—¡Xam najut kole-iaꞌfachan chikaxaelam! Me-ama xan matxoela isx wʉt, ¡jaki-amde, japa-iaꞌfachan xam najut chikam wʉt! Xan pejme japa-iafachanxot lelaxaelen tajtatoꞌlaxan. Me-ama matxoela lelx wʉt, jakichiyaxaelen. Xan matxoelalelxfachan, iaꞌfachan, xam xadapam wʉt, chiekal xatʉksabam. 2 Samata, ma amwʉt ¡thilde kandiawasap julaliajwam Sinaímʉax poxase! Pasaxoemch jaxotse tajwʉajnalel, kaes mʉax athʉpoxase. 3 Kandiawa, kaes asan aton, xam sʉapich, julaxil. Israelitas fʉlaeyaxil japamʉax poxadin. Choefbej mox laelpaxil japamʉaxxot puexa chiekal nej ijile jaxot. Ovejas, pak, mox japamʉaxxot pola matxaelpaxil —aech Dios Moisésxot.

4 Do jawʉt, Moisés kole-iaꞌfachan chikapon. Me-ama Dios matxoela is wʉt, jakawʉtat pejme ispon. Do kandiawasap wʉt, Moisés iaꞌfachan xafol xajulaliajwa Sinaímʉax poxase. Do jawʉx, Moisés is, me-ama Dios jʉm-aech. 5 Moisés mʉaxxotse wʉt, Dios fʉloek itloejentat Moisésxot pasliajwa japamʉaxxotsik. Jawʉtlap, Dios jʉm-aech pejwʉlkolax Moisésxot. 6 Dios mox xent wʉt Moisés wʉajnalel, pinjametat Dios jʉm-aech ampox:

—¡Xanlap Jehová, Diosnan! Xanlap xabich pachaeman. Xabich beltaenx, jiw babijaxan is wʉt. Xan xabich piach boejtaliatx. Kamta talala-el. Xan xabich pachaeman tajjiwliajwa. Israelitaslap-is xabich naxanaboejsaxael xan. 7 Xan kofsaxinil xabich pachaempox israelitasliajwa. Xan beltaeyaxaelen, japi is wʉt babijaxan. Xan beltaeyaxaelenbej japi nejwesla wʉt naexasisliajwa xan. Pelax, pejbʉꞌwʉajanpi, japi jiwlap, kastikaxaelen. Japi paxi, pamojiwbej, kastikaxaelen, paxjiw chajiakolaxtat babijaxan is xot. Japi paxibej, wʉchakal nalaelapi, jachiyaxaelen —aech Dios Moisésxot.

8-9 Moisés japox jʉmtaen wʉt Dios jʉm-aechpox, jawʉt brixtat nukon Dios wʉajnalel, sat makxabijnaliajwadik, itpaeliajwa sitaeyax Diosliajwa. Jawʉt, Moisés jʉm-aech ampox Diosxot:

—¡Tajpaklon Dios! ¡Tajpaklon Dios! Diachwʉajnakolax xam xabich nejchachaemlam wʉt xanliajwa, ¡xanal nachalam! Ampi jiw diachwʉajnakolax chiekal nejliakla. Pe nakiowa, ¡xanal puexa nabeltaem babijaxan isxpoxanliajwa! ¡Namakanoꞌe nejjiwanliajwa! —aech Moisés anksiya wʉt Diosxot.

10 Dios kaes jʉm-aech ampox Moisésxot:

“¡Ma amwʉt, chiekal najʉmtaem jʉmchiyaxaelenpox! Xan ma amwʉt, jʉmdutx isliajwan convenio puexa nejjiw israelitasliajwa. Isaxaelen xabich chamoeyaxan xamalxot. Japoxan is-enil asatʉajnʉchanpijiwxot. Puexa asew jiw xamalxotpi taeyaxael, japoxan xan isx wʉt. Ja-aech wʉt, japi pajut chiekal matbijsaxaeli, xanlap Diosnan, xajʉpxponan puexa nejmach isliajwan. Xan isxpoxan xabich pachaemaxael puexa israelitasliajwa” —aech Dios Moisésxot.

11 Dios kaes jʉm-aech ampox Moisésxot:

“Ma amwʉt puexa israelitas chiekal naexasisaxaeli xan tatoꞌlaxpoxan. Ja-aech wʉt, xanlap jukaxaelen amorreos, cananeos, hititas, ferezeos, heveos, jebuseosbej pejtʉanʉchanxot” —aech Dios Moisésxot.

