E sheshei kuna Yesu
26
Ana Yesu u kotsoi kudansa ili i nam pa,
u danai mukumitoni n ni,
2 “Uteku u na i yevei,
Ka̱ɗiva̱ ka Kupasamgbanai ayin e re a ɗa o okpoi a na a̱ gita̱ kaꞋa,
mpa ɗa kpamu Maku ma Vuma,
ma na a̱ kuka̱na̱ ka̱ta̱ a bapa a maɗanga ma atakaci.”
3 Ɗa anan ganu vu gbagbaꞋin nu nkoshi a yaꞋin oɓolo a kpaꞋa ku mogono ma anan ganu,
vuza na e ci ɗeke Kayafa.
4 Ɗa e sheshei kuka̱na̱ Yesu usokongi ka̱ta̱ a una yi.
5 Amma ɗa a danai,
“Ka̱ta̱ ci yaꞋan nannai a ayin a̱ Ka̱ɗiva̱ ka Kupasamgbanai ba,
adama a na uma i ta̱ a̱ kuɗengusa̱ vishili.”
Vuka m maniꞋin ma̱ ma̱gula̱ni
6 Ana i o kufoɓuso kuka̱na̱ Yesu,
a̱yi ɗe a Bataniya a kpaꞋa ku Sima ma̱kutu.
7 A̱yi ɗe a kulyaꞋa ilikulyaꞋa,
ɗa vuka vu ta̱wa̱i wa̱ ni n kedele ka maniꞋin ka̱ ma̱gula̱ni mi ikebe ka̱u.
Ɗa u tsungi maꞋa a kaci ke Yesu.
8 Amma ana mukumitoni n ni me enei nannai,
ɗa a yaꞋin wupa a danai,
“Ikebe i yi ɗa̱i a̱ la̱nga̱sa̱i nannai!
9 Ishi e denge maniꞋin ma nam pa ma n ikebe ka̱u,
ka̱ta̱ e neke aza a unambi.”
10 Yesu u yeve ta̱ ili i na i a kudansa,
ɗa u danai le,
“Yi ɗa̱i ɗa yi o koꞋuso vuka vu nam pa?
U yaꞋan ta̱ ili i singai i nam pa adama a̱ va̱.
11 Yi ta̱ koɓolo n aza a unambi ayin tutu,
amma mpa n kuyongo na n a̱ɗa̱ m megeshe ka̱u ba.
12 U tsunku mu ta̱ maniꞋin ma nam pa adama a na u foɓuso ikyamba i va̱ adama a̱ ka̱ciɗa̱.
13 N dana ɗa̱ mayun,
a̱ ubuta̱ u na baci de dem a dansai Arabali a Singai a aduniyan ra̱ka̱,
i ta̱ a kudana ili i na vuka vu nam pa u yaꞋin,
ka̱ta̱ ta na uma a ciɓa yi.”
Yahuza wu ushuki kudenge Yesu
14 Ɗa vuza te a̱ ka̱tsuma̱ ka Kupanazere,
vuza na e ci ɗeke Yahuza Iskaryoti,
u banai kuyaꞋan kadanshi n anan ganu vu gbagbaꞋin.
15 U danai,
“Yi ɗa̱i i kutsupa mu n neke ɗa̱ baci Yesu?”
Ɗa e nekei ni ikebe ya azurufa kamankupa.
16 Ana u kotsoi nannai,
ɗa u yongoi a̱ kula̱nsa̱ ayin a na a gaꞋin ka̱ta̱ u neke le Yesu.
A yaꞋin Ka̱ɗiva̱ ka Kupasamgbanai
17 A kanna ka iyain ka̱ Ka̱ɗiva̱ ko Burodi vu Moloko,
ɗa mukumitoni ma n ta̱wa̱i u Yesu ɗa e ecei,
“Te ɗai vi cigai tsu bana ci yaꞋan ofoɓuso a kulyaꞋa ilikulyaꞋa i Kupasamgbanai ya?”
