Aarón, paxi sʉapich, wʉlduwspox Dios pejsacerdotesliajwa
29
Dios pejme jʉm-aech ampox Moisésxot: “Ampoxlap xamal isaxaelam wʉlduiliajwam wʉt Aarón, Aarón paxibej, japi tajsacerdotesliajwa, xan kaenanliajwa natanbichliajwapi. ¡Toꞌaxaelam bʉflaeliajwapi pakxʉlan, kolenje carnero, chiekal pachaempikal, nawexalaeman wʉt tajcarpaba poxadin! 2 Jawʉtbej, ¡isaxaeli panes, torta sʉapich, trigobelin, kaes chiekal pachaembelintat! Japoxan is wʉti, ¡tanialaxili levadura! Pansapan isam wʉtbej, ¡tanialaxaeli cha-aelaxach olivosimint, hornotat bowaliajwa wʉt! Jawʉtbej, ¡isaxaeli hojuelas levadurajila! ¡Japoxan matxoela matsasalsaxaeli olivosimin, hornotat bowaliajwa wʉt! 3 Japoxan kitoeti wʉt, ¡owam wʉt canastilloxot nawechaxlaeyaxaenpi tajcarpaba poxadin! Do jawʉtbej, pakxʉlan bʉflaem wʉti, ¡bʉflaeyaxaeli kolenje carnero! 4 Do jawʉx, ¡xamlap najut bʉflaeyaxaelam Aarón, japon paxibej, tajcarpaba leyax poxadin, jaxot nuilaliajwa! Do jawʉtbej, ¡xamlap najut matwaeyaxaelam japi mintat! 5 Do jawʉx, ¡Aarón xajoelaxaelam sacerdote pijax, túnica, tʉaxajoelax! Jawʉtbej, ¡xajoelaxaelam sacerdote pijax, capa! ¡Do jawʉtbej, xajoelaxaelampon efod! ¡Wʉchadusaxaelambej pectoral! ¡Do jawʉt, chiekal fatxaseꞌnaxaelambej cinturónmʉat, efodpijax! 6 Do jawʉtbej, ¡matlʉaꞌsaxaelam turbante! ¡Turbantexotlap dusaxaelam placa, jʉm-aechpox ampox: ‘Ampon aton, nabistpon Dioskolanliajwa’ —aechpox! 7 Do jawʉx, ¡Aarón olivosimint matnaechafanaxaelam wʉlduiliajwam tajsacerdote! 8 Do jawʉt, ¡Aarón paxibej moxaxael tajcarpaba leyaxxotdin! ¡Japibej xajoeyaxaelam sacerdote pijaxan, túnicas! 9 Do jawʉt, ¡Aarón fatxaseꞌnaxaelam cinturónmʉat! Do jawʉtbej, jachiyaxaelam Aarón paxiliajwa. ¡Japibej matlʉaꞌaxaelam turbantes! Ja-am wʉt, japi xajʉpaxael tatoꞌlaliajwa israelitas, japi tajsacerdotes xot. Japi pejwʉlela japi paxi, pamojiwbej, japilap tajsacerdotesaxael pomatkoicha.10 “Do jawʉx, xajoeyax kitoetam wʉt, ¡nawebʉflaeyaxaeman pakxʉlan hasta tajcarpaba laleyaxxotdin, Aarón, paxi sʉapich, ki-owaliajwa pakxʉlan pejmatnaetxot! 11 Do jaxot, tajcarpaba laleyaxxot, ¡xʉaꞌlaxaelam pakxʉlan! 12 ¡Kothixathosaxaelam pakxʉlanjaltadik joelaliajwam altarmat-e! Altartokaxot chafanaxaelam pakxʉlanjal, namanpot. 13 Do jawʉt, pakxʉlanwoej-ʉlsi, japsi, kam-ʉthsi sʉapich, sitʉsaxaelam. Puexa japasi altarmatwʉajtat bowaxaelam. 14 Pe pakxʉlanwi, pabʉꞌtbej, pataesan sʉapich, atʉaj bowaxaelam tajcarpabaxot. Japoxan bowam wʉt, xan beltaeyaxaelen puexa sacerdotes babijaxan ispoxan.