12 Dios kaes jʉm-aech ampox Moisésxot:

“Israelitas pat wʉt japi pejtʉajnʉchanxot, isaxili convenio, japatʉajnʉpijiw sʉapich. Israelitas kaenejchaxoelaxan wʉt, japatʉajnʉchanpijiw sʉapich, ja-aech wʉt, israelitas nak-isaxaeli babijaxan, japi ispoxan. 13 Pelax, ¡chiekal toesaxaeli japi jiw pejew, ídolos, ídolos pej-altaranbej! ¡Toesaxaelbejpi kaes asaxan japi kawʉajanpoxan!” —aech Dios Moisésxot.

14 Dios kaes jʉm-aech ampox Moisésxot:

“¡Israelitas kawʉajnaxil asan dios! Xanlap chiekal kaenan, Diosnan, xabich nejweslapon jiw kawʉajanpi asan dios. Xan tajwʉl ‘Dios xabich nejweslapon’” —aech Dios Moisésxot.

15 Dios kaes jʉm-aech ampox Moisésxot:

“Israelitas isaxil convenio, japatʉajnʉpijiw sʉapich. Ja-aech wʉt, israelitas tadʉsaxaes nakkawʉajnaliajwa japi pejdiosan, nakxaeliajwabejpi choefwi, choef xʉaꞌataspi ofrendaliajwa pejdiosanliajwa. Do jawʉt, israelitas nakxaeyaxaeli japawi, japi jiw sʉapich. 16 Ja-aech wʉtbej, japi paxipoejiw, japi paxi wathoꞌ sʉapich, nakjiyaxael. Ma-is naxipoejiw nakjiyaxael, japi paxiwathoꞌ sʉapich. Ja-aech wʉt, japi kawʉajan wʉt, japi pejdiosan, israelitas paxi nakkawʉajnaxael japi pejdiosan” —aech Dios Moisésxot.

17 Dios kaes jʉm-aech ampox Moisésxot:

“Israelitas jofaxil anael isliajwapi ídolos, japoxan kawʉajnaliajwa” —aech Dios Moisésxot.

18 Dios kaes jʉm-aech ampox Moisésxot:

“Israelitas isaxael pan levadurajilafiesta, me-ama xan toꞌax. Japafiesta is wʉti, siete matkoiyaxaelpox, pan xaeliajwa, levadurajila. ¡Japafiestalap isaxaeli Abibjuimt wʉt, japajuimt wʉtlap, xam bʉꞌchijiam israelitas Egipto tʉajnʉxot! —aech Dios Moisésxot.

19 Dios kaes jʉm-aech ampox Moisésxot:

“Puexa kaenanʉla israelitas paxi poejiw, matxoelanalaelapi, japi xan chiekal tejwaxael. Malap-is jachiyaxaelen nejew choefpoejiwliajwa. Matxoelanaelapi, japi choef xan tejwaxael, becerros wʉt, o, corderos wʉt, o, cabritos wʉt. 20 Burxʉlan, matxoelanalaeltpon, poi wʉt, ja-aech wʉt, nachaxdusaxaeli cordero, o, cabrito, jeltiꞌsan, burxʉlan weliajwa. Nachaxdus-elasia wʉti, ¡burxʉlan wathijalnasaxaeli! Israelitas paxipoejiw, matxoelanalaelapi weliajwa, ofrenda nawexalaeyaxaeni xan nachaxduiliajwa. Chinax kaen aton ke-etat fʉlaeyaxil tajcarpabaleldin, xalae-el wʉt ofrenda xanliajwa” —aech Dios Moisésxot.

21 Dios kaes jʉm-aech ampox Moisésxot:

“¡Kaesemanalap seis matkoi nabichliajwa israelitas, japamakoiyan wʉtlap puexa chiekal isaxael israelitas! Séptimomatkoi wʉt, ¡puexa chiekal napataxaeli! Mʉthapi wʉtbej pejew naxaeyaxan, o, jol wʉtbejpi pejew naxaeyaxan, séptimomatkoi wʉt, napataxaeli!” —aech Dios Moisésxot.

22 Dios kaes jʉm-aech ampox Moisésxot:

“¡Isaxaeli fiesta de las Semanan! Japafiesta is wʉti, trigo kaesʉapich xapasaxaeli, pejew trigo, matxoelajolpi, japi trigolap taj-ofrendaliajwa. Isaxaelbejpi asafiesta waech toepax wʉajna, israelitas chiekal kitoet wʉti jolaxan, tʉsaxanbej, puexa mʉthapoxan” —aech Dios Moisésxot.

