4 Ndii cuááⁿ vmnaaⁿ ndii saⁿꞌā ꞌlííⁿ ꞌúú canéé na yáāⁿ Jerusalén ndúúcū ꞌiiⁿꞌyāⁿ Israel. Nꞌdiichi ꞌiiⁿꞌyāⁿ Israel sꞌeeⁿ ꞌúú. 5 ꞌIiⁿꞌyāⁿ sꞌeeⁿ ntúūⁿ déénu yā yeⁿꞌé ndíí cuaaⁿ vmnaaⁿ. Ní nduuti chi neⁿꞌe yā caaⁿꞌmaⁿ cuaacú yā, caneé tanꞌdúúcā saⁿꞌā fariseo chi chɛɛchi taavi yeⁿꞌē religión yeⁿꞌé ꞌnū ndúúcū costumbre yeⁿꞌé ꞌnū. 6 Maaⁿ ní caavā chi ꞌúú iꞌteenú chi Dendyuūs caⁿꞌá yā nadacuéeⁿ yā ꞌiiⁿꞌyāⁿ yeⁿꞌe nguaaⁿ tináⁿꞌā tanꞌdúúcā chi ngaⁿꞌa yā ngii yā chiida ꞌnū ꞌiiⁿꞌyāⁿ sꞌeeⁿ nꞌgai yā ꞌúú nanááⁿ juez. 7 ꞌIiⁿꞌyāⁿ yeⁿꞌe ndiichúúví daiyá yā ꞌiiⁿꞌyāⁿ Israel yeⁿꞌé ꞌnū iꞌteenu yā chi Ndyuūs caⁿꞌa yā chi diiⁿ yā. Ní cáávā chuū cueⁿꞌe daāⁿmaⁿ idiíⁿ yā ntiiⁿnyuⁿ yeⁿꞌé Dendyuūs ndii nguuvi ndii nꞌgaaⁿ. Nꞌdiī rey Agripa, caati cáávā chuū chi cunee ngíínú ntuúⁿ ꞌiiⁿꞌyāⁿ Israel ngiicá yā yeⁿꞌé. 8 ¿Dɛꞌɛ̄ nacadiinúúⁿ nī yeⁿꞌē chúū? ¿Dɛꞌɛ̄ cuuvi chí ndísꞌtiī nadacadiinúúⁿ nī chi Dendyuūs nguɛ́ɛ́ cuuvi nadinꞌduuchí yā ꞌiiⁿꞌyāⁿ yeⁿꞌē nguaaⁿ tináⁿꞌā?

9 ꞌÚú ní cuaacu nííⁿnyúⁿ sꞌteēnú chi cánéé chi nꞌdeēe nꞌdáí diíⁿ contra yeⁿꞌe Jesús yeⁿꞌe yáāⁿ Nazaret. 10 ꞌTiicá ntúūⁿ diíⁿ na yáāⁿ Jerusalén. ꞌÚú chꞌií ꞌiiⁿꞌyāⁿ chi iꞌtéénú Jesús vácūū. Chiiduú nꞌgɛɛtɛ́ yeⁿꞌe Israel tee yā poder ꞌúú. Ní taachí chꞌiiⁿꞌnúⁿ yā ꞌiiⁿꞌyāⁿ, ꞌúú caⁿꞌá ti ꞌtíícā. 11 Nééné nꞌdeee cuūvi chꞌií ꞌiiⁿꞌyāⁿ sꞌeeⁿ chi iꞌteenu na nducyáácá yaācū sinagoga na vácūū. Diíⁿ chi ꞌiiⁿꞌyāⁿ cuuví caaⁿꞌmaⁿ yā chi nguɛ́ɛ́ iꞌtéénu yā Jesús. Neené taaⁿ diíⁿ ndúúcū ꞌiiⁿꞌyāⁿ sꞌeeⁿ chí iꞌtéénu yā Jesús. Ní canꞌdaá ꞌiiⁿꞌyāⁿ ndíí na yáāⁿ chi nguɛ́ɛ́ nꞌdiichí.