18 Ɗa wu ushuki,
“Banai a asuvu a̱ likuci ya i cina vuma vi yoku ka̱ta̱ i dana yi,
‘Malum ma danai:
Ayin a na e sheshei adama a̱ va̱ a yawa ta̱ ɗevu.
Mi ta̱ a kuyaꞋan Ka̱ɗiva̱ ka Kupasamgbanai m mukumitoni n va̱ a kpaꞋa ku nu.’ ”
19 Ɗa a yaꞋin tsu na u danai le,
ɗa o foɓusoi ilikulyaꞋa i Ka̱ɗiva̱ ka Kupasamgbanai ya ɗe.
20 Ana kulivi ku yaꞋin,
Yesu n Kupanazere a a̱ da̱sa̱ngi adama a na a lyaꞋa ilikulyaꞋa.
21 Ele a kulyaꞋa,
ɗa Yesu u danai,
“N dana ɗa̱ ta̱ mayun,
vuza te vu ɗa̱ wi ta̱ e kudenge mu.”
22 Ɗa mukumitoni ma n na̱mgba̱i a̱tsuma̱ ka̱u,
ɗa a̱ gita̱i kece yi vuza vi te vi te,
“Vuzagbayin,
mpa ɗa vuza na mi e kudenge wu va ba,
mpa ɗa?”
23 Wu ushuki,
“Vuma vu na u ukai ka̱jishi ka̱ ni nu mpa e mevene ma kusaꞋan,
a̱yi ɗa vuza na u kudenge mu.
24 Katagarda ka Ciɗa ka danai n ayin a cau,
Maku ma Vuma mi ta̱ a̱ kukuwa̱.
Mayun ki ta̱ a kuyaꞋan nannai.
Amma ili ya atakaci i ɗa a̱ ubuta̱ u vuza na u nekei a una mu.
U kulaꞋa ta̱ n kugaꞋan ishi a matsa yi ba.”
25 Yahuza,
vuza na wi e kuneke yi,
u danai,
“Malum,
mayun mpa ɗa ba,
mpa ɗa?”
Yesu wu ushuki,
“E,
avu ɗa.”
IlikulyaꞋa yu ukocishi
26 Ele a kulyaꞋa ilikulyaꞋa,
ɗa Yesu u ɗikai burodi vi yoku.
U cikpai Ka̱shile ɗa u wansai vu ɗa wawaꞋa.
Ɗa u nekei mukumitoni n ni ɗa u danai,
“Isai burodi vu nam pa ka̱ta̱ i takuma vu ɗa,
adama a na ikyamba i va̱ i ɗa.”
27 Ɗa u ɗikai mataꞋan ɗa u cikpai Ka̱shile adama maꞋa,
ɗa u nekei maꞋa mukumitoni n ni.
U danai,
“Yaba dem vu ɗa̱ u soꞋo na va.
28 Adama a na na va mpasa n va̱ n ɗa n na mo okpoi agisana a uzuwakpani u na Ka̱shile ka yaꞋin n uma a̱ ni adama a na u cinukpaka le unushi u le.
29 N dana ɗa̱ na:
mi o kudoku mo soꞋo ma̱kya̱n ba,
sai kanna ka na n kusoꞋo ma savu n a̱ɗa̱ o tsugono ce Esheku a̱ va̱.”
30 Ɗa a yaꞋin vishipa vu kucikpa Ka̱shile,
ɗa a lazai a kubana a Kusan ku Zaitun.
Biturusu u kucinai wi ta̱ a kushamgba n Yesu
31 Yesu u danai mukumitoni n ni,
“N kayin ka nam pa,
ra̱ka̱ vu ɗa̱ yi ta̱ a kusuma ya̱ ka̱sa̱kpa̱ mu,
tsu na keneki Zakariya u ɗanai:
‘Ka̱shile ki ta̱ a kuna maguɓi ka̱ta̱ nlala ma n wacuwa.’◊
32 “Amma a ayin a na baci n ɗenga̱i a kasaun,
mi ta̱ a kubana a̱ Ga̱lili ka̱ta̱ n yawa ɗe kelime ka̱ ɗa̱.”
