Jesús dichóꞌo yā ꞌiīnū ngɛɛcu ndiichí discípulos yeⁿꞌe yā chí ngaⁿꞌā nduudu cuaacu
10
ꞌCuiinú chúū ní Jesús nandɛɛvɛ yā tá ꞌiīnū ngɛɛcu ndiichi discípulos yeⁿꞌe yā ní dichóꞌo yā cáꞌuūvī caꞌuuví yā. Ní cueⁿꞌe yā cuááⁿ vmnaaⁿ yeⁿꞌe Jesús cuaaⁿ nducyáácá yáāⁿ ndúúcū nduu cuaaⁿ naachi Jesús canéé chi cáⁿꞌa yā. 2 Ní Jesús ngaⁿꞌa yā ngiī yā ꞌiiⁿꞌyāⁿ sꞌeeⁿ: ꞌCuaacu nííⁿnyúⁿ chi nééné nꞌdeēe cosecha vɛ́ɛ́ chi nééné nꞌdeēe ꞌiiⁿꞌyāⁿ chi canéé chi ꞌcaandiveeⁿ yā nduudu yeⁿꞌé Ndyuūs naati saⁿꞌā chi idiiⁿ ntiiⁿnyuⁿ nguɛ́ɛ́ ꞌyaaⁿ sa. Cáávā chuū diꞌcuíítu nī ꞌiiví Ndyuūs chí dichóꞌo yā ꞌiiⁿꞌyāⁿ chi caaⁿꞌmaⁿ yā nduudu cuaacu yeⁿꞌé Ndyuūs ní nadacuéeⁿ yā cosecha yeⁿꞌé Ndyuūs. Cosecha miiⁿ ní tanꞌdúúcā ꞌiiⁿꞌyāⁿ chi cuꞌtéénu yā Ndyuūs. 3 Ndísꞌtiī cueⁿꞌe nī caati ꞌúú dichoꞌó ndísꞌtiī chi ndísꞌtiī ní caⁿꞌa nī tanꞌdúúcā ꞌiiti cuūchī caⁿꞌa tī nguaaⁿ lobos. 4 Nguɛ́ɛ́ candɛ́ɛ nī bolsa ndúúcū tuūmī, ndíí nguɛ́ɛ́ nduu morral, ndíí nguɛ́ɛ́ ndúú ndaacuú yeⁿꞌe nī. Ní taachi diíⁿ nī saludar ꞌiiⁿꞌyāⁿ cuaaⁿ cyúúní, ní nguɛ́ɛ́ cuuvi ꞌnaaⁿ nī. 5 Ní tanducuéⁿꞌē vaꞌāī chi ndaá nī caaⁿꞌmáⁿ nī vmnááⁿ vmnaaⁿ ꞌtúúcā: Cuneé ꞌiiⁿꞌyāⁿ yeⁿꞌe vaꞌáí ꞌcūū ndúúcū vaadī ꞌdiīíⁿ. 6 Ní nduuti chi ꞌiiⁿꞌyāⁿ ní ndiicúuⁿ yā na vaꞌai miiⁿ, tuuꞌmi ní vaadī ꞌdiīíⁿ cunéé ndúúcu yā. Ní nduuti chi nguɛ́ɛ́ vɛ́ɛ́ ꞌiiⁿꞌyāⁿ ndiicúūⁿ na vaꞌai miiⁿ, vaadī ꞌdiīíⁿ nguɛ́ɛ́ cunéé ndúúcu yā. 7 ꞌCuɛɛtinée núúⁿ nī vaꞌāī naachí ꞌiiⁿꞌyāⁿ ꞌcuaáⁿ yā ndísꞌtiī. Cheꞌé nī ní cuꞌu nī chi tée yā caati ꞌiiⁿꞌyāⁿ chi idiiⁿ ntíiⁿnyuⁿ canéé chi nduuvi ꞌííꞌvɛ yā. Ndísꞌtiī nguɛ́ɛ́ caⁿꞌa nī nduu vaꞌāī nduu vaꞌāī. 