—¡Isde diosan xatisliajwa, japi nakbʉflaeliajwa xatis nakchawʉajnamatxoelaliajwa, xatis matabijs-esal xot ja-aechpox Moisésliajwa, nakjukpon Egipto tʉajnʉxotas wʉt! —aech israelitas Aarónxot.

2 Do jawʉt, Aarón jʉmnot wʉt, jʉm-aechon ampoxpuexa israelitasliajwa:

—Nejwathoꞌjiw pejnaechoꞌxajoe, naxipoejiw pejnaechoꞌxajoebej, naxiwathoꞌ pejnaechoꞌxajoebej orotat isaspi, puexa japoxan xalaemen xanlel —aech Aarón puexa israelitasliajwa.

3-4 Do jawʉt, puexa israelitas jollisi naechoꞌxajoe, orotat isaspi, xalaeliajwa Aarón poxadin. Do jawʉt, Aarón japi kinotlison israelitas xalaeni, isaspi orotat. Jawʉt, japi oro jofpon. Do jawʉx, cinceltat bijiat matabefʉl chiekal tasiapkalaliajwa. Jasoxtat Aarón ael-ispon pakxʉlan. Aarón chiekal kitoet wʉt ael-ispox pakxʉlan, jawʉt jʉm-aechon ampox puexa israelitasliajwa:

—¡Xamal israelitas, ampoxlap wajdios, xatis nakjukpox, Egipto tʉajnʉxotas wʉt! —aech Aarón puexa israelitasliajwa.

5 Aarón taen wʉt israelitas ja-aechpoxliajwa japi taen wʉt pakxʉlan, ael-isaspox, jawʉt altar ison pakxʉlan ael-ispox wʉajnalel. Do jawʉt, Aarón pinjametat nejlaꞌcha wʉt, jʉm-aechon ampox puexa israelitasliajwa:

—¡Kandiawa, isaxaes fiesta wajpaklonliajwa itpaeliawas wajsitaeyax! —aech Aarón puexa israelitasliajwa.

6 Do kandiawasap wʉt, nanapi choef xʉaꞌasliajwa, bowaliajwabej altarmatwʉajtat. Asew choef xʉaꞌatbejpi ofrendaliajwa, japox dios sʉapich, chiekal pachaemaliajwa israelita. Do japox isax kitoet wʉt, puexa israelitas chalak xaeliajwa, feliajwabej. Do jawʉx, israelitas asaxan babijaxan ispi wathoꞌ sʉapich. 7 Samata, jawʉt, Dios jʉm-aech ampox Moisésxot:

—¡Xabʉaꞌdik! ¡Balaemk! Nejjiw, jukampi Egipto tʉajnʉxot, japi babijaxan is xot, kofaxotlisi xan nanaexasitpox. 8 Kaesʉapich matkoiyan wʉt, nejjiw nadija xanxot. Kaes nanaexasis-elbejpi tajtatoꞌlaxan. Oro jof wʉt, ael-ispi, pakxʉlan. Ma amwʉt, japi israelitas pakxʉlan ael-isaspox kawʉajan. Ofrendabej xalaeni japoxliajwa. Ofrenda xalaen wʉt, jʉma-aechbejpi ampox japoxliajwa: ‘Israelitas, ¡ampoxlap wajdios, xatis nakjukpox, Egipto tʉajnʉxotas wʉt!’ —aechi japoxliajwa —aech Dios Moisésxot.

9 Dios pejme jʉm-aechbej ampox Moisésxot:

—Xan tajut chiekal taenx. Tajut chiekal taenxbej japilap xabich nejliakliw. 10 Ma amwʉt, ¡xan chiekal tamachasian, xan xabich talala xot japi israelitaliajwa! ¡Japi israelitas chiekal toesaxaelen! Pe xam kajachawaesaxaelen asamatkoi xabichaliajwa namojiw —aech Dios Moisésxot.

