉꞌ, linobʉꞌ, dusax chaxpaeyaxaelam chawʉajnaxat-elaliajwa tajbaúl. 4 ¡Tajcarpabatuxotlap mesanosax chaxpaeyaxaelam, candelabro sʉapich! ¡Chaxpaeyaxaelampi chiekal puexa chaemsliajwa mesaxotaxaelpi! ¡Eyaxaelambej lámparan candelabroxot! 5 Linobʉꞌ wʉajnalellap altar nosaxaelam bowaliajwa incenso. Do jawʉx, dusaxaeli linobʉꞌ tajcarpaba laleyaxxot. 6 Do jawʉxbej, altar nosaxaeli choef bowaliajwa tajcarpaba laleyaxxot. 7 ¡Do jawʉx, tajcarpabaxot, altarxotbej, japox koloeyaxtuxot, broncetas, pinjiaf ispox, esaxaelam pejbasexot! ¡Do jawʉt, min wʉlʉsaxaeli! 8 Do jawʉxbej, tajcarpabafʉlmakt xajajialaxaeli. Jawʉt, duiyaxaeli linobʉꞌ tajcarpafʉlmakt laleyaxxot.9 “(Do jawʉtbej, ¡chafisaxaelam olivosimint matwʉajchafalaliajwam tajcarpaba, puexa japacarpaba-tutatpoxanbej! Japox isam wʉt olivosimintat, puexa japoxan xabich pachaemaxael xanliajwa. 10 Chafanaxaelambej olivosimintat altar, choef chabowaxaelxot, altarxot puexa xa-isxaelpoxanbej. Japox isam wʉt, japox altar xabich pachaemaxael taj-altarliajwa. 11 Chafanaxaelambej olivosimintat bronce-tas, pinjiyax tas, japoxtas pejbasebej. Japox isam wʉt, xabich pachaemaxael puexa japoxan xanliajwa.
12 Do jawʉx, xam najut Moisés ¡bʉflaeyaxaelam Aarón, Aarón paxibej, tajcarpaba poxadin! ¡Tajcarpaba laleyaxxot jaxot Aarón, paxi sʉapich, nawaeyaxael japamin itpaeliajwa japi xabich pachaempox tajwʉajnalel! 13 Do jawʉx, Aarón naxoelaxael sacerdote pijax, chamoeyaxpox. Do jawʉxbej, ¡olivosimintat taꞌchafanaxaelam Aarón japon tajsacerdoteliajwa! 14 Do jawʉxbej, moxaxaelam Aarón paxixot xaxoeliajwam túnicas. 15 ¡Malap-is Aarón paxi taꞌchafanaxaelam olivosimin! Me-ama Aarón taꞌchafanam wʉt, ¡jakichiyaxaelam, japibej tajsacerdotesliajwa! Xam japox isam wʉt, japi paxibej, japi pamojiwbej, asamatkoi, sacerdoteliajwa pomatkoicha —aech Dios Moisésxot.
16 Do jawʉx, Moisés, pejjiw sʉapich, puexa islisi, me-ama Dios kitoꞌas. 17 Kolewaechanlisox israelitas chijiapox Egipto tʉajnʉxot, matxoelamatkoi wʉt, matxoelajuim wʉt, jawʉt, israelitas kitoet Dios pejcarpaba ispox. 18 Moisés, pejjiw sʉapich, kitoet Dios pejcarpaba ispox. Japox isliajwa wʉt, basan iapi. Do jawʉtbej, tawlafachan noefʉli. Xatdelanaeyan japatawlafachan pej-argollawʉajan poxade xajoeipi. Nosnaechanbej noefʉli pejbasanxot. 19 Xabichalisi carpabʉꞌan Dios pejcarpabamatwʉajliajwa. Do jawʉx, thʉch owabejpi asabʉꞌan, me-ama Dios jʉm-aech Moisésxot japox isax chaxpaeliajwapon israelitas.
20-21 Do jawʉx, Moisés (xalaen) iaꞌfachan ((xalaen)) owaliajwa Dios pejbaúltutat. Do jawʉxbej, kolexatdelanaeyan xajoeipi Dios pejbaúl pej-argollawʉajan poxade. Do jawʉx, baúlfafa oꞌklisi. Do jawʉxbej, xalaechipox esliajwa Dios pejcarpabatutat. Jaxot xat-eli linobʉꞌ Dios pejbaúl etxot, me-ama Dios jʉm-aech Moisésxot japox isliajwa israelitas.