8 ꞌĀā tií nūuⁿ yáāⁿ naachi cūndaa nī ní ꞌiiⁿꞌyāⁿ mííⁿ ꞌcuaáⁿ yā, cheꞌé nī ꞌāā dɛꞌɛ́ nūuⁿ chi tée yā chi cheꞌé nī. 9 Idiíⁿ nī chi índuūvā yeⁿꞌé ꞌiiⁿꞌyāⁿ chi ngiītā chi sneé yā na yáāⁿ. Ní cuuvi nī ꞌiiⁿꞌyāⁿ yeⁿꞌē naachi Ndyuūs ngaⁿꞌa ntiiⁿnyúⁿ yā ní ꞌāā ndaā niiⁿnuúⁿ naachi snée yā. 10 Naati ꞌāā tií nūuⁿ yáāⁿ naachi ndaá nī ní ꞌiiⁿꞌyāⁿ ní nguɛ́ɛ́ ꞌcuáaⁿ yā ndísꞌtiī, tuuꞌmi ní canꞌdaa nī cuaaⁿ cyúúní ní caaⁿꞌmaⁿ nī ꞌtúúcā: 11 Ndíí yaācáā yeⁿꞌē yáaⁿ ꞌcūū chí caī na caꞌá ꞌnū nꞌdáádi ꞌnū ti nguɛ́ɛ́ cuꞌteenu nī yeⁿꞌé ꞌnū. Naati cadíínuuⁿ nī chuū chi yeⁿꞌē naachi Ndyuūs ngaⁿꞌa ntiiⁿnyúⁿ yā ní ꞌāā ndaā niiⁿnuúⁿ naachi snée nī. 12 ꞌÚú, Jesús, ngaⁿꞌá ngií ndísꞌtiī chi nguuvi taachi Ndyuūs caaⁿꞌmáⁿ yā nuuⁿndi yeⁿꞌe ꞌiiⁿꞌyāⁿ, castigo yeⁿꞌe ꞌiiⁿꞌyāⁿ yeⁿꞌe yáāⁿ sꞌtiī ní diītu cá ní nguɛ́ɛ́ ti chi cuuvi yeⁿꞌe ꞌiiⁿꞌyāⁿ chi nguɛ́ɛ́ dinꞌdaācā yeⁿꞌe yáāⁿ Sodoma.Yeⁿꞌe yáāⁿ sꞌeeⁿ naachi ꞌiiⁿꞌyāⁿ nguɛɛ iꞌtéénu yā Ndyuūs
13 Caⁿꞌa Jesús: Dɛꞌɛ̄ chúúcā yaꞌai yeⁿꞌe ꞌiiⁿꞌyāⁿ yeⁿꞌe yáāⁿ Corazín. Dɛꞌɛ̄ chúúcā yaꞌai yeⁿꞌe ꞌiiⁿꞌyāⁿ yeⁿꞌe yáāⁿ Betsaida. Ti ndúútī chi ꞌiiⁿꞌyāⁿ na yáⁿꞌāa Tiro ndúúcū ꞌiiⁿꞌyāⁿ na yáⁿꞌāa Sidón nꞌdiichí yā vaadī nꞌgiinu chí chiī nguaaⁿ ndísꞌtiī, ꞌiiⁿꞌyāⁿ yeⁿꞌe yáⁿꞌāa sꞌeeⁿ ꞌāā ꞌnaaⁿ ndaācādaamí yā yeⁿꞌē nuuⁿndi yeⁿꞌe yā. Ní chꞌɛɛtinúuⁿ yā catecai yā tanꞌdúúcā díínūuⁿ ní chꞌɛɛtɛ́ yā nguaaⁿ yaiyáā tanꞌdúúcā costumbre yeⁿꞌe ꞌiiⁿꞌyāⁿ miiⁿ ndíí vmnaaⁿ taachi chiⁿꞌi yā chi neené yaⁿꞌai yā. 14 Cáávā chuū ní ꞌiiⁿꞌyāⁿ yeⁿꞌe yáⁿꞌāa Tiro ndúúcū ꞌiiⁿꞌyāⁿ yeⁿꞌe yáⁿꞌāa Sidón ꞌduūꞌvī cá castigo yeⁿꞌé yā nguɛ́ɛ́ ti yeⁿꞌe ndísꞌtiī taachí ndaā nguuvi chí Ndyuūs caaⁿꞌmaⁿ yā nuuⁿndi yeⁿꞌe ꞌiiⁿꞌyāⁿ. 15 Ndísꞌtiī, ꞌiiⁿꞌyāⁿ yeⁿꞌe yáāⁿ Capernaum, neⁿꞌé nī diíⁿ nī chi maáⁿ nī nꞌgɛɛtɛ́ nī naati caⁿꞌá nī na infierno.