33 Biturusu u danai,
“Ko aza a na a buwai ra̱ka̱ a iwan wu,
mpa n kuꞋiwan wu ba!”
34 Ɗa Yesu u danai,
“N dana wu mayun,
n kayin ka nam pa,
kafu motoku ma sala vi ta̱ a kunana mu ali kutatsu.”
35 Amma ɗa Biturusu u danai,
“Mpa mi a kunana wu ba!
Ali n kukuwa̱ ta̱ koɓolo n avu!”
Ɗa mukumitoni n na m buwai dem a danai feu nannai.
Yesu u yaꞋin kavasa endeꞋen ni
36 Ɗa Yesu u banai a̱ ubuta̱ u na e ci ɗeke Getsemeni koɓolo m mukumitoni n ni,
ɗa u danai le,
“Da̱sa̱ngi na,
mpa n kubana ta̱ na ɗe ma yaꞋan kavasa.”
37 Ɗa u pura̱i Biturusu n olobo e re a Zabidi.
U na̱mgba̱i ka̱tsuma̱ ka̱u ɗa u panai a̱miki a ikyamba.
38 Ɗa u danai le,
“Mi ta̱ n una̱mgbi u ka̱tsuma̱ n a̱bunda̱i u na u yawai ɗevu a na wa kuna mu.
Shamgbai na nu mpa ka̱ta̱ i lata ba.”
39 U doku u walai n kelime kenu,
ɗa u kuɗa̱ngi n a̱shi a̱ ni a kinda iɗika ɗa u yaꞋin kavasa,
“Dada vu va̱,
wi baci a kuyaꞋan,
takpaka mu mataꞋan ma atakaci ma nam pa ma.
Amma u laꞋa ta̱ n kugaꞋan vi yaꞋan i na vi cigai,
amma i na n cigai ba.”
40 Ɗa u bonoi a̱ ubuta̱ u mukumitoni n tatsu ma ɗe u cinai le alavu.
U danai Biturusu,
“Nini ɗai tamkpamu i fuɗai i yaꞋin kavasa koɓolo nu mpa ko viyum vi te ba?
41 Yongoi n wuma ka̱ta̱ i yaꞋan kavasa n utsura adama a na ka̱ta̱ i yikpa̱ a̱ ubuta̱ u kukondo ba.
Ka̱ɗu ka ciga ta̱ kuyaꞋan ili i na yi derere,
amma ikyamba yi ta̱ ram.”
42 U ka̱sa̱kpa̱i le kpamu ɗa u yaꞋin kavasa,
“Dada vu va̱!
MataꞋan ma nam pa mi baci a kusula mu ba,
sai n soꞋo maꞋa,
mi ta̱ a kuyaꞋan ili i na vi cigai.”
43 U bonoi kpamu ɗa u cinai le alavu.
A fuɗa o yongo n wuma ba.
44 Ɗa Yesu u ka̱sa̱kpa̱i le ɗa u lazai tatsu,
ɗa u yaꞋin kavasa a kudansa ili i te i na u dansai ɗe.
45 Ɗa u bonoi u mukumitoni wa ɗa u danai,
“Nini ɗai ɗa i buwai alavu biꞋi a kuvuka tsu na i cikalai?
Gogo na ayin a yawa ta̱.
Mpa ɗa,
Maku ma Vuma ma na e kuneke a̱ ubuta̱ wu utsura u uma a̱ unushi.
46 Ɗenga̱i tsu walai.
Indai,
vuza na u nekei mu a̱yi ɗa na lo a̱ kuta̱wa̱.”
A̱ ka̱na̱i Yesu
47 Yesu biꞋi a kadanshi,
ɗa Yahuza,
vuza te a̱ ka̱tsuma̱ ka Kupanazere a,
u yawai koɓolo n ka̱bunda̱i ka uma n otokobi e le nu mgba̱la̱mgba̱la̱m.
