“¡Israelitasxot toꞌaxaelam wʉljaesliajwapi nakoewan Aarón, Aarón paxibej, japilap puexa israelitas pejsacerdote! Aarón paxixot, kaen pawʉl Nadab. Asan pawʉl Abiú. Asan pawʉl Eleazar. Asan pawʉl Itamar. 2 Samata, ¡asew israelitas toꞌaxaelam we-athoeliajwaspi naxoe, kaes chiekal chimiapi, nakoewan Aarónliajwa kaes sitaeliajwas israelitas! 3 ¡Xam chaxpaeyaxaelam xabich matabijtpi xan tajaxtat, japi baeliajwa, athoeliajwabej, ponan Aarónliajwa! Ja-aech wʉt, puexa israelitas pajut chiekal matabijsaxaeli Araón nabistpon xanliajwa. 4 Ponan, we-athoeyaxaespoxan, ampoxanlape. Matxoelaxpijax we-athoeyaxaespox, japox pawʉl pectoral. Japoxlap, me-ama wʉchajilax dusliajwapox matiafxot. Wʉchakalpijax we-athoeyaxaespox, pawʉlpox efod. Japox, me-ama chaleco. Terceropijax we-athoeyaxaespox, pawʉlpox capa. Japox thʉch naxoelaliajwadik. Cuartopijax we-athoeyaxaespox pawʉlpox túnica. Japox, me-ama tʉaxajoelax. Pe japox chiekal pakchowaxael. Weweꞌpaxaespon tʉakwasitade. Quintopijax we-athoeyaxaespox, pawʉl turbante. Japox matlʉaꞌsliajwa. Sextopijax we-athoeyaxaespox, pawʉl cinturón. Japox fatkakʉsliajwa. Japi japoxan we-athoeyaxaes nakoewan Aarón naxoeliajwa, paxi sʉapich, japi nabichaxael xot sacerdotesbichax xanliajwa. 5 Japi ponan we-isaxaespi, ¡athoeyaxaes linomʉatat, cuatro colortat chiekal jʉchmʉatat. Japabʉꞌan chiekal baelsbʉꞌanaxael! Kaemʉat, ¡oromʉataxael! Asamʉat, ¡moradomʉataxael! Asamʉat, ¡púrpuramʉataxael! Asamʉat, ¡pasoeimʉataxael!

6 “Japalinobʉꞌan chapaeyaxaelam aelbaeyax chiekal kijuspon, chiekal kilachaemilponbej, athow wʉt efod. 7 Efod kolebʉꞌjexael wʉajnalel, matwʉajlelbej. Japox efod kolebʉꞌjexaelpox, matathowspox takaxot. 8 Cinturónmʉat fʉlaeyaxaechpox efodmatwʉajade, chiekal xaseꞌnaliajwa efod sʉapich. Cinturónmʉat efod sʉapichaxaelpox, chiekal kaemʉataliajwapox. Japoxbej pejcoloraxaelpox pejhilomʉajʉchmʉa sʉapich.

9 “Do jawʉx, japoxan isaxael wʉti, koletje iaꞌt fisaxaeli, pawʉli cornalina. Japixot, kaen aton japa-iaꞌ markaxael, japon aton chiekal kilachaemilpon, japi iaꞌmatwʉajtat Israel paxi pejwʉlan lelaxaelon. 10 Kaet iaꞌxot seis Israel paxi pejwʉlan lelaxaelon. Ma-ison jachiyaxael asat iaꞌtxot. Seis Israel paxi pejwʉlan lelaxaelon. Japon aton tʉadut wʉt Israel paxi pejwʉlan lelaxan, chiekal tʉadusaxaelon matxoelanalaeltponxot pejwʉl lelax, hasta xapasaxaelon wʉllelaxan taxdukapijin nalaeltpon pejwʉlxot. 11 Israel paxi pejwʉlan lelaxaelpon, japonlap xabich nabisaxael iaꞌ ommaeya nabichliajwa. Japon aton, me-ama argollanxot lel wʉt sello isliajwa, jachiyaxaelon, Israel paxi pejwʉlan lel wʉt. Do jawʉx, koletje iaꞌt dusaxaelon kaenanʉla oromonturaxot. 12 Do jawʉx, kaet oromontura, pej-iaꞌt sʉapich, dusaxaelon kaetaka-efodxot. Asa-oromontura, pej-iaꞌt sʉapich, asatakaxot dusaxaelon. Jasoxtat Aarón pejkoletakaxot Israel paxi pejwʉlan Aarón pejtakaxotaxael, xan, Diosnan, nejkiowa-elaliajwan tajjiw, israelitas. 13 Japon aton koleyax oromontura isaxael cadenamʉaliajwa, efodtakaxot dusliajwa. Kaetakaxot dusliajwa kaemontura. Asatakalel dusaxaelon asamonturaxot. 14 Do jawʉx, kole-oromʉat faꞌtaspi, isaxaelon orokolatat, duiliajwa japox kolemonturaxotaxaeliajwa.