16 ꞌIiⁿꞌyāⁿ chí nꞌgiindiveéⁿ yā nduudu yeⁿꞌē ndisꞌtiī ní nduudu yeⁿꞌē ꞌúú nꞌgiindiveéⁿ yā. ꞌIiⁿꞌyāⁿ chi nguɛ́ɛ́ neⁿꞌe yā ndísꞌtiī, nguɛɛ neⁿꞌe yā ꞌúú. Ní nguɛ́ɛ́ neⁿꞌe yā Ndyuūs ti ꞌiiⁿꞌyāⁿ miiⁿ dichóꞌo yā ꞌúú.
Nanguɛɛcuunéé ꞌiīnū ngɛɛcu ndííchí discípulos yeⁿꞌé Jesús
17 Nguɛɛcuunéé nduꞌū ꞌiīnū ngɛɛcu ndííchí discípulos ndúúcū vaadī yeenú. Ní caⁿꞌa yā: Nꞌdií, Señor, espíritus yeⁿꞌe yááⁿnꞌguiinūuⁿ nꞌgiindiveeⁿ sa yeⁿꞌe ꞌnū chi caaⁿꞌmaⁿ ntiiⁿnyúⁿ ꞌnū ndúúcū chiduuchí nī.
18 Jesús caⁿꞌa yā: Cuáácú ꞌúú ní inaáⁿ yááⁿnꞌguiinūuⁿ tanꞌdúúcā chi snꞌdaā sa yeⁿꞌē nánguuvi tanꞌdúúcā ꞌcuai. 19 Ní Jesús caⁿꞌa yā chiī yā discípulos yeⁿꞌe yā: ꞌÚú ní teé poder ndísꞌtiī chí cunncaꞌá nī cúú ndúúcū ꞌiiti dáⁿꞌāi, níícu cuchɛ́ɛ nī ndúúcū ꞌiiⁿꞌyāⁿ chi contra yeⁿꞌe nī. Ní nguɛ́ɛ́ duꞌū vɛɛ cuuvi cuchɛ́ɛ́ yeⁿꞌe ndísꞌtiī. Ní nguɛ́ɛ́ idiiⁿ daño ndísꞌtiī. 20 Ndísꞌtiī nguɛ́ɛ́ ngii yeenú nī taachi caaⁿꞌmáⁿ nī ntiiⁿnyuⁿ yeⁿꞌē espíritus yeⁿꞌe yááⁿnꞌguiinūuⁿ ní nꞌgiindiveēⁿ yeⁿꞌe nī naati yeenú nī chi canéé nguūⁿ chi dúúchí nī na libro yeⁿꞌé Ndyuūs na vaꞌai chɛɛti nguuvi.
Jesús chiī yeenú yā
21 Hora mííⁿ nūuⁿ Jesús yeenú nꞌdai yā cáávā Espíritu Nꞌdai yeⁿꞌé Ndyuūs ní caⁿꞌa yā: Nꞌdiī, Chiidá, ꞌúú ní teé gracia nꞌdiī chi ꞌiiví nī yeⁿꞌe vaꞌai chɛɛti nguuvi ndúúcū yáⁿꞌāa ꞌcúū caati snuuⁿ nꞌdéꞌei nī nduudú ꞌcūū yeⁿꞌe ꞌiiⁿꞌyāⁿ chi déénu ca yā ndúúcū ꞌiiⁿꞌyāⁿ chi nꞌdeēe nꞌdáí túúmícádíínuuⁿ yā. Ní caꞌá nī chi cadíínūuⁿ ꞌiiⁿꞌyāⁿ chi ndiicúuⁿ yā chí nguɛ́ɛ́ nꞌdeēe cá déénu yā caati ꞌtíícā neⁿꞌe nī diiⁿ nī ti nꞌdaācā.
22 Nꞌdiī Chiidá, ꞌāā tee nī tanducuéⁿꞌē ꞌúú. Mar ꞌáámá ꞌiiⁿꞌyāⁿ nguɛ́ɛ́ déénu yā duꞌū chi ꞌaama nꞌdyaⁿꞌā Daiya Dendyuūs, dámaaⁿ nꞌdii Chiidá. Mar ꞌaama ꞌiiⁿꞌyāⁿ nguɛ́ɛ́ déénu yā duꞌū chi nꞌdii Chiidá dámaāⁿ ꞌáámá nꞌdyaⁿꞌā daiyá nī, ndúúcū ꞌāā duꞌú nūuⁿ ꞌiiⁿꞌyāⁿ chi Daiyá Dendyuūs neⁿꞌé yā ꞌcuuⁿꞌmíⁿ yā.
