Juan tee skuandute ñayii ma, ni kaxtnuꞌu de sukan kenda Jesucristo ma
3
Te kuiya ku‑jaꞌun ja tátnuni tee kúu emperador nani Tiberio ma ñuu Roma ma,
te Poncio Pilato ma tátnuni ñuu Judea ma,
te Herodes tetrarca ma tátnuni ñuu Galilea ma,
te ñani de Felipe tetrarca ma tátnuni ñuu Iturea ma jiꞌin Traconite ma,
te tee nani Lisanias ma tátnuni ñuu Abilinia ma,
2 te Anás ma jiꞌin Caifás ma ka kuu tee ka tatnuni nuu sutu ma.
Te kivi yukan ni kaꞌan Suꞌsi ma nuu Juan saꞌya Zacarías ma,
onde nuu masu nawa iyo kuiti ma.
3 Te Juan ma,
kuaꞌan de ndaka ichi yuꞌu yute Jordán ma,
jiñaꞌa de ñayii ma ja na jin ndakani jín ndakaꞌvi ini i nuu Suꞌsi ma,
te jín kuandute i,
sukan‑vaꞌa Suꞌsi ma,
ndasakanu ini ya kuechi i ma.
4 Te ja sukan ni yo saꞌa de ma,
te ni kuu sukan ni tee Isaías ma tee ni yo ndakaxtnuꞌu tnuꞌu ni yo waꞌa Suꞌsi ma,
ja káꞌan saꞌa ma:
“In tee káyuꞌu onde nuu masu nawa iyo kuiti ma:
Jin satuꞌva ni ichi Iya Tátnuni ma,
jin ndakune ni in ichi ndaa.
5 Ndaka nduꞌva kunu ma,
jin ndachitu i,
te ndaka yuku ma jiꞌin tinduu ma,
jin ndundaa i,
te ichi kuaꞌan yakua kuaꞌan yoꞌo ma,
jin ndundaa i,
6 te ndaka ñayii ñuu ñayivi a jin kuni naxe saꞌa Suꞌsi ma ja jin kaku i ma.”
7 Nuu ni ka kenda koo ñayii ma sukan‑vaꞌa skuandute ñaꞌa Juan ma,
te jiñaꞌa de:
―¡Sukan ka kuu koo ma ka kuu ni!
¿Na in ni kaxtnuꞌu nuu ni ja jin kaku ni ja ma xndoꞌo xneni ñaꞌa Suꞌsi ma?
8 Jin ko saꞌa ni ja vaꞌa,
sukan‑vaꞌa konaꞌa ndija ja ni ka ndakani,
ni ka ndakaꞌvi ini ni te ni ka ndakokuiñi ni nuu Suꞌsi ma.
Te másu ko jin kaꞌan ni:
“¡Yoꞌo chi jin ndaniꞌi taꞌvi o,
vaa saꞌya tata Abraham ma ka kuu o!”
Vaa ja ndaa káꞌan sa ja visi yuu yaꞌa chi kuu ndasaꞌa Suꞌsi ma saꞌya tata Abraham ma.
9 Te káꞌan sa ja jâ iyo kaa ma xuu yutnu ma,
ja kaꞌnde i onde yoꞌo tnu ma.
Ndaka yutnu masu kúun javixi vaꞌa ma,
jin teꞌnde tnu,
te jin koo tnu nuu ñuꞌu ma,
te jin kayu jin koko tnu ―kúu de jiñaꞌa de.
10 Sani te ñayii ma,
ni ka jikan‑tnuꞌu i:
―¿Te nú sukan,
nawa jin saꞌa sa?
―ka kuu i ka jiñaꞌa i.
11 Juan ma,
ni ndakoneꞌe de:
―Nú nde ni nevaꞌa uu muda saꞌma ni,
jin kuaꞌa ni in ñayii ñatuu nawa nevaꞌa i ma,
te nde ni nevaꞌa ja jin kaa ni,
jin kuaꞌa ni vala ñayii ñatuu nawa ka nevaꞌa i ja jin kaa i ma ―kúu de jiñaꞌa de.
12 Suni ni ka jan tuꞌva ñaꞌa tee ka ndakeꞌen yaꞌvi ja ka xiko ñayii ma,
sukan‑vaꞌa skuandute ñaꞌa Juan ma,
te ni ka jikan‑tnuꞌu de:
―Teskuaꞌa,
¿nawa jin saꞌa saña?