15 “Athoeyaxaelpi pectoral, puexa sacerdotestatoꞌlan matiafxot dusliajwa, japoxtat chiekal matabijsliajwa israelitas sacerdotestatoꞌlan isaxaelpox Diosliajwa. Koewtat baeyaxaelon efod, pectoral sʉapich, japonlap chiekal kilachaemilaxael. ¡Japox pectoral athoeyaxael wʉt linobʉꞌan, chiekal cuatro coloraxaelpox jʉchmʉayaxael, baelsbʉꞌan. Kaemʉat, ¡oromʉataxael! Asamʉat, ¡moradmʉataxael! Asamʉat, ¡púrpuramʉataxael! Asamʉat, ¡pasoeimʉataxael! 16 ¡Japox chiekal athoeyaxaelpi dobletat! ¡Isaxaelbejpi cuadradotat! ¡Kaelel xajʉsaxaelpi veintidós centímetro! Puexa palelan, ¡jasox jachiyaxaekpi! 17 Pectoralxot iaꞌ duw wʉt, ¡xatdeladuyaxaeli, xabich pachaempitat, japi xabich ommaenkpi! ¡Puexa chiekal nakolsaxaelpox cuatro xatdeladuiyaxan! Matxoelahileraxot, ¡dusaxaeli iaꞌt, pawʉlpot rubí! ¡Asat iaꞌt dusaxaeli, pawʉlpot crisólito! ¡Asat iaꞌt dusaxaeli, pawʉlpot esmeralda!

18 Segundahileraxot, ¡dusaxaeli iaꞌt, pawʉlpot granate! ¡Asat iaꞌt dusaxaeli, pawʉlpot zafiro! ¡Asat iaꞌt dusaxaeli, pawʉlpot jade! 19 Tercerahileraxot, ¡dusaxaeli iaꞌt, pawʉlpot jacinto! ¡Asat iaꞌt dusaxaeli, pawʉlpot ágata! ¡Asat iaꞌt dusaxaeli, pawʉlpot amatista! 20 Cuartahileraxot, ¡dusaxaeli iaꞌt, pawʉlpot topacio! ¡Asat iaꞌt dusaxaeli, pawʉlpot cornalina! Asat iaꞌt dusaxaeli, pawʉlpot jaspe! ¡Puexa japi iaꞌ, kaenanʉla duiyaxaeli oromonturaxot, pectoralxotbej! 21 ¡Puexa chiekal nakolsaxael doce iaꞌ, me-ama Israel paxi docepi! Jachiyaxaellap-is kaenanʉla japi iaꞌxot. Me-ama argollanxot lel wʉt sello isliajwa, ¡jakichiyaxaelon, docemʉtan israelitas pejwʉlan lel wʉt!

22 “¡Pectoralliajwa isax chaxpaeyaxaelam kole-orokolat cadenamʉaliajwa! ¡Me-ama cordónmʉa jʉchpi wʉt, jaki-chiyaxaelon! 23 ¡Isaxaelambej orotat kole-argolla! ¡Japi oro-argollanxot duiyaxaelam pectoral pej-izquinanxot, athʉlel! 24 ¡Do jawʉt, kolemʉat, orocadenamʉat, xajoelaxaelam oro-argollanwʉaj poxade, pectoral pejmatdukaxanxot athʉlel, dusliajwa oromʉatmatdukaxxot! 25 Malap-is jakichiyaxael asamʉat, orocadenamʉatxot, duiliajwa oromʉa. Do jawʉx, ¡kole-orocadenamʉatmatdukaxxot, xawaesaxaelon, duilaliajwa monturaxot, takanxot duilaliajwa, efodkafʉltanxot! 26 ¡Orotat isaxaelon koleyax argolla pectoralxot dusliajwa kae-oro-argolla kaelelaxael. Asa-oro-argolla dusaxaelon asalel, efodxot, mox paleltat dusaxaelon! 27 ¡Kaes pejme kole-oro-argolla isaxaelon kafʉltxot duiliajwa, kaesʉapich athʉliajwapox, mox efodxot thʉch naxoelaxaekpox makamatdukafʉlxot athowspox. Jaxot japi oro-argollan duiyaxaelon thʉch naxoelaxaelpox! 28 Do jawʉx, ¡moradomʉatat keꞌaxaelon pectoral pej-argollaxot epod pej-argollaxotbej, chiekal kaeyaxtat duilaliajwa, pectoral kaes athʉ namanaliajwa pafatxot! 29 Samata, Aarón low wʉt tajcarpabaxot, xan taenx wʉt pectoral japon pejmatiaftxot, jawʉt taeyaxaelen Israel paxi pejwʉlan lelspoxan pectoralxot, pomatkoicha nejchaxoelaliajwan japiliajwa. 30 ¡Japox pectoralxot, Aarón jeyaxael koletje iaꞌt, pawʉli Urim, Turím sʉapich. Japotanxotlap Aarón xapaeja wʉt, chiekal matabijsaxaelon israelitas isaxaelpoxan xanliajwa! Samata, Aarón low wʉt xan tajwʉajnalel, japon pejmattiajftxot, jaxotaxael japi koletje iaꞌt.