22 Do jawʉx, linobʉ pejtathoetlel Dios pejcarpabapiezaxot, pawʉlxot Lugar Santo, japapiezatutat mesa noti, nortelel. 23 Do jawʉt, japamesamatwʉajtat pan owalisi Dios pej-ofrendaliajwa, me-ama Dios jʉm-aech Moisésxot, japox isliajwa((pi)).
24 Do jawʉx, Dios pejcarpabapiezaxot, candelabrobej chanoti, surlel, mesawʉajnalel. 25 Tamduwpi lámparan Dioswʉajnalel, me-ama Dios toꞌaspi japox isliajwa.
26 Do jawʉx, Lugar Santoxot, linobʉꞌ dutxot wʉajnalel, noti altar, Japox altar isaspox orotat bowaliajwa incenso. 27 Do jawʉt, japox altarmatwʉajtat bowalisi incenso, xabich xabejnikpi, me-ama Dios jʉm-aech Moisésxot japox isliajwa.
28 Do jawʉx, Moisés dut(lison) linobʉꞌ Dios pejcarpaba laleyaxxot. 29 Do jawʉtbej, noti altar choef bowaliajwapox Dios pejcarpaba wʉajnalel. Choef bowan papijin altarxot bowaliajwapon choef. Japonlap bowaxael trigo, cebada, japoxan Dios pej-ofrendaliajwa, me-ama Dios jʉm-aech Moisésxot japox isliajwa.
30 Do jawʉxbej, Dios pejcarpabaxot, altarxotbej, japox koloeyaxtutat, bronce-tas, xabich pinjiyaxpox, etpon pejbasetat. Jawʉtbej, min powapon wʉlʉsliajwa japox tas pinjiyax jaxot kikakiasliajwa sacerdotes. 31 Japoxbronce-tasxot minpowa Moisés, Aarón sʉapich, Aarón paxibej, japi kikakiasliajwa, tʉakan kiasliajwabeji. 32 Dios pejcarpaba leliajwa wʉt, altarxot moxaliajwa wʉtbej, japi majt chiekal kikakiasaxael. Tʉakan kiasaxaelbejpi, me-ama Dios jʉm-aech Moisésxot japox isliajwa.
33 Dios pejcarpaba toesliajwa wʉt, Moisés, israelitas sʉapich, carpabafʉlmakt xamasajiaꞌapi. Linobʉꞌan duw wʉt Dios pejcarpabafʉlmakt laleyaxxot. Jasoxtat, Moisés, israelitas sʉapich, toeti Dios pejcarpabafʉlmakt ispox.
Itloejen dukpox Dios pejcarpabamatwʉajtat
34-35 Do jawʉt, Moisés, israelitas sʉapich, toet wʉti Dios pejcarpabafʉlmakt ispox, jawʉt itloejen fʉloek Dios pejcarpaba matwʉajasik. Jawʉtbej, Dios pej-itliakax masoxtat xabich itliak carpabatuxot. Samata, Moisés leyaxil Dios pejcarpabaxot.
36 Do jawʉx, itloejen athʉ jul wʉt Dios pejcarpabaxot, israelitas jol pejcarpabʉꞌan itloejen athʉ matxoela dukafʉl wʉt, israelitasbej fʉlaeliajwa itloejen dukafʉl poxade. 37 Itloejen athʉ jula-el wʉt, israelitasbej chiekal kaweta. Israelitas wʉajnawet, itloejen athʉ jul wʉt, japibej pejme fʉlaeliajwa. 38 Pomatkoicha, matkoi wʉt, itloejen jiduk Dios pejcarpabamatwʉajtat. Madoi wʉt, japox itloejen ji-itliakpox Dios pejcarpabamatwʉajtat. Ja-aech wʉt, puexa israelitas chiekal taenpi, itloejen itliak wʉt madoi. Ja-aech japox itloejen, Moisés bʉꞌnanʉamt wʉt(on) israelitas pajilaxxot.