Anan ganu vu gbagbaꞋin nu nlum n Wila̱ n nkoshi m gba̱ra̱gba̱ra̱ n ɗa a̱ suki uma a nam pa a.
48 Yahuza u danai le ta̱ ɗe agisana a na u kuyaꞋanka le m makyan ma ɗe,
“Yi ta̱ e kuyeve vuza na i kuka̱na̱ ayin a na baci m banai a̱ ni ɗa n kya̱sa̱i ni n woɓongi.”
49 Yahuza u tonoi derere sai u Yesu ɗa u danai,
“Malum!
Mi ta̱ ikya̱shi.”
Ɗa wo oɓongi ni.
50 Ɗa Yesu wu ushuki,
“Ka̱ja̱Ꞌa̱ ka̱ va̱,
yaꞋan ili i na vu ta̱wa̱i kuyaꞋan.”
Ɗa uma a̱ ta̱wa̱i ɗa e remei ni kpan-kpaꞋan.
51 Vuza te a̱ ka̱tsuma̱ ka̱ mukumitoni n Yesu u talai kotokobi ka̱ ni.
U kapai kagbashi ko mogono ma anan ganu,
ali ɗa u takpai ni kutsuvu.
52 Amma ɗa Yesu u danai ni,
“Bonoko kotokobi ka̱ nu iven.
Vuza na baci de dem u shilika̱i n kotokobi,
n kotokobi ka feu vuza yoku a̱ kunaka yi.
53 Mayun i yeve ta̱ mi ta̱ a kufuɗa mo folono Esheku a̱ va̱,
ka̱ta̱ ta na u neke mu alingata n a̱bunda̱i a na a lazai ugboku kupa n u re wa adama a̱ vishili.
54 Amma mayun ɗa ka kuyaꞋan nannai adama a na a shatangu ili i na Katagarda ka Ciɗa ka danai.”
55 Ɗa Yesu u danai ka̱bunda̱i ka uma ka,
“I ta̱wa̱i kuka̱na̱ mu n otokobi nu mgba̱la̱mgba̱la̱m adanshi vuza na u ci shilika̱ n tsugono?
Kanna dem n tsu da̱sa̱ngu ta̱ a̱ A̱Ꞌisa̱ a Gbayin a kuyaꞋan kuyotsongusu,
i ka̱na̱ mu ta na ɗe ba.
56 Amma ili i nam pa ra̱ka̱ i yaꞋan ta̱ nannai,
adama a na ili i na eneki a ɗanai yo okpo mayun.”
Ɗa mukumitoni n ni ra̱ka̱ n ka̱sa̱kpa̱i ni ɗa a sumai.
Aza e Kusheshe e ecei Yesu
57 Aza a na a̱ ka̱na̱i Yesu,
a bankai ni a kpaꞋa ku Kayafa,
mogono ma anan ganu,
a̱ ubuta̱ u na nlum n Wila̱ nu nkoshi n gasai koɓolo.
58 Biturusu u tonoi a̱ kucina̱ ku le dadaꞋin sapu ɗa a yawai ulanga u kpaꞋa u mogono ma anan ganu ma.
Ɗa u da̱sa̱ngi ɗevu n aza a kindi a kpaꞋa ku mogono,
adama a na we ene ili i na i kuciya̱ Yesu.
59 Amma anan ganu vu gbagbaꞋin n Aza e Kusheshe a ra̱ka̱ a ciga ta̱ kuna Yesu.
Adama a nannai ɗa a gbaɓarangi tsu na a̱ kuciya̱ uma o yoku a na a kudansa aꞋuwa adama e Yesu punu a̱ kunu ka afada ka.
60 Uma n a̱bunda̱i a̱ ta̱wa̱i ɗa a yaꞋankai ni aꞋuwa,
amma aza a afada a a̱ ciya̱ ili i ma̱riki i na a kunaka yi ba.
