2 N cikpa ɗa̱ ta̱ adama a na ayin tutu i tsu ciɓa ta̱ nu mpa,

n i tonoi kpamu kuyotsongusu ku na n yaꞋankai ɗa̱.

3 Amma n ciga ta̱ i yeve ili i nam pa:

Kishi wi ta̱ n utsura gaɗi vu vali,

a̱yi vali wi ta̱ n utsura gaɗi vu vuka vi ni,

Ka̱shile tamkpamu ki n utsura gaɗi vu Kishi.

4 Vali vu na baci de dem u palai kaci a̱yi a kuyaꞋan kavasa ko a kudana uma akaka a̱ Ka̱shile,

wi ta̱ a kuzuwa uma e neke Kishi wono.

5 Amma vuka dem vu na vu kpa̱ɗa̱i kupala kaci ka̱ ni a̱yi a kuyaꞋan kavasa ko a kudana uma akaka a̱ Ka̱shile,

wi ta̱ e kuneke vali vi ni wono.

Vuka vu nan lo wi ta̱ derere n vuka vu na o gbonduwoi kaci adama a urotu u wono.

6 To,

u iwan baci kushiya ka̱ka̱la̱bi a kaci ka̱ ni a kiꞋwan yi ka̱nji ka.

An wo okpoi ili i wono a kiꞋwan yi ka̱nji ko u gbonduwo,

sai u pala kaci ka̱ ni.^a

7 Ka̱shile ka yaꞋin ali n iyotsonoi i ni ka̱ta̱ feu e neke yi tsugbayin.

Na ɗaɗa a̱yi vali u uka ili i na u pala kaci ka̱ ni ba.

Ka̱shile ka yaꞋan ta̱ a̱ma̱ci adama a na e neke ali e le tsugbayin.

8 Ka̱shile ka yaꞋan vali vu ugiti wu uta̱ u vuka ba,

amma u yaꞋin vuka vu ugiti vu uta̱i punu u vali.

9 Ka̱shile ka yaꞋan vali adama a vuka ba,

amma u yaꞋan ta̱ vuka adama a vali.

10 I ɗaɗa i zuwai a̱yi vuka u kupala kaci ka̱ ni adama a na u yotsongu an vali wi n utsura wa̱ ni,

n adama a alingata kpamu.

11 Tsu na ci o kutono Vuzagbayin,

a̱ma̱ci i upeci n ali ba,

ali feu i upeci n a̱ma̱ci ba.

12 Mayun ɗa vuka vi iyain vu uta̱i u vali,

amma ɗa a̱ma̱ci a matsai ali a na a buwai dem.

Amma Ka̱shile kaꞋa vuza na u yaꞋin ili dem.

13 Ecei ka̱ci ka̱ ɗa̱ vuka vi yaꞋan baci kavasa babu na u palai kaci ka̱ ni,

na lo va ili i wono i ɗa ba?

14 Ve ene tsu na Ka̱shile ka yaꞋin aduniyan,

vali vi baci n ka̱nji va̱cilya̱,

wo okpo ili i wono ba?

15 Amma vuka vi baci n ka̱nji ku ugaɗi sa̱wu u tsu lobono ta̱.

Ka̱shile kaꞋa ke nekei ni ka̱nji ugaɗi nannai adama a na wo okpo yi ili i kupala kaci.

16 Uma o yoku a kuciga ta̱ kuyaꞋan kanananai adama a ukuna u nam pa wa ali n gogo na,

amma n kudana ta̱ a̱tsu n a̱Ꞌisa̱ a aza a na a buwai ci ci yaꞋan ili kakau ba.

17 O kuyotsongusu ku na mi a kuciga kuyaꞋanka ɗa̱,

n kucikpa ɗa̱ ba,

adama a na ayin a na baci i ɓolongi a na ya yaꞋan kasingai,

i kucikpa i bono i yaꞋan i na i kpa̱ɗa̱i kugaꞋan.

18 Ili i iyain i ɗaɗa,

m pana ta̱,

i gasa baci a̱ a̱Ꞌisa̱ aza o Kutoni i ci pecuku ta̱ ugboku kakau adama a kanananai.

Mu ushuku ta̱ ta na n ili i yoku.

19 Mayun ɗa i ciya̱ ugboku kakau a̱ ka̱tsuma̱ ka̱ ɗa̱ adama a na yaba dem we ene aza a na i m ma̱riki.

20 I gasa baci koɓolo,

i ci sheshe ta̱ yi ta̱ a kulyaꞋa IlikulyaꞋa yu Ukocishi,

amma ta ta na nannai ba.