15 “Do jawʉx, kolenje carneroxot, kaen bʉflaeyaxaelam hasta tajcarpaba laleyaxxotdin. Do jawʉt, Aarón, paxi sʉapich, ki-owaxael carnero pejmatnaetxot. 16 Jawʉx carnero xʉaꞌlaxaelam. Jawʉt, carnerojaltat altarmatwʉajsasalsaxaelam. Jalsasalsax xamasajiasaxaelam altarlelan. 17 Do jawʉt, tham wʉt carnero, pawoejan chiekal kiasaxaelam, patʉakan sʉapich. Jawʉtbej, kaeyaxtat owaxaelam thamwi, matnaet sʉapich. 18 Do jawʉt, puexa japoxan owaxaelam altarmatwʉajtat bowaliajwam taj-ofrendaliajwa, itpaeliajwam nasitaenampox. Do jawʉt, xan jaenxataenx wʉt, xabich nejchachaemlaxaelen.
19 “Do jawʉxbej, asan carnero bʉflaeyaxaeman hasta tajcarpaba laleyax poxadin, Aarón pejme, paxi sʉapich, ki-owaliajwa carneromatnaetxot. 20 Do jawʉt, xʉaꞌlaxaelam japon carnero. Do jawʉtbej, nakoewan Aarón pejpoklanaechoꞌta-ulel, joelaxaelam carnerojal. Aarón pejpoklakisaxa joelaxaelambej. Joelaxaelambej Aarón pejpoklalel pejtʉaksaxapija. Do jawʉxbej, Aarón paxi puexa jakichiyaxaelam. Do jawʉx, carnerojal, namanpot, japotat altarmatwʉajsasalsaxaelam. Japox kitoetam wʉt, jawʉt altarlelan xamasajiasaxaelam sasaltampox. 21 Carnerojal, namanpot altarmatwʉajtat, japot jalt tanialaxaelam, olivosimin sʉapich. Do jawʉxbej, japot jalt matsasalsaxaelam Aarón, japon pejnaxoelaxbej, sacerdote pijaxpox. ¡Malap-is jachiyaxaelam Aarón paxiliajwa! Xam japox isam wʉt, japi nabichaxael sacerdotes pejbichax xanliajwa. Ja-aech wʉtbej, japi pejnaxoebej naxoeyaxael, nabist wʉt xanliajwa.
22 “Carnero pejtojlisit tʉsaxaelam, woej-ʉlsibej, pajapsitbej, kolekam-ʉthsitbej, poklalel pejtawibʉxfalsitbej. Xamlap-is japox isaxaelam carnerosi tʉtam wʉt, xam makafitam xot Aarón, paxi sʉapich, japi sacerdotesliajwa xan tajbichax nabichliajwa. 23 Canastatat pan cha-echpi, levadurajila, tajcarpaba laleyaxxot, japi panxot, ¡kaepanax, jajaerax, fisaxaelam! ¡Fisaxaelambej kaetorta, kitanialaspox olivosimin isliajwas wʉt! Fisaxaelambej kaehojuela. Japox, me-ama galleta. 24 Do jawʉt, puexa japoxan Aarón chaxdusaxaelam, japon paxibej. Do jawʉtbej, japi athʉ xachosaxoeyi xan na-itpaeliajwa taj-ofrendapox. 25 Do jawʉx, toet wʉti xachoeyax athʉlelse, ¡japoxan japi pejke-echanxot nosaxaelam! Do jawʉx, japoxan bowaxaelam altarxot, carnerowi sʉapich, taj-ofrendaliajwa, itpaeliajwam xan nasitaenampox. Do jawʉt, xan jaenxataenx wʉt, nejchachaemlaxaelen.
26 “Xam fisaxaelam carneromatiafwit xaeliajwam. Pe majt japawit athʉ xachosaxoemch xan na-itpaeliajwam japawi, xanliajwapox. Do jawʉx, xaeyaxaelam. 27 Carneromatiafwit pejlel diajnaxaelam japoxlap, taj-ofrenda. Kawʉajnam wʉt xan tajwʉajnalel, tawibʉxfalwitbej pejlel diajnaxaelam, taj-ofrenda xot. Puexa japoxan carnerowixot masaxaelam Aarónliajwa, japon paxiliajwabej. 28 Japawi, ma, amwʉtjelliajwa, asamatkoiyanliajwabej, Aarónliajwa, japon paxiliajwabej, japon pamojiwliajwabej. Ampox tatoꞌlax toepaxil, israelitas chiekal naexasit wʉt. Israelitas isaxael japa-ofrenda xanliajwa, xan sʉapich, chiekal pachaemaliajwa.
29-30 “Aarón sacerdote xot, asamatkoi, japon pejkawʉtat, japon pamojiw, jachiyaxaellap-is. Japibej tatoꞌlaxael, sacerdotes xoti. Samata, asamatkoi, Aarón tʉp wʉt, kaen japon paxixot, namanaxael puexa sacerdote tatoꞌlanliajwapon. Japonlap naxoelaxael puexa sacerdotestatoꞌlan pijax, nabichaxael wʉt tajcarpabaxot. Japox naxoel wʉt, jolsaxilon siete matkoiyan.