23 Tuuꞌmi ní Jesús ngaⁿꞌa yā ngii yā discípulos yeⁿꞌe yā: Dɛꞌɛ chúúcā nꞌdai ndísꞌtiī chí ngii naaⁿ nī denduꞌū chi ndísꞌtiī nꞌgíínu nī. 24 ꞌÚú ní ngaⁿꞌá ngií ndísꞌtiī chi neené ꞌyaaⁿ profetas ndúúcū reyes chi yeⁿꞌē ndii cuááⁿ vmnaaⁿ néⁿꞌe yā snaaⁿ yā chí ndísꞌtiī ínaaⁿ nī naati nguɛ́ɛ́ nꞌdiichí yā. Ní neⁿꞌé yā ꞌcaandiveeⁿ yā chí ndísꞌtiī nꞌgiindiveéⁿ nī naati nguɛ́ɛ́ chꞌiindiveéⁿ yā.
Saⁿꞌā samaritano chí nꞌdai
25 ꞌÁámá maestro yeⁿꞌe ley chi neⁿꞌe sa nꞌdiichineeⁿ sa Jesús ndaa sa nanáaⁿ yā ní ntiinguuneeⁿ sa Jesús: Nꞌdií, Maestro, ¿dɛꞌɛ̄ chi canee chi diíⁿ chí ndáácāa vida cueⁿꞌe daāⁿmaⁿ?
26 Jesús nanꞌguɛɛcútaⁿꞌa yā: ¿Taacā canéé nguuⁿ na ley yeⁿꞌé chuū? ¿Dɛꞌɛ̄ tuumicadiinuuⁿ di yeⁿꞌe ley yeⁿꞌe chuū?
27 Maestro yeⁿꞌe ley miiⁿ nanꞌguɛɛcútaⁿꞌā sa: ꞌTúúcā canéé nguūⁿ: Dinéⁿꞌe di Señor Ndyuūs yeⁿꞌē di ndúúcū núúⁿmáⁿ staava yeⁿꞌē di, ndúúcū núúⁿmáⁿ alma yeⁿꞌē di, ndúúcū tanducuéⁿꞌē fuerzas yeⁿꞌē di, ndúúcū tanducuéⁿꞌē vaadī cadíínūuⁿ yeⁿꞌē di. Ní dinéⁿꞌe di nducyaaca ꞌiiⁿꞌyāⁿ na niiⁿnuúⁿ vaꞌāī yeⁿꞌe di tanꞌdúúcā chí neⁿꞌe di maāⁿ di.
28 Jesús nanꞌguɛɛcútaⁿꞌa yā: Nꞌdáácā nanꞌguɛɛcútaⁿꞌā di. Diiⁿ di chuū, ní cunduūchi di cueⁿꞌe daāⁿmaⁿ.
29 Saⁿꞌā miiⁿ neⁿꞌe sa cunéé nꞌdaāca sa ní caⁿꞌa sa chii sa Jesús: ¿Dúꞌū chi ꞌiiⁿꞌyāⁿ chi canéé chí neⁿꞌé chi niiⁿnuúⁿ vaꞌāī yeⁿꞌé?