21 Na lo ɗaɗa ayin a na baci yi a kulyaꞋa,

i tsu kpa̱ta̱ra̱ ta̱,

ali uma o yoku kpamu o okpo n kambulu.

A̱ɗa̱ vi yoku ali i soꞋo ma maka ɗa̱!

22 Vi n ilikulyaꞋa a kpaꞋa ku nu i na va kulyaꞋa ka̱ta̱ vu soꞋo ba?

Vu goyo ta̱ a̱Ꞌisa̱ aza e Yesu?

I zuwa ta̱ aza a unambi o okpo n wono?

Yi ɗa̱i i gaꞋin n dana ɗa̱?

I ciga ta̱ n cikpa ɗa̱ adama a na yi a kuyaꞋansa nannai?

N cikpa ɗa̱ ba,

ko kenu!

23 Vuzagbayin ɗa u nekei mu kuyotsongusu ku na n nekei ɗa̱:

A kayin ka na e dengei Vuzagbayin Yesu,

u ɗikai burodi va.

24 U cikpai Ka̱shile adama a vu ɗa.

Ɗa u wansai vu ɗa awanshi-awanshi ɗa u danai,

“Na va ikyamba i va̱ i ɗa i na e nekei adama a̱ ɗa̱.

YaꞋin ili i nam pa ayin tutu adama a kuciɓasa nu mpa.”

25 Ta kpamu nannai,

ana a lyaꞋi tsuwaꞋa,

u ɗikai matan,

u danai,

“Matan ma nam pa uzuwakpani u savu u Ka̱shile u ɗa,

uzuwakpani u nam pa mayun ɗa wi a̱ ubuta̱ wu mpasa n va̱.

Ayin a na baci de dem i soꞋi mataꞋan ma nam pa,

i yaꞋan nannai ciya̱ i ciɓasa nu mpa.”

26 Ayin a na baci de dem i takumai burodi vu nam pa,

ɗa kpamu i soꞋi mataꞋan ma nam pa,

yi ta̱ a kudana mayun Kishi u kuwa̱ ta̱.

LyaꞋi kelime n kudana uma nannai ali sai ayin a na u kubono.

27 Vuza ɗa̱ vi yoku u takuma baci burodi vu Vuzagbayin ɗa kpamu u soꞋi mataꞋan ma̱ ni n uye u na u kpa̱ɗa̱i kucikpa yi,

u yaꞋan ta̱ unushi n ikyamba koɓolo nu mpasa n Vuzagbayin.

28 I ɗaɗa i zuwai kafu vu takuma burodi ko vu soꞋo mataꞋan ma,

vu kondo ka̱ci ka̱ nu mayin.

29 Adama a na vi yeve baci ili i na ikyamba i Vuzagbayin yi a kudana ba,

ɗa vu takumai burodi ko vu soꞋi mataꞋan ma babu na vi yevei tsu na ma mi,

vu zuwaka ta̱ ka̱ci ka̱ nu afada.

30 I ɗaɗa i zuwai ɗa a̱ɗa̱ vi yoku n a̱bunda̱i i ci yaꞋan mɓa̱la̱ ko yo okpo babu utsura,

aza o yoku ali a̱ kuwa̱ ta̱.

31 Ci baci a kufuɗa ku kondo ka̱ci ka̱ tsu kafu tsu takuma ko tsu soꞋo,

Ka̱shile ka kuyaꞋanka tsu afada ba.

32 Amma Vuzagbayin u ci yaꞋanka tsu ta̱ afada,

ka̱ta̱ u lapula tsu,

adama a na u kpa̱ɗa̱ kilukpa̱ tsu koɓolo n uma a aduniyan a kanna ku uteku.

33 Adama a nannai uma a̱ va̱,

i gasa baci kulyaꞋa IlikulyaꞋa yu Ukocishi,

i vana itoku i ɗa̱ biꞋi.

34 A̱ɗa̱ vi yoku yi baci a kupana kambulu,

i lyaꞋa biꞋi ilikulyaꞋa a kpaꞋa,

adama a na ko yi a kulyaꞋa koɓolo,

Ka̱shile ka kuyaꞋanka ɗa̱ afada ba.

N kudana ɗa̱ ta̱ tsu na i kuyaꞋan n ili i na i buwai ayin a na baci n ta̱wa̱i.