12 Taachí diíⁿ chuū cueⁿꞌé na yáāⁿ Damasco ní candɛɛ́ caaca ndúúcū orden yeⁿꞌē chiiduú nꞌgɛɛtɛ́ yeⁿꞌe Israel. 13 Nꞌdiī rey, taachi canuúⁿ yúúní taanduu ná maⁿꞌa nguuvi nꞌdiīchí ꞌáámá dɛɛvɛ nanguuvi chi chꞌɛɛtɛ nꞌdáí cá dɛɛvɛ nguɛ́ɛ́ tii dɛ́ɛ́vɛ yeⁿꞌē ꞌyáⁿꞌā. Dɛɛvɛ́ miiⁿ ní nuuⁿmaⁿ ndiivii ꞌúú ndíí ꞌiiⁿꞌyāⁿ chi sneé yā nduucú. 14 Chindɛɛvɛ nducyaaca núsꞌūu na yáⁿꞌāa. ꞌÚú chꞌiindiveéⁿ ꞌáámá nduudu chi yaāꞌvī ꞌúú ndúúcu davaacu hebreo chi ngaⁿꞌā: Saulo, Saulo, ¿dɛꞌɛ̄ cáávā nꞌdaā di ꞌúú? Chɛ́ɛ́chí taavi chí diiⁿ di tanꞌdúúcā ꞌáámá ꞌiiti caꞌa caꞌa tī na yáⁿꞌá cuiiⁿnyuⁿ. 15 ꞌÚú ní caⁿꞌá: ¿Duꞌú nꞌdiī, Señor? Ní Señor miiⁿ ní caⁿꞌa yā: ꞌÚú Jesús chi nꞌdaā dī. 16 Naati nacuééⁿ di, ní cueendiī di. Cáávā chuū cheꞌenaaáⁿ yeⁿꞌē di. Ní cuꞌneéⁿ dii lado yeⁿꞌē ꞌiiⁿꞌyāⁿ ndíí tiiiⁿ chi diiⁿ ntiiⁿnyuⁿ yeⁿꞌé ní caaⁿꞌmaⁿ di nduudu cuaacu yeⁿꞌe dendúꞌū chi nꞌdííchi di yeⁿꞌe dendúꞌū chi ꞌúú diíⁿ chi ꞌcuuⁿꞌmíⁿ náāaⁿ yeⁿꞌē di. 17 Maaⁿ ní ꞌúú ní dichoꞌó dii nanááⁿ ꞌiiⁿꞌyāⁿ yeⁿꞌe di ndúúcū yeⁿꞌe ꞌiiⁿꞌyāⁿ sꞌeeⁿ chi nguɛ́ɛ́ yeⁿꞌē ndaata Israel. Ní taachi neⁿꞌé yā staꞌa yā dii ní ꞌúú nneé dii. 18 Ní cuuví diiⁿ di chi ꞌiiⁿꞌyāⁿ chi nguɛɛ snaaⁿ yā ní snaaⁿ yā ní tunꞌdáa di ꞌiiⁿꞌyāⁿ sꞌeeⁿ ná maāíⁿ ní naⁿꞌá yā na dɛɛvɛ. Ní tunꞌdáa di ꞌiiⁿꞌyāⁿ yeⁿꞌe poder yeⁿꞌe yááⁿnꞌguiinūuⁿ ní naⁿꞌá yā lado yeⁿꞌē Dendyuūs. Ní ndaācá yā ꞌúú ní ꞌúú inadachꞌɛɛcú nuuⁿndi yeⁿꞌé yā ní caavā chi cuꞌtéénu yā yeⁿꞌé. Ní vɛ́ɛ́ herencia yeⁿꞌé yā ndúúcū ꞌiiⁿꞌyāⁿ chi Dendyuūs dindɛɛvɛ yā.

19 Cáávā chuū, nꞌdiī rey Agripa, nguɛ́ɛ́ diíⁿ chi cheeⁿdiitú diíⁿ nꞌdiichí cosa yeⁿꞌē Dendyuūs. 20 Naati caⁿꞌá vmnaaⁿ vmnaaⁿ ꞌiiⁿꞌyāⁿ chi snéé na yáāⁿ Damasco, ní cuayiivi caⁿꞌá na yáāⁿ Jerusalén ndúúcū nuuⁿmaⁿ na yáⁿꞌāa yeⁿꞌe Judea ndúúcū ꞌiiⁿꞌyāⁿ sꞌeeⁿ chi nguɛ́ɛ́ yeⁿꞌē ndaata Israel chi canee cuuⁿmíⁿ yā chi ndaacadaamí yā yeⁿꞌē nuuⁿndi yeⁿꞌé yā níícu cuꞌtéénu yā Dendyuūs. Ní diíⁿ yā ntiiⁿnyuⁿ chí nꞌdaacā nꞌdai ní chꞌiⁿꞌí yā tanáⁿꞌā ꞌiiⁿꞌyāⁿ chi ndaacadaamí yā yeⁿꞌē nuuⁿndi yeⁿꞌe yā. 21 Cáávā chuū ꞌiiⁿꞌyāⁿ Israel sꞌeeⁿ staꞌá yā ꞌúú na yáacū templo ní nadacadíínuuⁿ yā chi ꞌcaaⁿꞌnuⁿ yā ꞌúú. 22 Ndyuūs chinnee yā ꞌúú chi chɛɛ́ ndíí maaⁿ ní caⁿꞌá nduudu cuaacu ndúúcū ꞌiiⁿꞌyāⁿ ndiicúūⁿ ní ꞌiiⁿꞌyāⁿ chi ngaⁿꞌa ntiiⁿnyúⁿ yā. Nguɛ́ɛ́ nꞌdeēe cá caⁿꞌá yeⁿꞌe denduꞌū chi caⁿꞌa profetas ndúúcū Moisés yeⁿꞌé denduꞌū chi canéé chí chiī. 23 Caati Cristo miiⁿ cánéé chi ꞌcueenu yā cuuvi ní ꞌiiⁿꞌyāⁿ miiⁿ vmnááⁿ vmnaaⁿ nnduuchí yā yeⁿꞌe nguaaⁿ tináⁿꞌā. Ní ngaⁿꞌa cuaacú yā yeⁿꞌē dɛɛvɛ nanááⁿ ꞌiiⁿꞌyāⁿ Israel yeⁿꞌé ndúúcū ꞌiiⁿꞌyāⁿ sꞌeeⁿ chi nguɛ́ɛ́ yeⁿꞌē ndaata Israel.