23 Dios kaes jʉm-aech ampox Moisésxot:

“Puexa poejiw tajwʉajnalel nuilaxael tres veces, kaewaechan wʉt. Powaechan japoxan jachiyaxaeli xan paklokolnan tajwʉajnalel, Israel pejDiosnan”. 24 Xan jukaxaelen asatʉajnʉchanpijiw pejtʉajnʉchanxot israelitas wʉajna. Israelitas pejtʉajnʉchan kaes pintʉajnʉchan kiladoflaxaelen. Ja-aech wʉt, chinax asew jiw, wenosaxil israelitas pejtʉajnʉchan, japi pejtʉajnʉchanliajwa. Israelitas nuil wʉti pejbrixantat, tres veces kaewaechan wʉt, japox ja-aech wʉti, xanlap kajachawaesaxaelen israelitas —aech Dios Moisésxot.

25 Dios kaes jʉm-aech ampox Moisésxot:

“Israelitas xʉaꞌatam wʉt choef taj-ofrendaliajwa, nachaxduiyaxili choefjal panbej, tanialaspi levadura. Pascuafiesta wʉt choef xʉaꞌat wʉti, choefwi nama wʉt, masaxili kandiawa pejme xaeliajwa” —aech Dios Moisésxot.

26 Dios kaes jʉm-aech ampox Moisésxot:

“Trigo matxoelajol wʉti, kaes chiekal pachaempi, pejlulanpijiw, ¡japitrigolap nawexalaeyaxaeli tajcarpaba poxadin, xan nejpaklon Diosnanliajwa! Kaes asaxan naxaeyaxan, mʉthapibej, jachiyaxaeli xanliajwa xalael wʉti” —aech Dios Moisésxot.

Dios kaes jʉm-aech ampox Moisésxot:

“¡Cabraxʉlan chat-eyaxili pen pejmit-ʉftat! —aech Dios Moisésxot.

27 Dios kaes jʉm-aech ampox Moisésxot: “Xamxot jʉm-anpoxan, ¡japoxan puexa chiekal lelaxaelam! Me-ama xan chajia jʉm-an, japajamechanxot isaxaelen convenio xamxot, puexa israelitasliajwabej” —aech Dios Moisésxot.

28 Moisés cuarenta matkoiyan, cuarenta madoiyan, kijlachpon Diosxotse. Japamatkoiyan wʉt, japamadoiyan wʉtbej, chinax xae-elon. Min fe-elbejpon. Jaxotse lelon iaꞌfachanxot convenio. Japoxlap jʉmchiyaxael ampox: “Diez tatoꞌlaxan, Dios pejtatoꞌaxan” —chiyaxaelpox. 29 Do jawʉx, baxael wʉt, Moisés baloek wʉt pinamʉax, Sinaímʉaxxotsik, kole-iaꞌfachan xabaloekpon, lelpoxan, diez tatoꞌlaxan. Japoxanlap Dios pejtatoꞌlaxan. Pe Moisés pajut matabijs-el Dios pej-itliakax xuwaechpox, nospaei wʉton, Dios sʉapich. 30 Aarón, puexa israelitas sʉapich, japox taen wʉt, Moisés xu-itliakpox, jawʉt xabich pejlewlapi moxaliajwa Moisésxot. 31 Pe jawʉt, Moisés puexa israelitas lapon, Aarón sʉapich, puexa israelitaspaklochiw sʉapichbej, natamejlaliajwa Moisésxot. Ja-aech wʉt, Moisés jʉm-aech ampox japiliajwa. 32 Do baxael, israelitas chiekal mox wʉt Moisésxot, jawʉt Moisés chapaei israelitasxot Dios jʉm-aechpoxan japiliajwa Sinaímʉaxxotse. 33 Do jawʉt, Moisés chapaeyax bʉxtoet wʉt israelitasxot, panuelbʉꞌch xumatakatpon.

34 Moisés nospaeliajwa wʉt, Dios sʉapich, panuelbʉꞌ jijolton, xumatakatpox. Diosxot nakolt wʉt, chajia wʉton, jaxot pejme xumatakatpon panuelbʉꞌ. Do jawʉt, Moisés chapaeipon israelitasxot Dios jʉm-aechpoxan japiliajwa. 35 Israelitas taen wʉt Moisés xu-itliakpox, jawʉt Moisés pejme xumatakat panuelbʉꞌ. Pe Moisés, Dios sʉapich, nospaeliajwa wʉt, panuelbʉꞌ, xumatakatpox, jijolton. Ja-aech Moisés, pejxu itliak xot, nospaei wʉt, Dios sʉapich.