—¡Xamal xabʉaꞌde! ¡Xam ampi jiw bʉflaem, jukampi Egipto tʉajnʉxot, bʉꞌpasliajwam asatʉajnʉxotde, xan chajia jʉmdutxtʉajnʉ chaxdusliajwan Abraham, Isaac, Jacob, japi pamojiwbej! 2 Xan toꞌaxaelen taj-ángel japon taxchalaliajwa xamal, folam wʉt. Samata, xan jukaxaelen cananeos, amorreos, hititas, ferezeos, heveos, jebuseosbej. Japi xan jukaxaelen pejtʉajnʉchanxot. 3 ¡Xabʉaꞌde japatʉajnʉchan poxade! Japatʉajnʉchanxot xabich naxaeyaxan maenk. Pe xan, xamal chalaxinil. Xamal tajut chalax wʉt, nʉamtat jʉmch chiekal toesaxaelen, xabich nejliakliwam xot —aech Dios Moisésxot.

4-5 Dios majt jʉm-aech ampox Moisésxot:

—¡Israelitas jʉm-amde xan jʉm-anpoxan japi xam jʉmchiliajwam: ‘Dios jʉm-aech ampox: “Xamalpil nejliakliwam. Xan tajut chiekal xamalxotx wʉt, ¡piachaxil xamal toesliajwan, kastikax wʉt! Nejew, iaꞌ xabich ommaenkpi, nejnaxoe xabich chamiapibej, ¡jolde! Xan tajut nejchaxoelaxaelen isaxaelenpox xamalliajwa” —aech Dios’, Moisés bʉxtoꞌa wʉton jʉmchiliajwapon israelitas.

Do jawʉx, puexa israelitas japox jʉmtaen wʉt, xabich nejxaejwasi. Do japoxwʉx, puexa israelitas chimianaxoepoxan kofalisi, iaꞌ, xabich ommaenkpibej, duspoxan.

6 Do jawʉx, israelitas chijia wʉt Sinaimʉaxxot, kaes naxoe-ellisi chimianaxoe, iaꞌ xabich ommaenkpi, duspi naxoe-ellisi.

7 Moisés pejkabʉan israelitas bijaxot wʉt, pejlel atʉaj ji-ispon carpaba tamachnospaeliajwa, Dios sʉapich. Japacarpaba Moisés wʉlduw ampawʉltat, “Carpaba, nafaenaliajwanpox, Dios sʉapich”. Nejmach-aton matabijsasia wʉt asax, japacarpaba poxade fʉlaechon wʉajnachaemsliajwa Dios. 8 Moisés fʉlalaecha wʉt japacarpaba poxade, puexa israelitas nana. Jawʉt, japi kaenanʉla pejcarpabachan laleyaxanxot nuili. Japi fʉlnatachaema Moisés, hasta Moisés lech wʉt japacarpaba poxade. 9 Moisés lalecha wʉt japacarpaba, jawʉt itloejenbej, mamochaxpox, athʉxotsik balaloeka dukaliajwa carpaba lalaeyaxxotsik, Dios nospaei wʉt, Moisés sʉapich. 10 Puexa israelitas taen wʉti itloejen, mamochaxpox, athʉxotsik balaloeka wʉtox carpaba laleyax poxasik, ja-aech wʉt, puexa israelitas kaenanʉla brixtat nuili pejcarpabachan laleyaxanxot itpaeliajwa pejsitaeyax pejDiosliajwa.

11 Dios nospaei wʉt, Moisés sʉapich, nospaeipon, me-ama aton nospaei wʉt, pejnachalan sʉapich, ja-aech Dios. Moisés bʉxtoet wʉt Dios sʉapich, nospaeipox, fʉlaechon israelitas bija poxade. Moisés pejkajachawaesan, pansian, pawʉlpon Josué, japonlap Nun paxʉlan, nakols-el japacarpabaxot.

12 Moisés jʉm-aech ampox Diosxot:

—Xam natoꞌam puexa israelitas pejpaklonaliajwa. Pe xam najʉmchi-emil, xan sʉapich, tatoꞌlaxaelpon. Xam najʉm-ambej ampox: ‘Xabich naxanaboejtampox. Xabich nejchachaemlaxbej xam isampoxanliajwa’ —am xam, xanxot. 13 Japox diachwʉajnakolax wʉt, ¡ma amwʉt, najʉm-amde isaxaelampox israelitasliajwa, xanbej chiekal xanaboejsliajwan xam, isliajwanbej, xamliajwa xabich pachaempox, xam xabich nejchachaemlaliajwam xanliajwa! ¡Xam chiekal nejchaxoelde nejjiw israelitasliajwa! —aech Moisés naksiya wʉton Diosxot.

14 Dios jʉmnot wʉt, jʉm-aechon ampox Moisésxot:

—Xan tajut xam chalaxaelen. Tapaeyaxaelenbej xam damlathʉlaliajwam —aech Dios Moisésxot.

15 Pe Moisés jʉmnot wʉt, jʉm-aechon ampox Diosxot:

—Xam najut nachala-elasiam wʉt xanal, ¡natoꞌaximil japamʉaxpoxade! 16 Xam nachala-emil wʉt, asew jiw matabijsaxael xam nejchachaemla-emilpox nejjiw israelitasliajwa, xanliajwabej. Pe xam nachalam wʉtlax, ja-aech wʉt, asew jiw pajut chiekal matabijsaxaeli, xanal nejjiwan xot tajkabʉananpox najʉpa-elpoxbej, puexa tʉajnʉchanpijiw sʉapich —aech Moisés naksiya wʉton Diosxot.

17 Do jawʉt, Dios jʉm-aech ampox Moisésxot:

—Xan isaxaelen nawʉljowampox. Samata, xan fʉlaeyaxaelen, xamal sʉapich, xam chiekal xanaboejtax xot, xan nejchachaemlax xotbej xamliajwa, isampoxanliajwabej —aech Dios Moisésxot.

18 Do jawʉtbej, Moisés jʉm-aech ampox Diosxot:

—¡Xan na-itpaem nej-itliakax, xabich chamoeyaxpox! —aech Moisés Diosxot.

19 Pe jawʉt, Dios pejme jʉmnot wʉt, jʉm-aechon ampox Moisésxot:

—Xan xensaxaelen xam nejwʉajnalel chiekal najut xan nataeliajwam, ma-an xan pachaemanpox. Nejwʉajnalelbej chiekal jʉmchiyaxaelen tajwʉl, tajwʉlpox Jehová. Xan beltaesianpon, japon aton beltaeyaxaelen. 20 Pe nakiowa, xam chiekal jʉmchiyaxaelen ampox. Xam najut nej-itfutat xan naxutaeyaximil. Chinax kaen aton pajut pej-itfutat xan nataeyaxil. Aton nataen wʉt, japon aton tʉpaxael —aech Dios Moisésxot.

21 Dios pejme jʉm-aech ampox Moisésxot:

—Ma amxot xanjʉp xam nukaliajwam xanxot. ¡Nukde ampot-iaꞌbotmatwʉajtat! 22 Do jawʉt, xan xensaxaelen wʉt xamxot taj-itliakaxtat, xam nosaxaelen iaꞌbot tawawaktxot. Jaxot nukam wʉt, xan tajke-etat matakasaxaelen, hasta xan xentax wʉt nataesamatam. 23 Do jawʉx, xan xentax wʉt xamxot, xan tajke-e piasaxaelen. Ja-an wʉt, xan tajmatwʉajkal taeyaxaelam. Pe najut tajxu taeyaximil —aech Dios Moisésxot.