6 “Ana kayin ke pecei vuza yoku u salai,

‘Vuza vi yolo i savu wi ta̱ lo a̱ kuta̱wa̱!

Ta̱wa̱i i gasa n a̱yi!’

7 “Ɗa nkere ma ra̱ka̱ n ɗenga̱i ɗa o goɗumoi nkuni n le.

8 Ɗaɗa alau a a danai aza a ugboji a,

‘NeꞋi tsu maniꞋin ma̱ ɗa̱ kenu,

adama a na nkuni n tsu mi ta̱ ɗevu n kukima̱.’

9 “Amma ɗa aza a ugboji a a̱ ushuki,

‘Ci m maniꞋin ma na ma kuyawa tsu ra̱ka̱ ba.

Banai a̱ ubuta̱ wa aza a na e ci denge maniꞋin,

ka̱ta̱ i tsulaka ka̱ci ka̱ ɗa̱.’

10 “A ayin a na alau e nkere a tawun a nan lo a banai kutsulaka ka̱ci ke le maniꞋin,

ɗa vuza vi yolo i savu va u yawai.

Nkere n na mi ufoɓushi a uwai a kpaꞋa ka koɓolo n vuza vi yolo vu savu va adama a na a yaꞋan kuyongo ku yolo ka.

Ayin a nan lo e yevei a̱ ɓa̱ya̱ngi utsutsu wa.

11 “A kubana megeshe,

ɗa nkere n na m buwai va n yawai ɗa e ɗekei,

‘Vuzagbayin!

Ɓa̱yuwa̱ka̱ tsu utsutsu wa!’

12 “Amma ɗa vuza vi yolo vu savu va wu ushuki,

‘N dana ta̱ mayun,

n yeve ko a̱ɗa̱ ɗa anan ya ba.’ ”

13 Ɗaɗa Yesu u danai,

“Adama a nannai yongoi ufoɓushi ayin tutu,

adama a na i yeve kanna ko ayin a na ili i nam pa ra̱ka̱ i kuyaꞋan ba.”

14 Ɗaɗa Yesu u dansai agisana a nam pa,

“A ayin a nan lo tsugono tsu Ka̱shile ci ta̱ a kuyaꞋan tsu nam pa:

Vuma vi yoku ɗa vu na wi a kuyaꞋan nwalu a kubana a̱ ubuta̱ u yoku.

Kafu u laza,

ɗa u ɗekei agbashi a̱ ni ɗa u danai le a̱ la̱na̱ ucanuku u ni ayin a na baci u lazai.

15 Vuma va u yeve ta̱ ili i na yaba dem vi le u kufuɗa wa yaꞋan.

Ɗa u nekei kagbashi ka iyain ikebe ya azurufa i gbagbaꞋin^a i tawun,

kagbashi ke ire i re,

ɗa u nekei kagbashi ka tatsu feu vi te.

Ɗa u ɗenga̱i u lazai.

16 GogoꞋo va lo an vuma va u lazai,

kagbashi ka na ki n ikebe i tawun ya u yaꞋin tsulaga n i ɗa,

ɗa u ciya̱i ikebe i tawun i yoku i uwai ni kpamu.

17 Kagbashi ka na ki n ikebe i re ya ka yaꞋin feu nannai n ikebe i ni ɗa u ciya̱i ikebe i re i yoku i uwai ni feu.

18 Amma kagbashi ka na ki n vikebe vi te va u ga̱va̱i kpenle ɗa u sokongi vu ɗa a iɗika.

19 “Ana ayin a yaꞋin ka̱u,

ɗa vuzagbayin u bonoi a kpaꞋa,

ɗa we ecei agbashi a ili i na a yaꞋin n ikebe ni.

20 Kagbashi ka na e nekei ikebe i tawun ya u tuka̱i n i ɗa koɓolo n i tawun i yoku i na i uwai ni.

U danai,

‘Vuzagbayin,

vi neke mu ta̱ ikebe i tawun,

n ciya̱ ta̱ i tawun i yoku i na i uwai mu.’