31 “Do jawʉx, carneromatiafwit, tawibʉxfalwitbej, fisaxaelam otamxot. Do jawʉt, japawi chat-eyaxaelam tajcarpabafʉlmakxot. 32 Do jawʉx, Aarón, japon paxi sʉapich, japawi xaeyaxael, pan sʉapich, canastaxot tajcarpaba laleyaxxot cha-echpan. 33 Xam japi wʉlduwam wʉt tajsacerdoteliajwa, japawi xaeyaxaeli, carnero xʉaꞌlas xot xan beltaeliajwan Aarón, japon paxibej, babijaxan ispoxan. Samata, japi tajsacerdote xot, tatoꞌlaxaeli puexa israelitas. Pelax, nejmach-aton xaeyaxil japawi, panbej, japoxan xanliajwa xot. 34 Pawi, panbej, nama wʉt, kandiawa wʉt, japoxan nejmach-aton xaeyaxil. Japoxan chiekal bowax toejafaxaelam, japoxan xan taj-ofrenda xot.
35 “Aarón, paxi sʉapich, xam wʉlduiliajwam wʉt japi tajsacerdoteliajwa, me-ama xan jʉm-an, xam toꞌax wʉt, japoxlap isaxaelam siete patkoiyan. 36 Siete matkoiyan wʉt, kaematkoisfʉl, nawebʉflaeyaxaeman tajcarpaba poxadin pakxʉlan xʉaꞌlaliajwam, nakoewan Aarón, japon paxibej, pejbabijaxan ispoxan, xan beltaeliajwan, altarbej chiekal nawepachaemaliajwa xanliajwa bowaliajwam choef. Do jawʉtbej, kaesʉapich olivosimin chafanaxaelam altarmatwʉaj, japox altar taj-altar xot. 37 Kaematkoisfʉl, siete matkoiyan wʉt, ¡choefan bʉflaeyaxaeman altar poxdin xʉaꞌlaliajwam! Ja-aech wʉt, taj-altar, xabich nawepachaemaxael. Sacerdote xabich nejmach owa wʉti altarxot, japoxanbej nawepachaemaxael xanliajwa.
Kaematkoisfʉl ofrenda xalalaeyaxaenpox, Dios pejcarpaba poxadin
38 “Chinax kaematkoi weꞌpaxil xamal choef xʉaꞌasaxaelampox taj-ofrendaliajwa taj-altarxot. Samata, pomatkoicha bʉflaeyaxaemen kolenje cordero, kaewaechanpi. 39 Kolenje corderoxot, kaen xʉaꞌlaxaelam kandiawasap. Asan xʉaꞌlaxaelam kaliax. 40-41 Kandiawasap, kaliax wʉtbej, cordero xʉaꞌlam wʉt xan taj-ofrendaliajwa, jawʉtbej xalaeyaxaelam dos kilos trigobelin, kaes chiekal pachaembelin, tanialassap kaelitrotat, olivosimin. Do jawʉtbej, matfalaxaelam kaelitropijt vino taj-ofrendaliajwa. Cordero botam wʉt, puexa japoxanbej bowaxaelam. Xan japa-itnum jaenxataenx wʉt, nejchachaemlaxaelen. 42 Japoxanofrenda kaematkoisfʉl bowaxaelam, na-itpaeliajwam nasitaenampox. Ja-am wʉt, xamal itpaeyaxaelam naxi, namojiwbej, japibej asamatkoi japoxan isliajwa tajwʉajnalel, tajcarpabaxot wʉti. Japacarpabaxot, xam sʉapich, nospaeyaxaelen. 43 Xan tajcarpabaxotan wʉt, jaxotaxaelen, puexa israelitas sʉapich. Japacarpaba xankalliajwa, xan jaxotaxaelen xot. 44 Japacarpabalap tajba. Altarlap-is taj-altar. Aarónlap, paxi sʉapich, tajsacerdote. 45 Xan, pomatkoicha israelitasxotaxaelen. Japi pejDiosnaxaelenbej. 46 Ja-an wʉt, japi pajut chiekal matabijsaxael xanlap japi pejDiosnan, jukxponan, Egipto tʉajnʉxot duil wʉti, Egipto tʉajnʉpijiw pejtʉajnʉxot. Xanlap nejDioskolnan, nejpaklonanbej —aech Dios Moisésxot.