Saꞌa ni kuu kivi ni kâku Jesucristo ma
2
Te ni yo kuu ja kivi yukan,
te tee tátnuni ñuu Roma ma tee kúu Augusto ma,
ni tatnuni de ja jin ndakan i kuenda nuu ndaka ñayii ñuu ñayivi a.
2 Te kivi ni yo kuu Cirenio ma tee tátnuni nuu ñayii Siria ma kúu ja xinañuꞌu ni ka ndakan de kuenda na saa ñayii iyo ñuu ma.
3 Ndaka ñayii ma,
jin nukoso tnuni maa maa i ñuu i ma.
4 Chukan kúu ja José ma,
ni kee i ñuu Nazaret ma ja iyo i ñuu Galilea ma,
te kuaꞌan i ñuu Belén ma ja iyo tna i ñuu Judea ma,
nuu ni kâku rey David ma,
vaa José ma chi saꞌya tata David ma kúu i.
5 Ni jaꞌan i yukan ni jan nukoso tnuni i jiꞌin María ma suchi tnandaꞌa jiꞌin i ma,
te jâ ñuꞌu saꞌya i ma.
6 Sani te nani ka iyo i ñuu Belén ma,
te ni kejaꞌa María ma ja káku saꞌya i ma.
7 Te yukan ni kâku lulu i suchi xinañuꞌu ma,
te ni chutuu i ya saꞌma.
Vaa ñatuu nde nune‑ka ja jin ndoo i ma,
te chukan kúu ja ni jakin tuu i ya in nuu ka ñuꞌu kiti ma.
Ni ka kenda koo ángel nuu tee ka jito ndikachi ma
8 Te jakuaa ma ka iyo tee ka jito ndikachi de ma ichi yuku ma yatni ñuu Belén ma.
9 Sani te ni kenda in ángel Suꞌsi ma,
te jayiñuꞌu Suꞌsi ma ni jandute nuu ka iyo de ma,
te ni ka yuꞌu xeen de.
10 Kovaa ángel ma,
jiñaꞌa i:
―Máko jin koyuꞌu ni.
Vee sa kaxtnuꞌu sa in tnuꞌu vii tnuꞌu vaꞌa,
te saꞌa i ja jin kusii ini ndaka ñayii ma:
11 Ñuu David ma,
vitna ni kâku in iya saꞌa ja jin kaku ni nuu ja uꞌvi ma.
Suu ya kúu Cristo ma,
Iya Tátnuni ma.
12 Te saꞌa jin ndakuni ni ya:
Vaa jin ndaniꞌi ni lulu ma,
ja ñutuu ya saꞌma,
te kátuu ya nuu ka ñuꞌu kiti ma ―kúu i jiñaꞌa i.
13 Te ora yukan ni ka kenda koo kuaꞌa‑ka ángel ka iyo andivi ma nuu iyo in ángel ma,
te ka jita i nuu Suꞌsi ma:
14 ¡Jayiñuꞌu kóo nuu Suꞌsi ma onde sukun ma!
¡Te nuu ñuꞌú a jín koo mani ñayii kunimani maa Suꞌsi ma!
15 Nuu ni ka nda koo ángel ma andivi ma,
te tee ka jito ndikachi ma,
ka kaꞌan ndi‑in ndi‑in de:
―Jín koo o onde ñuu Belén ma,
te jín kuni o nawa ni kuu ja ni kaxtnuꞌu Suꞌsi ma ―ka kuu de ka kaꞌan de.
16 Te yachi yachi ni jan koo de,
te ni ka ndaniꞌi de María ma jiꞌin José ma jiꞌin lulu ma,
kátuu ya nuu ka ñuꞌu kiti ma.
17 Te nuu ni ka jini de ya ma,
te ni ka jakondee de ka ndakani de ja ni jiñaꞌa ángel ma siki suchi luluu ma.
18 Te ndaka ñayii ni ka jinisoꞌo ma,
ni ka saꞌvi‑nka ini i ja ka kaꞌan tee ka jito ndikachi ma.
19 Kovaa María ma,
ndaka ja yikuu kúu ma távaꞌa i ini anua i ma,
te jani káꞌvi ini i.
20 Te tee ka jito ndikachi de ma,
ni ka ndakokuiñi de,
te ka ndachiñuꞌu de Suꞌsi ma ja ndaka ja ni ka jini de ma te ni ka jinisoꞌo de ma,
ndaka ni yo kuu sukan ni kaꞌan ángel ma.
21 Nuu una kii ma,
te ni ka chitnuni i lulu ma,
te ni ka xnani i ya Jesús,
sukan ni jiñaꞌa ángel ma onde xiꞌna‑ka sana jakun‑nee ya chii siꞌi ya ma.