31 “¡Chaxpaeyaxaelambej isliajwa capa moradabʉꞌ, Aarón thʉch naxoelaliajwapox! 32 ¡Japox, capa, kaewʉaj dusaxaelam patuxot Aarón naxoelaliajwadik! ¡Japawʉajdusax chaxpaeyam wʉt dos veces makatruksax chaxpaeyaxaelam athoeliajwa! Me-ama chalecobʉꞌ athows wʉt, ¡jakichiliajwapox thialfala-elaliajwa japoxwʉajxot! 33 Japox capa makamatdukafʉlxot duiyaxaelon, ¡ael-isampi, me-ama granadabaech, linohilomʉatat, moradamʉatat, púrpuramʉatatbej, pasoeimʉatatbej! ¡Cha-aex campanx isax chapaeyaxaelambej orotat duiflaliajwam capa makaxot! ¡Jasoxtat japox capa makxajʉsxaelam, duw wʉt campanx! 34 Pe cha-aelcampanx, orotat isaspot, ¡dusaxaelon capa makaxot! Do jawʉt, ¡kaet granadabaest, ael-isaampot, dusaxael capa makaxot! Do jawʉxbej, ¡dusaxael cha-ael-orocampanx! Do jawʉxbej, ¡ael-isaxaelam asagranadabaest! ¡Jasoxtat makxajʉsaxaelam, japoxan duw wʉt capa makaxot! 35 Aarón nabist wʉt sacerdotebichax, japon naxoelaxael capa. Samata, Aarón low wʉt Lugar Santísimoxot tajcarpabaxot xan tajwʉajnalelliajwa, nakolt wʉtbejpon jaxot, cha-aelcampanax nejmesaxael. Ja-aech wʉt, Aarón tʉpaxil, tajbichax nabist wʉt jaxot.

36 “¡Chaxpaeyaxaelambej isliajwa orokolatat placa! ¡Japox placaxot lelxaeli, me-ama argollanxot lel wʉt sello isliajwa, jakichiyaxaelipox! ¡Lelspox jʉmchiyaxael ampox: ‘Ampon aton, nabistpon Dioskolanliajwa’ —chiyaxael lelspox placaxot! 37 ¡Japox placa dusaxaeli turbantexot, maktlelse! ¡Japox placa kakʉsaxaeli cordónmʉat, moradamʉatat, jaxot chiekal dukaliajwa! 38 Pomatkoicha Aarón pejmakxot jachiyaxael, matlʉaꞌt wʉt turbante. Matlʉaꞌt wʉton turbante, japoxlap itpaeliajwa Aarón kaen xalaejapox israelitas pejbabijaxan ispoxan, israelitas is wʉt ofrenda xanliajwa. Placa pijaxtat, xanlap nejchachaemlaxaelen, japi xalaen wʉt ofrendan xanliajwa.

39 “Capa, turbante sʉapich, is wʉti, ¡chiekal baeyaxaeli linomʉatat, jʉchmʉatat! ¡Cinturónmʉatbej chiekal kilachaemlaxaeli, bael wʉt! 40 ¡Isaxaelbejpi kaes chiekal chimiapi, capas, cinturónmʉa, turbante sʉapich, Aarón paxiliajwa, kaes sitaeliajwas israelitas!

41 “Jachiyaxael nakoewan Aarón pejnaxoe. Malap-is jachiyaxael Aarón paxi pejnaxoe. Jasoxtat naxoeyaxaelpi naxoe. Ja-aech wʉt, Aarón olivosimin matnaechafalaxaelam, paxi sʉapich, japi tajsacerdotesliajwa. 42 Kijuspi athoeyaxan, ¡japi jiwlap athoexael tʉaxajoe linobʉꞌantat! ¡Japoxan, tʉaxajoe, weꞌpaxaesi bematwʉajade! 43 Japi tʉaxajoe, tʉaxajoeyaxael Aarón, paxi sʉapich, naxoeyaxaeli leliajwa wʉt tajcarpabaxot nabichliajwa sacerdotebichaxan, o, altarxot moxaxael wʉti, isasamata pachaema-elpox. Jachi-el wʉt, japi tʉpaxael. Japoxlap xan tajtatoꞌlax pomatkoichaliajwa japon Aarónliajwa, japon paxiliajwabej, asamatkoi japon pamojiwliajwabej —aech Dios Moisésxot.