30 Tuuꞌmi ní Jesús miiⁿ nánꞌguɛɛcútaⁿꞌā yeⁿꞌē sa ndúúcū ꞌáámá cuento chi ejemplo chi ꞌtíícā: ꞌÁámá saⁿꞌā nguaꞌāī sa yeⁿꞌē yáāⁿ Jerusalén miiⁿ ní cúnaⁿꞌa sa na yáāⁿ Jericó. Taachi canúúⁿ sá yúúní ꞌiiⁿꞌyāⁿ duucu ní staꞌá yā saⁿꞌā miiⁿ ní divíi yā ndii catecai sa ní chꞌeⁿꞌe yā saⁿꞌā ndíí chi yaꞌāī ca yeⁿꞌē sa ní ꞌtɛɛ ꞌtɛ́ɛ́ nguɛ́ɛ́ chꞌii sa ní cunaⁿꞌa yā. 31 Tuuꞌmi ní ꞌáámá chiiduú choꞌó yā yúúní miiⁿ ní taachi nꞌdiichi yā saⁿꞌā miiⁿ, divíi yā cuááⁿ ꞌdiituú yúúní ní choꞌó yā ní cueⁿꞌé yā. 32 ꞌTiicá ntúūⁿ saⁿꞌā levita chi chiiduú chi diiⁿ ntiiⁿnyuⁿ yeⁿꞌe nátai choꞌó yā naachi candíítí saⁿꞌā miiⁿ. Nꞌdiichí yā saⁿꞌā miiⁿ ní divíi yā cuaaⁿ ꞌdiituú yúúní. Ní choꞌó yā ní cueⁿꞌé yā. 33 Cuayiivi ní ꞌáámá saⁿꞌā yeⁿꞌe yáⁿꞌāa Samaria choꞌō sa yúúní miiⁿ. Taachí ndaa niiⁿnuúⁿ sa naachi candíítí saⁿꞌā miiⁿ, nꞌdiīchi sa saⁿꞌā nnee yaꞌāī ꞌiinu sa saⁿꞌā. 34 Ní ndaā sa naachi candíítí saⁿꞌā miiⁿ ní idiiⁿ yiīcú sá naachi yaꞌāī ndúúcū aceite ndúúcū vino ní chꞌɛɛcu sa tíínūuⁿ naachí yaꞌāī yeⁿꞌē sa. Ní snꞌduū sa saⁿꞌā ꞌyúudūu yeⁿꞌe sa ní candɛɛ̄ sa saⁿꞌā na yáāⁿ. Ní ꞌnuūⁿ sa ꞌáámá vaꞌai naachí cuuvi cuꞌneeⁿ sa saⁿꞌā miiⁿ naachi ꞌiiⁿꞌyāⁿ diíⁿ yā cuidado saⁿꞌā miiⁿ. 35 Chidɛɛvɛ táámá nguuvi, taachi neⁿꞌe caⁿꞌa sa tunꞌdáa sa na ꞌuūvī caadi yeⁿꞌe bolsa ní caꞌā sa saⁿꞌā vaacu miiⁿ. Ní caⁿꞌa sa chii sa saⁿꞌā: Nꞌdiī, diíⁿ nī cuidado saⁿꞌā, ti ꞌāā taa vɛ́ɛ́ nūuⁿ chi diíⁿ nī gastar ndúúcū sa, taachí nguɛɛcuneé nadííꞌvɛ́ yeⁿꞌe nī. 36 Maaⁿ ní Jesús ntiinguunéeⁿ yā saⁿꞌā miiⁿ: Naachi ꞌiinū saⁿꞌā sꞌeeⁿ ¿chɛɛ sá chi saⁿꞌā chi neⁿꞌe sa saⁿꞌā na niiⁿnuúⁿ yaꞌāī chi ꞌnuū cáꞌai chi duucu miiⁿ?
37 Saⁿꞌā miiⁿ ní caⁿꞌā sa: Saⁿꞌā chi nnee yaꞌāī ꞌiinu sa. Tuuꞌmi ní Jesús miiⁿ caⁿꞌa yā: Díí, cueⁿꞌe di, ní diiⁿ ntúuⁿ di ꞌtúúcā.
Parábola del Buen Samaritano
Jesús canée yā na vaacu Marta ndúúcū María
38 Cuayiivi ní cueⁿꞌe Jesús na ꞌáámá yáāⁿ ꞌlííⁿ ní ndaa yā na vaacu ꞌáámá nꞌdaataá chi nguuvi tá Marta. Ní ꞌcuūⁿ tá chi canee yā na vaacu tá. 39 Ní Marta miiⁿ ní vɛ́ɛ́ ꞌaama víꞌi yā chi nguuvi tá María. Ní María miiⁿ chꞌiīndī tá ná caꞌa Señor Jesús miiⁿ, ní nꞌgiindiveeⁿ tá nduudu chí chiꞌcueeⁿ yā. 40 Marta miiⁿ ní nééné nꞌdeēe ntiiⁿnyuⁿ idiīⁿ tá ní ndaā tá nanááⁿ Jesús ní caⁿꞌa tá: Nꞌdií Señor, ¿ꞌáá nguɛ́ɛ́ inadicádiinūūⁿ yeⁿꞌé chi dámaaáⁿ nꞌnééⁿ viꞌí ꞌúú chí diíⁿ mandado? Cuuvi nī táⁿꞌā ní cunnee tá ꞌúú.