11 Do jawʉt, Moisés nakiowa jʉm-aech ampox Dios ʉlboejthʉlaliajwa. Jʉm-aechon ampox Diosxot:

—Tajpaklon Dios, ¿ma-aech xotkat xam, xabich nalala nejjiwliajwa, jukampi nejpamamaxtat Egipto tʉajnʉxot? 12 Xam toetam wʉt israelitas, Egipto tʉajnʉpijiw jʉmch jʉmchiyaxael ampox xamliajwa: ‘Dios juk israelitas wajtʉajnʉxot jʉmch chiekal toesliajwa mʉaxanxot’ —chiyaxael Egipto tʉajnʉpijiw naksiya wʉtixamliajwa. ¡Ulboejthʉlde xabich nalalapox israelitasliajwa! Nejjiw toesax nejchaxoelampox, ¡japox ma amwʉt, kaes xabich nejchaxoelaximil! 13 ¡Nejchaxoelde namakan Abraham, Isaacbej, Israelbej! Xam najut chiekal jʉmdutam japi kajachawaesliajwam, japi pamojiw xabich pin-iakolaliajwa, me-ama ithaej. Xambej jʉmdutam puexa ampatʉajnʉ chaxdusliajwam japi pamojiw pomatkoicha japi pejtʉajnʉliajwa, japatʉajnʉ xanmanaliajwapi —aech Moisés naksiya wʉton Diosxot israelitasliajwa.

14 Do jawʉt, Dios kaes nejchaxoela-el chiekal toesaliajwapon israelitas, Moisés naksiyaxot Diosxot. 15 Do jawʉtbej, Moisés natfoꞌcha wʉt, balaeklison pinamʉaxxotsik. Xafolon pejke-etat kole-iaꞌfachan. Japa-iaꞌfachan nataelalels Dios pejtatoꞌlaxan israelitas naexasisliajwa. 16 Dios pajut is japa-iaꞌfachan. Pajut lelbejpon pejtatoꞌlaxan japa-iaꞌfachanxot.

17 Baloek wʉti, Josué jʉmtaen israelitas xabich atʉaj jʉm-ok wʉt. Jawʉt, Josué jʉm-aech ampox Moisésxot:

—Xan jʉmtaenx, israelitas nabapox xatis bijasxot —aech Josué Moisésxot.

18 Pe Moisés jʉmnot wʉt, jʉm-aechon ampox Josuéliajwa:

—Xam jʉmtaenampox, nabeyax kana wʉt, najibalapoxa-el. Nabeyax malechas wʉt, nowpoxa-elbej. Xan jʉmtaenxpoxan, japoxan chiekal asaxan —aech Moisés Josuéliajwa.

19 Moisés mox fol wʉtlejen israelitas bijaxot, taenlison orotat ael-isaspox, pakxʉlan. Taenbejpon israelitas nababoelapoxan. Japoxan Moisés taen wʉt, xabich palalapon. Samata, kole-iaꞌfachan xadapon mʉaxleltat. Jawʉt, iaꞌfachan xatʉksabapon. 20 Do jawʉtbej, Moisés foꞌak orotat ael-isaspox, pakxʉlan, jitadik. Jawʉx, japox thʉl wʉt, Moisés xatatopal, xatkiana wʉt. Xatkianax kitoet wʉt, jawʉt, orobelin thondikon minadik. Do jawʉt, Moisés kaechatoꞌa israelitas oromint feliajwa israelitas bijaxot. 21 Do jawʉt, Moisés jʉm-aech pakoewan Aarónxot:

—Achaxkat ampi jiw is xamliajwa, xam ampi jiw bʉꞌisliajwam ampox babijax, xabich pinjikolaxpox Diosliajwa —aech Moisés wʉajnachaemt wʉton pakowan Aarón.

22 Aarón jʉmnot wʉt, jʉm-aechon ampoxpakoewan Moisésxot:

—Tajpaklon, ¡nabej nalaleꞌ xanliajwa! “Xam najut chiekal matbijtam ampi jiw nejxasink babijaxan isliajwa. 23 Ampi jiw xan najʉm-aech ampox: ‘¡Isde xatis wajdios, xatis nakbʉflaeliajwa fols wʉt, xatis matabijs-esal xot ja-aechpox Moisésliajwa, nakjukpon Egipto tʉajnʉxot!’ —aech ampi jiw xanliajwa —aech Aarón pakoewan Moisésxot. 24 Xan japi jʉmnotx wʉt, jʉm-an ampox: ‘Xamalxot isaspi wʉt orotat, xalaeman xanlel’ —an xan puexa israelitasliajwa. Do jawʉt, israelitas xalaeni isaspi orotat. Jawʉt, xan jʉmch jofx wʉt jitat, ¡pakxʉlax nakoltpox!” —aech Aarón pakoewan Moisésxot.