Ni jan koo yuva Jesús ma jiꞌin siꞌi ya ma ini veñuꞌu kaꞌnu ma ja jin ndakuaꞌa de ya nuu Iya Tátnuni ma
22 Nuu ni kenda kivi ja jin koo María ma jiꞌin José ma ñuu Jerusalén ma ja jin nduvii ña sukan káꞌan tnuꞌu ni tatnuni Suꞌsi ma nuu Moisés ma,
te ni jan koo ña jiꞌin ya,
sukan‑vaꞌa jin ndakuaꞌa ña in kiti nuu Iya Tátnuni ma,
te jin ndakuaꞌa ña Jesús ma nuu maa Iya Tátnuni ma.
23 Sukan ni ka saꞌa ña jiꞌin de,
vaa sukan káꞌan tutu ndee tnuꞌu ni tatnuni ya nuu Moisés ma:
“Ndaka suchi xinañuꞌu suchi yii ma,
jin ndakuaꞌa yuva i ma i nuu Iya Tátnuni ma,
vaa kuenda maa ya ko kuu i.”
24 Ni jan koo ña jiꞌin de,
te ni ka jaꞌmi ña kiti nuu Suꞌsi ma,
sukan káꞌan tnuꞌu ni tatnuni ya nuu Moisés ma,
ja jin kaꞌmi i uu ndivi xi uu sata.
25 Te kivi yukan iyo in tee nani Simeón ñuu Jerusalén ma,
in tee ni yo saꞌa sukan játna ini Suꞌsi ma,
te ni yo ndachiñuꞌu de ya.
Ndetu de ja ndakaꞌan‑mani Suꞌsi ma ñuu Israel ma.
Te ûni iyo ndija Xtumani Ndios ma jiꞌin Simeón ma.
26 Vaa ni skuiso Xtumani Ndios ma ja ma kûu de chi onde kuni de Cristo iya tetniñu maa Iya Tátnuni ma.
27 Maa Xtumani Ndios ma ni saꞌa ja Simeón ma,
ni jaꞌan de onde veñuꞌu kaꞌnu ma.
Te ni ka kivi koo José ma jiꞌin María ma jiꞌin Jesús ma,
sukan‑vaꞌa jin saꞌa de sukan tátnuni tnuꞌu ni kaꞌan Moisés ma.
28 Te Simeón ma,
ni kanundee de ya,
te ni ndachiñuꞌu de Suꞌsi ma,
jiñaꞌa de:
29 ―Vitna vi,
Iya Tátnuni,
jâ kuu ndakuan‑taꞌvi ni nuu sa
ja jâ ni yo jinukuechi sa nuu ni,
te ndatatu sa,
te kúsii ini sa,
sukan ni skuiso ni nuu sa a.
30 Vaa jâ ni jini sa naxe jin ndaniꞌi taꞌvi ñayii ñuu ñayivi a,
31 vaa yaꞌa iyo iya ni satuꞌva ni ja jin kuni ndaka ñayii ñuu ñayivi a.
32 Te suu ya kúu ñuꞌu ndaxtnuu nuu ndaka‑ka ñayii ñuu ñayivi a,
ja jin jakuꞌni ini i.
Te ja maa ya,
te jayiñuꞌu ko kuu ñuu Israel ya
―kúu de jiñaꞌa de.
33 Te José ma jiꞌin siꞌi ya María ma,
ni ka saꞌvi‑nka ini de ja ni ka jinisoꞌo de ja káꞌan Simeón ma ja kuu ya ma.
34 Te Simeón ma,
ni kaꞌan de ja vaꞌa ja jin kuu ña,
te jiñaꞌa de siꞌi ya María ma:
―Te iya yaꞌa,
iyo ya ja saꞌa ya ja kuaꞌa ñayii Israel ya,
jin kotuu i xi jin ndakoo i.
Te maa ya ko kuu seña,
te kuaꞌa ñayii,
jin saxiko i ya,
35 sukan‑vaꞌa jin ndatuu ja ka jani ini anua ndaka ñayii a.
Te kuenda tnuꞌu ja in yuchi xen‑xeen yanduu ini anua maa ni a ―kúu de jiñaꞌa de.
36 Te suni iyo in ñaꞌa nani Ana.
Ñaꞌa ni yo ndakaxtnuꞌu tnuꞌu ni yo waꞌa Suꞌsi ma kúu ña,
te sasiꞌi Fanuel ma saꞌya tata Aser ma kúu ña.
Te in ñaꞌa nijaꞌnu kúu ña.
