Marea Robe Maearimakia Hanona Rama Hamona ꞌAbana.
5
Hau anepakakia herekiai aꞌi koꞌabi pahihi ꞌapua,
iamo mariki hoahoanai kohinabe hinabe harainakia matoha ia hanona oi hamamu ꞌabana,
ia hau ꞌaruꞌarukia hanona uahoꞌabamuai kobaonakia,
2 babiꞌe anepakakia hanona hinamu ꞌabanai kobaonakia,
mai babiꞌe ꞌaruꞌarukia hanona haibumuai kobaonakia mai aomu beronai.
Wapu Babiꞌekia Tohakia Kateiha Harainakia.
3 Wapu babiꞌekia weiakia tiwapu toha haukia komariki ainakia.
4 Ia wapu nahuna ꞌao kupuna baika raninai,
ia kobaꞌiobi ꞌuainakia ekia kuti hoahoana tainai ekia itu haukia kateꞌima harainakia,
uahomanai hanona hamakia hinakia mai kupukia ekia ꞌimaꞌima ꞌarana katebamuena,
pokina weiana hanona Tirama aona ibanamona akana.
5 Wapu babiꞌena tohana ikupaiana nemiaho hanona ena buabeni Tirama herenai nihorotina rabi ikoinai mai mararani ikoinai nibahubaꞌari Tirama herenai baraibarai ninoiaina.
6 Ia wapu babiꞌena weiana hauanina ena aonamo niraona apaꞌuana hanona hauaniai nimauri ia aubai aba eꞌari.
7 Aꞌikakauma haukia herekiai ꞌabi neiakia kobenakia katekaꞌai,
weiana herekiai beho ha aꞌi temetabu ahina marikina.
8 Weiana maearima ha hatiaꞌana ꞌao ena itu haukia tohakia baraibarai ha aꞌi nibenakia hanona aꞌikakauma babaina nebuniaina,
maearima uahomana hauna hanona ekiꞌa kiꞌa baha ba maearima weiana aꞌi niaꞌikakauma hauna.
9 Atarere pukanai wapu atakia aꞌi katererenakia keaomo ekia rama ihaukia imabui harauhaea abiranai,
haeamona atawakia hamokia tewapu ainakia babiꞌekia mo atakia katererenakia,
10 haeamona babiꞌe haꞌiobi haraina ena mauri enamo,
abomo nahuna neꞌima harainakia,
aru ꞌabaea haukia niaꞌi taea harainakia ena ituai,
aꞌikakauma haukia taꞌarakia niaꞌi,
baika ekia aroꞌariai ebarainakia,
mai aka namokia haeaihaeai ikoikiai aokiai niaꞌituri babiꞌena.
11 Iamo wapu babiꞌekia ꞌaruꞌarukia hanona atakia atarere pukanai aꞌi korerenakia,
pokina aokia hawainibe kateraonana raninai Keriso aba katereana ba katehawainibe.
12 Weiana ia hanona kipokia Tirama ena bakai ꞌekanai katetoto pokina Tirama herenai ekia ꞌabiꞌuai koriꞌuaina weiana aꞌi katehawainibe mue hauna tekabena.
13 Ia hanona tiꞌaboro tiao itu ha haeamona itu ha ai tikaraꞌau,
ekia ꞌaboro mo ahaꞌi ia ṯeꞌuahi ꞌuahi mai maearima haeai ekia aka aokiai titoto,
haeamona ꞌabi aꞌi patehina haukia ṯehinanakia.
14 Ua buonai au nanuatae wapu ꞌaruꞌarukia hanona katehawainibe nahukia kateba ramanakia kipokia ekia itu kateꞌimanakia.
Weiana ꞌou haukia kateꞌabi kiꞌa herekai hanona taearana keahaꞌi.
15 Wapu baika hanona aꞌikakauma aba tehabona teao Satani murinai teꞌau.
16 Aꞌikakauma babiꞌena ha ena ituai wapu baika ṯemiaho raninai ia mehore wapu weiakia mebarainakia,
ia Tirama ena marea maearimakia aꞌi kebaroꞌarinakia,
weianai Tirama ena marea maearimakia katehore wapu tohakia weiakia ikupaiakia ṯemiaho haukia katebarainakia.
Tirama Ena Aka Tihauaro ainakia Haukia Katomariki ainakia.
17 Tirama ena marea kiro haukia weiakia maearima herekiai ꞌuai akana namona tibabaina haukia katomariki ainakia.
Ba weiakia aka tihauaro aina Tirama ena ꞌabi ṯeiroro aina mai tibamarere aina haukia hanona katomarikiai apaꞌuanakia.
18 Puka robenai eꞌabi,
“Poromakau witi ibaꞌitiꞌitina
akana nibabaina aonai pinana
aꞌi kobiri abuna,”
Deu 25.4
haeamona
“Aka hauna ꞌarana keaꞌina
hanona ebero.” Lk 10.7
19 Weiana hau ha Tirama ena marea poki hauna ena beho ꞌabina nehina hanona aiana aꞌi koaꞌi taeana,
keaomo maearima rua ꞌao aihau katebatohana hanona aiakia koaꞌi taeana.
20 Ba marea poki hauna ha kiꞌa ebabai toha raninai mako wairanai kobatana ba marea poki haukia baika ihaiha neiana kateihana hanona katetaꞌu.
21 Tirama mai Keriso Iesu mai aneru robekia wairakiai au oi nahina beniꞌo,
aka neiakia ikoikiai robakia ahu haukia kokaꞌai harainakia,
maearima ikoikiai herekiai babai ihobona kobabaina ia tai haꞌi kotaina.
Kipomu Koꞌimaꞌima Harainiꞌo.
22 Koraona harai ꞌuaina ba imamu hau ha ahanai kohaoꞌau Obiapaka ena aka kebabaina raninai baika ekia babai kiꞌa aokiai aꞌi kototo.
Kipomu koꞌima harainiꞌo emu mauri aꞌi keꞌopu Tirama wairanai.
23 Bei ꞌaki mo aꞌi koinu,
ia bine beina papana koinu nuamu kebaraina pokina emu inawa inawa paunai.
24 Maearima baika ekia kiꞌa hanona temahanai harai kiꞌa baha nahaihanakia,
kiꞌa weiana hanona keaoai ꞌuainakia bakai ꞌekanai,
iamo baika ekia kiꞌa hanona muriai aba katewaira tina.
25 Ihobonai mo maearima babai namokia tibabai hanona temahanai harai kiꞌa baha nahaihanakia,
haeamona ekia babai namokia aꞌi nahaihanakia haukia abomo aba katewaira tina.