21 “Ɗa vuzagbayin va wu ushuki,

‘Vi yaꞋan ta̱ tsu na u yotsoi.

Avu kagbashi ka̱ ma̱riki kaꞋa ka na ka panakai mu.

Adama a na vi yaꞋin nahannai n ili i kenu,

n kuzuwa wu ta̱ vi inda ili i gbagbaꞋin ka̱u.

Ta̱wa̱ vi yaꞋan ma̱za̱nga̱ nu mpa.’

22 “Vuza na kpamu e nekei ikebe i re ya u uwai ɗa u danai,

‘Vuzagbayin,

vu neke mu ta̱ ikebe i re,

n ciya̱ ta̱ i re i yoku i na i uwai mu.’

23 “Ɗa vuzagbayin va wu ushuki,

‘Vi yaꞋan ta̱ tsu na u yotsoi.

Avu kagbashi ka̱ ma̱riki kaꞋa ka na ka panakai mu.

Adama a na vi yaꞋin nahannai n ili i kenu,

n kuzuwa wu ta̱ vi inda ili i gbagbaꞋin ka̱u.

Ta̱wa̱ vi yaꞋan ma̱za̱nga̱ nu mpa.’

24 “Ɗaɗa kagbashi ka na e nekei vikebe vi te va u uwai ɗa u danai,

‘Vuzagbayin,

n yeve ta̱ a na avu vuma ɗa vu na vi canai ba.

Avu vi ta̱ an vuza na u tsu kyaꞋa a kashina ka na vuza yoku kau u ca̱Ꞌi.

25 Ɗaɗa m panai wovon ɗa m banai n sokongi vikebe vu nu a iɗika.

Isa vikebe va.’

26 “Ɗa vuzagbayin va wu ushuki,

‘Avu kagbashi ka gbani-gbani kaꞋa korogo kaꞋa kpamu vi!

Vu danai vi yeve ta̱ a na mpa n tsu kyaꞋa a kashina ka na vuza yoku kau u ca̱Ꞌi.

27 Wishi u laꞋa n kugaꞋan vu zuwaka mu vikebe vu va̱ a kpakikebe,

adama a na n ciya̱ ili i na i kuꞋuwa mu.’

28 “Ɗa vuzagbayin va u danai agbashi a̱ ni a na a buwai,

‘Isai vikebe va u kagbashi ka nan lo ka,

ka̱ta̱ i neke kagbashi ka na ki n ikebe kupa va.

29 Vuza na baci u yaꞋin ili mayin n ili i na wi n i ɗa,

Ka̱shile ki ta̱ o kudoku yi i yoku,

ka̱ta̱ u ciya̱ ili n a̱bunda̱i.

Amma vuza na wi n ili ba,

Ka̱shile ki ta̱ a kisa ko kenu i na wi n i ɗa wa̱ ni.

30 Gogo na taɗuki kagbashi ku unambi ka̱ ma̱riki ka nan lo pulai,

a̱ ubuta̱ u ka̱yimbi u na uma a̱ kushika̱ n a lumamgbanai ngaꞋan n atakaci.’ ”

31 Yesu u lyaꞋi kelime n kuyotsongusu,

“Maku ma Vuma mi ta̱ o kubono kpamu n tsugbayin ci ni,

n alingata a̱ ni ra̱ka̱.

Wi ta̱ o kokpo Mogono ka̱ta̱ u da̱sa̱ngu a kakuba ko tsugono ka gbayin ka̱ ni.

32 Iɗika ya aduniyan kakau yi ta̱ o kuɓolongu wa̱ ni,

a̱yi wi ta̱ e kupecuku le ugboku u re uteku u na maguɓi me ci pecuku nkyon nu nraɗika.

33 Wi ta̱ a kuzuwa nkyon e kukiye ku usingai ku ni,

nraɗika tamkpamu a̱ ugula̱ u ni.