―ka kuu de ka jiñaꞌa de.
13 Juan ma,
jiñaꞌa de:
―Máko jin ndakeꞌen yaꞌvi kuaꞌa‑ka ni ja sukan iyo ja jin ndakeꞌen yaꞌvi ni ma ―kúu de jiñaꞌa de.
14 Suni jaku tee ka kuu soldado ma,
ni ka jikan‑tnuꞌu de:
―Te saña,
¿nawa jin saꞌa sa?
―ka kuu de ka jiñaꞌa de.
Te ni ndakoneꞌe de:
―Máko jin xtandee ni nuu ni‑in ñayii ma nawa ka nevaꞌa i ma,
ni a jin xsiuꞌu ni i,
ni a jin xtekuechi ni i tnaꞌa ja masu nawa ni ka saꞌa i ma.
Jin koo sii ini ni jiꞌin ja ka keꞌen yaꞌvi ni ma‑ni ―kúu de jiñaꞌa de.
15 Te ñayii ka iyo ma,
ka ndi ini i,
te ka jikan‑tnuꞌu tnaꞌa i xi saa Juan ma kúu Cristo iya tetniñu Suꞌsi ma.
16 Kovaa Juan ma,
jiñaꞌa de nuu ndaka ñayii ma:
―Saña chi ja ndaa kúu ja skuandute ñaꞌa sa jiꞌin ndute,
kovaa kenda iya nevaꞌa‑ka tnuꞌu ndee tnuꞌu ndatnu sana saña,
kovaa ni a ñií ndijan ya ma masu kaa masu iyo sa ja ndaji sa.
Te maa ya chi skuandute ñaꞌa ya jiꞌin Xtumani Ndios ma,
nuna jin kachi ni.
Te nú ñaꞌa,
iyo ya ja chunee ñaꞌa ya nuu ñuꞌu iꞌni ndúꞌva ma.
17 Vaa yindaꞌa ya ja ndasavii ya triu ma,
te saꞌa siin ya paja ma,
te tavaꞌa ya triu ma nuu kuꞌun i ma.
Te kaꞌmi ya paja ma in nuu ñuꞌu ja masu ndaꞌva kuiti i ―kúu de jiñaꞌa de.
18 Te saꞌa jiꞌin kuaꞌa‑ka ja ni kaꞌan‑soꞌo Juan ma,
te ni kaxtnuꞌu de tnuꞌu vii tnuꞌu vaꞌa nuu ñayii ma.
19 Te suni ni ndonda de nuu Herodes tee tátnuni ma,
vaa Herodes ma,
ni ndakueka de ñaꞌa kúu Herodías ma,
ñasiꞌi ñani de Felipe ma,
te suni kuaꞌa‑ka ja uꞌvi ni yo saꞌa de ma.
20 Te Herodes ma,
ndaka ja uꞌvi ni yo saꞌa de ma,
te ni saꞌa‑ka de in‑ka ja uꞌvi,
vaa ni chinee de Juan ma vekaa ma.
Jesús ma, ni jandute ya
21 Kivi yikuu Juan ma skuandute de ndaka ñayii ma,
suni ni kenda tna Jesús ma,
te ni jandute ya.
Te nani jikan‑taꞌvi ya ma,
te ni ndanune andivi ma,
22 te sukan kaa in sata kaa Xtumani Ndios ma,
ni nuu ya,
te ni jakoxtnee ya siki Jesús ma.
Te ni ka jinisoꞌo ñayii ma ja saꞌa káꞌan Suꞌsi ma onde andivi ma:
―Roꞌo kúu Saꞌya maa ri,
te kútoo ñaꞌa ri,
te játna ini ri ja saꞌa ro a ―kúu ya jiñaꞌa ya.
Tee ka kuu tnaꞌa Jesucristo ma tee janaꞌa‑ka ma
23 Jesús ma yiꞌi ya oko uxi (30) kuiya nuu ni kejaꞌa ya satniñu ya ja ni tatnuni Suꞌsi ma.
Te ñayii ma,
ka kaꞌán i ja saꞌya José ma kúu ya,
vaa ni yo jito de ya ja ni jaꞌnu ya ma.