Ɗa uma e re a̱ ta̱wa̱i ɗa a danai,
61 “Vuma vu nam pa va u danai,
‘Mi ta̱ a̱ kufa̱da̱ A̱Ꞌisa̱ a Gbayin a̱ Ka̱shile ka̱ta̱ n doku m maꞋa a ɗa kpamu a̱ ka̱tsuma̱ ka ayin a tatsu.’ ”
62 Mogono ma anan ganu ma ma̱ ɗenga̱i ɗa ma danai Yesu,
“Vi n wushuki u na ve kuneke kadanshi ka nam pa adama a̱ nu ba?”
63 Amma a̱yi Yesu u dana ili ba.
Ɗa kpamu mogono ma ma danai ni,
“A̱ ka̱tsuma̱ ka kula ku Ka̱shile ka na ki n wuma,
dana mu mayun avu ɗa baci Kishi,
Maku ma̱ Ka̱shile.”
64 Ɗa Yesu wu ushuki,
“E,
ta nannai tsu na i danai.
Amma n dana ɗa̱ ta̱ ra̱ka̱,
a kubana ayin a̱ kuta̱wa̱,
yi ta̱ e kene Maku ma Vuma ida̱shi e kukiye ku usingai ku Uba̱nga̱ri a̱ kuta̱wa̱ gaɗi ve eleshu!”
65 Ana mogono ma ma panai nannai,
ɗa u yaꞋin wupa ali ɗa u karai ntogu n ni,
ɗa u danai,
“Vuma vu nam pa u dansa ta̱ kadanshi ki ishikushi a̱ ubuta̱ u Ka̱shile!
Ci o kudoku kuciga ngan n yoku kpamu ba.
A̱ɗa̱ dem i panaka yi ta̱ a kudansa kadanshi ki ishikushi ka nam pa u Ka̱shile.
66 Yi ɗa̱i i sheshei a yaꞋanka yi?”
Ɗa a̱ ushuki,
“U yaꞋan ta̱ unushi u na u yawai a una yi.”
67 Ɗaɗa a̱ ciꞋikpa̱i ni ntsa̱n a̱ a̱shi,
ɗa a̱ dukpa̱i ni n a̱kuꞋun.
Ɗa aza o yoku a ɓasai ni.
68 A danai,
“Vu dana avu ɗa Kishi!
To,
dana tsu yayi u dukpa̱i nu?”
Biturusu u nanai Yesu
69 A ayin a nan lo,
ana Biturusu wi ida̱shi a ulanga u kpaꞋa,
kagbashi ke mekere ka̱ ta̱wa̱i a̱ ni ɗa u danai,
“Avu feu vi ta̱ koɓolo n Yesu vu Ga̱lili.”
70 Amma e kelime ka yaba dem ɗa Biturusu u danai,
“Ta nannai ba!
N yeve ili i na vi a kudansa ba!”
71 Ana u ka̱sa̱kpa̱i ulanga wa,
ɗa u banai a̱ utsutsu u kpaꞋa wa,
mekere mo yoku kau me enei ni.
U danai uma a na i lo a̱ ubuta̱ wa,
“Vuma vu nam pa wi ta̱ koɓolo n Yesu vu Nazara.”
72 Ɗa kpamu Biturusu u nanai ɗa u danai,
“N kucina ta̱ mpa n yeve vuma vu nan lo ba!”
73 Ana megeshe ma yaꞋin kenu,
uma o yoku a na i lo kashani a banai u Biturusu ɗa a danai,
“Mayun avu vi ta̱ a̱ ka̱tsuma̱ ka aza a na i o kutono Yesu.
Tsu na vi a kadanshi u yotso ta̱ adanshi vuza vu Ga̱lili vu ɗa vi.”
74 Ɗa Biturusu u danai,
“N kucina ta̱ mayun ɗa mi a kudansa!
N yeve vuma vu nan lo ba!”