Nuu ni tnandaꞌa ña ma,
te ni iyo ña jiꞌin yii ña ma uja‑ni kuiya,
37 te ja iyo kuun xiko kuun (84) kuiya ja ni jiꞌi yii ña ma.
Te ni ndoo ña,
te ñatuu nama ni yo kee ña ini veñuꞌu ma,
suꞌva ni yo jinukuechi ña nduu ñuu nuu Iya Tátnuni ma,
te ndimaa ni yo jikan‑taꞌvi ña,
te ni yo iyo ndite ña.
38 Te maa ora yukan,
te ni kenda Ana ma,
te ni ndakuan‑taꞌvi ña nuu Suꞌsi ma,
te ni kaꞌan ña na in kúu lulu ma nuu ndaka ñayii ñuu Jerusalén ma ja ka ndetu i ja saꞌa Suꞌsi ma ja jin ndayaa i nuu ja uꞌvi ma.
Nuu ni ka ndakokuiñi de jiꞌin Jesús ma ñuu Nazaret ma
39 Nuu ni jinu ni ka ndakuan‑taꞌvi José ma jiꞌin María ma nuu Suꞌsi ma te ni ka saꞌa de sukan káꞌan tnuꞌu ni tatnuni Iya Tátnuni ma,
te ni ka ndakokuiñi de jiꞌin Jesús ma ñuu Galilea ma onde ñuu Nazaret ma,
ñuu maa de ma.
40 Te ve kuaꞌnu ya,
te ve kundee ve kundatnu ya,
te ve kundichi ya,
te tnuꞌu vii tnuꞌu mani Suꞌsi ma iyo jiꞌin ya.
Luluu-ni Jesús ma, te ni kivi ya ini veñuꞌu kaꞌnu ma
41 Te José ma jiꞌin María ma,
ni yo jan koo de ndaka kuiya Viko Pascua ñuu Jerusalén ma.
42 Te nuu yiꞌi Jesús ma uxi uu kuiya ma,
ni jan koo de jiꞌin ya ñuu Jerusalén ma,
sukan ka saꞌa i viko yukan ma.
43 Kivi nuu ni jinu ma,
te ni ka ndakokuiñi de veꞌe de ma,
te Jesús ma,
ni kendoo ya ñuu Jerusalén ma,
te ñatuu ni ka jini yuva ya ma,
44 te ka jani ini de ja Jesús ma,
kuan noꞌo ya neꞌun ñayii ma.
Nuu jâ ni kuu in kivi ja ka jika de ma,
sani te ni ka ndanduku de ya neꞌun tnaꞌa de ma,
jiꞌin ñayii ka jini de ma.
45 Te ñatuu ni ka ndaniꞌi de ya,
te ni ka ndakokuiñi de ñuu Jerusalén ma,
sukan‑vaꞌa jin ndanduku de ya yukan.
46 Te nuu uni kivi ma,
saa ni ka ndaniꞌi de ya,
núkoo ya neꞌun tee ka skuaꞌa tnuꞌu ni kaxtnuꞌu Moisés ma,
ninisoꞌo ya ja ka kaꞌan de ma,
te jikan‑tnuꞌu ya de.
47 Te ndaka ñayii ka ninisoꞌo ma,
ni ka saꞌvi‑nka ini i ja jini xeen ya ma te ndaka ndákoneꞌe ya.
48 Nuu ni ka jini yuva ya ma sukan saꞌa ya ma,
te ni ka saꞌvi‑nka ini de,
te siꞌi ya ma,
jiñaꞌa ña:
―Saꞌya maa ri,
¿navaꞌa ni saꞌa ro saꞌa?
Yuva ro a jiꞌin ruꞌu ya,
ka ndanduku ñaꞌa ri,
te ka ndi ini xeen ri ―kúu ña jiñaꞌa ña.
49 Jesús ma,
ni ndakoneꞌe ya:
―¿Navaꞌa ka ndanduku ñaꞌa ni?
¿Ñatuu ka jini ni ja jiniñuꞌu ja satniñu sa tniñu iyo nuu Yuva sa ma?
―kúu ya jiñaꞌa ya.
50 Kovaa masu ni ka jakuꞌni ini de ja ni kaꞌan ya ma.
51 Sani te kuan noꞌo ya jiꞌin de ñuu Nazaret ma,
te ni yo kandija ya ndaka nuu yuva ya ma.
Te siꞌi ya ma,
ni yo tavaꞌa ña ini anua ña ma ndaka nawa kúu ma.
52 Te Jesús ma,
ve kundichi‑ka ya,
te ve kuaꞌnu‑ka ya,
te ja saꞌa ya ma játna ini Suꞌsi ma te ka jatnuꞌu ini ñaꞌa ñayii ma.