34 “Ka̱ta̱ Mogono ma ma dana uma a na i e kukiye ku usingai ku ni,

‘Ta̱wa̱i,

Esheku a̱ va̱ e neke ɗa̱ ta̱ ɗe una̱singai u ni.

Isai tsugono tsu na Ka̱shile ko foɓusokoi ɗa̱ ali n ayin a na u yaꞋin aduniyan.

35 Ana mi n kambulu,

i neke mu ta̱ ilikulyaꞋa.

Ana mi n kakuli,

i neke mu ta̱ ili i kusoꞋo.

Ana mi o limoci,

i rabasa mu ta̱.

36 Ana mi koshomboɗi,

i neke mu ta̱ ili i na n ukai.

Ana mi nu mbanaki,

i la̱na̱ mu ta̱.

Ana kpamu mi a̱ kunu ku ugbashi,

i bana ta̱ ɗa ye ene mu.’

37 “Ka̱ta̱ ele uma a̱ usuɓi a a̱ ushuku,

‘Vuzavaguɗu,

wana ɗai a̱tsu ce enei nu a kambulu ɗa ci nekei nu tsuwaꞋa,

ko n kakuli ɗa ci nekei nu ili i kusoꞋo?

38 Wana ɗai a̱tsu ce enei nu endeꞋen daꞋin m kpaꞋa,

ɗa tsu ukai nu a kpaꞋa ku tsu?

Wana ɗai a̱tsu ce enei nu koshomboɗi,

ɗa ci nekei nu ntogu?

39 Wana ɗai a̱tsu ce enei nu a mbanaki ko a̱ kunu ku ugbashi,

ɗa tsu la̱na̱i nu?’

40 “Mogono ma mi ta̱ a̱ kushuku,

‘Ayin a na baci de dem i yaꞋankai uma a̱ va̱ ili i nam pa,

ko nini ɗai ye enei adanshi uma a ili i ma̱riki ɗa i ba,

mpa ɗa i yaꞋankai.’

41 “Ka̱ta̱ Mogono ma dana aza a na i a̱ ugula̱ u ni,

‘Ɗenga̱i mu lo,

a̱ɗa̱ aza a na Ka̱shile ka yaꞋankai una̱ u wuya.

Banai ka̱ta̱ i uwa a asuvu a akina a babu uteku a na u foɓusokoi Kalijani n alingata a̱ ni!

42 Mi ta̱ a kambulu,

amma i neke mu ilikulyaꞋa ba.

Mi ta̱ kpamu n kakuli,

amma i neke mu ili i na n kusoꞋo ba.

43 Mi ishi ta̱ komoci,

amma i rabasa mu ba,

ɗa kpamu mi ishi koshomboɗi,

amma ko ili i kuꞋuka i neke mu ba.

Mi ishi ta̱ nu mbanaki koɓolo n ugbashi,

amma i la̱na̱ mu ba.’

44 “Ka̱ta̱ uma a nan lo a a̱ ushuku,

‘Vuzavaguɗu,

wana ɗai tsu kpa̱ɗa̱i kuɓa̱nka̱ wu ana vi a kambulu,

ko a kakuli,

ko o limoci,

ko koshomboɗi,

ko a mbanaki,

ko a̱ kunu ku ugbashi?’

45 “Mogono ma mi ta̱ a kudana le,

‘Ayin a na baci de dem i kpa̱ɗa̱i kuɓa̱nka̱ uma a̱ va̱,

ko nini ɗai ye enei adanshi aza a̱ ma̱riki a ɗa i ba,

mpa ɗa i kpa̱ɗa̱i kuyaꞋanka.’

46 “Ayin a nan lo uma a nam pa a kuꞋuwa ta̱ atakaci a babu uteku,

amma uma a usuɓi a kuꞋuwa ta̱ a̱ ubuta̱ u na o kuyongo n wuma u babu uteku.”