Te José ma ni yo kuu saꞌya Elí ma,
24 saꞌya tee ni yo kuu Matat ma,
saꞌya tee ni yo kuu Leví ma,
saꞌya tee ni yo kuu Melqui ma,
saꞌya tee ni yo kuu Jana ma,
saꞌya tee ni yo kuu José ma,
25 saꞌya tee ni yo kuu Matatías ma,
saꞌya tee ni yo kuu Amós ma,
saꞌya tee ni yo kuu Nahúm ma,
saꞌya tee ni yo kuu Esli ma,
saꞌya tee ni yo kuu Nagai ma,
26 saꞌya tee ni yo kuu Maat ma,
saꞌya tee ni yo kuu Matatías ma,
saꞌya tee ni yo kuu Semei ma,
saꞌya tee ni yo kuu Josec ma,
saꞌya tee ni yo kuu Judá ma,
27 saꞌya tee ni yo kuu Joanán ma,
saꞌya tee ni yo kuu Resa ma,
saꞌya tee ni yo kuu Zorobabel ma,
saꞌya tee ni yo kuu Salatiel ma,
saꞌya tee ni yo kuu Neri ma,
28 saꞌya tee ni yo kuu Melqui ma,
saꞌya tee ni yo kuu Adi ma,
saꞌya tee ni yo kuu Cosam ma,
saꞌya tee ni yo kuu Elmadam ma,
saꞌya tee ni yo kuu Er ma,
29 saꞌya tee ni yo kuu Josué ma,
saꞌya tee ni yo kuu Eliezer ma,
saꞌya tee ni yo kuu Jorim ma,
saꞌya tee ni yo kuu Matat ma,
30 saꞌya tee ni yo kuu Leví ma,
saꞌya tee ni yo kuu Simeón ma,
saꞌya tee ni yo kuu Judá ma,
saꞌya tee ni yo kuu José ma,
saꞌya tee ni yo kuu Jonam ma,
saꞌya tee ni yo kuu Eliaquim ma,
31 saꞌya tee ni yo kuu Melea ma,
saꞌya tee ni yo kuu Mena ma,
saꞌya tee ni yo kuu Matata ma,
saꞌya tee ni yo kuu Natán ma,
32 saꞌya tee ni yo kuu David ma,
saꞌya tee ni yo kuu Isaí ma,
saꞌya tee ni yo kuu Obed ma,
saꞌya tee ni yo kuu Booz ma,
saꞌya tee ni yo kuu Sala ma,
saꞌya tee ni yo kuu Naasón ma,
33 saꞌya tee ni yo kuu Aminadab ma,
saꞌya tee ni yo kuu Admín ma,
saꞌya tee ni yo kuu Arní ma,
saꞌya tee ni yo kuu Esrom ma,
saꞌya tee ni yo kuu Fares ma,
saꞌya tee ni yo kuu Judá ma,
34 saꞌya tee ni yo kuu Jacob ma,
saꞌya tee ni yo kuu Isaac ma,
saꞌya tee ni yo kuu Abraham ma,
saꞌya tee ni yo kuu Taré ma,
saꞌya tee ni yo kuu Nacor ma,
35 saꞌya tee ni yo kuu Serug ma,
saꞌya tee ni yo kuu Ragau ma,
saꞌya tee ni yo kuu Peleg ma,
saꞌya tee ni yo kuu Heber ma,
saꞌya tee ni yo kuu Sala ma,
36 saꞌya tee ni yo kuu Cainán ma,
saꞌya tee ni yo kuu Arfaxad ma,
saꞌya tee ni yo kuu Sem ma,
saꞌya tee ni yo kuu Noé ma,
saꞌya tee ni yo kuu Lamec ma,
37 saꞌya tee ni yo kuu Matusalén ma,
saꞌya tee ni yo kuu Enoc ma,
saꞌya tee ni yo kuu Jared ma,
saꞌya tee ni yo kuu Mahalaleel ma,
saꞌya tee ni yo kuu Cainán ma,
38 saꞌya tee ni yo kuu Enós ma,
saꞌya tee ni yo kuu Set ma,
saꞌya tee ni yo kuu Adán ma,
saꞌya maa Suꞌsi ma.