24 Caⁿꞌa Pablo chúú cáávā maāⁿ sa. Festo gobernador miiⁿ ní caⁿꞌa yuudu sa: Loco dii, Pablo. Cáávā chi nꞌgeēⁿ taaví dí chííⁿ chi nduuví loco di.

25 Naati saⁿꞌā miiⁿ ní caⁿꞌā sa: Nguɛ́ɛ́ loco ꞌúú, nꞌdiī Festo, chi nꞌdai taavi. Ngaⁿꞌá nduudu cuaacu chi nꞌdai. 26 Rey Agripa miiⁿ deenú ntúuⁿ yā chuū. ꞌÚú ngaⁿꞌá nduucú yā yeⁿꞌē tanducuéⁿꞌē ndúúcū confianza. ꞌÚú nadacadiinúúⁿ chi déenu yā chuū. Nguɛɛ chóꞌōo chuū ná nꞌdeꞌei. 27 Nꞌdiī rey Agripa, ¿ꞌáá iꞌtéénu nī ꞌiiⁿꞌyāⁿ profetas chi caⁿꞌa nduudu yeⁿꞌe Dendyuūs? ꞌÚú deenú chi iꞌtéénu nī.

28 Tuuꞌmi ní Agripa miiⁿ caⁿꞌa sa chii sa Pablo: ꞌTɛɛ ꞌtɛɛ nūuⁿ diiⁿ di chi cuꞌteenú ndaacá Dendyuūs.

29 Pablo miiⁿ ní caⁿꞌā sa: ꞌÚú ngiicá Dendyuūs ndii taꞌlííⁿ o ndii chꞌɛɛtɛ, nguɛ́ɛ́ dámaāⁿ nꞌdiī ti ꞌtiicá ntúūⁿ nducyaaca ꞌiiⁿꞌyāⁿ chi nꞌgiindiveéⁿ yā yeⁿꞌé, cuuví cuꞌtéénu ntuuⁿ yā Ndyuūs miiⁿ tanꞌdúúcā ꞌúú, naati nguɛ́ɛ́ cuneé yā ndúúcū cadenas ꞌcūū.

30 Taachí caⁿꞌa sa chuū ncueeⁿ rey ndúúcū gobernador ndúúcū Berenice ndúúcū ꞌiiⁿꞌyāⁿ chi caneé yā ndúúcū ꞌiiⁿꞌyāⁿ sꞌeeⁿ. 31 Taachí ꞌiiⁿꞌyāⁿ sꞌuuⁿ cueⁿꞌé yā ꞌáámá lado caⁿꞌá yā nguaaⁿ maáⁿ yā: Mar ꞌáámá nuuⁿndi chꞌɛɛtɛ nguɛ́ɛ́ vɛ́ɛ́ yeⁿꞌē sa ꞌcūū nguɛɛ chi ꞌcaaⁿꞌnuⁿ yú saⁿꞌā, ndíí nguɛ́ɛ́ chi caⁿꞌa sa vácūū.

32 Níícú Agripa ngaⁿꞌā sa ngii sa Festo: Sá ꞌcūū cúúví nguáⁿꞌai sa nduuti chi nguɛ́ɛ́ caⁿꞌā sa ꞌtíícā: ꞌÚú caⁿꞌá nanááⁿ César.