25 Moisés natachaemt wʉt, taenpon puexa israelitas isasiapoxan, is wʉt. Moisés matabijt israelitas padaelmajiw jʉmchiyaxaespox babejjamechan. Do jawʉtbej, Moisés matabijt Aarón xajʉpa-elpox fiasliajwa israelitas isasiapoxan is-elaliajwa. 26 Do ja-aech wʉt, Moisés nuk puexa israelitas bijaxot, lalaeyaxxot. Jawʉtbej, Moisés jʉm-aech ampox puexa israelitasliajwa:

—Xamal isasiampi Dios tatoꞌalpoxan, xanlel fʉlaeman natamejlaliajwam, xan sʉapich —aech Moisés puexa israelitasliajwa.

Do jawʉt, puexa levitas fʉlaeni natamejlaliajwa Moisésxot.

27 Do jawʉt, Moisés jʉm-aech ampox puexa levitasliajwa:

—Wajwʉajnapijin Israel, pej-Dios, japon jʉm-aech ampox: ‘¡Kaenanʉla xamal noꞌe espada! ¡Xabʉaꞌde pejme israelitas pejcarpabachan poxade! ¡Kaenanʉla israelitas pejcarpabachan lem puexa israelitaspoejiw, kawʉajanpi pakxʉlax, orotat ael-isaspox, japi puexa bem! Nakoewan wʉt, nejnachalan wʉtbej, mox dukpon wʉt xamalxot, ¡pe nakiowa, bempi, kawʉajan xoti pakxʉlax!’ —aech japox Dios —aech Moisés kitoꞌa wʉton puexa levitas.

28 Do jawʉt, puexa levitas ow-aechlisi Moisés kitoꞌaspox. Jawʉt, japamatkoitat israelitas boesapi, tres mil israelitaspoejiwkal. 29 Do jawʉt, Moisés jʉm-aech ampox japiliajwa:

—Ma amwʉt, xamal Dioskal tanbichaxaelam, asewam naxikola bam xot, asewam xamalxot ba xotbej pakoewkola. Samata, Dios ampamatkoitat itpaei xamal beltaenpox.

30 Do jawʉx, kandiawa wʉt, Moisés jʉm-aech ampox israelitasliajwa:

—Xamal xabich babijax isam Diosliajwa. Ma amwʉt, pinamʉax poxase julaxoeyan jaxotse naksiyaliajwan Diosxotse. Jʉmchiyaxaelenbejpon xamal beltaeliajwa babijax isampoxliajwa. Ow-aech wʉtondoꞌ, xan matbijs-enil —aech Moisés israelitasliajwa.

31 Do jawʉt, Moisés pejme julach Dios poxase. Jaxotse wʉt, Moisés naksiya Diosxot:

—Diachwʉajnakolax israelitas xabich babijax is, ael-is wʉti pakxʉlax orotat pej-diosliajwa. 32 Xan julanax xamxot naksiyaliajwan wʉljoeliajwanbej beltaeyax israelitasliajwa. Beltae-elasiam wʉt israelitas babijax ispox xamliajwa, ¡tajwʉlbej nawejoem nejfʉxot, xam lelamxotse! —aech Moisés naksiya wʉt Diosxotse.

33 Pe jawʉt, Dios jʉm-aech ampox Moisésxot:

—Babijaxan ispi xanliajwa, japikal pejwʉlan wejoeyaxaelen, tajpelfʉtxot. 34 ¡Puexa israelitas bʉflaem xan jʉm-an poxade! Taj-ángel xam taxchalaxael itpaeliajwa xam. Kastikamatkoi pat wʉt, xan tajut kastikaxaelen israelitas, babijaxan is xoti xanliajwa —aech Dios Moisésxot.

35 Dios toꞌa paxaechkolaxwaxae, israelitas waeliajwas, kawʉajan xoti orotat isaspox pakxʉlan, Aarón ispox israelitasliajwa.